Read news in NepalBhasa text-- www.hamroschool.com BACK 𑐁𑐥𑑂𑐬𑐰𑐵𑐳𑐣– 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂 𑐎𑐵𑐮 𑐏𑑅 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐥𑑂𑐬𑐰𑐵𑐳𑐣– 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂 𑐎𑐵𑐮 𑐏𑑅

𑐗𑐷𑐠𑐵𑐫𑑂 𑐳𑑂𑐰𑐣𑐶𑐐𑐮𑐫𑑂 𑐳𑑂𑐰𑐣𑐶𑐐𑑅 𑐥𑐶𑐣𑐾𑐫𑐵𑐥𑐶𑑄 𑐩𑐣𑐹𑐟 𑐏𑐸𑐳𑐶𑐧𑐵𑑅 𑐰𑐫𑐾 𑐠𑐾𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐣 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂𑐐𑐸 𑐮𑑂𑐫𑐵𑑅 𑐣𑑂𑐴𑐫𑑂𑐐𑐹 𑐔𑑂𑐫𑐵𑐐𑐹 𑐮𑐵𑐏 𑐖𑐎 𑐏𑑅 𑑋 𑐥𑐶𑐣𑐾𑑄 𑐰𑐫𑐵𑐔𑑂𑐰𑐥𑐶𑑄 𑐢𑐵𑑅𑐳𑐵 𑑕𑑐÷𑑖𑑐 𑐮𑐵𑐏 𑐠𑑂𑐫𑐣𑐾 𑐢𑐸𑑄𑐎𑐮 𑑋 𑐥𑐶𑐣𑐾𑑄 𑐰𑐫𑐵𑑅 𑐔𑑂𑐰𑑄𑐰𑐫𑐵𑐔𑑂𑐰𑑄𑐐𑐸𑐫𑐵𑐟 𑐁𑐥𑑂𑐬𑐰𑐵𑐳𑐣 𑐢𑐵𑐂𑐳𑐵, 𑐥𑐶𑐣𑐾𑑄 𑐰𑐫𑐵𑐔𑑂𑐰𑑄𑐥𑐶𑑄𑐟 𑐁𑐥𑑂𑐬𑐵𑐰𑐵𑐳𑐷 𑐢𑐵𑐂 𑑋

𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐁𑐥𑑂𑐬𑐰𑐵𑐳𑐣𑑄 𑐫𑐵𑐣𑐵𑑅 𑐳𑑂𑐰𑐣𑐶𑐐𑐮𑐫𑑂 𑐫𑐎𑑂𑐰 𑐫𑐎𑑂𑐰 𑐳𑐩𑐳𑑂𑐫𑐵 𑐥𑐶𑐴𑐵𑑄 𑐰𑐫𑐵𑐔𑑂𑐰𑐣 𑑋 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵 𑐮𑐵 𑐗𑐷 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅 𑐖𑐵𑐟𑐶 𑐴𑐾 𑐩𑐡𑐫𑐵 𑐰𑐣𑐾𑐟𑑂𑐫𑑄𑐐𑐸 𑐡𑐸, 𑐣𑑂𑐴𑐣𑐵 𑐰𑐣𑐾𑐟𑑂𑐫𑑄𑐐𑐸 𑐡𑐸, 𑐳𑐶𑐣𑐵 𑐰𑐣𑐾𑐟𑑂𑐫𑑄𑐐𑐸 𑐡𑐸 𑑋

𑐁𑐡𑐶𑐰𑐵𑐳𑐶 𑐢𑐫𑐵𑐐𑐸 𑐕𑐸 ?
𑐳𑑂𑐰𑐣𑐶𑐐𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐔𑑂𑐰𑑄𑐰𑑅𑐥𑐶𑑄, 𑐳𑑂𑐰𑐣𑐶𑐐𑑅 𑐡𑐫𑐾𑐎𑐹𑐥𑐶𑑄 𑐗𑐷 𑐣𑐾𑐰𑐵𑑅𑐟 𑐏𑑅 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐗𑐷 𑐣𑐾𑐰𑐵𑑅𑐟𑐫𑑂𑐟 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐧𑐵𑐳𑐶 𑐢𑐵𑐂 𑑋 𑐳𑑂𑐰𑐣𑐶𑐐𑑅𑐫𑐵𑐟 𑐣𑐾𑐰𑐵𑑅𑐟𑐫𑑂 𑐁𑐡𑐶𑐨𑐹𑐩𑐷 𑐢𑐵𑐂 𑑋

𑐣𑐾𑐰𑐵𑑅 𑐢𑐿𑐥𑐶𑑄 𑐳𑐸 ?
𑐣𑐾𑐰𑐵𑑅 𑐢𑐫𑐵𑐥𑐶𑑄 𑐩𑐹𑐮 𑐬𑐸𑐥𑑄 𑐎𑐶𑐬𑐵𑑃𑐟 𑐥𑐬𑐶𑐰𑐵𑐬𑐫𑐵 𑐣𑐾𑐥𑐵𑐬 𑐖𑐵𑐟𑐶 𑐏𑑅 𑐢𑐵𑐂 𑑋 𑐠𑐸𑐎𑐷 𑐩𑑂𑐫𑐾𑐥𑐹, 𑐳𑐵𑐥𑐹, 𑐱𑐵𑐎𑑂𑐫, 𑐠𑐎𑐸𑐬𑐷, 𑐮𑐶𑐔𑑂𑐕𑐰𑐶, 𑐩𑐮𑑂𑐮, 𑐩𑐿𑐠𑐶𑐮𑐟 𑐮𑑂𑐰𑐵𑐎𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐢𑐫𑐵𑐥𑐶𑑄 𑐕𑐐𑐹 𑐴𑐾 𑐴𑐶 𑐀𑐠𑐰𑐵 𑐣𑐱𑑂𑐮𑐫𑐵 𑐖𑐵𑐟𑐶 𑐩𑐏𑐸 𑑋

𑐁𑐡𑐶𑐰𑐵𑐳𑐶 𑐣𑐾𑐰𑐵𑑅𑐟 𑐐𑐸𑐮𑐶 𑐡𑐸 ?
𑐣𑐾𑐥𑐵𑐮𑐫𑑂 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟 𑑑𑑔÷𑑑𑑕 𑐮𑐵𑐏𑐟𑐶 𑐡𑐸 𑑋 𑐳𑑂𑐰𑐣𑐶𑐐𑑅 𑐡𑐸𑐣𑐾 𑐢𑐵𑑅𑐳𑐵 𑐣𑐾𑐰𑐵𑑅𑐟𑐫𑑂 𑐮𑑂𑐫𑐵𑑅 𑑗÷𑑘 𑐮𑐵𑐏 𑐟𑐶 𑐖𑐎 𑐡𑐸 𑑋 𑐰𑐶.𑐳𑑄. 𑑒𑑐𑑒𑑐 𑐳𑑄 𑐳𑑂𑐰𑐣𑐶𑐐𑐮𑐫𑑂 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟 𑑕𑑐% 𑐳𑐶𑐧𑐾𑑄 𑐀𑐥𑑂𑐰𑑅 𑐡𑐸 𑑋 𑐰𑐶.𑐳𑑄. 𑑒𑑐𑑖𑑘 𑐫𑐵 𑐖𑐣𑐐𑐞𑐣𑐵 𑐎𑐠𑑄 𑐳𑑂𑐰𑐣𑐶𑐐𑐮𑐫𑑂 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂 𑐮𑑂𑐫𑐵𑑅 𑑒𑑓% 𑐫𑑂 𑐎𑐸𑐴𑐵𑑄 𑐰𑐫𑐾 𑐢𑐸𑑄𑐎𑐮 𑑋 𑐁𑐥𑑂𑐬𑐰𑐵𑐳𑐶𑐟 𑐫𑐎𑑂𑐰 𑐡𑐸𑐴𑐵𑑄𑐰𑑅𑐐𑐸𑐮𑐶𑑄 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂 𑐮𑑂𑐫𑐵𑑅 𑐎𑐩 𑐖𑐹𑐰𑑄𑐐𑐸 𑐏𑑅 𑑋

𑐁𑐥𑑂𑐬𑐰𑐵𑐳𑐣 𑐀𑐥𑑂𑐰𑑅𑐐𑐸 𑐮𑐵𑐎𑐶 𑐬𑐵𑐖𑑂𑐫 𑐳𑐟𑑂𑐟𑐵𑑄 𑐀𑐥𑑂𑐰𑐫𑐾𑐎𑐹𑐐𑐸 ? 𑐁𑐥𑑂𑐬𑐰𑐵𑐳𑐣 𑐀𑐥𑑂𑐰𑑅𑐐𑐸 𑐩𑐏𑐸 𑐀𑐥𑑂𑐰𑐫𑐾𑐎𑐹𑐐𑐸 𑐏𑑅 𑑋 𑐳𑑂𑐰𑐣𑐶𑐐𑐮𑐫𑑂 𑐖𑐣𑐳𑑄𑐏𑑂𑐫𑐵 𑐀𑐥𑑂𑐰𑑅 𑐖𑐸𑐂𑐢𑐸𑑄𑐎𑐮 𑑋 𑐳𑑂𑐰𑐣𑐶𑐐𑑅 𑐀𑐳𑑂𑐟𑐰𑑂𑐫𑐳𑑂𑐟 𑐖𑐸𑐂𑐢𑐸𑑄𑐎𑐮 𑑋 𑐠𑐣 𑐟𑑂𑐰𑐣𑐾𑐐𑐸 𑐮𑑅 𑐟𑐎𑑄 𑐴𑐾 𑐩𑐐𑐵𑐫𑐾 𑐢𑐸𑑄𑐎𑐮 𑑋 𑐮𑑅 𑐢𑐫𑐵𑐐𑐸 𑐣𑑂𑐴𑐶𑑄𑐣𑑂𑐴𑐶𑑄 𑐴𑐾 𑐩𑐡𑐫𑐾𑐎𑑄 𑐩𑐐𑐵𑑅 𑑋 𑐟𑐬 𑐳𑐬𑐎𑐵𑐬𑑄 𑐔𑑂𑐫𑐵𑐣𑑂𑐴𑐸𑐂 𑐕𑐎𑑅 𑐊𑐎 𑐑𑐞𑑂𑐚𑐵 𑐮𑑅 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰 𑐣𑑄 𑐜𑐶𑐥 𑐧𑑀𑐬𑐶𑐒𑐫𑐵 𑐮𑑅 𑐧𑐶𑐫𑐵 𑐔𑑂𑐰𑑄𑐐𑐸 𑐏𑑅 𑑋 𑐜𑐶𑐥 𑐧𑑀𑐬𑐶𑐒 𑐫𑐵𑐣𑐵𑑅 𑐫𑐎𑑂𑐰 𑐮𑑅 𑐮𑐶𑐎𑐵𑑅𑐐𑐸𑐮𑐶𑑄 𑐳𑑂𑐰𑐣𑐶𑐐𑑅𑐫𑐵 𑐧𑑃 𑐟𑐳𑐎𑑄 𑐎𑐩𑐖𑑀𑐬 𑐖𑐸𑐂𑐢𑐸𑑄𑐎𑐮 𑑋 𑐮𑐵𑐖𑐶𑐩𑑂𑐥𑐵𑐟 𑐮𑐵𑐐𑐵 𑑒 𑐂𑐣𑑂𑐔 𑐨𑐵𑐳𑐫𑑂 𑐖𑐸𑐂𑐢𑐸𑑄𑐎𑐮 𑑋 𑐟𑐬 𑐳𑐬𑐎𑐵𑐬𑐫𑐵𑐟 𑐕𑐸𑑄 𑐴𑐾 𑐩𑐟𑐮𑐧 𑐩𑐡𑐸 𑑋 𑐮𑑅 𑐟𑑂𑐰𑐣𑐾 𑐩𑐏𑑄𑐳𑐵 𑐩𑐏𑑄, 𑐳𑑂𑐰𑐣𑐶𑐐𑑅 𑐳𑑂𑐫𑑄𑐳𑐵 𑐳𑑂𑐫𑑄, 𑐏𑐶𑐟𑐸𑐐𑐵 𑐠𑑅 𑐴𑐸𑑃 𑐫𑐵𑐣𑐵𑑅 𑐁𑐥𑑂𑐬𑐰𑐵𑐳𑐣 𑐟𑐔𑑂𑐰𑐫𑐾𑐎𑐵 𑐔𑑂𑐰𑑄𑐐𑐸 𑐡𑐸 𑑋 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟 𑐀𑐮𑑂𑐥𑐩𑐟𑐫𑑂 𑐮𑐵𑐎𑐾𑐟 𑐴𑐾 𑐠𑐠𑐾 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑁𑐎𑐣𑑂𑐴𑐾 𑐳𑑂𑐰𑐣𑐶𑐐𑐮𑐫𑑂 𑐨𑐶𑐟𑑂𑐬𑐷 𑐱𑐴𑐬𑐫𑐵 𑐥𑐶𑐣𑐾𑐫𑐵𑐐𑐸 𑐰𑐜𑐵𑐟 𑐐𑐿𑐬 𑐁𑐡𑐶𑐰𑐵𑐳𑐶 𑐣𑐾𑐰𑐵𑑅𑐟𑐳𑐾𑑄 𑐎𑐧𑑂𑐖𑐵 𑐫𑐵𑐫𑐾 𑐢𑐸𑑄𑐎𑐮 𑑋 𑐁𑐥𑑂𑐬𑐰𑐵𑐳𑐣 𑐧𑐝𑐾 𑐖𑐸𑐫𑐵𑐰𑑄𑐮𑐶𑐳𑐾 𑐨𑐶𑐟𑑂𑐬𑐷 𑐱𑐴𑐬 𑐡𑐸𑐣𑐾 𑐣𑑄 𑐐𑐿𑐬𑐣𑐾𑐰𑐵𑑅𑐟𑐳𑐾𑑄 𑐴𑐾 𑐎𑐧𑑂𑐖𑐵 𑐫𑐵𑑅𑐰𑐂𑐟𑐶𑐣𑐶 𑑋 𑐳𑑂𑐰𑐣𑐶𑐐𑑅𑐫𑐵 𑐖𑐣𑐳𑑄𑐏𑑂𑐫𑐵 𑐊𑐎 𑐎𑐬𑑀𑐜 𑐠𑑂𑐫𑑄𑐎𑐵𑑅 𑐩𑐾𑐐𑐵𑐳𑐶𑐚𑐷 𑐡𑐫𑐾𑐎𑐾𑐐𑐸 𑐳𑐬𑐎𑐵𑐬𑐫𑐵 𑐫𑑀𑐖𑐣𑐵 𑐡𑐸 𑑋 𑐳𑑂𑐰𑐣𑐶𑐐𑑅𑐫𑐵 𑐖𑐣𑐳𑑄𑐏𑑂𑐫𑐵 𑐊𑐎 𑐎𑐬𑑀𑐜 𑐠𑑂𑐫𑐣𑐷𑐧𑐮𑐫𑑂 𑐁𑐡𑐶𑐰𑐵𑐳𑐶 𑐣𑐾𑐰𑐵𑑅𑐟 𑑗÷𑑘 𑐥𑑂𑐬𑐟𑐶𑐱𑐟𑐫𑑂 𑐎𑐸𑐴𑐵𑑄 𑐰𑐂𑐟𑐶𑐣𑐶 𑑋 𑐨𑐶𑐟𑑂𑐬𑐷 𑐱𑐴𑐬𑐫𑐵 𑐥𑐶𑐣𑐾 𑐖𑐎 𑐩𑐏𑐸 𑐡𑐸𑐣𑐾𑐣𑑄, 𑐣𑐐𑐬𑐥𑐵𑐮𑐶𑐎𑐵 𑐖𑐎 𑐩𑐏𑐸 𑐰𑐜𑐵 𑐟𑐎 𑐣𑑄 𑐐𑐿𑐬 𑐣𑐾𑐰𑐵𑑅𑐟𑐳𑐾𑑄 𑐎𑐧𑑂𑐖𑐵 𑐫𑐵𑐂𑐟𑐶𑐣𑐶 𑑋 𑐳𑑂𑐠𑐵𑐣𑐶𑐫 𑐳𑐟𑑂𑐟𑐵𑑄 𑐟𑐎𑐣𑑄 𑐣𑐾𑐰𑐵𑑅𑐟𑐫𑑂𑐟 𑐥𑐶𑐟𑐶𑐣𑐵 𑐕𑑂𑐰𑐾𑐟 𑐁𑐥𑑂𑐬𑐰𑐵𑐳𑐣 𑐟𑐔𑑂𑐰𑐾𑐎𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐣𑐾𑐰𑐵𑑅𑐟 𑐣𑑂𑐴𑐵𑐥𑐵 𑐴𑐾 𑐨𑐵𑐲𑐵, 𑐨𑐹𑐩𑐶, 𑐥𑑂𑐬𑐱𑐵𑐳𑐣, 𑐰𑑂𑐫𑐵𑐥𑐵𑐬 𑐰𑑂𑐫𑐰𑐳𑐵𑐫, 𑐮𑐖𑐐𑐵𑑅 , 𑐳𑐾𑐣𑐵 𑐥𑑂𑐬𑐴𑐬𑐷 𑐏𑑂𑐫𑐮𑑄 𑐰𑐶𑐳𑑂𑐠𑐵𑐥𑐶𑐟 𑐖𑐸𑐂𑐢𑐸𑑄𑐎𑐮 𑑋

𑐁𑑅 𑐳𑑂𑐠𑐵𑐣𑐷𑐫 𑐳𑐟𑑂𑐟𑐵𑑄 𑐟𑐎 𑐣𑑄 𑐥𑐹𑐰𑑄𑐎 𑐰𑐶𑐳𑑂𑐠𑐵𑐥𑐶𑐟 𑐖𑐸𑐂𑐟𑑂𑐫𑑄𑐐𑐸 𑐏𑐣𑐾𑐡𑐸 𑑋 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐫𑑂𑐟 𑐥𑐴𑐶𑐔𑐵𑐣 𑐩𑐡𑐸𑐩𑑂𑐴, 𑐴𑐵𑑅𑐣𑐵𑑅 𑐩𑐡𑐸𑐩𑑂𑐴, 𑐡𑐵𑐳 𑐳𑐬𑐴𑐫𑐵 𑐀𑐰𑐳𑑂𑐠𑐵𑐫𑑂 𑐮𑐵𑐎𑐾𑐟𑑂𑐫𑑄𑐐𑐸 𑐏𑐣𑐾𑐡𑐸 𑑋 𑐗𑐶𑐡𑑃 𑐣𑐷𑐡𑑃𑐫𑐵 𑐏𑑃 𑐏𑑅 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅 𑐖𑐵𑐟𑐶 𑐣𑑂𑐴𑐣𑐵 𑐰𑐣𑐾𑐟𑑂𑐫𑑄𑐐𑐸 𑐡𑐸, 𑐟𑐣𑐵𑐰𑐣𑐾𑐟𑑂𑐫𑑄𑐐𑐸 𑐡𑐸, 𑐳𑐶𑐣𑐵 𑐰𑐣𑐾𑐟𑑂𑐫𑑄𑐐𑐸 𑐡𑐸 𑑋 𑐗𑐷𑐳𑑄 𑐢𑐵𑐫𑐾𑐦𑐸 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟 𑐳𑐶𑐣𑐵 𑐰𑐣𑐾𑐟𑑂𑐫𑑄𑐐𑐸 𑐩𑐏𑐸 𑐳𑑂𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐬𑐵𑐖𑑂𑐫𑐳𑐟𑑂𑐟𑐵 𑐣𑑂𑐴𑑂𑐫𑐵𑐎𑐵 𑐔𑑂𑐰𑑄𑐥𑐶 𑐊𑐩𑐵𑐮𑐾–𑐩𑐵𑐌𑐰𑐵𑐡𑐷 𑐖𑐵𑐣𑐵𑑅 𑐡𑐫𑐾𑐎𑐹𑐐𑐸 𑐣𑐾𑐥𑐵𑐮 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷 (𑐣𑐾𑐎𑐥𑐵), 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳𑐫𑐵𑐟 𑐗𑐷𑐳𑑄 𑐥𑑂𑐬𑐖𑐵𑐟𑐣𑑂𑐟𑑂𑐬𑐧𑐵𑐡𑐷 𑐳𑐩𑐵𑐖𑐧𑐵𑐡𑐷 𑐢𑐵𑐫𑐾𑐐𑐸 𑐫𑐵𑐣𑐵 𑐔𑑂𑐰𑐣𑐵 𑑋 𑐠𑑂𑐰 𑐨𑑂𑐬𑐩 𑐏𑑅 𑑋 𑐠𑐸𑐥𑐶𑑄 𑐳𑐵𑐩𑑂𑐥𑑂𑐬𑐡𑐵𑐫𑐶𑐎, 𑐖𑐵𑐟𑐶𑐧𑐵𑐡𑐶, 𑐣𑐱𑑂𑐮𑐧𑐵𑐡𑐶, 𑐧𑑂𑐬𑐵𑐩𑑂𑐴𑐞𑐧𑐵𑐡𑐷 𑐏𑑅 𑑋 𑐠𑐸𑐥𑐶𑑄 𑐣𑐾𑐰𑐵𑑅 𑐰𑐶𑐬𑑀𑐢𑐷, 𑐣𑐾𑐥𑐵𑐮𑐨𑐵𑐲𑐵 𑐰𑐶𑐬𑑀𑐢𑐷 𑐰𑐶𑐨𑐾𑐡𑐎𑐵𑐬𑐷 𑐏𑑅 𑑋 𑐠𑐸𑐥𑐶𑑄 𑐖𑐵𑐟𑐶 𑐳𑑄𑐴𑐵𑐬 𑐫𑐵𑐂𑐥𑐶𑑄 𑐴𑐶𑐚𑐮𑐬𑐰𑐵𑐡𑐷 𑐏𑑅 𑑋

𑐣𑐱𑑂𑐮𑐰𑐵𑐡𑐷 𑐨𑑂𑐬𑐲𑑂𑐚 𑐬𑐵𑐖𑑂𑐫𑐳𑐟𑑂𑐟𑐵𑐫𑐵 𑐰𑐶𑐎𑐮𑑂𑐥 𑐖𑐸𑐖𑐸 𑐏𑑅𑐮𑐵 ?
𑐗𑐷 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟𑐳𑐾𑑄 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳, 𑐊𑐩𑐵𑐮𑐾, 𑐩𑐵𑐌𑐰𑐵𑐡𑐷 𑐖𑐎 𑐩𑐏𑐸 𑐖𑐸𑐖𑐸 𑐰 𑐬𑐵𑐖𑐟𑐣𑑂𑐟𑑂𑐬 𑐣𑑄 𑐨𑑀𑐐𑐫𑑂 𑐫𑐵𑐫𑐾 𑐢𑐸𑐣 𑑋 𑐠𑐸𑐥𑐶𑑄 𑐳𑐎𑐮𑐾𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐬𑑀𑐢𑐷 𑐣𑐾𑐰𑐵𑑅 𑐰𑐶𑐬𑑀𑐢𑐷 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐣𑐱𑑂𑐮𑐰𑐵𑐡𑐷 𑐏𑑅 𑑋 𑐰𑐬𑑂𑐟𑐩𑐵𑐣 𑐬𑐵𑐖𑑂𑐫 𑐳𑐟𑑂𑐟𑐵𑐫𑐵 𑐰𑐶𑐎𑐮𑑂𑐥 𑐖𑐸𑐖𑐸 𑐩𑐏𑐸 𑐗𑐷 𑐁𑐡𑐶𑐰𑐵𑐳𑐶 𑐣𑐾𑐰𑐵𑑅𑐟 𑐠𑑅𑐴𑐾 𑐏𑑅 𑑋

𑐁𑐡𑐶𑐰𑐵𑐳𑐶 𑐣𑐾𑐰𑐵𑑅 𑐖𑐵𑐟𑐶 𑐩𑑂𑐰𑐵𑐫𑐾 𑐦𑐂𑐟𑐶𑐣𑐶 𑐮𑐵 ?
𑐗𑐷 𑐣𑐾𑐰𑐵𑑅𑐟𑐳𑐾𑑄 𑐖𑐶𑐥𑐶𑑄 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐧𑐵𑐳𑐶 𑐏𑑅 𑐢𑐵𑐫𑐾 𑐦𑐟 𑐢𑐵𑑅𑐳𑐵, 𑐳𑑂𑐰𑐣𑐶𑐐𑑅 𑐖𑐶𑐩𑐶𑐐𑐸 𑐁𑐡𑐶𑐨𑐹𑐩𑐶 𑐏𑑅 𑐖𑐶𑐩𑐶𑐎𑐾 𑐩𑐣𑑂𑐫𑑃𑐳𑐾 𑐠𑐣 𑐫𑑅𑐫𑑅𑐠𑐾 𑐫𑐵𑐫𑐾 𑐡𑐂𑐩𑐏𑐸 𑐢𑐵𑐫𑐾 𑐦𑐟 𑐢𑐵𑑅𑐳𑐵 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅𑐟 𑐩𑑂𑐰𑐵𑐫𑐾 𑐦𑐂𑐟𑐶𑐣𑐶, 𑐁𑐡𑐶𑐨𑐹𑐩𑐶 𑐳𑑂𑐰𑐣𑐶𑐐𑑅 𑐩𑑂𑐰𑐵𑐎𑐾 𑐦𑐂𑐟𑐶𑐣𑐶 𑑋 𑐄𑐮𑐶 𑐢𑐵𑐫𑐾 𑐳𑑅𑐥𑐶𑑄, 𑐄𑐮𑐶 𑐢𑐵𑐫𑐾 𑐦𑐸𑐥𑐶𑑄 𑐣𑐾𑐰𑐵𑑅𑐟 𑐥𑐶𑐴𑐵𑑄 𑐰𑐫𑐾𑐩𑐵𑐮 𑑋 𑐟𑑂𑐰𑐵𑑅𑐟𑑂𑐰𑐵𑐮𑐫𑑂 𑐐𑐵𑑄𑐐𑐵𑐩𑐫𑑂 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅 𑐖𑐵𑐐𑐬𑐞 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐎𑐾 𑐩𑐵𑐮 𑑋 𑐣𑑂𑐴𑑂𑐫𑐮𑑄 𑐔𑐵𑑅𑐥𑐶𑑄 𑐣𑐾𑐰𑐵𑑅𑐟 𑐕𑐥𑑂𑐥𑑃 𑐖𑐸𑐂𑐩𑐵𑐮 𑑋 𑐳𑑄𑐐𑐛𑐶𑐟 𑐣𑐾𑐰𑐵𑑅 𑐱𑐎𑑂𑐟𑐶 𑐣𑐶𑐬𑑂𑐩𑐵𑐞 𑐖𑐸𑐂𑐩𑐵𑐮 𑑋

𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐟𑑅𑐐𑐸 𑐳𑑂𑐰𑐵𑐫𑐟𑑂𑐟 𑐎𑑂𑐲𑐾𑐟𑑂𑐬𑐫𑐵 𑐀𑐢𑐶𑐎𑐵𑐬 𑐎𑐵𑐫𑐾 𑐩𑐵𑐮 𑑋 𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐟𑑅𑐐𑐸 𑐳𑑂𑐰𑐵𑐫𑐟𑑂𑐟 𑐎𑑂𑐲𑐾𑐟𑑂𑐬𑐫𑐵 𑐀𑐢𑐶𑐎𑐵𑐬 𑐩𑐎𑐵𑐳𑐾𑑄 𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐩𑐟𑑅𑐐𑐸 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐀𑐢𑐶𑐎𑐵𑐬 𑐩𑐵𑐮 𑐢𑐵𑐫𑐾𑐐𑐸, 𑐰 𑐣𑑄 𑐩𑑂𑐴𑐸𑐟𑐸 𑐕𑐥𑑂𑐰𑐵𑐮𑑄 𑐖𑐎 𑐴𑐵𑐮𑐵 𑐔𑑂𑐰𑐣𑐾𑐐𑐸 𑐐𑐮𑐟 𑐏𑑅 𑑋 𑐐𑐮𑐟 𑐣𑐷𑐟𑐶 𑐖𑑂𑐰𑐣𑐵 𑐔𑑂𑐰𑐣 𑐢𑐵𑑅𑐳𑐵 𑐁𑐡𑐶𑐰𑐵𑐳𑐶 𑐣𑐾𑐰𑐵𑑅 𑐖𑐵𑐟𑐶 𑐩𑑂𑐰𑐵𑐫𑐾 𑐦𑐂𑐩𑐏𑐸𑐟 𑑋 𑐁𑑅 𑐗𑐶𑐡𑑃 𑐣𑐷𑐡𑑃𑐫𑐵 𑐏𑑃 𑐏𑑅 𑐁𑐡𑐶𑐧𑐵𑐳𑐶 𑐣𑐾𑐰𑐵𑑅 𑐖𑐵𑐟𑐶 𑐳𑐷𑐟𑑂𑐫𑑄𑐐𑐸 𑐡𑐸 𑑋 𑐳𑐷𑐟𑑂𑐫𑑄𑐐𑐸 𑐩𑐏𑐸 𑐳𑑂𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐩𑑂𑐰𑐵𑐫𑐾𑐟 𑐎𑐸𑐟𑑅 𑐫𑐵𑐫𑐾𑐐𑐸 𑐮𑐵𑐎𑐶 𑐁𑐟𑑂𑐩𑐳𑐩𑑂𑐬𑑂𑐥𑐞 𑐫𑐵𑐫𑐾𑐐𑐸 ? 𑐣𑐾𑐰𑐵𑑅 𑐰𑐶𑐬𑑀𑐢𑐷 𑐣𑐾𑐥𑐵𑐮𑐨𑐵𑐲𑐵 𑐰𑐶𑐬𑑀𑐢𑐷 𑐬𑐵𑐖𑐣𑐷𑐟𑐶𑐎 𑐡𑐮 𑐰𑐵 𑐖𑐸𑐖𑐸𑐫𑐵 𑐮𑑂𑐫𑐹𑐮𑑂𑐫𑐹 𑐰𑐣𑐵𑑅 𑐣𑐾𑐰𑐵𑑅 𑐖𑐵𑐟𑐶 𑐩𑑂𑐰𑐵𑐫𑐾 𑐦𑐂𑐩𑐏𑐸𑐟 𑑋 𑐰𑐶𑐎𑐮𑑂𑐥 𑐖𑐸𑐖𑐸 𑐩𑐏𑐸 𑐗𑐷 𑐁𑐡𑐶𑐰𑐵𑐳𑐶 𑐣𑐾𑐰𑐵𑑅 𑐠𑑅𑐥𑐶𑑄 𑐴𑐾 𑐏𑑅 𑑋 𑐠𑑅𑐐𑐸 𑐮𑑄 𑐠𑑅𑐩𑑂𑐴𑑄 𑐴𑐾 𑐡𑐫𑐾𑐎𑐾 𑐩𑐵𑐮 𑑋 𑐠𑑅𑐐𑐸 𑐮𑐵𑐐𑐶𑑄 𑐠𑑅 𑐴𑐾 𑐩𑐟 𑐠𑐾𑑄 𑐔𑑂𑐫𑐵𑐫𑐾 𑐦𑐫𑐾 𑐩𑐵𑐮 𑑋 ‘𑐀𑐥𑑀 𑐡𑐶𑐥𑑀 𑐨𑐰𑑅’ 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS