Read news in NepalBhasa text-- www.hamroschool.com BACK 𑐜𑐧𑑂𑐮𑐸𑐊𑐣𑐌 𑐗𑐶𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐨𑐬𑑂𑐔𑐸𑐀𑐮 𑐳𑑄𑐰𑐵𑐡 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐜𑐧𑑂𑐮𑐸𑐊𑐣𑐌 𑐗𑐶𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐨𑐬𑑂𑐔𑐸𑐀𑐮 𑐳𑑄𑐰𑐵𑐡

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐰𑐬𑑂𑐮𑑂𑐜 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐳𑐣 (𑐜𑐧𑑂𑐮𑐸𑐊𑐣𑐌) 𑑑𑑐 𑐡𑑃 𑐎𑑂𑐫𑑄𑐐𑐸 𑐮𑐳𑐟𑐵𑐫𑑂 𑐕𑐐𑐹 𑐨𑐬𑑂𑐔𑐸𑐀𑐮 𑐳𑑄𑐰𑐵𑐡 𑐖𑑂𑐫𑐵𑐗𑑂𑐰𑑅 𑐖𑐸𑐮 𑑋 𑐎𑑀𑐬𑑀𑐣𑐵 𑐨𑐵𑐂𑐬𑐳 𑐳𑑄𑐎𑑂𑐬𑐩𑐞𑐫𑐵 𑐩𑐴𑐵𑐩𑐵𑐬𑐷𑐫𑐵 𑐎𑐵𑐬𑐞𑑄 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐖𑑂𑐫𑐵𑐗𑑂𑐰𑑅 𑐩𑐫𑐵𑐳𑐾𑑄 𑐨𑐬𑑂𑐔𑐸𑐀𑐮 𑐩𑐵𑐢𑑂𑐫𑐩𑑄 𑐳𑑄𑐰𑐵𑐡 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐠𑑅𑐐𑐸 𑐰𑐵𑐬𑑂𑐲𑐶𑐎𑑀𑐟𑑂𑐳𑐰 𑐴𑑄𑐐𑐸 𑐏𑑅 𑑋

𑐜𑐧𑑂𑐮𑐸𑐊𑐣𑐌𑐫𑐵 𑐣𑐵𑐫𑑅 𑐳𑐶𑐖𑐣 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑑅 ‘𑐐𑑂𑐮𑑀𑐧𑐮 𑐣𑐾𑐰𑐵𑑅 : 𑐣𑑂𑐴𑑂𑐫𑑅𑐣𑐾𑐫𑐵 𑐮𑑃𑐥𑐸’ 𑐰𑐶𑐲𑐫𑐫𑑂 𑐎𑐾𑐣𑑂𑐡𑑂𑐬𑐷𑐟 𑐖𑐸𑐫𑐵𑑅 𑐰𑑄𑐐𑐸 𑐜𑐶𑐳𑐩𑑂𑐧𑐬 𑑓𑑐 𑐰 𑑓𑑑 𑐟𑐵𑐬𑐶𑐏 𑐣𑐶𑐣𑑂𑐴𑐸𑐫𑑄𑐎𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐜𑐵. 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐨𑐬𑑂𑐔𑐸𑐀𑐮 𑐳𑑄𑐰𑐵𑐡 𑐖𑑂𑐫𑐵𑐗𑑂𑐰𑑅𑐫𑐵 𑐩𑐵𑐢𑑂𑐫𑐩𑑄 𑐥𑐵𑐮𑐨𑐵𑐲𑐵𑐫𑐵𑐟 𑐮𑑂𑐫𑑄𑐎𑐾𑐟 𑐰 𑐠𑐸𑐎𑐶𑐫𑐵𑐟 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫𑐳𑑂𑐟𑐬𑐫𑑂 𑐟𑐎𑑄 𑐣𑑂𑐫𑑄𑐎𑑀 𑐫𑑄𑐎𑐷𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐀𑐬𑑂𑐐𑐣𑐵𑐂𑐖𑐾𑐳𑐣𑑄 𑐀𑑄𑐐𑑂𑐬𑐾𑐖𑐷 𑐮𑐐𑐵𑐫𑐟 𑐩𑐾𑐩𑐾𑐐𑐸 𑐨𑐵𑐳𑑄 𑐣𑑄 𑐀𑐣𑐸𑐰𑐵𑐡𑐫𑐵 𑐩𑐵𑐢𑑂𑐫𑐩𑑄 𑐨𑐹𑐩𑐶𑐎𑐵 𑐩𑑂𑐴𑐶𑐟𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐩𑐹𑐰𑐎𑑂𑐟𑐵𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐦𑑂𑐬𑐵𑐣𑑂𑐳𑐫𑐵 𑐥𑑂𑐬𑑀𑐦𑐾𑐳𑐬 𑐜𑐵. 𑐖𑐾𑐬𑐵𑐬𑑂𑐜 𑐚𑑀𑐦𑐶𑐣𑑄 ‘𑐐𑐸𑐠𑐶𑐫𑐵 𑐢𑐵𑐬𑑂𑐩𑐶𑐎 𑐳𑑄𑐳𑐵𑐬’ 𑐰𑐶𑐲𑐫𑐫𑑂 𑐣𑑂𑐰𑐔𑐸 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑐵 𑐳𑑂𑐰𑑄𑐐𑐹 𑐥𑐎𑑂𑐲 𑐩𑐴𑐟𑑂𑐰𑐥𑐹𑐬𑑂𑐞 𑐖𑐹𑐐𑐸 𑐢𑐵𑐳𑐾𑑄 𑐣𑐾𑐰𑐵𑑅 𑐳𑐨𑑂𑐫𑐟𑐵𑐫𑐵 𑐟𑐠𑑂𑐫 𑐣𑐾𑐥𑐵𑑅, 𑐖𑑂𑐫𑐵𑐥𑐸 𑐳𑐩𑐸𑐡𑐵𑐫𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐥𑐎𑑂𑐲 𑐰 𑐂𑐥𑐶𑑄𑐮𑐶𑐳𑐾 𑐳𑑂𑐰𑐵𑐥𑐹 𑐡𑐸𑐐𑐸 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢 𑐔𑐬𑑂𑐫𑐵 𑐥𑑂𑐫𑐵𑐏𑑄 𑐰 𑐳𑑄𑐐𑐷𑐟𑐫𑐵 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐎𑐸𑐮𑐵𑐡𑐷𑐐𑐸 𑐏𑑅 𑑋

𑐜𑐧𑑂𑐮𑐸𑐊𑐣𑐌𑐫𑐵 𑐰𑐬𑐶𑐲𑑂𑐛 𑐄𑐥𑐵𑐢𑑂𑐫𑐎𑑂𑐲 𑐜𑐵. 𑐣𑐵𑐬𑐵𑐫𑐞 𑐬𑐵𑐖𑐨𑐞𑑂𑐜𑐵𑐬𑐷𑑄 𑐕𑐐𑐹 𑐡𑐱𑐎 𑐣𑑂𑐴𑑂𑐫𑑅 𑐥𑐮𑐶𑐳𑑂𑐠𑐵 𑐖𑐹𑐐𑐸 𑐳𑑄𑐐𑐛𑐣𑑄 𑐠𑑂𑐰 𑐀𑐰𑐢𑐶𑐂 𑐫𑐵𑑅𑐐𑐸 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐰 𑐐𑐟𑐶𑐰𑐶𑐢𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐱𑐶𑐎𑑂𑐲𑐵, 𑐨𑐵𑐲𑐵, 𑐎𑐮𑐵-𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵 𑐮𑐐𑐵𑐫𑐟𑐫𑐵 𑐰𑐶𑐲𑐫𑐫𑑂 𑐗𑐶𑑄𑐳𑑂𑐰𑑄𑐐𑐹 𑐡𑐾𑐫𑑂𑐫𑐵 𑐣𑐷𑐳𑑂𑐰𑐩𑑂𑐴𑐾𑐳𑐶𑐣𑑄 𑐖𑑂𑐫𑐵𑐥𑑁 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋 𑐳𑑄𑐰𑐵𑐡 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐥𑐵𑐏𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐥𑐶𑑄 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛, 𑐣𑐬𑐾𑐱 𑐟𑐵𑐩𑑂𑐬𑐵𑐎𑐵𑐬, 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫, 𑐬𑐵𑐖𑐨𑐵𑐃 𑐖𑐎𑑅𑐩𑐶, 𑐁𑐮𑑀𑐎𑐳𑐶𑐡𑑂𑐢𑐶 𑐟𑐸𑐮𑐵𑐢𑐬 𑐮𑐐𑐵𑐫𑐟𑑄 𑐧𑑂𑐰𑐟𑐶 𑐎𑐫𑐵𑐡𑐷𑐐𑐸 𑐏𑑅 𑑋

𑐁𑐥𑐵𑐮𑑄 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐟𑐵, 𑐳𑐵𑐴𑐶𑐟𑑂𑐫𑐶𑐎 𑐰𑑂𑐫𑐎𑑂𑐟𑐶𑐟𑑂𑐰, 𑐎𑐵𑐬𑑂𑐫𑐎𑐬𑑂𑐟𑐵, 𑐀𑐨𑐶𑐫𑐣𑑂𑐟𑐵, 𑐳𑑄𑐬𑐎𑑂𑐲𑐞𑐎𑐬𑑂𑐩𑐶𑐟𑐫𑑂𑐐𑐸 𑐣𑑄 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐵𑐫𑑅 𑐱𑑂𑐬𑐾𑐲𑑂𑐛𑑄 𑐀𑐬𑑂𑐐𑐣𑐵𑐂𑐖𑐾𑐳𑐣𑐫𑐵 𑐳𑑄𑐳𑑂𑐠𑐵𑐥𑐎 𑐡𑐫𑐵𑐬𑐟𑑂𑐣 𑐱𑐵𑐎𑑂𑐫𑐵𑐟 𑐜𑐧𑑂𑐮𑐸𑐊𑐣𑐌𑐫𑐵 𑐳𑑄𑐬𑐎𑑂𑐲𑐎 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐶𑐣𑑂𑐴𑐸𑐫𑑄𑐎𑑄 𑐖𑐹𑐐𑐸 𑐳𑑄𑐰𑐵𑐡𑐫𑐵 𑐣𑑂𑐴𑐵𑐥𑐵𑑄𑐐𑐸 𑐣𑑂𑐴𑐶 ‘𑐱𑐶𑐎𑑂𑐲𑐵’ 𑐰𑐶𑐲𑐫𑐫𑑂 𑐧𑐾𑐮𑐵𑐫𑐟𑐫𑐵 𑐀𑐎𑑂𑐳𑐦𑑀𑐬𑑂𑐜 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐜𑐵. 𑐄𑐩𑐵 𑐥𑑂𑐬𑐢𑐵𑐣𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐣𑑂𑐴𑐵𑐥𑐵𑑄𑐐𑐸 𑐳𑐟𑑂𑐬𑐫𑑂 𑐣𑐾𑐥𑐵𑑅𑐥𑐵𑐏𑐾𑑄 𑐳𑐸𑐣𑐶𑐟𑐵 𑐜𑑄𑐐𑑀𑐮𑑄 𑐣𑐾𑐥𑐵𑐮𑐨𑐵𑐲𑐵 𑐥𑑂𑐬𑐱𑐶𑐎𑑂𑐲𑐞, 𑐧𑐾𑐮𑐵𑐫𑐟𑐫𑐵 𑐥𑑂𑐬𑐞𑐶𑐱𑐵 𑐱𑐵𑐎𑑂𑐫𑑄 𑐧𑐾𑐮𑐵𑐫𑐟𑐫𑑂 𑐬𑐘𑑂𑐖𑐣𑐵 𑐮𑐶𑐥𑐶 𑐳𑑂𑐫𑐣𑐾𑐖𑑂𑐫𑐵𑐫𑑂 𑐏𑐣𑐾 𑐡𑐸𑐐𑐸 𑐳𑐩𑐳𑑂𑐫𑐵, 𑐫𑐸𑐎𑑂𑐟𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐩𑐔𑐵 𑐳𑐵𑐴𑐶𑐟𑑂𑐫 𑐳𑐩𑑂𑐧𑐣𑑂𑐢𑐷 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐖𑑂𑐫𑐵𑐗𑑂𑐰𑑅’𑐨𑐵𑐲𑐵’ 𑐰𑐶𑐲𑐫𑐫𑑂 𑐜𑐧𑑂𑐮𑐸𑐊𑐣𑐌𑐫𑐵 𑐣𑑂𑐰𑐎𑐸 𑐎𑐺𑐲𑑂𑐞 𑐔𑐏𑐸𑑄𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐫𑐵 𑐳𑐟𑑂𑐬𑐫𑑂 𑐣𑐾𑐥𑐵𑑅𑐥𑐵𑐏𑐾𑑄 𑐬𑐸𑐎𑑂𑐳𑐵𑐣𑐵 𑐎𑐥𑐵𑐮𑐷𑑄 𑐳𑐩𑐮𑐶𑑄𑐐𑐷 𑐀𑐢𑐶𑐎𑐵𑐬 𑐰 𑐮𑐿𑑄𑐐𑐶𑐎 𑐰𑐶𑐱𑐾𑐲𑐟𑐵, 𑐬𑐳𑐶𑐫𑐵𑐫𑐵 𑐔𑑂𑐰𑐩𑐶 𑐎𑐺𑐲𑑂𑐞𑐥𑑂𑐬𑐎𑐵𑐱 𑐱𑑂𑐬𑐾𑐲𑑂𑐛𑑄 𑐬𑐸𑐳𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐂𑐟𑐶𑐴𑐵𑐳, 𑐜𑐵. 𑐳𑐸𑐨𑐵𑐲 𑐥𑑂𑐬𑐖𑐵𑐥𑐟𑐶𑑄 𑐣𑐾𑐥𑐵𑐮𑐨𑐵𑐲𑐵𑐫𑐵𑐟 𑐜𑐶𑐖𑐶𑐚𑐮𑐵𑐂𑐖𑑂𑐜 𑐫𑐵𑐫𑐾𑐐𑐸 𑐩𑐴𑐟𑑂𑐰𑐫𑐵 𑐧𑐵𑐬𑐾 𑐰𑑂𑐫𑐵𑐏𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐀𑐎𑑂𑐳𑐦𑑀𑐬𑑂𑐜 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐥𑑂𑐬𑐵. 𑐜𑐵. 𑐜𑐾𑐨𑐶𑐜 𑐊𑐣 𑐐𑐾𑐮𑑂𑐣𑐬𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐳𑐩𑑂𑐩𑐾𑐮𑐣𑐫𑐵 𑐣𑐶𑐣𑑂𑐴𑐸𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 ‘𑐳𑐩𑑂𑐥𑐡𑐵’ 𑐰𑐶𑐲𑐫𑐫𑑂 𑐳𑐟𑑂𑐬𑐫𑑂 𑐎𑐵𑐣𑐹𑐣 𑐰𑑂𑐫𑐰𑐳𑐵𑐫𑐷 𑐮𑐶𑐱𑐵 𑐜𑑄𑐐𑑀𑐮𑑄 𑐳𑐩𑑂𑐥𑐡𑐵𑐳𑑂𑐠𑐮 𑐰 𑐱𑐶𑐎𑑂𑐲𑐵𑐰𑐶𑐡𑑂 𑐣𑐵𑐥𑑄 𑐀𑐨𑐶𑐫𑐣𑑂𑐟𑐵 𑐳𑐸𑐥𑑂𑐬𑐶𑐫𑐵 𑐩𑐵𑐣𑐣𑑂𑐢𑐬𑑄 𑐳𑑁𑐬𑑂𑐫𑐩𑐵𑐣𑐎𑐠𑑄 𑐣𑐾𑐥𑐵𑐮 𑐳𑑄𑐰𑐟𑑂 𑐳𑐩𑑂𑐧𑐣𑑂𑐢𑐷, 𑐜𑐧𑑂𑐮𑐸𑐊𑐣𑐌 𑐣𑐾𑐥𑐵𑑅 𑐎𑐰𑑅𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐥𑐸𑐲𑑂𑐎𑐬 𑐩𑐵𑐠𑐾𑐩𑐵𑑄 𑐳𑑂𑐰𑐣𑐶𑐐𑐮𑐫𑑂 𑐖𑐸𑐫𑐵𑐔𑑂𑐰𑐐𑐸 𑐀𑐟𑐶𑐎𑑂𑐬𑐩𑐞 𑐰 𑐊𑐳𑑂𑐚𑑀𑐣𑐶𑐫𑐵𑐫𑐵 𑐳𑑀𑐨𑐶𑐟 𑐱𑐵𑐎𑑂𑐫𑑄 𑐣𑐾𑐰𑐵𑑅𑐟𑐫𑑂 𑐐𑐸𑐠𑐶 𑐡𑐸𑐣𑐾 𑐡𑐸𑐐𑐸 𑐣𑐎𑐵𑐬𑐵𑐟𑑂𑐩𑐎 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐔𑐬𑑂𑐔𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐎𑐠𑑄 𑐴𑐾 𑐳𑑄𑐳𑑂𑐠𑐵𑐫𑐵 𑐮𑐶𑐄 𑐕𑑂𑐫𑐵𑐘𑑂𑐖𑐾 𑐣𑐵𑐥𑑄 𑐣𑐾𑐰𑐵𑑅 𑐩𑐶𑐳𑐵 𑐡𑐧𑐹𑐫𑐵 𑐣𑐵𑐫𑑅 𑐬𑐱𑑂𑐩𑐶𑐮𑐵 𑐥𑑂𑐬𑐖𑐵𑐥𑐟𑐶𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 ‘𑐳𑐎𑑂𑐬𑐶𑐫𑐟𑐵’ 𑐰𑐶𑐲𑐫𑐫𑑂 𑐖𑐹𑐐𑐸 𑐳𑑄𑐰𑐵𑐡 𑐖𑑂𑐫𑐵𑐗𑑂𑐰𑐮𑐫𑑂 𑐳𑐾𑐨 𑐣𑐾𑐥𑐵𑑅 𑐨𑑂𑐫𑐵𑐮𑐷𑐫𑐵 𑐎𑐺𑐥𑐾𑐣𑑂𑐡𑑂𑐬 𑐀𑐩𑐵𑐟𑑂𑐫, 𑐣𑐾𑐥𑐵𑑅𑐫𑐵 𑐮𑐸𑐩𑐸 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣 𑐧𑐵𑐬𑐾 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐬𑐵𑐳 𑐖𑑀𑐱𑐷𑑄 𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴 𑐰 𑐣𑐾𑐰𑐵𑑅𑐟𑐫𑑂𑐟 𑐮𑐵𑐎𑐹𑐐𑐸 𑐥𑑂𑐬𑐨𑐵𑐰 𑐰 𑐬𑐵𑐲𑑂𑐚𑑂𑐬𑐶𑐫 𑐣𑐾𑐰𑐵𑑅 𑐏𑐮𑑅 𑐂𑐖𑐬𑐵𑐫𑐮𑐫𑐵 𑐳𑑄𑐬𑐎𑑂𑐲𑐎 𑐣𑐬𑐾𑐱 𑐣𑐾𑐰𑐵𑐮𑑄 𑐣𑑄 𑐠𑑅𑐐𑐸 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐳𑐟𑑂𑐬 𑐡𑐧𑐹𑐫𑐵 𑐳𑑄𑐬𑐎𑑂𑐲𑐎 𑐱𑐵𑐎𑑂𑐫𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 ‘𑐳𑑄𑐳𑑂𑐎𑐺𑐟𑐶’ 𑐰𑐶𑐲𑐫𑐫𑐵𑐟 𑐎𑐫𑐵𑑅 𑐳𑐴𑐮𑐴 𑐖𑐹𑐐𑐸 𑐏𑑅 𑑋 𑐠𑐸𑐐𑐸 𑐳𑐟𑑂𑐬𑐫𑑂 𑐣𑐾𑐥𑐵𑑅𑐥𑐵𑐏𑐾𑑄 𑐳𑐴 𑐥𑑂𑐬𑐵𑐢𑑂𑐫𑐵𑐥𑐎 𑐳𑐵𑐰𑐶𑐟𑑂𑐬𑐷 𑐱𑑂𑐬𑐾𑐲𑑂𑐛𑑄 𑐥𑑂𑐰𑑅 𑐖𑐵𑐟𑐶, 𑐰𑐶𑐡𑑂𑐫𑐵𑐬𑑂𑐠𑐷𑐥𑐶𑑄 𑐚𑐶𑐣𑐵 𑐴𑑀 𑐰 𑐜𑐵. 𑐊𑐮𑐶𑐖𑐵 𑐮𑐵𑐄𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐥𑐬𑐩𑑂𑐥𑐬𑐵𑐐𑐟 𑐥𑑂𑐫𑐵𑐏𑑄 𑐧𑐵𑐬𑐾 𑐥𑑂𑐬𑐳𑑂𑐟𑐸𑐟𑐶 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS