𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑐰𑐺𑐟𑑂𑐟𑐔𑐶𑐟𑑂𑐬𑐫𑐵 𑐣𑑂𑐴𑐵𑐥𑐵𑑄𑐐𑐸 𑐎𑑂𑐫𑐣𑐾𑐖𑑂𑐫𑐵
𑐫𑐾𑑃- 𑐰𑐵𑐒𑑂𑐐𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑑑𑑕 𑐑𑑁 𑐟𑐵𑑅𑐴𑐵𑐎𑑅𑐐𑐸 𑐀𑐣𑑂𑐟𑐬𑑂𑐰𑐵𑐟𑐵 𑐡𑐸𑐐𑐸 𑐨𑐶𑐖𑐸𑐰𑐮 𑐁𑐬𑑂𑐎𑐵𑐂𑐨 𑐰 𑐰𑐺𑐟𑑂𑐟𑐔𑐶𑐟𑑂𑐬 ‘𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐂𑐟𑐶𑐴𑐵𑐳 𑐰𑐵𑐒𑑂𑐐𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐜𑐵. 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷’ 𑐫𑐵 𑐣𑑂𑐴𑐵𑐥𑐵𑑄𑐐𑐸 𑐎𑑂𑐫𑐣𑐾𑐖𑑂𑐫𑐵 𑐩𑑄𑐐𑐮𑐰𑐵𑑅 𑐖𑐸𑐮 𑑋 𑐠𑑂𑐫𑑄𑐩𑐠𑑂𑐫𑑄 𑐳𑑂𑐰𑐡𑑃 𑐣𑑂𑐴𑑂𑐫𑑅 𑐣𑐶𑐬𑑂𑐩𑐵𑐞 𑐖𑑂𑐫𑐵 𑐣𑑂𑐴𑑂𑐫𑐵𑑅𑐐𑐸 𑐠𑑂𑐰 𑐰𑐺𑐟𑑂𑐟𑐔𑐶𑐟𑑂𑐬 𑐰𑐵𑐒𑑂𑐐𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐖𑑀𑐱𑐷𑐫𑐵𑐮𑐶𑐳𑐾𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐶𑐧𑐵𑐧𑐸 𑐩𑐴𑐬𑑂𑐖𑐣, 𑐡𑐵𑐟𑐵𑐥𑐶𑑄 𑐰 𑐩𑐾𑐩𑐾𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶𑐂 𑐳𑐵𑐟𑑀𑐁𑐎𑐷 𑐨𑐰𑐣𑐫𑑂 𑐣𑑂𑐴𑐵𑐥𑐵𑑄𑐐𑐸 𑐎𑑂𑐫𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋
𑐳𑐕𑐶𑐡𑑃 𑐥𑐸𑐰𑐣𑐾𑐢𑐸𑑄𑐎𑐹𑐩𑑂𑐴 𑐧𑐴𑐸𑐁𑐫𑐵𑐩𑐶𑐎 𑐰𑑂𑐫𑐎𑑂𑐟𑐶𑐟𑑂𑐰 𑐰𑐶𑐱𑐾𑐲 𑐥𑐵𑐴𑐵𑑃 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐠𑑅𑐐𑐸 𑐴𑐾 𑐧𑐵𑐬𑐾 𑐡𑐫𑐾𑐎𑐵𑐟𑑅𑐐𑐸 𑐰𑐺𑐟𑑂𑐟𑐔𑐶𑐟𑑂𑐬 𑐳𑑂𑐰𑐫𑐾𑐢𑐸𑑄𑐎𑐵𑑅 𑐠𑐸𑐎𑐶𑐫𑐵𑐟 𑐕𑐩𑑂𑐴 𑐰𑑂𑐫𑐎𑑂𑐟𑐶𑐫𑐵 𑐧𑐵𑐬𑐾 𑐖𑐎 𑐩𑐢𑐵𑐳𑐾 𑐳𑐩𑐳𑑂𑐟 𑐣𑐾𑐰𑐵𑑅, 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶 𑐰 𑐣𑐾𑐥𑐵𑐮𑐫𑐵 𑐴𑐾 𑐔𑐶𑐟𑑂𑐬𑐫𑐵 𑐬𑐸𑐥𑐫𑑂 𑐎𑐫𑐵𑐡𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋
𑐩𑐹𑐥𑐵𑐴𑐵𑑃 𑐎𑐠𑑄 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐫𑐬 𑐔𑐶𑐬𑐷𑐧𑐵𑐧𑐸 𑐩𑐴𑐬𑑂𑐖𑐣𑑄 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑐳𑐕𑐶𑐡𑑃 𑐧𑐸𑐡𑐶𑑄 𑐴𑐣𑐾𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐟𑑅𑐐𑐸 𑐩𑐕𑐶 𑐖𑑂𑐫𑐵 𑐖𑐹𑐐𑐸 𑐩𑐢𑑂𑐫𑐾 𑐠𑐸𑐐𑐸 𑐖𑑂𑐫𑐵 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐖𑑂𑐫𑐵 𑐏𑑅 𑐢𑐫𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐠𑐸𑐐𑐸 𑐖𑑂𑐫𑐵 𑐟𑐵𑑅𑐮𑐵𑐎𑐾𑐟 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑑄 𑐡𑐵𑐟𑐵𑐥𑐶𑑄 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬, 𑐩𑑀𑐟𑐶𑐮𑐵𑐮 𑐱𑐶𑐮𑑂𑐥𑐎𑐵𑐬, 𑐫𑐖𑑂𑐘𑐬𑐟𑑂𑐣 𑐢𑐵𑐏𑑂𑐰𑐵𑑅, 𑐎𑐿𑐮𑐵𑐱𑐨𑐎𑑂𑐟 𑐥𑑂𑐬𑐢𑐵𑐣𑐵𑐒𑑂𑐐, 𑐜𑐵. 𑐳𑐸𑐩𑐶𑐟𑑂𑐬𑐵 𑐩𑐵𑐣𑐣𑑂𑐢𑐬, 𑐣𑐾𑐰𑐵𑑅 𑐡𑐾𑐫 𑐡𑐧𑐹 𑐰 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵𑐟 𑐴𑐣𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐮 𑑋
𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐰𑐺𑐟𑑂𑐟𑐔𑐶𑐟𑑂𑐬 𑐣𑐶𑐬𑑂𑐩𑐵𑐞 𑐥𑐸𑐔𑑅𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐡𑐫𑐾𑐎𑐹𑐐𑐸 𑐄𑐐𑐸 𑐜𑐎𑐸𑐩𑐾𑐣𑑂𑐚𑑂𑐬𑐷 𑐎𑑂𑐫𑐣𑐾𑐐𑐸 𑐖𑑂𑐫𑐵𑐗𑑂𑐰𑑅 𑐰𑐺𑐟𑑂𑐟𑐔𑐶𑐟𑑂𑐬 𑐣𑐶𑐬𑑂𑐩𑐵𑐞 𑐥𑐸𑐔𑑅𑐫𑐵 𑐣𑐵𑐫𑑅 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐏𑑅 𑐣𑑂𑐰𑐎𑐹 𑐱𑐵𑐎𑑂𑐫 𑐳𑐸𑐬𑐾𑐣𑑄 𑐄𑐐𑐸 𑐖𑑂𑐫𑐵𑐫𑐵 𑐥𑐺𑐲𑑂𑐛𑐨𑐹𑐩𑐶 𑐎𑐣𑐵𑐡𑐶𑐮 𑑋 𑐀𑐠𑐾𑐴𑐾 𑐡𑐵𑑄𑐨𑐬𑐶𑑄 𑐳𑐸𑐣𑐶𑐟𑐵 𑐬𑐵𑐖𑐨𑐞𑑂𑐜𑐵𑐬𑐷𑑄 𑐮𑑂𑐫𑐵𑑅𑐔𑐵𑑅 𑐎𑑃𑐳𑐾𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐶𑐮 𑑋
LEAVE YOUR COMMENTS