𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐥𑐬𑐶𑐟𑑂𑐬𑐵𑐞, (𑐨𑐫𑐟𑐵𑐬𑐎, 𑐎𑐸𑐱𑐮𑐎𑐵𑐬𑐎 𑐄𑐥𑐵𑐫)

𑐳𑐦𑐹𑐫𑐵 𑐳𑐩𑐶𑐎𑑂𑐲𑐵

𑐟𑑂𑐬𑐶𑐬𑐟𑑂𑐣 𑐩𑐵𑐣𑐣𑑂𑐢𑐬 ‘𑐥𑐬𑐶𑐫𑐟𑑂𑐟𑐶 𑐳𑐡𑑂𑐢𑐩𑑂𑐩 𑐎𑑀𑐰𑐶𑐡’

𑐕𑐔𑐵𑐏𑐾𑐬𑑄 𑐰𑐫𑐾𑐦𑐸𑐐𑐸 𑐰𑐶𑐨𑐶𑐣𑑂𑐣 𑐥𑑂𑐬𑐎𑐵𑐬𑐫𑐵 𑐨𑐫, 𑐰𑐶𑐑𑑂𑐣, 𑐧𑐵𑐢𑐵 𑐁𑐡𑐶 𑐩𑐡𑐫𑐾𑐎𑐾𑐫𑐵 𑐮𑐵𑐐𑐶𑑄 𑐧𑑁𑐡𑑂𑐢 𑐥𑐬𑐩𑑂𑐥𑐬𑐵𑐫𑑂 𑐥𑐵𑐛 𑐫𑐵𑐂𑐐𑐸 𑐳𑐹𑐟𑑂𑐬𑐫𑐵𑐟 𑐥𑐬𑐶𑐟𑑂𑐬𑐵𑐞 𑐢𑐵𑐂 𑑋 𑐥𑐬𑐶𑐟𑑂𑐬𑐵𑐞𑐫𑐵 𑐣𑑂𑐴𑐵𑐥𑐵𑑄𑐐𑐸 𑐳𑐦𑐹𑐮𑐶𑐂 𑐨𑐹𑐩𑐶𑐎𑐵 𑐔𑑂𑐰𑐫𑐵𑐧𑐶𑐖𑑂𑐫𑐵𑑅𑐩𑑂𑐴 𑐨𑐶𑐎𑑂𑐲𑐸 𑐳𑐸𑐡𑐬𑑂𑐱𑐣 𑐩𑐴𑐵𑐳𑑂𑐠𑐰𑐶𑐬𑐥𑐵𑐏𑐾𑑄 𑐕𑐔𑐵𑑅𑐏𑐾𑐬 𑐰𑐂𑐐𑐸 𑐨𑐫 𑐀𑐣𑑂𑐟𑐬𑐵𑐫𑐫𑐵𑐟 𑐩𑐡𑐫𑐾𑐎𑐵 𑐧𑐷𑐐𑐸 𑐎𑐠𑑄 𑐠𑐸𑐎𑐶𑐫𑐵𑐟 𑐥𑐬𑐶𑐨𑐵𑐲𑐶𑐟 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮𑐫𑑂 𑐠𑐾𑐬𑐰𑐵𑐡 𑐥𑐸𑐣𑐬𑑂𑐖𑐵𑐐𑐬𑐞 𑐮𑐶𑐥𑐵 𑐡𑐎𑐳𑐶𑐧𑐾 𑐣𑑂𑐴𑐵𑐥𑐵𑑄 𑐥𑐶𑐴𑐵𑑄𑐰𑑅𑐐𑐸 𑐳𑐦𑐹𑐟 𑐩𑐢𑑂𑐫𑐾 ‘𑐥𑐬𑐶𑐟𑑂𑐬𑐵𑐞’ 𑐳𑐦𑐹 𑐣𑑄 𑐏𑑅 𑑋 𑐣𑐾.𑐳𑑄 𑑑𑑐𑑖𑑐 𑐂 𑐣𑐾𑐥𑐵𑑅𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐳𑑄𑐑𑐣𑐵𑐫𑐎 𑐨𑐶𑐎𑑂𑐲𑐸 𑐥𑑂𑐬𑐖𑑂𑐘𑐵𑐣𑐣𑑂𑐡 𑐩𑐴𑐵𑐳𑑂𑐠𑐰𑐶𑐬 𑐥𑐵𑐏𑐾𑑄 𑐡𑐎𑐳𑐶𑐧𑐾 𑐣𑑂𑐴𑐵𑐥𑐵𑑄 𑐥𑐬𑐶𑐟𑑂𑐬𑐵𑐞 𑐣𑐵𑐩𑑄 𑐥𑐶𑐴𑐵𑑄𑐰𑑅𑐐𑐸 𑐳𑐦𑐹 𑐴𑐾 𑐡𑐎𑐮𑐾 𑐣𑑂𑐴𑐵𑐥𑐵𑑄𑐐𑐸 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐏𑑅 𑑋 𑐠𑐸𑐎𑐷 𑐥𑐬𑐶𑐟𑑂𑐬𑐵𑐞𑐫𑐵 𑐳𑐹𑐟𑑂𑐬𑐟 𑐥𑐵𑐮𑐶𑐨𑐵𑐲𑑄 𑐖𑐎 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐠𑐸𑐐𑐸 𑐳𑐦𑐹𑐫𑐵 𑐗𑐶𑑄𑐣𑐶𑐐𑐸𑐮𑐶𑑄 𑐩𑐫𑐵𑐎 𑐳𑑄𑐳𑑂𑐎𑐬𑐞 𑐥𑐶𑐴𑐵𑑄 𑐰𑐫𑐾𑐢𑐸𑐎𑐹𑐐𑐸 𑐡𑐸 𑑋 𑐠𑐸𑐎𑐶𑑄 𑐥𑐬𑐶𑐟𑑂𑐬𑐵𑐞 𑐳𑐦𑐹𑐫𑐵 𑐮𑑀𑐎𑐥𑑂𑐬𑐶𑐫𑐟𑐵 𑐐𑐸𑐮𑐶 𑐡𑐸 𑐢𑐎𑐵 𑐎𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐥𑐵𑑅𑐫𑐵 𑐥𑑂𑐫𑐩𑑂𑐴𑐩𑑂𑐴 𑐳𑑄𑐑𑐣𑐵𑐫𑐎 𑐨𑐶𑐎𑑂𑐲𑐸 𑐧𑐸𑐡𑑂𑐢𑐑𑑀𑐲 𑐩𑐴𑐵𑐳𑑂𑐠𑐰𑐶𑐬 𑐥𑐵𑐏𑐾𑑄 𑑑𑑑𑑐𑑓 𑐥𑐵𑐏𑐾 𑐥𑐬𑐶𑐟𑑂𑐬𑐵𑐞𑐫𑐵 𑐩𑐾𑐐𑐸 𑐳𑐦𑐹 𑐥𑐶𑐴𑐵𑑄𑐰𑑅𑐐𑐸 𑐏𑑅 𑑋 𑐥𑐵𑐮𑐶 𑐨𑐵𑐲𑐵𑐫𑐵 𑐣𑐵𑐥𑑄 𑐣𑐾𑐥𑐵𑐮𑐨𑐵𑐳𑑄 𑐀𑐣𑐸𑐰𑐵𑐡 𑐖𑐸𑐫𑐵𑑅 𑐥𑐶𑐴𑐵𑑄𑐰𑑅𑐐𑐸 𑐎𑐵𑐬𑐞𑑄 𑐥𑐬𑐶𑐟𑑂𑐬𑐵𑐞 𑐩𑐵𑐟𑑂𑐬 𑐥𑐵𑐛 𑐫𑐵𑐫𑐾𑐐𑐸 𑐰𑐶𑐲𑐫 𑐖𑐎 𑐩𑐏𑐸𑐳 𑐠𑐸𑐎𑐷 𑐧𑐸𑐡𑑂𑐢𑐫𑐵 𑐖𑐷𑐰𑐣𑑀𑐥𑐫𑑀𑐐𑐶 𑐱𑐶𑐎𑑂𑐲𑐵 𑐀𑐣𑐬𑑂𑐣𑐶𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐰 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾𑐩𑐵𑑅𑐐𑐸 𑐢𑐫𑐵𑐐𑐸 𑐳𑐣𑑂𑐡𑐾𑐱 𑐠𑐸𑐐𑐸 𑐳𑐦𑐸𑐮𑐶𑐂 𑐀𑐣𑑂𑐟𑐬𑑂𑐣𑐶𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐫𑑂 𑐥𑐬𑐶𑐟𑑂𑐬𑐵𑐞 𑐳𑐦𑐹𑐫𑐵 𑐥𑑂𑐬𑐔𑐵𑐬 𑐣𑐵𑐥𑐣𑐵𑐥𑑄 𑐠𑐷𑐠𑐷 𑐖𑑂𑐫𑐵𑐏𑑃𑐫𑑂 𑐥𑐬𑐶𑐟𑑂𑐬𑐵𑐞 𑐫𑐵𑐫𑐾𑐐𑐸 𑐰 𑐩𑐴𑐵𑐥𑐬𑐶𑐟𑑂𑐬𑐵𑐞 𑐄𑐟𑑂𑐳𑐰 𑐣𑑂𑐫𑐵𑐫𑐾𑐎𑐾𑐐𑐸 𑐔𑐮𑐣 𑐮𑑀𑐎𑐥𑑂𑐬𑐶𑐫 𑐖𑐸𑐫𑐵𑐔𑑂𑐰𑑄𑐐𑐸 𑐳𑐎𑐳𑑂𑐫𑐵𑑄 𑐳𑑂𑐫𑐹𑐐𑐸 𑐏𑑅 𑑋 𑐠𑐾𑐬𑐰𑐵𑐡 𑐥𑐸𑐣𑐬𑑂𑐖𑐵𑐐𑐬𑐞𑑄 𑐡𑐎𑐳𑐶𑐧𑐾 𑐣𑑂𑐴𑐵𑐥𑐵𑑄 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐧𑐸𑐡𑑂𑐢𑐥𑐹𑐖𑐵 𑐣𑑂𑐫𑐵𑐫𑐾𑐎𑐾𑐐𑐸 𑐔𑐮𑐣 𑐱𑐸𑐬𑐸 𑐖𑐸𑐮 𑑋 𑐰 𑐣𑐵𑐥𑐣𑐵𑐥𑑄 𑐩𑐴𑐵𑐥𑐬𑐶𑐟𑑂𑐬𑐵𑐞 𑐥𑐵𑐛𑐫𑐵 𑐁𑐫𑑀𑐖𑐣𑐵 𑐣𑑄 𑐩𑐴𑑀𑐟𑑂𑐳𑐰 𑐎𑐠𑑄 𑐀𑐴𑑀𑐬𑐵𑐟𑑂𑐬 𑐫𑐵𑐫𑐾𑐐𑐸 𑐔𑐮𑐣 𑐰𑐮 𑑋 𑐳𑐵𑐩𑐵𑐣𑑂𑐫 𑐖𑑂𑐫𑐵𑐗𑑂𑐰𑐮𑐫𑑂 𑐥𑐬𑐶𑐟𑑂𑐬𑐵𑐞 𑐢𑐎𑐵𑑅 𑐔𑐶𑐔𑐶𑐥𑐸𑐐𑐸 𑐳𑐸𑐟𑑂𑐬 𑐥𑐵𑐛 𑐫𑐵𑐫𑐾𑐐𑐸 𑐀𑐮𑐾 𑐰𑐶𑐱𑐾𑐲 𑐄𑐟𑑂𑐳𑐰 𑐎𑐠𑑄 𑐩𑐴𑐵𑐥𑐬𑐶𑐟𑑂𑐬𑐵𑐞 𑐫𑐵𑐫𑐾𑐐𑐸 𑐔𑐮𑐣 𑐣𑑄 𑐰𑐮 𑑋 𑐁𑐥𑐵𑐮𑑄 𑐨𑐶𑐎𑑂𑐲𑐸𑐥𑐶𑑄 𑐀𑐣𑐵𑐐𑐵𑐬𑐶𑐎𑐵𑐥𑐶𑑄 𑐀𑐮𑐾 𑐄𑐥𑐵𑐳𑐎 𑐄𑐥𑐵𑐳𑐶𑐎𑐵𑐥𑐶𑑄 𑐣𑐶𑐩𑐣𑑂𑐟𑑂𑐬𑐞𑐵 𑐫𑐵𑐣𑐵𑑅 𑐩𑐞𑑂𑐜𑐥 𑐐𑑂𑐰𑐫𑐵𑑅 𑐰𑐶𑐢𑐶𑐥𑐹𑐬𑑂𑐰𑐎 𑐥𑐵𑐛 𑐫𑐵𑐫𑐾𑐐𑐸𑐫𑐵𑐟 𑐩𑐴𑐵𑐥𑐬𑐶𑐟𑑂𑐬𑐵𑐞 𑐫𑐵𑐫𑐾𑐐𑐸 𑐢𑐵𑐂 𑑋 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅 𑐣𑑂𑐴𑐵𑐥𑐵 𑐣𑑂𑐴𑐵𑐥𑐵 𑐔𑐔𑑂𑐕𑐶 𑐫𑑄𑐎𑑄 𑐫𑐵𑐫𑐾𑐐𑐸 𑐔𑐮𑐣 𑐏𑑅 𑑋 𑐟𑐬 𑐮𑐶𑐥𑐵 𑐣𑑂𑐴𑐶𑐣𑐫𑑂 𑐣𑑄 𑐫𑐵𑐫𑐾𑐐𑐸 𑐔𑐮𑐣 𑐰𑐮 𑑋

𑐠𑑂𑐰 𑐰𑐵𑐴𑐾𑐎 𑐣𑑂𑐴𑐫𑑂𑐣𑑂𑐴𑐸𑐫𑑄𑐎𑑄 𑐳𑐵𑐥𑑂𑐟𑐵𑐴𑐶𑐎 𑐩𑐴𑐵𑐥𑐬𑐶𑐟𑑂𑐬𑐵𑐞 𑐫𑐵𑐫𑐾𑐐𑐸 𑐔𑐮𑐣 𑐣𑑄 𑐰𑐮 𑑋 𑐔𑐶𑐔𑐶𑐥𑐸𑐐𑐸 𑑑𑑑 𑐳𑐩𑐾𑐟 𑐫𑐵𑐣𑐵𑑅 𑑓𑑐 𑐥𑐹 𑐳𑐸𑐟𑑂𑐬𑐟 𑐥𑐵𑐛 𑐫𑐵𑐫𑐾𑐐𑐸 𑐔𑐮𑐣 𑐩𑐴𑐵𑐥𑐬𑐶𑐟𑑂𑐬𑐵𑐞 𑐖𑑂𑐫𑐵𑐗𑑂𑐰𑐮𑐫𑑂 𑐫𑐵𑐂 𑑋 𑐣𑐾𑐥𑐵𑐮𑐫𑑂 𑐠𑐾𑐬𑐰𑐵𑐡 𑐧𑐸𑐡𑑂𑐢𑐱𑐵𑐳𑐣𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐮𑐶𑐥𑐵 𑐳𑐮𑑄𑐳𑑅 𑐎𑑂𑐰𑐮𑑄 𑐩𑐫𑐵𑐎 𑐩𑐴𑐵𑐥𑐬𑐶𑐟𑑂𑐬𑐵𑐞 𑐥𑐹𑐞𑑂𑐫𑐎𑐵𑐬𑑂𑐫 𑐳𑐩𑑂𑐥𑐵𑐡𑐣 𑐖𑐸𑐂𑐢𑐸𑐎𑐹𑐐𑐸 𑐡𑐸 𑑋 𑐧𑑁𑐡𑑂𑐢𑐳𑐵𑐴𑐶𑐟𑑂𑐫𑐫𑑂 𑐟𑑂𑐬𑐶𑐥𑐶𑐚𑐎 𑐡𑐸𑐣𑐾 𑐀𑐣𑑂𑐟𑐬𑑂𑐣𑐶𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐠𑐸𑐥𑐶𑑄 𑐳𑐸𑐟𑑂𑐬𑐫𑐵 𑐳𑑄𑐐𑑂𑐬𑐴𑐫𑐵𑐟 𑐔𑐟𑐸𑐨𑐵𑐞𑐰𑐵𑐬𑐥𑐵𑐮𑐶 𑐢𑐵𑐂 𑑋

𑐠𑑁𑑄𑐎𑐣𑑂𑐴𑐫𑑂 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐥𑑂𑐬𑐟𑑂𑐫𑐾𑐎 𑐰𑐶𑐴𑐵𑐬 𑐥𑐵𑐏𑐾𑑄 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐴𑐵𑐬𑐫𑑂 𑐖𑐸𑐂𑐐𑐸 𑐣𑑂𑐴𑐶𑐠𑑄𑐫𑐵 𑐧𑐸𑐡𑑂𑐢𑐥𑐹𑐖𑐵 𑐣𑐵𑐥𑑄 𑐥𑐬𑐶𑐟𑑂𑐬𑐵𑐞𑐫𑐵 𑐳𑐹𑐟𑑂𑐬𑐟 𑐡𑐸𑐠𑑂𑐫𑐵𑐎𑐵𑑅 𑐳𑐦𑐹 𑐥𑐶𑐠𑐣𑐾𑐐𑐸 𑐥𑑂𑐬𑐔𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐐𑐸 𑐴𑐶𑐳𑐵𑐧𑑄 𑐢𑐵𑐫𑐾𑐐𑐸 𑐏𑑅𑐳𑐵 𑐳𑑄𑐏𑑂𑐫𑐵𑐫𑐵 𑐴𑐶𑐳𑐵𑐧𑑄 𑐡𑐎𑐳𑐶𑐧𑐾 𑐁𑐥𑐵𑑅 𑐧𑐸𑐡𑑂𑐢𑐢𑐬𑑂𑐩𑐫𑐵 𑐳𑐦𑐹𑐟 𑐥𑐶𑐴𑐵𑑄𑐰𑑅𑐐𑐸 𑐩𑐢𑑂𑐫𑐾 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐡𑐎𑐳𑐶𑐧𑐾 𑐀𑐥𑑂𑐰𑑅 𑐖𑐸𑐂 𑑋 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐠𑐸𑐎𑐠𑑄 𑐳𑐬𑑂𑐰𑐵𑐢𑐶𑐎 𑐳𑑄𑐏𑑂𑐫𑐵𑐫𑑂 𑐥𑐶𑐴𑐵𑑄𑐰𑑅𑐐𑐸 𑐧𑐸𑐡𑑂𑐢𑐢𑐬𑑂𑐩𑐫𑐵 𑐳𑐦𑐹 𑐢𑐵𑑅𑐳𑐵𑑄 𑐥𑐵𑐂𑐩𑐏𑐸 𑑋

𑐥𑐬𑐶𑐟𑑂𑐬𑐵𑐞 𑐳𑐦𑐹 𑐥𑐶𑐠𑐣𑐾𑐐𑐸 𑐗𑑂𑐰𑐮𑐫𑑂 𑐥𑐬𑐶𑐟𑑂𑐬𑐵𑐞 (𑐨𑐫𑐟𑐵𑐬𑐎, 𑐎𑐸𑐱𑐮𑐎𑐵𑐬𑐎 𑐄𑐥𑐵𑐫 ) 𑐫𑐵 𑐣𑐵𑐩𑑄 𑐧𑑁𑐡𑑂𑐢 𑐰𑐶𑐡𑑂𑐰𑐵𑐣 𑐩𑐡𑐣𑐬𑐟𑑂𑐣 𑐩𑐵𑐣𑐣𑑂𑐢𑐬𑑄 𑐥𑐬𑐶𑐟𑑂𑐬𑐵𑐞𑐫𑐵 𑐳𑐦𑐹 𑐣𑐎𑐟𑐶𑐣𑐶 𑐴𑐾 𑐥𑐶𑐡𑑄𑐐𑐸 𑐡𑐸 𑑋 𑐧𑐸𑐡𑑂𑐢𑐢𑐬𑑂𑐩𑐫𑐵 𑐎𑑂𑐲𑐾𑐟𑑂𑐬𑐫𑑂 𑐡𑐬𑑂𑐖𑐣𑑄 𑐩𑐫𑐵𑐎 𑐳𑐦𑐹𑐫𑐵 𑐔𑑂𑐰𑐩𑐶 𑐩𑐡𑐣𑐬𑐟𑑂𑐣 𑐩𑐵𑐣𑐣𑑂𑐢𑐬 𑐥𑐵𑐏𑐾𑑄 𑐳𑐩𑑂𑐥𑐵𑐡𑐣 𑐰 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐥𑐶𑐡𑑄𑐐𑐸 𑐠𑐸𑐐𑐸 𑐳𑐦𑐹, 𑐩𑐾𑐩𑐾𑐐𑐸 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐳𑐶𑐧𑐾𑑄 𑐧𑐶𑐳𑑂𑐎 𑐎𑐠𑑄 𑐥𑑂𑐬𑐳𑑂𑐟𑐸𑐟 𑐖𑐹𑐐𑐸 𑐡𑐸 𑑋 𑐠𑐸𑐐𑐸 𑐳𑐦𑐹𑐫𑐵 𑐰𑐶𑐱𑐾𑐲𑐟𑐵 𑐢𑐫𑐵𑐐𑐸 𑐠𑐸𑐎𑐷 𑐥𑐵𑐮𑐶 𑐨𑐵𑐲𑐵𑐫𑐵 𑐥𑐬𑐶𑐟𑑂𑐬𑐵𑐞 𑐳𑐹𑐟𑑂𑐬𑐟 𑐣𑐾𑐥𑐵𑐮𑐨𑐵𑐲𑐵, 𑐏𑐳 𑐣𑐾𑐥𑐵𑐮𑐷 𑐰 𑐀𑑄𑐐𑑂𑐬𑐖𑐷 𑐨𑐵𑐳𑑄 𑐀𑐣𑐸𑐰𑐵𑐡 𑐫𑐵𑐣𑐵𑑅 𑐩𑐸𑐎𑑂𑐎𑑄 𑐥𑑂𑐫𑑄𑐐𑐹 𑐨𑐵𑐳𑑄 𑐠𑐸𑐐𑐸 𑐳𑐦𑐹 𑐟𑐫𑐵𑐬 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐀𑐗 𑐠𑐸𑐎𑐷 𑐥𑐬𑐶𑐟𑑂𑐬𑐵𑐞 𑐥𑐵𑐮𑐶𑐫𑐵𑐟 𑐬𑑀𑐩𑐣 𑐮𑐶𑐥𑐶𑑄 𑐣𑑄 𑐥𑑂𑐬𑐳𑑂𑐟𑐸𑐟 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐩𑐡𑐣 𑐬𑐟𑑂𑐣 𑐩𑐵𑐣𑐣𑑂𑐢𑐬 𑐧𑐸𑐡𑑂𑐢𑐢𑐬𑑂𑐩𑐫𑐵 𑐏𑑂𑐫𑐮𑐫𑑂 𑐥𑐬𑐶𑐔𑐶𑐟 𑐣𑐵𑑄 𑐏𑑅 𑑋 𑐕𑐐𑐹 𑐡𑐬𑑂𑐖𑐣𑑄 𑐩𑐫𑐵𑐎 𑐧𑐸𑐡𑑂𑐢𑐢𑐬𑑂𑐩𑐫𑐵 𑐳𑐦𑐹 𑐥𑐶𑐠𑐣𑐾 𑐢𑐸𑑄𑐎𑐹𑐩𑑂𑐴 𑐰𑐫𑑂𑐎𑑅 𑐨𑐹𑐐𑐬𑑂𑐨 𑐱𑐵𑐳𑑂𑐟𑑂𑐬𑐫𑐵 𑐥𑑂𑐬𑐵𑐢𑑂𑐫𑐵𑐥𑐎 𑐏𑑅 𑑋 𑐨𑐹𑐐𑐬𑑂𑐨𑐱𑐵𑐳𑑂𑐟𑑂𑐬𑐷 𑐣𑐵𑐥𑑄 𑐕𑐩𑑂𑐴 𑐎𑐹𑐱𑐮 𑐰𑑂𑐫𑐰𑐳𑐵𑐫𑐷 𑐀𑐮𑐾 𑐧𑐸𑐡𑑂𑐢𑐢𑐬𑑂𑐩𑐫𑐵 𑐰𑐶𑐱𑐾𑐲 𑐖𑑂𑐘𑐵𑐟𑐵 𑐎𑐠𑑄 𑐰𑐫𑑂𑐎𑑅𑐫𑐵 𑐩𑑂𑐴𑐳𑐷𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑑂𑐎𑑅 𑐥𑐵𑐏𑐾𑑄 𑐥𑐶𑐡𑑄𑐐𑐸 𑐥𑐬𑐶𑐟𑑂𑐬𑐵𑐞 𑐳𑐦𑐹 𑐗𑐶𑑄𑐣𑐶𑐥𑐸 𑐥𑐬𑐶𑐟𑑂𑐬𑐵𑐞 𑐳𑐹𑐟𑑂𑐬𑐫𑐵 𑐳𑑄𑐐𑑂𑐬𑐴 𑐏𑑅 𑑋 𑐏𑐫𑑂𑐟 𑐮𑐵 𑐳𑐵𑐩𑐵𑐣𑑂𑐫𑐟 𑐥𑐬𑐶𑐟𑑂𑐬𑐵𑐞 𑐢𑐵𑐫𑐾𑐧𑐮𑐫𑑂 𑐗𑐶𑑄𑐕𑐥𑐹 𑐳𑐹𑐟𑑂𑐬𑐫𑐵 𑐳𑑄𑐐𑑂𑐬𑐴𑐎𑐠𑑄 𑐎𑐵𑐫𑐾𑐐𑐸 𑐔𑐮𑐣 𑐡𑐸 𑑋
𑐠𑐸𑐐𑐸 𑐳𑐦𑐸𑐮𑐶𑐂 𑐡𑐸𑐠𑑂𑐫𑐵𑐣𑐵 𑐔𑑂𑐰𑑄𑐐𑐸 𑐳𑐹𑐟𑑂𑐬𑐟 𑐕𑐳𑐶𑐎𑐠𑑄 𑐠𑐸𑐎𑐠𑑄 𑐏𑑅 –

𑐔𑐎𑑂𑐬𑐰𑐵𑐮𑐫𑐵 𑐳𑐩𑑂𑐥𑐹𑐬𑑂𑐞 𑐡𑑂𑐫𑑅𑐥𑐶𑑄𑐟 𑐁𑐴𑑂𑐰𑐵𑐣 𑐫𑐵𑐣𑐵𑑅 𑐰𑐶𑐨𑐶𑐣𑑂𑐣 𑐨𑐫, 𑐬𑑀𑐐, 𑐄𑐥𑐡𑑂𑐬𑐰𑐫𑐵𑐟 𑐣𑐵𑐱 𑐫𑐵𑐫𑐾𑐩𑐵 𑐢𑐎𑐵𑑅 𑐥𑑂𑐬𑐵𑐬𑑂𑐠𑐣𑐵 𑐫𑐵𑐫𑐾𑐐𑐸 𑐁𑐴𑑂𑐰𑐵𑐣 𑐳𑐹𑐟𑑂𑐬 𑐡𑐎𑐳𑐶𑐰𑐾 𑐣𑑂𑐴𑐵𑐥𑐵𑑄 𑐥𑐵𑐛 𑐫𑐵𑐂𑐐𑐸 𑐳𑐹𑐟𑑂𑐬 𑐏𑑅 𑑋 𑐰𑐶𑐨𑐶𑐣𑑂𑐣 𑐥𑑂𑐬𑐎𑐵𑐬𑐫𑐵 𑐡𑐺𑐱𑑂𑐫 𑐳𑑂𑐰𑐫𑐵𑑅, 𑐱𑐧𑑂𑐡 𑐣𑑂𑐫𑐣𑐵𑑅, 𑐮𑑂𑐴𑐵𑐟𑐶𑑄 𑐠𑐶𑐫𑐵𑑅 𑐕𑐸𑐎 𑐰𑐶𑐕𑐸𑐎 𑐖𑐸𑐂 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵 𑐧𑐶𑐖𑑂𑐫𑐵𑐳𑐾𑑄 𑐩𑐹𑐬𑑂𑐏𑐥𑐶𑑄 𑐣𑐵𑐥 𑐳𑑄𑐐𑐟 𑐩𑐫𑐵𑐫𑐾𑐐𑐸 𑐣𑐶𑐳𑐾𑑄 𑐣𑐶𑐬𑑂𑐨𑐫𑐷 𑐖𑐸𑐂𑐐𑐸 𑐟𑐎𑐫𑐵 𑑓𑑘 𑐐𑐹 𑐩𑑄𑐐𑐮𑐎𑐵𑐬𑐎 𑐄𑐥𑐡𑐾𑐱 𑐀𑐣𑑂𑐟𑐬𑑂𑐣𑐶𑐴𑐶𑐟 𑐩𑑄𑐐𑐮 𑐳𑐹𑐟𑑂𑐬 𑐣𑐶𑐥𑐸𑐐𑐸 𑐳𑐸𑐟𑑂𑐬 𑐏𑑅 𑑋

𑐰𑐿𑐱𑐵𑐮𑐷𑐂 𑐬𑑀𑐐, 𑐀𑐩𑐣𑐸𑐲𑑂𑐫, 𑐡𑐸𑐬𑑂𑐨𑐶𑐎𑑂𑐲 𑐰𑐵 𑐀𑐣𑐶𑐎𑐵𑐮 𑐖𑐹𑐧𑐮𑐫𑑂 𑐨𑐐𑐰𑐵𑐣 𑐧𑐸𑐡𑑂𑐢 𑐳𑑂𑐰𑐫𑑄 𑐨𑐶𑐎𑑂𑐲𑐸 𑐁𑐣𑐣𑑂𑐡𑐫𑐵𑐟 𑐰𑐵𑐔𑐣 𑐫𑐵𑐫𑐾𑐐𑐸 𑐄𑐖𑑄 𑐖𑐹𑐎𑐠𑑄 𑐟𑑂𑐬𑐶𑐬𑐟𑑂𑐣𑐫𑐵 𑐐𑐸𑐞𑐫𑐵𑐟 𑐳𑐵𑐎𑑂𑐲𑐷 𑐟𑐫𑐵𑑅 𑐱𑐵𑐣𑑂𑐟𑐶 𑐳𑑂𑐰𑐳𑑂𑐟𑐶𑐫𑐵 𑐎𑐵𑐩𑐣𑐵 𑐀𑐣𑑂𑐟𑐬𑑂𑐣𑐶𑐴𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐬𑐟𑑂𑐣 𑐳𑐹𑐟𑑂𑐬, 𑐰𑐶𑐨𑐶𑐣𑑂𑐣 𑐥𑑂𑐬𑐎𑐵𑐬𑐎𑐵 𑐨𑐶𑑄𑐐𑐸 𑐧𑐵𑑄𑐮𑐵𑑅𑐐𑐸 𑐔𑐬𑐶𑐟𑑂𑐬 𑐀𑐣𑐸𑐳𑐵𑐬 𑐖𑐷𑐰𑐣𑐫𑐵𑐥𑐣 𑐫𑐵𑐫𑐾𑐐𑐸 𑐥𑑂𑐬𑐰𑐺𑐟𑐶 𑐰𑐶𑐎𑐵𑐳 𑐫𑐵𑐫𑐾𑐦𑑅𑐳𑐵 𑐖𑐷𑐰𑐣 𑐫𑐵𑐄𑑃𑐎 𑐩𑑂𑐰𑐵𑐫𑐾𑐦𑐂𑐐𑐸 𑐰 𑐄𑐎𑐶𑑄 𑐫𑐵𑐣𑐵𑑅 𑐩𑐣𑐹𑐲𑑂𑐫 𑐀𑐩𑐣𑐸𑐲𑑂𑐫𑐥𑐶𑑄𑐳𑑄 𑐟𑐎𑑄 𑐕𑐸𑑄 𑐴𑐵𑐣𑐷 𑐣𑑀𑐎𑑂𑐳𑐵𑐣𑐷 𑐫𑐵𑐫𑐾 𑐩𑐦𑐂𑐐𑐸 𑐄𑐥𑐡𑐾𑐱 𑐳𑐩𑐵𑐰𑐾𑐱 𑐖𑐸𑐫𑐵𑐔𑑂𑐰𑑄𑐐𑐸, 𑐩𑐿𑐟𑑂𑐬𑐷𑐥𑐹𑐬𑑂𑐞 𑐖𑐸𑐂𑐐𑐸 𑐳𑐣𑑂𑐡𑐾𑐱 𑐡𑐸𑐐𑐸 𑐩𑐿𑐟𑑂𑐬𑐷 𑐳𑐹𑐟𑑂𑐬, 𑐰𑐶𑐨𑐶𑐣𑑂𑐣 𑐥𑑂𑐬𑐎𑐵𑐬𑐫𑐵 𑐳𑐬𑑂𑐥, 𑐰𑐶𑐔𑑂𑐕𑐾 𑐁𑐡𑐶 𑐎𑐷𑐚𑐥𑐟𑑄𑐐𑐟𑐫𑑂 𑐥𑐵𑐏𑐾𑑄 𑐳𑐸𑐬𑐎𑑂𑐲𑐶𑐟 𑐖𑐸𑐂𑐟 𑐄𑐩𑐶𑐐𑐸 𑐥𑑂𑐬𑐟𑐶 𑐴𑐶𑑄𑐳𑐵𑐨𑐵𑐰 𑐟𑑂𑐰𑑅𑐟𑐵𑑅 𑐩𑐿𑐟𑑂𑐬𑐷 𑐫𑐵𑐫𑐾𑐩𑐵 𑐢𑐫𑐵𑐐𑐸 𑐳𑐣𑑂𑐡𑐾𑐱 𑐡𑐸𑐐𑐸 𑐏𑐣𑑂𑐢 𑐳𑐸𑐟𑑂𑐬, 𑐧𑑀𑐢𑐶𑐳𑐟𑑂𑐰 𑐩𑑂𑐴𑐫𑑂𑐏𑐵𑐫𑐵 𑐫𑑀𑐣𑐶𑐂 𑐖𑐣𑑂𑐩 𑐖𑐹𑐧𑐮𑐫𑑂 𑐰𑑂𑐫𑐵𑐢𑐵𑐥𑐵𑐏𑐾𑑄 𑐬𑐎𑑂𑐲𑐵 𑐖𑐸𑐂𑐩𑐵 𑐢𑐎𑐵𑑅 𑐰𑐵𑐔𑐣 𑐫𑐵𑑅𑐐𑐸 𑐩𑐫𑐹𑐬 𑐳𑐹𑐟𑑂𑐬, 𑐩𑐶 𑐥𑐵𑐏𑐾𑑄 𑐧𑐔𑐾 𑐖𑐸𑐂𑐟 𑐥𑐵𑐛 𑐫𑐵𑐂𑐐𑐸 𑐰𑐟𑐵𑐂𑑃 𑐳𑐹𑐟𑑂𑐬 , 𑐰𑐶𑐨𑐶𑐣𑑂𑐣 𑐥𑑂𑐬𑐎𑐵𑐬𑐫𑐵 𑐨𑐫𑐥𑐵𑐏𑐾𑑄 𑐀𑐮𑐐 𑐖𑐸𑐂𑐟 𑐟𑑂𑐬𑐶𑐬𑐟𑑂𑐣𑐫𑐵 𑐀𑐣𑐸𑐳𑑂𑐩𑐬𑐞 𑐫𑐵𑐫𑐾𑐐𑐸 𑐳𑐣𑑂𑐡𑐾𑐱 𑐡𑐸𑐐𑐸 𑐢𑑂𑐰𑐵𑑃𑐫𑑂 𑐳𑐹𑐟𑑂𑐬, 𑐰𑐶𑐨𑐶𑐣𑑂𑐣 𑐧𑐸𑐡𑑂𑐢𑐥𑐶𑐣𑐶𑐐𑐸 𑐣𑐵𑑄 𑐄𑐔𑑂𑐔𑐵𑐬𑐞 𑐫𑐵𑐣𑐵 𑐨𑐹𑐟, 𑐥𑑂𑐬𑐾𑐟 𑐁𑐡𑐶 𑐀𑐩𑐣𑐸𑐲𑑂𑐫𑐥𑐶𑐣𑐶 𑐥𑐵𑐏𑐾𑑄 𑐰𑐂𑐐𑐸 𑐰𑐶𑐑𑑂𑐣 𑐧𑐵𑐢𑐵 𑐔𑐶𑐂𑐎𑐾𑐦𑐃𑐐𑐸 𑐳𑐣𑑂𑐡𑐾𑐱 𑐡𑐸𑐐𑐸 𑐁𑐚𑐵𑐣𑐵𑐚𑐶𑐫 𑐳𑐹𑐟𑑂𑐬, 𑐣𑑂𑐴𑐫𑑂𑐐𑐹 𑐧𑑀𑐢𑑂𑐫𑑄𑐐𑐫𑐵 𑐥𑐵𑐛 𑐱𑑂𑐬𑐰𑐞 𑐫𑐵𑐣𑐵𑑅 𑐨𑐶𑐎𑑂𑐲𑐸𑐥𑐶𑑄 𑐰 𑐳𑑂𑐰𑐫𑑄 𑐧𑐸𑐡𑑂𑐢𑐫𑐵𑐐𑐸 𑐄𑐳𑐵𑑃𑐫 𑐳𑐩𑐾𑐟 𑐎𑑂𑐰𑐮𑐵𑐣𑐵𑐰𑑄𑐐𑐸 𑐳𑐣𑑂𑐡𑐾𑐳 𑐡𑐸𑐐𑐸 𑐧𑑀𑐢𑑂𑐫𑑄𑐐 𑐳𑐹𑐟𑑂𑐬 𑐀𑐮𑐾 𑐰𑐶𑐨𑐶𑐣𑑂𑐣 𑐡𑐸𑐬𑑂𑐡𑐱𑐵𑐥𑐵𑐏𑐾𑑄 𑐩𑐸𑐎𑑂𑐟 𑐖𑐸𑐂𑐟 𑐥𑐵𑐛 𑐫𑐵𑐂𑐐𑐸 𑐥𑐹𑐬𑑂𑐰𑐵𑐣𑑂𑐴 𑐳𑐹𑐟𑑂𑐬 𑐫𑐵𑐣𑐵𑑅 𑐗𑐶𑑄𑐕𑐥𑐹 𑐳𑐹𑐟𑑂𑐬 𑐥𑐬𑐶𑐟𑑂𑐬𑐵𑐞 𑐥𑐬𑐩𑑂𑐥𑐬𑐵 𑐎𑐠𑑄 𑐰𑐵𑐔𑐣 𑐫𑐵𑐂𑐐𑐸 𑐳𑐹𑐟𑑂𑐬 𑐠𑐸𑐐𑐸 𑐳𑐦𑐸𑐮𑐶𑐂 𑐄𑐮𑑂𑐮𑐾𑐏 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑂𑐰 𑐧𑐵𑐴𑐾𑐎 𑐥𑑂𑐬𑐳𑐰 𑐰𑐾𑐡𑐣𑐵𑐫𑐵𑐟 𑐩𑑂𑐴𑑀 𑐫𑐵𑐣𑐵𑑅 𑐳𑐴𑐖 𑐎𑐠𑑄 𑐥𑑂𑐬𑐳𑐰 𑐫𑐵𑐫𑐾𑐟 𑐐𑑂𑐰𑐵𑐴𑐵𑐮𑐷 𑐫𑐵𑐂𑐐𑐸 𑐎𑐠𑑄 𑐰𑐶𑐱𑑂𑐰𑐵𑐳 𑐫𑐵𑐣𑐵𑐟𑑅𑐐𑐸 𑐀𑑄𑐐𑐸𑐮𑐶𑐩𑐵𑐮 𑐳𑐹𑐟𑑂𑐬 𑐣𑑄 𑐠𑐸𑐐𑐸 𑐳𑐦𑐸𑐮𑐶𑐂 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐗𑐶𑑄𑐣𑐶𑐥𑐹 𑐳𑐸𑐟𑑂𑐬 𑐰𑐵𑐴𑐾𑐎 𑐟𑑂𑐬𑐶𑐱𑐬𑐞 𑐰 𑐥𑐘𑑂𑐔𑐱𑐷𑐮 𑐰 𑐀𑐣𑑂𑐟𑐫𑑂 𑐥𑐸𑐞𑑂𑐫𑐵𑐣𑐸𑐩𑑀𑐡𑐣 𑐣𑑄 𑐡𑐸𑐠𑑂𑐫𑐵𑑅𑐐𑐸 𑐠𑐸𑐐𑐸 𑐳𑐦𑐸𑐮𑐶𑐂 𑐥𑑂𑐬𑐟𑑂𑐫𑐾𑐎 𑐥𑐬𑐶𑐟𑑂𑐬𑐵𑐞𑐫𑐵 𑐳𑐸𑐟𑑂𑐬𑐫𑐵 𑐍𑐔𑐶𑐟𑑂𑐫 𑐰 𑐩𑐴𑐟𑑂𑐰 𑐣𑑄 𑐣𑑂𑐴𑑂𑐫𑐧𑑂𑐰𑐫𑐵 𑐠𑐸𑐎𑐶𑐫𑐵𑐟 𑐁𑐎𑐬𑑂𑐲𑐎 𑐎𑐠𑑄 𑐥𑑂𑐬𑐳𑑂𑐟𑐸𑐟 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐥𑐵𑐮𑐶 𑐨𑐵𑐲𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵 𑐰𑐶𑐨𑐶𑐣𑑂𑐣 𑐨𑐵𑐲𑐵𑐫𑑂 𑐀𑐣𑐸𑐰𑐵𑐡 𑐖𑐸𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐳𑐦𑐹 𑐰𑐶𑐨𑐶𑐣𑑂𑐣 𑐨𑐵𑐲𑐵𑐨𑐵𑐲𑐷𑐥𑐶𑐣𑐶𑐐𑐸 𑐮𑐵𑐐𑐶 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐰𑐣𑐾𑐦𑐂𑐐𑐸𑐮𑐷 𑐱𑑄𑐎𑐵 𑐩𑐡𑐸 𑑋 𑐕𑐐𑐹 𑐴𑐾 𑐥𑐬𑐶𑐰𑐵𑐬𑐫𑑂 𑐠𑑁𑑄𑐎𑐣𑑂𑐴𑐫𑑂 𑐰𑐶𑐨𑐶𑐣𑑂𑐣 𑐨𑐵𑐲𑐵𑐫𑑂 𑐡𑐎𑑂𑐏𑐮 𑐖𑐸𑐫𑐵𑐔𑑂𑐰𑐣𑐷𑐐𑐸 𑐫𑐠𑐵𑐬𑑂𑐠 𑐫𑐵𑐟 𑐧𑐶𑐔𑐵𑑅 𑐫𑐵𑐫𑐾𑐧𑐮𑐫𑑂 𑐳𑐎𑐮 𑐥𑐬𑐶𑐰𑐵𑐬𑐫𑐵𑐟 𑐠𑑂𑐰 𑐕𑐐𑐹 𑐳𑐵𑐗𑐵 𑐳𑐦𑐹 𑐀𑐰𑐱𑑂𑐫 𑐖𑐹𑐰𑐣𑐷 𑑋 𑐁𑐏𑑅𑐫𑐵 𑐐𑑂𑐰 𑐳𑐵𑐩𑐵𑐣𑑂𑐫 𑐳𑑂𑐰𑐫𑐵𑑄 𑐟𑑅𑐐𑑂𑐰 𑐖𑐹𑐐𑐸𑐮𑐶𑑄 𑐖𑑂𑐫𑐵𑐠𑑅𑐖𑑂𑐫𑐵𑐠𑐶𑐥𑐶𑑄𑐳𑑄 𑐣𑑄 𑐳𑐴𑐖 𑐎𑐠𑑄 𑐥𑐵𑐛 𑐫𑐵𑐫𑐾𑐦𑐂𑐎𑐠𑑄 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣𑐸𑐳𑐣𑑂𑐢𑐵𑐣 𑐫𑐵𑐂𑐥𑐶𑐣𑐶𑐐𑐸 𑐮𑐵𑐐𑐶𑑄 𑐣𑑄 𑐠𑐸𑐐𑐸 𑐳𑐦𑐹 𑐰𑐶𑐳𑑂𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐰𑐣𑐾𑐦𑐹 𑑋 𑐰𑐶𑐨𑐶𑐣𑑂𑐣 𑐨𑐵𑐳𑑄 𑐀𑐣𑐸𑐳𑐣𑑂𑐢𑐵𑐣 𑐔𑑂𑐰𑐳𑐸 𑐔𑑂𑐰𑐂𑐥𑐶𑑄𑐟 𑐳𑐣𑑂𑐡𑐬𑑂𑐨 𑐎𑐵𑐫𑐾𑐟 𑐠𑐸𑐐𑐸 𑐳𑐦𑐸𑐮𑐶𑑄 𑐁𑐥𑐵𑐮𑑄 𑐐𑑂𑐰𑐵𑐴𑐵𑐮𑐶 𑐧𑐷𑐐𑐸 𑐏𑑃𑐫𑑂 𑐱𑑄𑐳𑐫 𑐩𑐡𑐸 𑑋 𑐠𑐸𑐎𑐠𑑄 𑐥𑐬𑐶𑐟𑑂𑐬𑐵𑐞 𑐣𑑂𑐴𑐶𑐠𑑄 𑐥𑐵𑐛 𑐫𑐵𑐫𑐾𑐐𑐸 𑐡𑐿𑐣𑐶𑐎𑐷 𑐡𑐸𑐥𑐶𑑄 𑐣𑐶𑐳𑐾𑑄 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐟𑐵𑐥𑐶𑑄𑐟 𑐟𑐎𑑄 𑐠𑐸𑐐𑐸 𑐳𑐦𑐹 𑐩𑐴𑐟𑑂𑐰𑐥𑐹𑐬𑑂𑐞 𑐖𑐸𑐂𑐐𑐸 𑐨𑐮𑐳𑐵 𑐎𑐵𑐫𑐾𑐦𑐸 𑑋