𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐏𑑂𑐰𑐥𑐫𑐵𑐟 𑐥𑐹𑐬𑑂𑐞 𑐳𑐦𑐵𑐂𑐫𑐸𑐎𑑂𑐟 𑐖𑐶𑐮𑑂𑐮𑐵 𑐡𑐫𑐾𑐎𑐾𑐟 𑐥𑐴𑐮

𑐏𑑂𑐰𑐥 – 𑐳𑑂𑐰𑐣𑐶𑐐𑑅𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐳𑐴𑐬 𑐏𑑂𑐰𑐥𑐫𑐵𑐟 𑐥𑐹𑐬𑑂𑐞 𑐳𑐬𑐳𑐦𑐵𑐂𑐫𑐸𑐎𑑂𑐟 𑐖𑐶𑐮𑑂𑐮𑐵 𑐡𑐫𑐾𑐎𑐷𑐐𑐸 𑐖𑐹𑐐𑐸 𑐡𑐸 𑑋 𑐏𑑂𑐰𑐥𑐫𑐵𑐟 𑐄𑐎𑐠𑑄 𑐖𑐶𑐮𑑂𑐮𑐵 𑐡𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐳𑐬𑐳𑐦𑐵𑐂 𑐳𑐩𑑂𑐧𑐣𑑂𑐢𑐷 𑐕𑐐𑐹 𑐬𑐞𑐣𑐷𑐟𑐶𑐎 𑐎𑐵𑐬𑑂𑐫𑐫𑑀𑐖𑐣𑐵 𑐣𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋 𑐖𑐶𑐮𑑂𑐮𑐵 𑐏𑐵𑐣𑐾𑐥𑐵𑐣𑐷 𑐳𑐬𑐳𑐦𑐵𑐂 𑐟𑐠𑐵 𑐳𑑂𑐰𑐔𑑂𑐕𑐟𑐵 𑐳𑐩𑐣𑑂𑐰𑐫 𑐳𑐩𑐶𑐟𑐶 𑐏𑑂𑐰𑐥𑑄 𑐖𑐶𑐮𑑂𑐮𑐵𑐫𑐵𑐟 𑐥𑐹𑐬𑑂𑐞 𑐳𑐬𑐳𑐦𑐵𑐂𑐫𑐸𑐎𑑂𑐟 𑐖𑐶𑐮𑑂𑐮𑐵 𑐡𑐫𑐾𑐎𑐾𑐐𑐸 𑐮𑑂𑐫𑐵𑐏𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐣𑐶𑐣𑑂𑐴𑐸𑐫𑑄𑐎𑑄𑐫𑐵 𑐕𑐐𑐹 𑐎𑐵𑐬𑑂𑐫𑐱𑐵𑐮𑐵𑑄 𑐄𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐳𑐵𑑄𑐳𑐡 𑐩𑐴𑐾𑐱 𑐧𑐳𑑂𑐣𑐾𑐟𑑄 𑐏𑑂𑐰𑐥 𑐖𑐶𑐮𑑂𑐮𑐵𑐫𑐵𑐟 𑐳𑐬𑐳𑐦𑐵𑐂𑐫𑐸𑐎𑑂𑐟 𑐡𑐫𑐾𑐎𑐾𑐟 𑐠𑑂𑐰 𑐳𑐩𑑂𑐧𑐣𑑂𑐢𑐷 𑐬𑐞𑐣𑐷𑐟𑐶𑐎 𑐎𑐵𑐬𑑂𑐫𑐫𑑀𑐖𑐣𑐵 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐣𑐵𑑅 𑐳𑐦𑐮 𑐫𑐵𑐫𑐾𑐟 𑐖𑐶𑐮𑑂𑐮𑐵𑐫𑐵 𑐥𑑂𑐫𑑄𑐐𑐸𑐮𑐶𑑄 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐡𑐂 𑐢𑐵𑐳𑐾𑑄 𑐖𑐶𑐮𑑂𑐮𑐵𑐫𑐵 𑐣𑐶𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐏𑐸𑐳𑐶 𑐴𑐣𑐸𑐩𑐣𑑂𑐟𑐾 𑐰 𑐩𑐣𑑀𑐴𑐬𑐵𑐫𑐵𑐟 𑐢𑑅 𑐩𑐸𑐎𑑂𑐟 𑐫𑐵𑐫𑐾 𑐩𑐦𑐸𑐟𑐮𑐾 𑐏𑑂𑐰𑐥 𑐡𑐾𑐫𑑂 𑐳𑐦𑐵 𑐖𑐸𑐂𑐩𑐏𑐸 𑐢𑐫𑐵𑐡𑐶𑐮 𑑋 𑐴𑐣𑐸𑐩𑐣𑑂𑐟𑐾 𑐏𑐸𑐳𑐶 𑐳𑐦𑐵 𑐫𑐵𑐫𑐾𑐐𑐸 𑑑𑑐𑑐 𑐍𑑄 𑐴𑐥𑑂𑐟𑐵 𑐀𑐨𑐶𑐫𑐵𑐣 𑐱𑐸𑐬𑐸 𑐖𑐹𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐳𑐾𑑄 𑐣𑐶𑐐𑐸𑐮𑐶𑑄 𑐏𑐸𑐳𑐶 𑐳𑐦𑐵 𑐫𑐵𑐣𑐵𑑅 𑐎𑐬𑐶𑐜𑑀𑐬 𑐡𑐫𑐾𑐎𑐾𑐟 𑐦𑐟 𑐢𑐵𑑅𑐳𑐵 𑐀𑐨𑐶𑐫𑐵𑐣𑑄 𑐳𑐵𑐬𑑂𑐠𑐎𑐟𑐵 𑐎𑐵𑐂 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐡𑐾𑐱𑐳𑐨𑐵 𑐳𑐡𑐳𑑂𑐫 𑐴𑐬𑐶𑐱𑐬𑐞 𑐮𑐵𑐩𑐶𑐕𑐵𑐣𑐾 𑐧𑑂𑐰𑐣𑐾𑐎𑐸𑐠𑐶𑐣𑐶𑐳𑐾𑑄 𑐩𑐣𑐹𑐟𑐫𑑂𑐟 𑐦𑑀𑐴𑐬 𑐰𑐵𑑄𑐕𑑂𑐰𑐫𑐾𑐐𑐸𑐥𑐵𑐏𑐾𑑄 𑐥𑐣𑐾𑐐𑐸 𑐔𑐾𑐟𑐣𑐵 𑐧𑑂𑐰𑐮𑑄𑐎𑐾𑐐𑐸 𑐰 𑐳𑑂𑐠𑐵𑐣𑐷𑐫 𑐟𑐴𑑄 𑐎𑐵𑐣𑐸𑐣 𑐡𑐫𑐾𑐎𑐵𑑅 𑐎𑐵𑐬𑐰𑐵𑐴𑐷 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐖𑐶𑐮𑑂𑐮𑐵𑐫𑐵 𑐥𑑂𑐬𑐩𑐸𑐏 𑐖𑐶𑐮𑑂𑐮𑐵 𑐀𑐢𑐶𑐎𑐵𑐬𑐷 𑐡𑑂𑐬𑑀𑐞 𑐥𑑀𑐏𑐬𑐾𑐮𑑄 𑐎𑐵𑐬𑑂𑐫𑐫𑑀𑐖𑐣𑐵 𑐳𑐦𑐮 𑐫𑐵𑐫𑐾𑐟 𑐰𑑅𑐐𑐸 𑐳𑐸𑐗𑐵𑐰𑐫𑐵𑐟 𑐡𑐸𑐠𑑂𑐫𑐵𑐎𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐖𑐸𑐂 𑐢𑐵𑐳𑐾𑑄 𑐫𑑀𑐖𑐣𑐵𑐫𑐵 𑐣𑐷𑐟𑐶𑐫𑐵𑐟 𑐣𑑄 𑐴𑐶𑐮𑐵 𑐫𑑄𑐎𑐾𑐩𑐵𑑅 𑐢𑐫𑐵𑐡𑐶𑐮 𑑋
𑐀𑐠𑐾 𑐴𑐾 𑐔𑐵𑑃𑐐𑐸𑐣𑐵𑐬𑐵𑐫𑐞 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐳𑑀𑐩 𑐩𑐶𑐱𑑂𑐬 𑐰 𑐳𑐹𑐬𑑂𑐫𑐰𑐶𑐣𑐵𑐫𑐎 𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥𑐥𑑂𑐬𑐩𑐸𑐏 𑐖𑐸𑐣𑐵 𑐧𑐳𑑂𑐣𑐾𑐟𑑄 𑐏𑑂𑐰𑐥𑐫𑐵𑐟 𑐫𑐾𑑃𑐫𑑂𑐥𑐵𑐏𑐾𑑄 𑐥𑑂𑐬𑐡𑐹𑐲𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐧𑐶𑐫𑐵𑐡𑐶𑐳𑐾𑑄 𑐣𑐐𑐬𑐥𑐵𑐮𑐶𑐎𑐵𑑄 𑐦𑑀𑐴𑐬 𑐫𑐵𑐂𑐥𑐶𑑄𑐟 𑐎𑐜𑐵 𑐎𑐵𑐬𑐰𑐵𑐴𑐷 𑐫𑐵𑐫𑐾𑐐𑐸 𑐣𑐷𑐟𑐶 𑐣𑑂𑐴𑑂𑐫𑑅𑐴𑐾 𑐴𑐫𑐵𑐐𑐸 𑐢𑐫𑐵𑐡𑐶𑐮 𑑋