Read news in NepalBhasa text-- www.hamroschool.com BACK 𑐣𑐾𑐰𑐵𑑅 𑐥𑐴𑑅𑐫𑐵 𑐕𑐾𑑃 𑐡𑑄𑐥𑐶𑑄𑐟 𑐳𑐩𑑂𑐩𑐵𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐾𑐰𑐵𑑅 𑐥𑐴𑑅𑐫𑐵 𑐕𑐾𑑃 𑐡𑑄𑐥𑐶𑑄𑐟 𑐳𑐩𑑂𑐩𑐵𑐣

𑐎𑐶𑐥𑐹 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐠𑑁𑑄𑐎𑐣𑑂𑐴𑐫𑑂 𑐁𑐢𑐸𑐣𑐶𑐎 𑐰 𑐣𑑂𑐴𑐹 𑐣𑑂𑐴𑐹𑐐𑐸 𑐥𑐴𑑅𑐫𑐵 𑐕𑐾𑑃 𑐡𑐣𑐾𑐐𑐸 𑐥𑑂𑐬𑐔𑐮𑐣 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐥𑐸𑐮𑐵𑑄𑐐𑐸 𑐰 𑐥𑐬𑐩𑑂𑐥𑐬𑐵𑐐𑐟 𑐕𑐾𑑃𑐫𑐵 𑐠𑐵𑐳𑐫𑑂 𑐠𑐸𑐎𑐠𑑄 𑐣𑑂𑐴𑐹𑐐𑐸 𑐰 𑐁𑐢𑐸𑐣𑐶𑐎 𑐕𑐾𑑃 𑐡𑐫𑐾𑐎𑐾𑐐𑐸 𑐴𑑀𑐜𑐧𑐵𑐖𑐷 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐎𑐶𑐥𑐸𑐮𑐶𑐂 𑐢𑐵𑑅𑐳𑐵 𑐥𑐸𑐮𑐵𑑄𑐐𑐸 𑐕𑐾𑑃 𑐡𑐣𑐷𑐥𑐶𑑄 𑐕𑐾𑑃𑐠𑐸𑐰𑐵𑑅𑐫𑐵𑐟 𑐳𑐩𑑂𑐩𑐵𑐣𑐫𑐵 𑐥𑐬𑐩𑑂𑐥𑐬𑐵 𑐣𑑂𑐴𑑂𑐫𑐵𑐎𑐹𑐐𑐸 𑐡𑐸 𑑋

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑖 𑐳𑑂𑐠𑐶𑐟 𑐥𑐵𑑄𑐐𑐵 𑐮𑐵𑐕𑐶𑐂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐄𑐎𑐠𑑄 𑐥𑐸𑐮𑐵𑑄𑐐𑐸 𑐰 𑐥𑐬𑐩𑑂𑐥𑐬𑐵𑐐𑐟 𑐥𑐴𑐮𑑄 𑐕𑐾𑑃 𑐡𑑄𑐥𑐶𑑄 𑐕𑐾𑑃𑐠𑐸𑐰𑐵𑑅𑐫𑐵𑐟 𑐳𑐩𑑂𑐩𑐵𑐣𑐮𑐶𑐳𑐾𑑄 𑐥𑐸𑐬𑐳𑑂𑐎𑐵𑐬 𑐣𑑄 𑐰𑐶𑐟𑐬𑐞 𑐫𑐵𑑅𑐐𑐸 𑐏𑑅 𑑋 𑐰𑑄𑐐𑐸 𑐱𑐣𑐶𑐰𑐵𑑅 𑐠𑐣𑐫𑐵 𑐥𑐵𑑄𑐐𑐵𑐮𑐵𑐕𑐶𑐂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐐𑐟 𑐱𑐿𑐮𑐷𑑄 𑐕𑐾𑑃 𑐡𑐫𑐾𑐎𑐹𑐥𑐶𑑄 𑐕𑐾𑑃𑐠𑐸𑐰𑐵𑑅𑐫𑐵𑐟  𑐳𑐩𑑂𑐩𑐵𑐣𑐮𑐶𑐳𑐾𑑄 𑐥𑐸𑐬𑐳𑑂𑐎𑐵𑐬 𑐰𑐶𑐟𑐬𑐞 𑐫𑐵𑑅𑐐𑐸 𑐏𑑅 𑑋

𑑒𑑐𑑗𑑒 𑐳𑐵𑐮 𑐧𑐿𑐱𑐵𑐏 𑑑𑑒 𑐐𑐟𑐾𑐫𑐵 𑐰𑐶𑐣𑐵𑐱𑐎𑐵𑐬𑐷 𑐟𑑅𑐨𑐸𑐏𑐵𑐔𑑄 𑐎𑑂𑐲𑐟𑐶 𑐖𑐹𑐐𑐸 𑐕𑐾𑑃𑐫𑐵𑐟 𑐳𑑂𑐠𑐵𑐣𑐷𑐫 𑐥𑐵𑑄𑐐𑐵 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬𑐫𑐵 𑐥𑑂𑐬𑐵𑐰𑐶𑐢𑐶𑐎 𑐐𑑂𑐰𑐵𑐴𑐵𑐮𑐶𑑄 𑐮𑑀𑐥 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐥𑐬𑐩𑑂𑐥𑐬𑐵𑐐𑐟 𑐣𑐾𑐰𑐵𑑅 𑐱𑐿𑐮𑐷𑐫𑐵 𑐕𑐾𑑃 𑐡𑐣𑐾𑐟 𑐥𑑂𑐬𑑀𑐟𑑂𑐳𑐵𑐴𑐶𑐟 𑐫𑐵𑑅𑐐𑐸 𑐏𑑅 𑑋 𑐎𑐾𑐣𑑂𑐡𑑂𑐬𑐫𑐵 𑐥𑑂𑐬𑐵𑐰𑐶𑐢𑐶𑐎 𑐐𑑂𑐰𑐵𑐴𑐵𑐮𑐶𑑄 𑐕𑐾𑑃 𑐣𑐶𑐬𑑂𑐩𑐵𑐞 𑐫𑐵𑑅𑐥𑐶𑑄𑐟 𑐳𑐩𑑂𑐩𑐵𑐣 𑐰 𑐥𑐸𑐬𑐳𑑂𑐎𑐵𑐬 𑐰𑐶𑐟𑐬𑐞 𑐫𑐵𑑅𑐐𑐸 𑐏𑑅 𑑋 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐥𑐬𑐩𑑂𑐥𑐬𑐵𑐐𑐟 𑐕𑐾𑑃 𑐡𑑄𑐥𑐶𑑄𑐟 𑐳𑐩𑑂𑐩𑐵𑐣 𑐰 𑐥𑐸𑐬𑐳𑑂𑐎𑐵𑐬 𑐰𑐶𑐟𑐬𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐎𑐶𑐥𑐹 𑐣𑐐𑐬𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐐𑐟 𑐕𑐾𑑃𑐫𑐵 𑐠𑑅𑐐𑐸 𑐴𑐾 𑐩𑑁𑐮𑐶𑐎𑐟𑐵 𑐡𑐸𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐥𑐬𑐩𑑂𑐥𑐬𑐵𑐐𑐟 𑐣𑐾𑐰𑐵𑑅 𑐱𑐿𑐮𑐷𑐫𑐵 𑐕𑐾𑑃𑐫𑑂 𑐕𑐾𑑃𑐡𑐶, 𑐩𑐵𑐟𑑄, 𑐔𑑂𑐰𑐟𑑃 𑐰 𑐧𑐿𑐐𑑅 𑐡𑐂𑐐𑐸 𑐰 𑐠𑐸𑐎𑐷 𑐥𑑂𑐬𑐟𑑂𑐫𑐾𑐎 𑐟𑑃 (𑐟𑐮𑑂𑐮𑐵)𑐫𑐵 𑐠𑑅𑐠𑑅𑐐𑐸 𑐴𑐾 𑐩𑐴𑐟𑑂𑐰 𑐡𑐸𑐐𑐸 𑐣𑑄 𑐢𑐫𑐵𑐡𑐶𑐮 𑑋

𑐠𑑁𑑄 𑐀𑐟𑐶 𑐰𑐶𑐎𑐳𑐶𑐟 𑐢𑐫𑐵𑐔𑑂𑐰𑑄𑐐𑐸 𑐀𑐩𑐾𑐬𑐶𑐎𑐵 𑐠𑐾𑑄𑐖𑑂𑐫𑐵𑑅𑐐𑐸 𑐡𑐾𑐱𑐫𑑂 𑐟𑐎𑑄 𑐧𑐵𑑄𑐮𑐵𑐎 𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐩𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐗𑐷 𑐠𑐵𑐫𑑂 𑐠𑑅𑐐𑐸 𑐴𑐾 𑐩𑑁𑐮𑐶𑐎𑐟𑐵𑑄 𑐖𑐵𑑅𑐐𑐸 𑐳𑐩𑑂𑐥𑐡𑐵𑐫𑐵 𑐰𑐶𑐎𑐵𑐳 𑐖𑐸𑐂𑐢𑐸𑑄𑐎𑐹𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐣𑐐𑐬𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐢𑐫𑐵𑐡𑐶𑐮, ‘𑐗𑐷𑐐𑐸 𑐴𑐾 𑐳𑐩𑑂𑐥𑐡𑐵, 𑐢𑐬𑑀𑐴𑐬 𑐳𑑂𑐰𑐫𑐵𑑅 𑐂𑐣𑑂𑐖𑐶𑐣𑐶𑐫𑐬𑐶𑐒 𑐳𑐫𑐾𑐎𑐵𑑅 𑐂𑐩𑐶𑐳𑑄 𑐠𑑅𑐐𑐸 𑐕𑐾𑑃 𑐡𑐫𑐾𑐎𑐮, 𑐟𑐬 𑐠𑑁𑑄 𑐗𑐷𑐐𑐸 𑐡𑐾𑐫𑑂𑐫𑐵 𑐂𑐣𑑂𑐖𑐶𑐣𑐶𑐫𑐬𑐟𑐫𑑂𑐳𑑄 𑐀𑐣𑐫𑐵 𑐂𑐣𑑂𑐖𑐶𑐣𑐶𑐫𑐬𑐶𑐒 𑐳𑐫𑐾𑐎𑐵𑑅 𑐰𑐫𑐵𑐔𑑂𑐰𑐣, 𑐠𑑂𑐰 𑐐𑐖𑑂𑐫𑐵𑑅𑐐𑐸 𑐰𑐶𑐜𑐩𑑂𑐧𑐣𑐵 !’

𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑑂𑐥𑐡𑐵𑐰𑐶𑐡𑑂 𑐬𑐰𑐶𑐣𑑂𑐡𑑂𑐬 𑐥𑐸𑐬𑐷𑑄 𑐣𑐶𑐎𑑂𑐰𑑅𑐐𑐸 𑐰𑐶𑐱𑑂𑐰𑐫𑐸𑐡𑑂𑐢𑐫𑐵 𑐂𑐮𑐫𑑂𑐟𑐎 𑐗𑐷𑐐𑐸 𑐳𑑂𑐰𑐣𑐶𑐐𑑅 𑐰𑐶𑐱𑑂𑐰𑐫𑐵 𑐴𑐾 𑐣𑐶𑐐𑐹𑐐𑐸 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐳𑐩𑑂𑐥𑐡𑐵 𑐎𑑂𑐲𑐾𑐟𑑂𑐬 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐐𑐸𑐮𑐶𑐂 𑐮𑐶𑐥𑐵𑑄𑐐𑐸 𑑕𑑐-𑑖𑑐𑐫𑐵 𑐠𑐸𑐏𑐾 𑑙𑑕 𑐥𑑂𑐬𑐟𑐶𑐱𑐟 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐀𑐖𑑂𑐫𑐵𑑅𑐐𑐸 𑐳𑐩𑑂𑐥𑐡𑐵𑐟 𑐮𑑀𑐥 𑐖𑐸𑐫𑐵 𑐰𑐣𑐾𑐢𑐸𑑄𑐎𑐹𑐐𑐸 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐁𑑅 𑐮𑑂𑐫𑑄 𑐡𑐸𑐐𑐸 𑐳𑐎𑐟𑐵𑑄𑐎𑐠𑑄𑐫𑐵 𑐳𑐩𑑂𑐥𑐡𑐵𑐫𑐵𑐟 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰 𑐰𑐶𑐎𑐵𑐳 𑐎𑐾𑐣𑑂𑐡𑑂𑐬𑐫𑐵𑐟 𑐳𑐸𑐨𑐵𑐫𑑂 𑐣𑑄 𑐡𑐾𑐕𑐵𑐣𑐵𑐡𑐶𑐮 𑑋

𑐥𑐵𑑄𑐐𑐵 𑐰𑐶𑐎𑐵𑐳 𑐳𑐬𑑀𑐎𑐵𑐬 𑐎𑐾𑐣𑑂𑐡𑑂𑐬𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐱𑐵𑐣𑑂𑐟 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑐬𑑂𑐫𑐚𑐣 𑐰𑑂𑐫𑐰𑐳𑐵𑐫𑐷 𑐱𑐾𑐏𑐬 𑐳𑐶𑑄𑐴 𑐜𑑄𑐐𑑀𑐮𑑄 𑐥𑐬𑐩𑑂𑐥𑐬𑐵𑐐𑐟 𑐣𑐾𑐰𑐵𑑅 𑐱𑐿𑐮𑐷𑐫𑐵 𑐕𑐾𑑃 𑐳𑐩𑑂𑐧𑐣𑑂𑐢𑐷 𑐠𑑅𑐐𑐸 𑐥𑑂𑐬𑐟𑐶𑐰𑐾𑐡𑐣 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐮𑐵𑑄𑐩𑑂𑐴 𑐬𑐵𑐖𑑂𑐫𑐩𑐣𑑂𑐟𑑂𑐬𑐷 𑐡𑐶𑐮𑐶𑐥 𑐩𑐴𑐬𑑂𑐖𑐣, 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑒𑐫𑐵 𑐀𑐢𑑂𑐫𑐎𑑂𑐲 𑐬𑐩𑐾𑐱𑐩𑐵𑐣 𑐜𑑄𑐐𑑀𑐮𑐫𑐵 𑐣𑑄 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐣𑐾𑐰𑐵𑑅 𑐱𑐿𑐮𑐷𑐫𑐵 𑐕𑐾𑑃 𑐣𑐶𑐬𑑂𑐩𑐵𑐞𑐫𑐵𑐟 𑐐𑑂𑐮𑑀𑐧𑐮 𑐬𑐣𑐬𑑂𑐳 𑐳𑑂𑐰𑐷𑐜𑐾𑐣𑐫𑐵 𑐐𑑂𑐰𑐵𑐴𑐵𑐮𑐶𑑄 𑐳𑑂𑐰𑑄𑐐𑐹 𑐰𑐬𑑂𑐐 𑐰𑐶𑐨𑐵𑐖𑐣 𑐫𑐵𑐣𑐵𑐟𑑅𑐐𑐸 𑐏𑑅𑐳𑐵 𑐣𑑂𑐴𑐵𑐥𑐵𑑄𑐐𑐸 𑐰𑐬𑑂𑐐𑐫𑑂 𑐮𑐵𑑅𑐥𑐶𑑄 𑐗𑐶𑑄𑐳𑑂𑐰𑐩𑑂𑐴𑐾𑐳𑐶𑐟 𑐏𑑂𑐰𑐷𑐡𑑂𑐰𑑅𑐟𑐎𑐵, 𑐣𑐶𑐐𑐹𑐐𑐸 𑐰𑐬𑑂𑐐𑐫𑑂 𑐮𑐵𑐫𑐾𑐟 𑐳𑐦𑐮 𑐖𑐹𑐥𑐶𑑄 𑐏𑐸𑐩𑑂𑐴𑐾𑐳𑐶𑐟 𑐔𑑂𑐫𑐵𑐡𑑂𑐰𑑅𑐟𑐎𑐵 𑐰 𑐳𑑂𑐰𑑄𑐐𑐹𑐐𑐸 𑐰𑐬𑑂𑐐𑐫𑑂 𑐮𑐵𑐫𑐾𑐟 𑐟𑐵𑑅𑐮𑐵𑑅𑐥𑐶𑑄𑐟 𑐥𑑂𑐬𑐱𑑄𑐳𑐵 𑐥𑐟𑑂𑐬 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS