Read news in NepalBhasa text-- www.hamroschool.com BACK 𑐣𑐾𑐥𑐵𑐮 𑐳𑑄𑐰𑐟𑑂 𑐰𑑂𑐫𑐵𑐰𑐴𑐵𑐬𑐶𑐎 𑐕𑑂𑐫𑐮𑐵𑐧𑐸𑐮𑐵𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐩𑐸𑑃𑐖𑑂𑐫𑐵 𑐖𑐸𑐂𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐾𑐥𑐵𑐮 𑐳𑑄𑐰𑐟𑑂 𑐰𑑂𑐫𑐵𑐰𑐴𑐵𑐬𑐶𑐎 𑐕𑑂𑐫𑐮𑐵𑐧𑐸𑐮𑐵𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐩𑐸𑑃𑐖𑑂𑐫𑐵 𑐖𑐸𑐂𑐐𑐸

𑐫𑐾𑑃- 𑐣𑐾𑐥𑐵𑐮 𑐳𑑄𑐰𑐟𑑂 𑐣𑑂𑐴𑐹𑐡𑑃 𑐬𑐵𑐲𑑂𑐚𑑂𑐬𑐶𑐫 𑐳𑐩𑐵𑐬𑑀𑐴 𑐳𑐩𑐶𑐟𑐶–𑑑𑑑𑑔𑑑𑐫𑐵 𑐐𑑂𑐰𑐳𑐵𑐮𑐫𑑂 𑐰𑐂𑐐𑐸 𑐁𑐂𑐟𑐰𑐵𑑅 𑐕𑐐𑐹 𑐳𑐴𑐮𑐴 𑐩𑐸𑑃𑐖𑑂𑐫𑐵 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐳𑐩𑐶𑐟𑐶𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐐𑐸 𑐮𑑂𑐫𑐵𑐏𑑄 𑐄𑐐𑐸 𑐩𑐸𑑃𑐖𑑂𑐫𑐵 𑐫𑐵𑐫𑐾𑐐𑐸 𑐟𑑂𑐫𑑄𑐐𑐸 𑐏𑑅 𑑋

𑐳𑐩𑐶𑐟𑐶𑑄 𑐠𑐸𑐐𑐸𑐳𑐷 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐡𑐕𑐶𑐫𑑄𑐎𑑄 𑐠𑐷𑐠𑐷 𑐐𑐟𑐶𑐰𑐶𑐢𑐶 𑐫𑐵𑐫𑐾𑐐𑐸 𑐢𑐎𑐵𑑅 𑐎𑑂𑐰𑑅𑐕𑐶𑐄𑐎𑐠𑑄 𑐰𑐂𑐐𑐸 𑐁𑐂𑐟𑐰𑐵𑑅 𑐖𑐹𑐩 𑐀𑐣𑐮𑐵𑐂𑐣𑐫𑐵 𑐩𑐵𑐢𑑂𑐫𑐩𑑄 𑐳𑐣𑐶𑐮𑐫𑐵 𑐏𑐸𑐟𑐵𑑅 𑐂𑐮𑐫𑑂 𑐄𑐐𑐸 𑐩𑐸𑑃𑐖𑑂𑐫𑐵 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋

𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑐫𑐵 𑐰𑐶𑐱𑐾𑐲 𑐄𑐥𑐳𑑂𑐠𑐶𑐟𑐶𑐂 𑐖𑐸𑐂𑐐𑐸 𑐩𑐸𑑃𑐖𑑂𑐫𑐵 𑐰𑐶𑐱𑐾𑐲 𑐫𑐵𑐣𑐵𑑅 𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐳𑑄𑐰𑐟𑑂 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐐𑐸 𑐣𑐶𑑄𑐟𑐶𑑄 𑐕𑐸 𑐐𑐸𑐎𑐠𑑄 𑐥𑐴𑐮 𑐫𑐵𑐫𑐾 𑐦𑐂𑐐𑐸 𑐢𑐂𑐐𑐸 𑐏𑑃𑐫𑑂 𑐎𑐾𑐣𑑂𑐡𑑂𑐬𑐷𑐟 𑐖𑐸𑐂𑐐𑐸 𑐳𑐩𑐶𑐟𑐶𑑄 𑐢𑐵𑑅𑐐𑐸 𑐡𑐸 𑑋 𑐳𑐴𑐮𑐴 𑐩𑐸𑑃𑐖𑑂𑐫𑐵𑐫𑑂 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐰𑐶𑐲𑐫𑐫𑑂 𑐀𑐢𑑂𑐫𑐫𑐣, 𑐀𑐣𑐸𑐳𑐣𑑂𑐢𑐵𑐣 𑐫𑐵𑐣𑐵𑐔𑑂𑐰𑑄𑐥𑐶𑑄 𑐰𑐶𑐖𑑂𑐘 𑐰𑑂𑐫𑐎𑑂𑐟𑐶𑐟𑑂𑐰𑐫𑐵 𑐣𑑄 𑐳𑐴𑐨𑐵𑐐𑐶𑐟𑐵 𑐡𑐂 𑑋

𑐣𑐾𑐥𑐵𑐮𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐔𑐣𑑂𑐡𑑂𑐬𑐩𑐵𑐳𑐎𑐠𑑄 𑐣𑐾𑐥𑐵𑐮 𑐳𑑄𑐰𑐟𑑂 𑐕𑑂𑐫𑐮𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐖𑐎 𑐩𑐏𑐳𑐾 𑐣𑐾𑐰𑐵𑑅𑐟𑐫𑑂𑐳𑑄 𑐴𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐏𑑅𑐔𑐏𑑅, 𑐖𑐵𑐟𑑂𑐬𑐵, 𑐥𑐬𑑂𑐰 𑐟𑐎𑑄 𑐔𑐣𑑂𑐡𑑂𑐬𑐩𑐵𑐳𑐫𑐵 𑐮𑐶𑐢𑑄𑐳𑐵𑐫𑑂 𑐴𑐾 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐩𑐾𑐏𑐾 𑐀𑐩𑐾𑐬𑐶𑐎𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐳𑑁𑐬𑑂𑐫𑐩𑐵𑐳 𑐎𑐠𑑄 𑐣𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐰𑑂𑐫𑐵𑐰𑐴𑐵𑐬𑐶𑐎 𑐬𑐸𑐥𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾 𑐖𑐶𑐄 𑐏𑑃𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐡𑐸 𑑋

𑐁𑐟𑐎 𑐔𑐣𑑂𑐡𑑂𑐬𑐩𑐵𑐳𑐎𑐠𑑄 𑐖𑐎 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐕𑑂𑐫𑐮𑐵𑐧𑐸𑐮𑐵 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸𑐮𑐶𑐂 𑐁𑑅 𑐰𑐫𑐵𑑅 𑐳𑑁𑐬𑑂𑐫𑐩𑐵𑐳𑐎𑐠𑑄 𑐣𑑄 𑐠𑐸𑐎𑐶𑐫𑐵𑐟 𑐕𑑂𑐫𑐮𑐾 𑐖𑐶𑐄 𑐢𑐂𑐐𑐸 𑐏𑑃 𑐥𑐶𑐴𑐵𑑄 𑐰𑑅𑐐𑐸𑐮𑐶𑑄 𑐠𑑂𑐰 𑐴𑐾 𑐰𑐶𑐲𑐫𑐫𑑂 𑐳𑐴𑐮𑐴 𑐩𑐸𑑃𑐖𑑂𑐫𑐵 𑐎𑐾𑐣𑑂𑐡𑑂𑐬𑐷𑐟 𑐖𑐸𑐂𑐐𑐸 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS