𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐥𑑂𑐬𑐵. 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐀𑐣𑑂𑐟𑑂𑐫𑐾𑐲𑑂𑐚𑐶

𑐫𑐾𑑃 – 𑐰𑐵𑐩 𑐧𑐸𑐡𑑂𑐢𑐶𑐖𑐷𑐰𑐷, 𑐰𑐬𑐶𑐲𑑂𑐛 𑐳𑐩𑐵𑐮𑑀𑐔𑐎 𑐥𑑂𑐬𑐵𑐢𑑂𑐫𑐵𑐥𑐎 𑐩𑐵𑐞𑐶𑐎𑐮𑐵𑐮 𑐱𑑂𑐬𑐾𑐲𑑂𑐛𑐫𑐵 𑐀𑐣𑑂𑐟𑑂𑐫𑐲𑑂𑐚𑐶 𑐠𑑁𑑄 𑐧𑐶𑐴𑐶𑐰𑐵𑑅 𑐖𑐸𑐮 𑑋 𑐫𑐾𑑃𑐫𑐵 𑐱𑑀𑐨𑐵 𑐨𑐐𑐰𑐟𑐶 𑐎𑐬𑑂𑐞𑐡𑐶𑐥𑐫𑑂 𑐰𑐫𑑂𑐎𑑅𑐫𑐵 𑐳𑐷𑐩𑑂𑐴 𑐰𑐫𑑂𑐎𑑅𑐫𑐵 𑐟𑑅𑐢𑐶𑐎𑐩𑑂𑐴 𑐎𑐵𑐫 𑐩𑐮𑐏𑐮𑐵𑐮 𑐱𑑂𑐬𑐾𑐲𑑂𑐛𑑄 𑐩𑐶 𑐟𑐫𑐵𑐡𑐷𑐐𑐸 𑐏𑑅 𑑋 𑐩𑐶 𑐟𑐫𑐾 𑐣𑑂𑐴𑑂𑐫𑑅 𑐰𑐫𑑂𑐎𑑅𑐫𑐵 𑐳𑐷𑐩𑑂𑐴𑐫𑑂 𑐱𑐶𑐎𑑂𑐲𑐵 𑐩𑐣𑑂𑐟𑑂𑐬𑐷 𑐎𑐺𑐲𑑂𑐞𑐐𑑀𑐥𑐵𑐮 𑐱𑑂𑐬𑐾𑐲𑑂𑐛 𑐰 𑐥𑐸𑐮𑐵𑑄𑐩𑑂𑐴 𑐳𑐨𑐵𑐩𑐸𑐏 𑐳𑐸𑐰𑐵𑐳 𑐣𑐾𑐩𑑂𑐰𑐵𑐒𑑄 𑐣𑐾𑐥𑐵𑑅𑐫𑐵 𑐢𑑂𑐰𑐵𑑃𑐫𑑂 𑐦𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐵. 𑐱𑑂𑐬𑐾𑐲𑑂𑐛𑐫𑐵 𑐀𑐣𑑂𑐟𑐶𑐩 𑐱𑑂𑐬𑐡𑑂𑐢𑐵𑐘𑑂𑐖𑐮𑐷 𑐡𑐾𑐕𑐵𑐫𑐾𑐟 𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑑅𑐫𑐵 𑐣𑑂𑐴𑑂𑐫𑐮𑐸𑐰𑐵𑑅𑐥𑐶𑑄 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑐥𑐶𑑄 𑐮𑐶𑐳𑐾𑑄 𑐫𑐎𑑂𑐰 𑐴𑐾 𑐣𑐾𑐟𑐵–𑐎𑐵𑐬𑑂𑐫𑐎𑐬𑑂𑐟𑐵 𑐎𑐬𑑂𑐞𑐡𑐶𑐥𑐫𑑂 𑐠𑑂𑐫𑑄𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐳𑐷𑐩𑑂𑐴 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐢𑑂𑐰𑐵𑑃𑐫𑑂 𑐣𑑄 𑐦𑐵𑐫𑐾𑐎𑐹𑐐𑐸 𑐏𑑅 𑑋 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐣𑐬𑐾𑐱 𑐟𑐵𑐩𑑂𑐬𑐵𑐎𑐵𑐬 𑐰 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐡𑐧𑐹𑐫𑐵 𑐢𑑂𑐰𑐵𑑃𑐫𑑂 𑐦𑐵𑐫𑐾𑐎𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐥𑑂𑐬𑐵. 𑐱𑑂𑐬𑐾𑐲𑑂𑐛𑐫𑐵𑐟 𑐱𑑂𑐬𑐡𑑂𑐢𑐵𑐘𑑂𑐖𑐮𑐷 𑐡𑐾𑐕𑐵𑐫𑐾𑐐𑐸 𑐣𑐶𑑄𑐟𑐶𑑄 𑐥𑐸𑐮𑐵𑑄𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑐶𑐳𑐾𑑄 𑐖𑐣𑐟𑐵 𑐳𑐩𑐵𑐖𑐰𑐵𑐡𑐷 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃, 𑐣𑐾𑐎𑐥𑐵 𑐩𑐵𑐌𑐰𑐵𑐡𑐷 𑐎𑐾𑐣𑑂𑐡𑑂𑐬𑐫𑐵 𑐣𑐾𑐟𑐵 𑐣𑐵𑐬𑐵𑐫𑐞𑐎𑐵𑐖𑐷 𑐱𑑂𑐬𑐾𑐲𑑂𑐛𑐥𑐶𑑄 𑐣𑑄 𑐠𑑂𑐫𑑄𑐐𑐸 𑐏𑑅 𑑋

𑐥𑑂𑐬𑐵. 𑐱𑑂𑐬𑐾𑐲𑑂𑐛𑐫𑐵 𑐀𑐣𑑂𑐟𑑂𑐫𑐾𑐲𑑂𑐚𑐶 𑐣𑑂𑐴𑑂𑐫𑑅 𑐰𑐫𑑂𑐎𑑅𑐫𑐵 𑐳𑐷𑐩𑑂𑐴 𑐧𑐶𑐴𑐶𑐰𑐵𑑅 𑐴𑐾 𑐳𑐸𑐠𑐫𑑂 𑑑𑑑 𑐧𑐖𑐾 𑐣𑐶𑐳𑐾𑑄 𑐠𑑃𑐴𑐶𑐟𑐶𑐂 𑐔𑑂𑐰𑑄𑐐𑐸 𑐰𑐫𑑂𑐎𑑅𑐫𑐵 𑐥𑐸𑐮𑐵𑑄𑐐𑐸 𑐕𑐾𑑃𑐫𑑂 𑐀𑐣𑑂𑐟𑐶𑐩 𑐡𑐬𑑂𑐱𑐣𑐫𑐵 𑐣𑐶𑑄𑐟𑐶𑑄 𑐟𑑅𑐐𑐸 𑐏𑑅 𑑋 𑐠𑑃𑐴𑐶𑐟𑐶𑐂 𑐔𑑂𑐰𑑄𑐐𑐸 𑐥𑐸𑐮𑐵𑑄𑐐𑐸 𑐕𑐾𑑃𑐣𑑄 𑐐𑐵𑐜𑐷 𑐟𑐫𑐵𑑅 𑐮𑐸𑐟𑐶𑐂 𑐫𑑄𑐎𑐹𑐐𑐸 𑐏𑑅𑐳𑐵 𑐮𑐸𑐟𑐶𑑄 𑐴𑐾 𑐳𑐷𑐩𑑂𑐴 𑐄𑐛𑐾 𑐫𑐵𑐣𑐵𑑅 𑐎𑐬𑑂𑐞𑐡𑐶𑐥 𑐟𑐎 𑐳𑐶𑐠𑑄 𑐫𑑄𑐎𑐹𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐳𑐷𑐩𑑂𑐴𑐫𑐵𑐟 𑐰𑐫𑑂𑐎𑑅𑐫𑐵 𑐕𑐫𑑂𑐥𑐶𑑄𑐳𑑄 𑐎𑐸𑐧𑐶𑐄𑐐𑐸 𑐏𑑅 𑑋

𑐥𑑂𑐬𑐵. 𑐱𑑂𑐬𑐾𑐲𑑂𑐛 𑐩𑑄𑐐𑐮𑐰𑐵𑑅 𑐳𑐸𑐠𑐫𑑂 𑐰𑐵𑐳𑑅 𑐫𑐵𑐎𑐸𑐫𑐵𑐎𑐸𑑄 𑐀𑐳𑑂𑐥𑐟𑐵𑐮𑐫𑑂 𑐩𑐡𑐸𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐎𑐵𑐫 𑐖𑐬𑑂𑐩𑐣𑐷𑑄 𑐮𑐶𑐴𑐵𑑄 𑐰𑐫𑐾𑐰𑑄 𑐧𑐶𑐴𑐶𑐰𑐵𑑅 𑐀𑐣𑑂𑐟𑑂𑐫𑐾𑐲𑑂𑐚𑐶 𑐫𑐵𑑅𑐐𑐸 𑐏𑑅 𑑋