Read news in NepalBhasa text-- www.hamroschool.com BACK 𑐱𑑄𑐏𑐢𑐬 𑐥𑐵𑐬𑑂𑐎𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐂𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐱𑑄𑐏𑐢𑐬 𑐥𑐵𑐬𑑂𑐎𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐂𑐐𑐸

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐠𑐸𑐐𑐸𑐳𑐷 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐣𑑂𑐴𑐹𑐡𑑃 𑑑𑑑𑑔𑑑 𑐫𑐵 𑐮𑐳𑐟𑐵𑐫𑑂 𑐠𑐣𑐫𑐵 𑐱𑑄𑐏𑐢𑐬 𑐧𑐵𑐚𑐶𑐎𑐵 (𑐥𑐸𑐮𑐵𑑄𑐐𑐸 𑐬𑐟𑑂𑐣𑐥𑐵𑐬𑑂𑐎) 𑐡𑐸𑐣𑐾 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐰𑐬𑑂𑐟𑐎 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐟𑐂𑐐𑐸 𑐖𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐀𑐣 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐟𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐣𑑂𑐴𑐵𑐥𑐵 𑐬𑐟𑑂𑐣𑐥𑐵𑐬𑑂𑐎 𑐣𑐵𑑄 𑐖𑐸𑐫𑐵𑐔𑑂𑐰𑑄𑐐𑐸 𑐄𑐐𑐸 𑐥𑐵𑐬𑑂𑐎𑐫𑐵 𑐣𑐵𑑄 𑐴𑐶𑐮𑐵𑑅 𑐕𑐸𑑄 𑐃 𑐣𑑂𑐴𑑂𑐫𑑅 𑐟𑐶𑐣𑐶 ‘𑐱𑑄𑐏𑐢𑐬 𑐥𑐵𑐬𑑂𑐎’ 𑐟𑐫𑐾𑐐𑐸 𑐣𑐶𑐬𑑂𑐞𑐫 𑐖𑐹𑐐𑐸 𑐏𑑅𑐳𑐵 𑐠𑐸𑐐𑐸𑐳𑐷 𑐄𑐐𑐸 𑐥𑐵𑐬𑑂𑐎 𑐡𑐸𑐣𑐾 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐣𑑄 𑐟𑐫𑐾𑐐𑐸 𑐟𑐫𑐵𑐬𑐷 𑐖𑐹𑐐𑐸 𑐏𑑅 𑑋 𑐄𑐎𑐶𑐫𑐵 𑐮𑐵𑐐𑐶𑑄 𑐳𑐩𑑂𑐥𑐹𑐬𑑂𑐞 𑐰𑑂𑐫𑐰𑐳𑑂𑐠𑐵 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐖𑐸𑐂 𑑋

𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐠𑑁𑑄𑐎𑐣𑑂𑐴𑐫𑑂 𑐡𑐾𑐫𑑂𑐫𑐵 𑑓𑑐 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐖𑐶𑐮𑑂𑐮𑐵𑐫𑑂 𑐟𑐫𑐾𑐐𑐸 𑐖𑑂𑐫𑐵 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸𑑋 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐥𑐵𑐏𑐾𑑄 𑐡𑐾𑐫𑑂𑐫𑐵 𑐐𑐸𑐐𑐸𑑄 𑐣𑑄 𑐠𑐵𑐳𑐫𑑂 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐗𑑂𑐰𑐵𑐟𑐵 𑐟𑐂𑐐𑐸 𑐖𑐸𑐮 𑐢𑐵𑑅𑐳𑐵 𑐀𑐣 𑐟𑐫𑐾𑐐𑐸 𑐮𑐵𑐐𑐶𑑄 𑐮𑑂𑐰𑐴𑑄𑐫𑐵𑐐𑐸 𑐗𑑂𑐰𑐵𑐟𑐵 𑐕𑐐𑐹 𑐣𑐶𑑅𑐱𑐸𑐮𑑂𑐎 𑐄𑐥𑐮𑐧𑑂𑐢 𑐫𑐵𑐎𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸𑑋 𑐠𑐐𑐸𑐣𑐾 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐡𑑀𑐮𑑂𑐏𑐵𑐫𑑂 𑐱𑑄𑐏𑐢𑐬𑐫𑐵 𑐗𑑂𑐰𑐵𑐟𑐵 𑐟𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑐣𑑂𑐴𑐹𑐡𑑃𑐫𑐵 𑐖𑑂𑐫𑐵𑐗𑑂𑐰𑑅 :
𑐠𑐸𑐐𑐸𑐳𑐷 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑔𑑑 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐟𑑅𑐢𑑄𑐐𑐸 𑐖𑑂𑐫𑐵𑐗𑑂𑐰𑑅𑐟 𑐩𑐫𑐵𑑅𑐳𑐵𑑄 𑐬𑐵𑐲𑑂𑐚𑑂𑐬𑐶𑐫 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐥𑐵𑐏𑐾𑑄 𑐠𑐣𑐫𑐵 𑐬𑐵𑐲𑑂𑐚𑑂𑐬𑐶𑐫 𑐳𑐨𑐵𑐐𑐺𑐴𑐫𑑂 𑐢𑐵𑑅𑐳𑐵 𑐕𑐐𑐹 𑐣𑑂𑐴𑐹𑐡𑑃 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐟𑑂𑐫𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸𑑋 𑐣𑑂𑐴𑐹𑐡𑑃𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐳𑐴𑐨𑐵𑐐𑐷 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐰 𑐥𑑂𑐬𑐩𑐫𑐵 𑐳𑐣𑑂𑐡𑐾𑐱 𑐎𑐵𑐫𑐾𑐐𑐸 𑐮𑐵𑐐𑐶𑑄 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶𑐫𑐵 𑐡𑐸𑐖𑑅𑐥𑐶𑑄 𑐠𑑁𑑄 𑐰𑐵𑐮𑐸𑐰𑐵𑐚𑐵𑐬 𑐰𑐣𑐵𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐾𑐥𑐷 𑐱𑐬𑑂𑐩𑐵 𑐌𑐮𑐷𑐫𑐵𑐟 𑐣𑐵𑐥𑐮𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐳𑐵𑐬𑑂𑐰𑐖𑐣𑐶𑐎 𑐬𑐹𑐥𑑄 𑐟𑑅𑐢𑑄𑐐𑐸 𑐳𑐨𑐵 𑐰 𑐨𑐾𑐮𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐩𑐖𑐹𑐳𑐵𑑄 𑐔𑐶𑐔𑐷𑐢𑑄𑐐𑐸 𑐨𑐾𑐮𑐵 𑐰 ¥𑐫𑐵𑐮𑐷𑐟 𑐢𑐵𑑅𑐳𑐵 𑐠𑐷𑐠𑐷 𑐠𑐵𑐳𑐫𑑂 𑐥𑐶𑐎𑐵𑐫𑐾𑐐𑐸 𑐟𑐫𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐳𑑂𑐰𑐵𑐳𑑂𑐠𑑂𑐫 𑐳𑐩𑑂𑐧𑐣𑑂𑐢𑐷 𑐩𑐵𑐥𑐡𑐞𑑂𑐜 𑐥𑐹𑐬𑐵 𑐫𑐵𑐣𑐵𑑅 𑐰 𑐳𑐵𑐩𑐵𑐖𑐶𑐎 𑐡𑐹𑐬𑐷 𑐎𑐵𑐫𑐩 𑐫𑐵𑐣𑐵𑑅 𑐖𑐹𑐳𑐵𑑄 𑐀𑐖𑑂𑐫𑐵𑑅𑐐𑐸 𑐔𑐷𑐢𑑄𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾𑐐𑐸 𑐐𑑂𑐰𑐳𑐵𑑅𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS