Read news in NepalBhasa text-- www.hamroschool.com BACK 𑐟𑐵𑑅𑐮𑐵𑐫𑐾𑐩𑐵𑑅𑐐𑐸 ‘𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣’ – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐟𑐵𑑅𑐮𑐵𑐫𑐾𑐩𑐵𑑅𑐐𑐸 ‘𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣’

𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾𑐥𑐵𑐮𑐫𑑂 𑐕𑐸𑑄 𑐡𑐶𑑄 𑐮𑐶𑐥𑐵 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐣𑐾𑐰𑐵𑑅 𑐐𑑁𑐬𑐰𑐫𑐵 𑐨𑐵𑐰𑐣𑐵 𑐧𑑂𑐰𑐮𑑄𑐎𑐾𑐐𑐸 𑐁𑐖𑑂𑐖𑐸𑑄 𑐠𑑂𑐰 𑐳𑐩𑑂𑐩𑐾𑐮𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣𑑄 𑐴𑐬𑐾𑐎 𑐩𑐵𑐬𑑂𑐔 𑐩𑐴𑐶𑐣𑐵𑐫𑐵 𑐀𑐣𑑂𑐟𑐶𑐩 𑐱𑐣𑐶𑐰𑐵𑑅 𑐠𑐸𑐐𑐸 𑐡𑐶𑐰𑐳 𑐴𑐣𑐾𑐐𑐸 𑐑𑑀𑐲𑐞𑐵 𑐖𑐹𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐱𑐸𑐬𑐸 𑐣𑐾𑐥𑐵𑐮𑑄 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐠𑐸𑐎𑐠𑑄 𑐠𑑂𑐰 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑑂𑐟𑐬𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐰𑐵𑑅𑐟𑐫𑑂𑐐𑐸 𑐧𑑂𑐰𑐟𑐶 𑐫𑐵𑐫𑐾𑐟𑑂𑐫𑑄𑐐𑐸 𑐠𑑂𑐰 𑐣𑑂𑐴𑐵𑐥𑐵𑑄𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐩𑐾𑐮𑐣 𑐖𑐸𑐂𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹 𑐨𑐹𑐩𑐶 𑐣𑐾𑐥𑐵𑑅 𑐏𑑅 𑑋 𑐣𑐾𑐥𑐵𑑅𑐫𑐵 𑐣𑐾𑐥𑐵𑐮 𑐩𑐞𑑂𑐜𑐮 𑐏𑑅 𑑋 𑐰𑐶𑐰𑐶𑐢 𑐎𑐵𑐬𑐞𑑄 𑐣𑐾𑐰𑐵𑑅𑐟 𑐠𑐥𑐶𑐣𑐶𑐐𑐸 𑐡𑐾𑐱𑑄 𑐧𑐵𑐫𑑂𑐴𑐶𑐮𑐵𑑅 𑐰𑐶𑐡𑐾𑐱𑐫𑑂 𑐔𑑂𑐰𑑄𑐰𑐣𑐵𑐔𑑂𑐰𑑄𑐥𑐶𑐣𑐶𑐐𑐸 𑐮𑑂𑐫𑐵𑑅 𑐁𑑅 𑐀𑐥𑑂𑐰𑑅 𑐡𑐫𑐾𑐢𑐸𑑄𑐎𑐮 𑑋 𑐣𑐶𑐐𑐹 𑐡𑐱𑐎 𑐣𑑂𑐴𑑂𑐫𑑅 𑐟𑐎 𑐴𑐾 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑑄𑐟 𑐏𑐸𑐮𑑂𑐮𑐵𑐎𑐠𑑄 𑐣𑐾𑐰𑐵𑑅 𑐢𑐵𑐫𑐾𑐎𑐾𑐟 𑐀𑐣𑐾𑐎 𑐥𑑄𑐐𑑅𑐟 𑐰𑐵𑑅𑐔𑐵𑐫𑐾𑐎𑐵𑐔𑑂𑐰𑑄𑐐𑐸 𑐂𑐮𑐫𑑂 𑐁𑑅 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐴𑐾 𑐣𑐾𑐰𑐵𑑅𑐟 𑐡𑐸𑐠𑑂𑐫𑐵𑐎𑐵𑑅 𑐣𑐾𑐰𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣 𑐣𑐷𑐳𑑂𑐰𑐣𑐾 𑐦𑐹𑐐𑐸 𑐩𑐹𑐮 𑐨𑐹𑐩𑐶 𑐣𑐾𑐥𑐵𑐮𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶 𑐣𑐾𑐰𑐵𑑅𑐟𑐫𑑂𑐐𑐸 𑐣𑐶𑑄𑐟𑐶𑑄 𑐣𑑄 𑐐𑐬𑑂𑐰𑐫𑐵 𑐏𑑃 𑐏𑑅 𑑋

𑐣𑐾𑐰𑐵𑑅𑐟 𑐐𑐣 𑐐𑐣 𑐰𑐣 𑐀𑐣 𑐳𑐱𑐬𑐷𑐬 𑐩𑐣𑐹 𑐖𑐎 𑐰𑐣𑐷𑐐𑐸 𑐩𑐏𑐸, 𑐄𑐥𑐶𑑄 𑐣𑐵𑐥𑑄 𑐬𑐶𑐟𑐶𑐠𑐶𑐟𑐶, 𑐳𑑄𑐳𑑂𑐎𑐵𑐬 𑐰 𑐨𑐵𑐫𑑂 𑐣𑑄 𑐣𑐵𑐥𑑄 𑐰𑐣𑐷𑐐𑐸 𑐏𑑅 𑐢𑐫𑐵𑐐𑐸 𑐮𑐶𑐔𑑂𑐰𑑅 𑐣𑐺𑐰𑑄𑐱𑐱𑐵𑐳𑑂𑐟𑑂𑐬𑐷𑐟𑐫𑑂𑐐𑐸 𑐡𑐸 𑑋 𑐠𑑂𑐰 𑐴𑐾 𑐮𑑂𑐫𑐵𑐏𑑄 𑐰𑐶𑐱𑑂𑐰𑐫𑑂 𑐣𑑂𑐫𑐣𑐵𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑑄 𑐠𑑅𑐥𑐶𑐣𑐶𑐐𑐸 𑐧𑐶𑐳𑑂𑐎𑑄𑐫𑐵 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐫𑐾𑐟 𑐠𑑅𑐥𑐶𑐣𑐶𑐐𑐸 𑐳𑑄𑐳𑑂𑐎𑐺𑐟𑐶 𑐰 𑐳𑐨𑑂𑐫𑐟𑐵𑐫𑐵 𑐧𑑂𑐰𑐖𑑂𑐫𑐵 𑐠𑑅𑐥𑐶𑑄 𑐰𑐳𑑀𑐰𑐵𑐳 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐵𑐳𑐫𑑂 𑐣𑑂𑐴𑑂𑐫𑐠𑐣𑐾𑐧𑐴 𑐖𑐸𑐂𑐎 𑐴𑐾 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐠𑑅𑐥𑐶𑐣𑐶𑐐𑐸 𑐥𑐴𑐶𑐔𑐵𑐣 𑐳𑐴𑐶𑐟𑐫𑐵 𑐳𑑄𑐳𑑂𑐠𑐵𑐟 𑐰𑐶𑐡𑐾𑐱𑐫𑑂 𑐣𑑄 𑐳𑐬𑐎𑐵𑐬𑐷 𑐣𑐶𑐎𑐵𑐫𑐫𑑂 𑐡𑐬𑑂𑐟𑐵 𑐫𑐵𑐣𑐵𑑅 𑐠𑑅𑐥𑐶𑐣𑐶𑐐𑐸 𑐁𑐢𑐶𑐎𑐵𑐬𑐶𑐎𑐟𑐵 𑐳𑑂𑐠𑐵𑐥𑐶𑐟 𑐫𑐵𑐫𑐾𑐟 𑐠𑐸𑐥𑐶𑑄 𑐟𑐵𑑅𑐮𑐵𑑅𑐐𑐸 𑐏𑐣𑐾𑐡𑐸 𑑋 𑐩𑐾𑐏𑐾𑐬 𑐁𑑅 𑐰𑐫𑐵𑑅 𑐣𑐾𑐰𑐵𑑅𑐟𑐫𑑂𑐐𑐸 𑐰𑐶𑐱𑑂𑐰 𑐳𑑄𑐐𑐛𑐣 𑐴𑐾 𑐰𑐶𑐡𑐾𑐱𑐫𑑂 𑐡𑐬𑑂𑐟𑐵 𑐫𑐵𑐣𑐵𑑅 𑐠𑑅𑐥𑐶𑐣𑐶𑐐𑐸 𑐩𑐵𑐄𑐨𑐹𑐩𑐶 𑐣𑐾𑐥𑐵𑑅𑐫𑐵𑐟 ‘𑐣𑐾𑐥𑐵𑑅 𑐔𑑂𑐫𑐵𑐥𑑂𑐚𑐬’𑐫𑐵 𑐖𑐎 𑐩𑐵𑐣𑑂𑐫𑐟𑐵 𑐧𑐶𑐫𑐵𑑅 𑐠𑐸𑐐𑐸 𑐰𑐶𑐱𑑂𑐰 𑐳𑑄𑐐𑐛𑐣 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐣𑐾𑐰𑐵𑑅𑐟 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐹𑐩𑐶𑐂 𑐬𑐵𑐖𑑂𑐫𑐥𑐵𑐏𑐾𑑄 𑐴𑐾 𑐳𑐮𑑄𑐳𑑅 𑐡𑑃 𑐨𑐵𑐲𑐵, 𑐖𑐵𑐟𑐶, 𑐢𑐬𑑂𑐩𑐫𑐵 𑐏𑑃𑐫𑑂 𑐄𑐟𑑂𑐥𑐷𑐜𑐣𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐰𑐵𑐳𑑂𑐟𑐰𑐶𑐎𑐟𑐵 𑐏𑑅 𑑋 𑐣𑐾𑐥𑐵𑑅 𑐡𑐾𑐫𑑂 𑐐𑐧𑐮𑐾𑑄 𑐄𑐥𑐣𑐶𑐰𑐾𑐱 𑐩𑐸𑐮𑐸𑐎 𑐩𑐖𑐹𑐳𑐵𑑄 𑐠𑐣𑐫𑐵 𑐱𑐵𑐳𑐎𑐟𑐫𑑂𑐐𑐸 𑐱𑐵𑐳𑐣𑐫𑑂 𑐣𑐾𑐰𑐵𑑅𑐟 𑐴𑐬𑐾𑐎 𑐏𑑂𑐫𑐮𑐫𑑂 𑐄𑐥𑐣𑐶𑐰𑐾𑐱𑐫𑐵 𑐰𑐵𑐟𑐵𑐰𑐬𑐞𑐫𑑂 𑐩𑑂𑐰𑐵𑐫𑐾𑐟 𑐧𑐵𑐢𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐳𑐮𑑄𑐳𑑅𑐡𑑃 𑐡𑐫𑐾𑐢𑐸𑑄𑐎𑐮 𑑋

𑐁𑑅 𑐣𑑄 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵𑑄 𑐱𑐶𑐎𑑂𑐲𑐵 𑐎𑐵𑐫𑐾𑐐𑐸 𑐀𑐢𑐶𑐎𑐵𑐬 𑐩𑐡𑐸 𑑋 𑐠𑑅𑐥𑐶𑐣𑐶𑐐𑐸 𑐩𑐵𑐟𑐺𑐨𑐵𑐲𑐵, 𑐩𑑁𑐮𑐶𑐎 𑐳𑑄𑐰𑐟𑑂 𑐣𑐾𑐥𑐵𑐮 𑐳𑑄𑐰𑐟𑑂, 𑐩𑑁𑐮𑐶𑐎 𑐮𑐶𑐥𑐶 𑐣𑐾𑐥𑐵𑐮 𑐮𑐶𑐥𑐶𑐫𑐵 𑐁𑐢𑐶𑐎𑐵𑐬𑐶𑐎 𑐕𑑂𑐫𑐮𑐵𑐧𑐸𑐮𑐵 𑐐𑐣𑑄 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐡𑐾𑐫𑑂𑐫𑐵 𑐧𑐴𑐸𑐳𑑄𑐏𑑂𑐫𑐎 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐐𑐸 𑐨𑐵𑐫𑑂 𑐣𑐾𑐥𑐵𑑅 𑐳𑐬𑐎𑐵𑐬𑐫𑐵 𑐁𑐢𑐶𑐎𑐵𑐬𑐷𑐎 𑐨𑐵𑐫𑑂 𑐖𑐸𑐂 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐮𑐎𑐳𑐫𑑂 𑐁𑑅 𑐰𑐶𑐎𑐳𑐶𑐟 𑐰 𑐥𑑂𑐬𑐖𑐵𑐟𑐵𑐣𑑂𑐟𑑂𑐬𑐶𑐎 𑐡𑐾𑐱𑐫𑑂 𑐰𑐳𑑀𑐰𑐵𑐳 𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐥𑐵𑐏𑐾𑑄 𑐣𑐾𑐰𑐵𑑅𑐟𑐫𑑂𑐐𑐸 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐩𑐵𑐎𑑂𑐰 𑐐𑑂𑐰𑐵𑐴𑐵𑐮𑐶, 𑐳𑐴𑐮𑐴 𑐖𑐸𑐂 𑐢𑐫𑐵𑐐𑐸 𑐁𑐱𑐵 𑐫𑐵𑐫𑐾𑐐𑐸 𑐕𑐸𑑄𑐎𑐠𑑄𑐫𑐵 𑐢𑐺𑐲𑑂𑐚𑐟𑐵 𑐩𑐖𑐸𑐂 𑑋𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣 𑐐𑐛𑐣𑐫𑐵 𑐂𑐟𑐶𑐴𑐵𑐳 𑐟𑐵𑑅𑐴𑐵𑐎𑑅 𑐩𑐖𑐹𑐣𑐶 𑑋 𑐁𑑅𑐫𑐵 𑐀𑐰𑐳𑑂𑐠𑐵𑐫𑑂 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐥𑐬𑐶𑐳𑑂𑐠𑐶𑐟𑐶𑐫𑐵 𑐀𑐢𑑂𑐫𑐫𑐣 𑐴𑐾 𑐣𑑄 𑐩𑐹 𑐰𑐶𑐲𑐫 𑐖𑐸𑐂𑐦𑐸 𑑋 𑐠𑐸𑐎𑐶𑐫𑐵 𑐴𑐾 𑐎𑐵𑐬𑐞𑑄 𑐖𑐸𑐂𑐦𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐰𑐶𑐱𑑂𑐰𑐣𑑂𑐫𑑄𑐎𑑄 𑐫𑐵𑐣𑐵𑑅 𑐳𑐎𑐮 𑐣𑐾𑐰𑐵𑑅𑐟𑐫𑑂𑐟 𑐠𑑅 𑐣𑐾𑐰𑐵𑑅 𑐢𑐫𑐵𑐐𑐸 𑐁𑐟𑑂𑐩𑐷𑐫 𑐐𑑁𑐬𑐰 𑐧𑑂𑐰𑐮𑑄𑐎𑐾𑐐𑐸 𑐠𑐸𑐎𑐶𑐫𑐵 𑐖𑑂𑐫𑐵 𑐖𑐸𑐂𑐦𑐸 𑑋 𑐣𑐾𑐥𑐵𑑅𑐫𑐵 𑐳𑐣𑑂𑐡𑐬𑑂𑐨𑐫𑑂 𑐐𑐣 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹 𑐠𑐵𑐫𑑂 𑐏𑑅𑐳𑐵𑑄 𑐧𑐸𑐮𑐸𑐴𑐸𑑃 𑐠𑑅𑐥𑐶𑐣𑐶𑐐𑐸 𑐨𑐵𑐲𑐵 𑐳𑑄𑐳𑑂𑐎𑐺𑐟𑐶𑐥𑐵𑐏𑐾𑑄 𑐰𑐶𑐔𑐮𑐣𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐄𑐩𑐶𑐟 𑐣𑑄 𑐖𑐵𑐟𑐷𑐫 𑐐𑑁𑐬𑐰 𑐧𑑂𑐰𑐮𑑄𑐎𑐾 𑐧𑐷𑐩𑐵𑑅𑐐𑐸 𑐁𑐰𑐱𑑂𑐫𑐎 𑐏𑑅 𑑋

𑐰𑐶𑐱𑑂𑐰𑐣𑑂𑐫𑑄𑐎𑑄 𑐰𑐳𑑀𑐰𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑐟 𑐕𑐐𑐹 𑐴𑐾 𑐠𑐵𑐳𑐫𑑂 𑐟𑐫𑐵𑑅 𑐳𑑂𑐰𑐫𑐾𑐐𑐸 𑐣𑑄 𑐥𑐵𑐫𑑂𑐕𑐶 𑐖𑐸𑐂 𑐩𑐏𑐸 𑑋 𑐐𑐣𑑄 𑐣𑐾𑐰𑐵𑑅𑐟𑐫𑑂𑐐𑐸 𑐮𑑂𑐫𑐵𑑅 𑐀𑐥𑑂𑐰𑑅 𑐡𑐸𑐳𑐵 𑐐𑐣𑑄 𑐩𑑂𑐴𑑀 𑐖𑐎 𑐡𑐸 𑑋 𑐄𑐎𑐠𑑄 𑐴𑐾 𑐐𑐣𑑄 𑐐𑐣𑑄 𑐣𑐾𑐰𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐟𑑂𑐰𑑅𑐟𑐾𑐢𑐸𑑄𑐎𑐹𑐥𑐶𑑄 𑐰𑐵 𑐀𑐣 𑐴𑐾 𑐳𑑂𑐠𑐵𑐫𑐷 𑐰𑐳𑑀𑐰𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑐣𑐶𑐐𑐸 𑐁𑐰𑐱𑑂𑐫𑐎𑐟𑐵 𑐰 𑐩𑐾𑐩𑐾𑐥𑐶𑐣𑐶𑐐𑐸 𑐔𑐵𑐴𑐣𑐵 𑐕𑐐𑐹 𑐴𑐾 𑐖𑐸𑐂 𑐩𑐏𑐸 𑑋 𑐁𑑅𑐫𑐵 𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣𑑄 𑐠𑑂𑐰 𑐰𑐶𑐲𑐫𑐫𑑂 𑐣𑑄 𑐔𑐶𑐣𑑂𑐟𑐣 𑐫𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐸𑐂 𑑋 𑐀𑐩𑐾𑐬𑐶𑐎𑐵 𑐰𑐵 𑐐𑐣𑑄 𑐩𑐾𑐐𑐸 𑐡𑐾𑐱𑐫𑑂 𑐰𑐳𑑀𑐰𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹 𑐳𑐩𑐳𑑂𑐫𑐵 𑐠𑑅𑐥𑐶𑐣𑐶𑐐𑐸 𑐥𑐴𑐶𑐔𑐵𑐣𑐫𑐵 𑐣𑐶𑑄𑐟𑐶𑑄 𑐳𑑄𑐳𑑂𑐎𑐺𑐟𑐶 𑐐𑐸𑐎𑐠𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐖𑐎 𑐖𑐸𑐫𑐵𑐔𑑂𑐰𑐣𑐷𑐳𑐵 𑐣𑐾𑐥𑐵𑑅 𑐡𑐸𑐣𑐾𑐫𑐵 𑐣𑐾𑐰𑐵𑑅𑐟𑐫𑑂𑐟 𑐬𑐵𑐖𑑂𑐫𑑄 𑐴𑐾 𑐄𑐟𑑂𑐥𑐷𑐜𑐣𑐫𑑂 𑐮𑐵𑐎𑐵𑐟𑑅𑐐𑐸 𑐎𑐵𑐬𑐞𑑄 𑐀𑐖𑑂𑐫𑐵𑑅𑐐𑐸 𑐳𑑂𑐠𑐶𑐟𑐶𑑄 𑐐𑐸𑐎𑐠𑑄 𑐩𑐸𑐎𑑂𑐟 𑐖𑐸𑐂 𑐢𑐫𑐵𑐐𑐸 𑐴𑐾 𑐔𑐶𑐣𑑂𑐟𑐵 𑐖𑐸𑐫𑐵𑐔𑑂𑐰𑐣𑐷 𑑋 𑐠𑐷𑐠𑐷 𑐎𑐵𑐬𑐞𑑄 𑐰𑐶𑐡𑐾𑐱𑐫𑑂 𑐧𑐵𑐫𑑂 𑐴𑐶𑐮𑐾𑐢𑐸𑑄𑐎𑐹𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐁𑐬𑑂𑐠𑐶𑐎 𑐳𑑂𑐠𑐶𑐟𑐶 𑐰 𑐠𑑅𑐐𑐸 𑐴𑐾 𑐩𑐸𑐮𑐸𑐎𑐫𑑂 𑐰𑐳𑑀𑐰𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑑄 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐐𑐸 𑐳𑑂𑐠𑐶𑐟𑐶 𑐳𑐩𑐵𑐣 𑐩𑐖𑐹 𑑋 𑐣𑐶𑐱𑑂𑐔𑐫 𑐣𑑄 𑐰𑐶𑐎𑐳𑐶𑐟 𑐁𑐬𑑂𑐠𑐶𑐎 𑐥𑐬𑐶𑐞𑐟𑐶𑐂 𑐀𑐨𑑂𑐫𑐳𑑂𑐟 𑐣𑐾𑐰𑐵𑑅𑐟𑐫𑑂𑐐𑐸 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐣𑐾𑐰𑐵𑑅𑐟 𑐀𑐰𑐶𑐎𑐳𑐶𑐟 𑐁𑐬𑑂𑐠𑐶𑐎 𑐔𑐵𑐎𑐮𑐫𑑂 𑐩𑑂𑐰𑐵𑐣𑐵𑐔𑑂𑐰𑑄𑐥𑐶𑑄 𑐟𑐵𑐫𑐾𑐎𑐾 𑐦𑐂 𑑋

𑐰𑐶𑐱𑑂𑐰𑐫𑐵 𑐢𑐣𑐷 𑐡𑐾𑐱𑐫𑑂 𑐡𑐸𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑐣𑐫𑐵 𑐁𑐬𑑂𑐠𑐶𑐎 𑐳𑐩𑐺𑐡𑑂𑐢𑐶𑐫𑐵 𑐣𑐶𑑄𑐟𑐶𑑄 𑐖𑑂𑐫𑐵 𑐫𑐵𑐫𑐾𑐩𑐵𑑅 𑐢𑐫𑐵𑐐𑐸 𑐳𑑀𑐔 𑐣𑑄 𑐧𑑂𑐰𑐮𑑄𑐎𑐾 𑐦𑐂 𑑋 𑐠𑑂𑐰𑐴𑐾 𑐎𑐵𑐬𑐞𑑄 𑐣𑑄 𑐖𑐸𑐂𑐦𑐸 𑐁𑑅𑐫𑐵 𑐥𑐬𑐶𑐳𑑂𑐠𑐶𑐟𑐶𑐂 𑐀𑐣𑐾𑐎 𑐳𑑂𑐎𑐸𑐮𑐫𑑂 ‘𑐕𑐵𑐟𑑂𑐬𑐰𑐺𑐟𑑂𑐟𑐶’ 𑐠𑐸𑐩𑐶𑐳𑑄 𑐄𑐥𑐮𑐧𑑂𑐢 𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐏𑑄𑐎𑐾𑐦𑐂 𑑋 𑐟𑐬 𑐠𑐣𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐐𑐸 𑐰𑐵𑐳𑑂𑐟𑐰𑐶𑐎 𑐳𑑂𑐠𑐶𑐟𑐶𑐂 𑐐𑐸𑐎𑐠𑑄 𑐐𑑂𑐰𑐵𑐴𑐵𑐮𑐶𑐫𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐾 𑐦𑐂 𑐢𑐫𑐵𑐐𑐸 𑐔𑐶𑐣𑑂𑐟𑐣 𑐣𑑄 𑐖𑐸𑐂𑐩𑐵𑑅 𑑋 𑐁𑑅𑐫𑐵 𑐀𑐟𑐶 𑐔𑐬𑑂𑐔𑐶𑐟 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐦𑐾𑐳𑐧𑐸𑐎𑐫𑑂 𑐖𑐎 𑐳𑑂𑐰𑐮 𑐢𑐵𑑅𑐳𑐵𑑄 𑐣𑑄 𑐣𑐾𑐥𑐵𑑅𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐠𑐠𑐾 𑐫𑐵𑐫𑐾𑐩𑐵𑑅, 𑐀𑐠𑐾 𑐫𑐵𑐫𑐾𑐩𑐵𑑅 𑐢𑐫𑐵𑐎𑐠𑑄𑐫𑐵 𑐀𑐣𑐾𑐎 𑐦𑐸𑐳𑑂𑐎𑐸𑐮𑐸𑐐𑐸 𑐧𑐶𑐔𑐵𑑅𑐟 𑐟𑐫𑐵𑐔𑑂𑐰𑑄𑐐𑐸 𑐏𑑄𑐎𑐾 𑐦𑐂 𑑋 𑐟𑐬 𑐠𑑅𑐥𑐶𑑄𑐳𑑄 𑐫𑐵𑐫𑐾𑐦𑐂𑐐𑐸 𑐳𑐵𑐩𑐵𑐣𑑂𑐫 𑐖𑑂𑐫𑐵 𑐟𑐎𑑄 𑐩𑐫𑐵𑐳𑐾 𑐨𑐶𑑄𑐳𑑂𑐎𑐵𑑅 𑐖𑐸𑐂𑐐𑐸 𑐖𑑂𑐫𑐵𑐥𑐵𑐏𑐾𑑄 𑐩𑐣𑐹𑐟 𑐄𑐡𑐾𑐎 𑐣𑑄 𑐔𑐵𑐫𑐾𑐦𑐸 𑑋
𑐣𑐾𑐰𑐵𑑅𑐟𑐫𑑂𑐐𑐸 𑐄𑐟𑑂𑐥𑐟𑑂𑐟𑐶𑐫𑐵 𑐠𑐵𑐫𑑂 𑐣𑐾𑐥𑐵𑑅𑐫𑐵𑐟 𑐣𑑄 𑐕𑐐𑐹 ‘𑐔𑑂𑐫𑐵𑐥𑑂𑐚𑐬’𑐫𑐵 𑐴𑐿𑐳𑐶𑐫𑐟 𑐧𑐶𑐫𑐵𑑅 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐰𑐶𑐱𑑂𑐰 𑐳𑑄𑐐𑐛𑐣𑐫𑐵 𑐨𑐹𑐩𑐶𑐎𑐵 𑐐𑐸𑐎𑐠𑑄 𑐳𑐱𑐎𑑂𑐟 𑐖𑐸𑐂𑐐𑐸 𑐏𑑅, 𑐠𑐸𑐎𑐶𑐫𑐵𑐟 𑐂𑐮𑑄 𑐴𑐾 𑐖𑐎 𑐥𑑂𑐬𑐩𑐵𑐞𑐶𑐟 𑐫𑐵𑐫𑐾 𑐦𑐂 𑑋 𑐁𑑅 𑐖𑐸𑐂𑐟𑑂𑐫𑑄𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐥𑑂𑐬𑐟𑐶𑐫𑐵 𑐁𑐎𑐬𑑂𑐲𑐞 𑐠𑐣𑐫𑐵 𑐣𑐾𑐰𑐵𑑅𑐟𑐫𑑂𑐎𑐾 𑐡𑐸𑐐𑐸 𑐏𑑅𑐳𑐵𑑄 𑐄𑐮𑐶 𑐄𑐟𑑂𑐳𑐵𑐴 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐠𑑂𑐰 𑐕𑐸 𑐐𑐸𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐏𑑅 𑐢𑐫𑐵𑐐𑐸 𑐀𑐣𑑂𑐫𑑁𑐮𑐟𑐵 𑐡𑐣𑐶 𑑋

𑐠𑐣𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐠𑑅𑐥𑐶𑐣𑐶𑐐𑐸 𑐴𑐾 𑐳𑐩𑐳𑑂𑐫𑐵 𑐖𑑂𑐰𑐵𑑃𑐫𑑂𑐖𑑂𑐰𑐵𑑃𑐫𑑂 𑐮𑑂𑐫𑐣𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐰𑐳𑑂𑐟𑐶 𑐴𑐾 𑐣𑑂𑐴𑑄𑐎𑐵𑑅 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐡𑐸𑐣𑐾 𑐠𑑅𑐥𑐶𑐣𑐶𑐐𑐸 𑐥𑐴𑐶𑐔𑐵𑐣𑐫𑐵 𑐥𑑂𑐬𑐡𑐾𑐱 𑐣𑐵𑐩𑐵𑑄𑐎𑐬𑐞𑐫𑐵 𑐳𑑄𑐎𑐚 𑐰𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐠𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵𑐫𑐵 𑐧𑐵𑐬𑐾 𑐠𑐸𑐐𑐸 𑐳𑐩𑑂𑐩𑐾𑐮𑐣𑐫𑐵 𑐢𑐵𑐬𑐞𑐵 𑐕𑐸 𑐖𑐸𑐂𑐐𑐸 𑐏𑑅 𑐢𑐫𑐵𑐐𑐸 𑐔𑐶𑐣𑑂𑐟𑐵 𑐣𑑄 𑐠𑐸𑐩𑐶𑐐𑐸 𑐖𑐸𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐣𑑂𑐴𑐵𑐥𑐵𑑄𑐐𑐸 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐩𑐾𑐮𑐣 𑐟𑐵𑑅𑐮𑐵𑐎𑐾𑐩𑐵𑑅𑐐𑐸 𑐏𑑃𑐫𑑂 𑐳𑐸𑐫𑐵𑑄 𑐣𑐶𑐟𑐵 𑐧𑐶𑐔𑐵𑑅 𑐡𑐂 𑐩𑐏𑐸 𑑋 𑐠𑑂𑐰 𑐩𑐵𑐟𑑂𑐬 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐥𑐵𑐮𑐫𑑂 𑐰𑐫𑐵𑑅 𑐳𑐩𑑂𑐩𑐾𑐮𑐣 𑐫𑐵𑑅 𑐰𑐮 𑐢𑐫𑐵𑐐𑐸 𑐳𑐣𑑂𑐡𑐾𑐱 𑐖𑐎 𑐩𑐖𑐸𑐳𑐾 𑐰𑐵𑐳𑑂𑐟𑐰𑐶𑐎𑐬𑐸𑐥𑑄 𑐣𑐾𑐰𑐵𑑅𑐟𑐫𑑂𑐐𑐸 𑐩𑐹𑐮𑐨𑐹𑐩𑐶 𑐣𑐾𑐰𑐵𑑅 𑐮𑐐𑐵𑐫𑐟 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐳𑐩𑐳𑑂𑐫𑐵 𑐐𑐸𑐎𑐠𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣𑑄 𑐳𑐩𑑂𑐧𑑀𑐢𑐣 𑐫𑐵𑐫𑐾 𑐦𑐂 𑐢𑐫𑐵𑐐𑐸 𑐏𑑃𑐫𑑂 𑐣𑑄 𑐢𑑂𑐫𑐵𑐣 𑐰𑐣𑐾𑐩𑐵𑑅 𑑋 𑐠𑑂𑐰 𑐳𑐩𑑂𑐩𑐾𑐮𑐣 𑐳𑐩𑐳𑑂𑐟 𑐣𑐾𑐰𑐵𑑅𑐟𑐫𑑂𑐐𑐸 𑐣𑐶𑑄𑐟𑐶𑑄 𑐐𑐬𑑂𑐰𑐫𑐵 𑐖𑑂𑐫𑐵𑐗𑑂𑐰𑑅 𑐖𑐸𑐂𑐩𑐵𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS