𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

‘𑐣𑐾𑐥𑐵𑑅𑐫𑐵 𑐣𑑂𑐴𑐹𑐐𑐸 𑐣𑐎𑑂𑐳𑐵𑐫𑐵 𑐥𑑂𑐬𑐩𑐵𑐞 𑐮𑐸𑐂𑐎𑐹𑐩𑑂𑐴 𑐥𑐡𑑂𑐩𑐬𑐟𑑂𑐣 𑐏𑑅’

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐳𑐬𑐎𑐵𑐬𑑄 𑐕𑐸𑑄 𑐃 𑐣𑑂𑐴𑑂𑐫𑑅 𑐮𑐶𑐩𑑂𑐥𑐶𑐫𑐵𑐢𑐸𑐬𑐵, 𑐮𑐶𑐥𑐸𑐮𑐾𑐎 𑐰 𑐎𑐵𑐮𑐵𑐥𑐵𑐣𑐷 𑐎𑑂𑐲𑐾𑐟𑑂𑐬 𑐡𑐸𑐠𑑂𑐫𑐵𑐎𑐵𑑅 𑐣𑐾𑐥𑐵𑑅𑐫𑐵 𑐣𑑂𑐴𑐹𑐐𑐸 𑐣𑐎𑑂𑐳𑐵 𑐳𑐵𑐬𑑂𑐰𑐖𑐣𑐶𑐎 𑐫𑐵𑐟 𑑋 𑐳𑐬𑐎𑐵𑐬𑑄 𑐣𑐎𑑂𑐳𑐵𑐫𑑂 𑐡𑐸𑐠𑑂𑐫𑐵𑑅𑐐𑐸 𑐠𑑂𑐰 𑐎𑑂𑐲𑐾𑐟𑑂𑐬 𑐣𑐾𑐥𑐵𑑅𑐫𑐵 𑐴𑐾 𑐏𑑅 𑐢𑐎𑐵𑑅 𑐡𑐵𑐰𑐷 𑐫𑐵𑐫𑐾𑐐𑐸 𑐥𑑂𑐬𑐱𑐳𑑂𑐟 𑐥𑑂𑐬𑐩𑐵𑐞 𑐠𑑅𑐥𑐶𑑄𑐎𑐾 𑐡𑐸 𑐢𑐎𑐵𑑅 𑐡𑐵𑐰𑐷 𑐫𑐵𑐟 𑑋 𑐀𑐖𑑂𑐫𑐵𑑅𑐐𑐸 𑐥𑑂𑐬𑐩𑐵𑐞 𑐩𑐸𑑄𑐎𑐾𑐐𑐸 𑐖𑑂𑐫𑐵 𑐳𑐸𑐣𑐵𑑄 𑐫𑐵𑑅𑐐𑐸 𑐏𑑅 𑐢𑐂𑐐𑐸 𑐏𑑃 𑐢𑐵𑑅𑐳𑐵 𑐳𑐬𑐎𑐵𑐬𑑄 𑐳𑐵𑐬𑑂𑐰𑐖𑐣𑐶𑐎 𑐩𑐫𑐵𑑅 𑑋 𑐟𑐬 𑐀𑐖𑑂𑐫𑐵𑑅𑐐𑐸 𑐥𑑂𑐬𑐩𑐵𑐞𑐟 𑐩𑐸𑑄𑐎𑐾𑐐𑐸 𑐖𑑂𑐫𑐵 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐨𑐵𑐖𑐸 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐣𑐵𑐐𑐬𑐶𑐎 𑐳𑐩𑐵𑐖𑐫𑐵 𑐣𑑂𑐴𑑂𑐫𑐮𑐸𑐰𑐵 𑐣𑐵𑐥𑑄 𑐰𑐵𑐩 𑐧𑐸𑐡𑑂𑐢𑐶𑐖𑐷𑐰𑐷 𑐱𑑂𑐫𑐵𑐩 𑐱𑑂𑐬𑐾𑐲𑑂𑐛𑑄 𑐮𑐶𑐩𑑂𑐥𑐶𑐫𑐵𑐢𑐸𑐬𑐵, 𑐮𑐶𑐥𑐸𑐮𑐾𑐎 𑐰 𑐎𑐵𑐮𑐵𑐥𑐵𑐣𑐷 𑐎𑑂𑐲𑐾𑐟𑑂𑐬𑐟 𑐣𑐾𑐥𑐵𑑅𑐫𑐵 𑐏𑑅 𑐢𑐎𑐵𑑅 𑐥𑑂𑐬𑐩𑐵𑐞 𑐮𑐸𑐂𑐎𑐹𑐩𑑂𑐴 𑐴𑐾 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬 𑐏𑑅 𑐢𑐎𑐵𑑅 𑐡𑐵𑐰𑐷 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑑒𑑐𑑕𑑕 𑐳𑐵𑐮𑐫𑑂 𑐩𑐴𑐵𑐎𑐵𑐮𑐷 𑐳𑐣𑑂𑐢𑐷 𑐖𑐹𑐐𑐸 𑐂𑐮𑐫𑑂 𑐥𑐡𑑂𑐩𑐬𑐟𑑂𑐣𑐫𑐵 𑐴𑐾 𑐣𑐾𑐟𑐺𑐟𑑂𑐰𑐫𑑂 𑐳𑐷𑐩𑐵 𑐀𑐟𑐶𑐎𑑂𑐬𑐩𑐞 𑐥𑑂𑐬𑐟𑐶𑐬𑑀𑐢 𑐳𑐩𑐶𑐟𑐶 𑐣𑐷𑐳𑑂𑐰𑑄𑐐𑐸 𑐰 𑐎𑐵𑐮𑐷 𑐣𑐡𑐷𑐫𑐵 𑐳𑐶𑐩𑐵𑐣𑐵𑐫𑐵 𑐥𑑂𑐬𑐩𑐵𑐞 𑐰𑐴𑐾 𑐳𑐩𑐶𑐟𑐶𑑄 𑐮𑐸𑐂𑐎𑐹𑐐𑐸 𑐏𑑃 𑐱𑑂𑐬𑐾𑐲𑑂𑐛𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐨𑐵𑐖𑐸 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐮𑐸𑐩𑐣𑑂𑐟𑐶𑐂 𑐫𑐾𑑃𑐫𑑂 𑐖𑐹𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂 𑐎𑐮𑑄 𑐢𑐫𑐵𑐡𑐶𑐮, ‘𑐎𑐵𑐮𑐷 𑐣𑐡𑐷𑐫𑐵 𑐳𑐶𑐩𑐵𑐣𑐵 𑐕𑐸𑐚𑐾 𑐖𑐹𑐳𑐵 𑐖𑐎 𑐩𑐴𑐟𑑂𑐰𑐥𑐹𑐬𑑂𑐞 𑐏𑑃 𑐖𑐸𑐂 𑐢𑐎𑐵𑑅 𑐄𑐐𑐸 𑐳𑐩𑐶𑐟𑐶𑑄 𑐥𑑂𑐬𑐩𑐵𑐞 𑐩𑐵𑐮𑐾𑐟 𑐣𑐶𑐐𑐹 𑐳𑐩𑐶𑐟𑐶 𑐣𑐷𑐳𑑂𑐰𑑄𑐐𑐸 𑐏𑑅 𑑋 𑐕𑐐𑐹 𑐋𑐟𑐶𑐴𑐵𑐳𑐶𑐎 𑐟𑐠𑑂𑐫 𑐏𑑀𑐖𑐧𑐶𑐣 𑐳𑐩𑐶𑐟𑐶 𑐰 𑐩𑐾𑐐𑐸 𑐣𑐎𑑂𑐳𑐵 𑐏𑑀𑐖𑐧𑐶𑐣 𑐳𑐩𑐶𑐟𑐶 𑑋’

𑐣𑐎𑑂𑐳𑐵 𑐏𑑀𑐖𑐧𑐶𑐣 𑐳𑐩𑐶𑐟𑐶𑐫𑐵 𑐣𑐾𑐟𑐺𑐟𑑂𑐰 𑐥𑐡𑑂𑐩𑐬𑐟𑑂𑐣 𑐳𑑂𑐰𑐫𑐩𑑄 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐄𑐎𑐶𑐫𑐵 𑐮𑐵𑐐𑐶𑑄 𑐮𑐞𑑂𑐜𑐣𑐫𑑂 𑐡𑐸𑐐𑐸 𑐣𑐎𑑂𑐳𑐵, 𑐳𑐸𑐐𑑁𑐮𑐶 𑐳𑐣𑑂𑐢𑐷 𑐣𑐶𑐳𑐾𑑄𑐫𑐵 𑐣𑐎𑑂𑐳𑐵, 𑐟𑐟𑑂𑐎𑐵𑐮𑐷𑐣 𑐩𑐸𑐏𑑂𑐫 𑐳𑐔𑐶𑐰 𑐖𑐾. 𑐊𑐜𑐵𑐩𑑂𑐳𑑄 𑐎𑐵𑐮𑐷 𑐣𑐡𑐷𑐫𑐵 𑐳𑐶𑐩𑐵𑐣𑐵 𑐡𑐸𑐠𑑂𑐫𑐵𑐎𑐵𑑅 𑐔𑑂𑐰𑑅𑐐𑐸 𑐥𑑁 𑐎𑐮𑐎𑐟𑑂𑐟𑐵 𑐥𑐸𑐳𑑂𑐟𑐎𑐵𑐮𑐫𑑄 𑐎𑐵𑐫𑐾𑐐𑐸 𑐣𑐶𑐳𑐾𑑄 𑐧𑐿𑐟𑐜𑐷 𑐩𑐵𑐮𑐥𑑀𑐟𑐫𑑂 𑐀𑐣𑐫𑐵𑐥𑐶𑑄 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐎𑐬 𑐥𑐸𑐮𑐵𑐟𑑅𑐐𑐸 𑐨𑑂𑐰𑑄 𑐮𑐸𑐂𑐎𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑃 𑐣𑑄 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

‘𑐥𑐡𑑂𑐩𑐡𑐵𑐂𑐫𑐵 𑐣𑐾𑐟𑐺𑐟𑑂𑐰𑐫𑑂 𑐩𑐵𑐮𑐾𑐖𑑂𑐫𑐵 𑐖𑐹𑐐𑐸 𑐥𑑂𑐬𑐩𑐵𑐞 𑐴𑐾 𑐮𑐶𑐥𑐵 𑐎𑐺𑐲𑑂𑐞𑐥𑑂𑐬𑐳𑐵𑐡 𑐨𑐚𑑂𑐚𑐬𑐵𑐃 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐖𑐹𑐐𑐸 𑐂𑐮𑐫𑑂 𑐗𑐷𑐳𑑄 𑐳𑐬𑐎𑐵𑐬𑐫𑐵𑐟 𑐮𑑅𑐮𑑂𑐴𑐵𑐣𑐵𑐐𑐸 𑐏𑑅,’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐳𑐬𑐎𑐵𑐬𑑄 𑐰 𑐧𑐵𑐴𑐾𑐎 𑐩𑐾𑐐𑐸 𑐕𑐸𑑄 𑐣𑑄 𑐥𑑂𑐬𑐩𑐵𑐞 𑐁𑑅 𑐟𑐎 𑐮𑐸𑐂𑐎𑐹𑐐𑐸 𑐩𑐡𑐸𑐣𑐶 𑑋’

𑐨𑐵𑐬𑐟𑑄 𑐎𑐵𑐮𑐵𑐥𑐵𑐣𑐷 𑐳𑐩𑐾𑐟 𑐠𑑅𑐐𑐸 𑐨𑐹𑐨𑐵𑐐 𑐡𑐸𑐣𑐾 𑐡𑐸𑐠𑑂𑐫𑐵𑐎𑐵𑑅 𑐣𑑂𑐴𑐹𑐐𑐸 𑐣𑐎𑑂𑐳𑐵 𑐖𑐵𑐬𑐷 𑐫𑐵𑐫𑐾𑐰𑑄 𑐣𑐾𑐥𑐵𑐮𑑄 𑐣𑑄 𑐄𑐎𑐶𑐫𑐵𑐟 𑐮𑐶𑐳𑑅 𑐧𑐷 𑐎𑐠𑑄 𑐎𑐵𑐮𑐵𑐥𑐵𑐣𑐷 𑐠𑑅𑐐𑐸 𑐨𑐹𑐨𑐵𑐐 𑐡𑐸𑐣𑐾 𑐡𑐸𑐠𑑂𑐫𑐵𑐎𑐵𑑅 𑐣𑑂𑐴𑐹𑐐𑐸 𑐣𑐎𑑂𑐳𑐵 𑐖𑐵𑐬𑐷 𑐫𑐵𑑅𑐐𑐸 𑐏𑑅 𑑋 𑐠𑑂𑐰𑐴𑐾 𑐩𑐸𑐡𑑂𑐡𑐵𑑄 𑐫𑐵𑐣𑐵𑑅 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐣𑐾𑐥𑐵𑑅-𑐨𑐵𑐬𑐟 𑐳𑑂𑐰𑐵𑐥𑐹 𑐳𑐩𑐾𑐟 𑐥𑑂𑐬𑐨𑐵𑐰𑐶𑐟 𑐖𑐹𑐰𑑄𑐐𑐸 𑐏𑑅 𑑋