Read news in NepalBhasa text-- www.hamroschool.com BACK 𑐣𑑂𑐴𑐹𑐡𑑃 𑐴𑐣𑐾𑐐𑐸 𑐧𑐵𑐬𑐾 𑐩𑑄𑐎𑐵𑑅 𑐀𑐥𑐶𑐮 : 𑐩𑑄𑐳𑐶𑐬 𑑑 𑐐𑐟𑐾 𑐮𑐵𑐂𑐐𑐸 𑐟𑐶𑐠𑐶 𑐎𑐸𑐣𑑂𑐴𑐸 𑐣𑑂𑐴𑐹𑐡𑑃 𑑑𑑑𑑔𑑑 𑐴𑐣𑐾𑐐𑐸 𑐣𑐶𑐬𑑂𑐞𑐫 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑑂𑐴𑐹𑐡𑑃 𑐴𑐣𑐾𑐐𑐸 𑐧𑐵𑐬𑐾 𑐩𑑄𑐎𑐵𑑅 𑐀𑐥𑐶𑐮 : 𑐩𑑄𑐳𑐶𑐬 𑑑 𑐐𑐟𑐾 𑐮𑐵𑐂𑐐𑐸 𑐟𑐶𑐠𑐶 𑐎𑐸𑐣𑑂𑐴𑐸 𑐣𑑂𑐴𑐹𑐡𑑃 𑑑𑑑𑑔𑑑 𑐴𑐣𑐾𑐐𑐸 𑐣𑐶𑐬𑑂𑐞𑐫

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐠𑐸𑐐𑐸𑐳𑐷 𑐣𑑄 𑐳𑑂𑐰𑐣𑑂𑐟𑐶 𑐣𑐏𑑅 𑐴𑐣𑐾𑐐𑐸 𑐳𑐩𑑂𑐧𑐣𑑂𑐢𑐫𑑂 𑐰𑐶𑐰𑐵𑐡 𑐡𑐸𑐳𑐵𑑄 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑔𑑑 𑐣𑑂𑐴𑐹𑐡𑑃 𑐴𑐣𑐾𑐐𑐸 𑐩𑐹 𑐖𑑂𑐫𑐵𑐗𑑂𑐰𑑅 𑐢𑐵𑑅𑐳𑐵 𑐠𑑂𑐰𑐴𑐾 𑐰𑐂𑐐𑐸 𑐣𑐾.𑐳𑑄. 𑑑𑑑𑑔𑑑 𑐎𑐕𑐮𑐵𑐠𑑂𑐰 𑐥𑐵𑐬𑐸 𑐀𑐬𑑂𑐠𑐵𑐟 𑐰𑐶.𑐳𑑄. 𑑒𑑐𑑗𑑗 𑐩𑑄𑐳𑐶𑐬 𑑑 𑐐𑐟𑐾 𑐳𑑀𑐩𑐰𑐵𑑅 𑐎𑐸𑐣𑑂𑐴𑐸 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫𑐖𑐹𑐐𑐸 𑐡𑐸 𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐣𑑂𑐴𑐹𑐡𑑃 𑐴𑐣𑐾𑐐𑐸 𑐖𑑂𑐫𑐵𑐫𑑂 𑐳𑐎𑑂𑐬𑐶𑐫 𑐠𑐷𑐠𑐷 𑐏𑐮𑑅 𑐥𑐸𑐔𑑅𑐟𑐫𑑂 𑐩𑑂𑐴𑐶𑐐𑑅 𑐔𑑂𑐰𑑄𑐐𑐸 𑐩𑑄𑐎𑐵𑑅 𑐩𑐸𑑃𑐖𑑂𑐫𑐵𑑄 𑐠𑑂𑐰 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐠𑑂𑐰𑐴𑐾 𑐣𑐶𑐬𑑂𑐞𑐫 𑐁𑑅 𑐡𑐾𑐫𑑂𑐣𑑂𑐫𑑄𑐎𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐣𑐵 𑐫𑑄𑐎𑐾𑐐𑐸 𑐣𑐶𑐬𑑂𑐞𑐫 𑐣𑑄 𑐩𑐸𑑃𑐖𑑂𑐫𑐵𑑄 𑐫𑐵𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐠𑐸𑐐𑐸𑐳𑐷 𑐎𑑀𑐬𑑀𑐣𑐵 𑐩𑐴𑐵𑐩𑐵𑐬𑐷𑐫𑐵 𑐎𑐵𑐬𑐞𑑄 𑐟𑑅𑐢𑑄𑐐𑐸 𑐳𑐨𑐵 𑐰𑐵 𑐬𑑂‍𑐫𑐵𑐮𑐷 𑐥𑐶𑐎𑐵𑐫𑐾𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸𑐐𑐸𑐮𑐶𑑄 𑐣𑑂𑐴𑐹𑐡𑑃𑐫𑐵 𑐖𑑂𑐫𑐵𑐗𑑂𑐰𑑅𑐟 𑐐𑐸𑐎𑐠𑑄 𑐣𑑂𑐴𑑂𑐫𑐵𑐎𑐵 𑐫𑑄𑐎𑐾𑐐𑐸 𑐢𑐂𑐐𑐸 𑐧𑐵𑐬𑐾 𑐣𑑄 𑐩𑐸𑑃𑐖𑑂𑐫𑐵𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐥𑐴𑐮𑐫𑑂 𑐣𑑂𑐴𑐹𑐡𑑃 𑐬𑐵𑐲𑑂𑐚𑑂𑐬𑐶𑐫 𑐳𑐩𑐵𑐬𑑀𑐴 𑐳𑐩𑐶𑐟𑐶-𑑑𑑑𑑔𑑑 𑐫𑐵 𑐣𑐵𑐫𑑅 𑐬𑐩𑐾𑐱 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐨𑐬𑑂𑐔𑐸𑐫𑐮 𑐩𑐸𑑃𑐖𑑂𑐫𑐵𑐥𑐵𑐏𑐾𑑄 𑐠𑐸𑐐𑐸𑐳𑐷 𑐣𑑂𑐴𑐹𑐡𑑃 𑐴𑐣𑐾𑐐𑐸 𑐐𑑂𑐰𑐳𑐵𑑅 𑐰 𑐟𑐶𑐠𑐶𑐫𑐵𑐟 𑐎𑐫𑐵𑑅 𑐕𑐐𑐹 𑐩𑑄𑐎𑐵𑑅 𑐀𑐥𑐶𑐮 𑐖𑐵𑐬𑐷 𑐫𑐵𑐫𑐾𑐐𑐸 𑐣𑑄 𑐎𑑂𑐰𑑅𑐕𑐶𑐄𑐐𑐸 𑐏𑑅 𑑋

𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐣𑐬𑐾𑐱 𑐟𑐵𑐩𑑂𑐬𑐵𑐎𑐵𑐬𑑄 𑐄𑐐𑐸 𑐀𑐥𑐶𑐮𑐫𑐵 𑐩𑐳𑑂𑐫𑑁𑐡𑐵 𑐥𑑂𑐬𑐳𑑂𑐟𑐵𑐰 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐄𑐎𑐷 𑐳𑐵𑐩𑐵𑐣𑑂𑐫 𑐳𑑄𑐱𑑀𑐢𑐣 𑐫𑐵𑐣𑐵𑑅 𑐳𑐵𑐬𑑂𑐰𑐖𑐣𑐶𑐎 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐖𑐹𑐐𑐸 𑐏𑑅 𑑋 𑐀𑐣 𑐣𑑂𑐴𑑂𑐫𑐧𑑂𑐰𑑅𑐐𑐸 𑐩𑑄𑐎𑐵𑑅 𑐀𑐥𑐶𑐮𑐫𑐵 𑐩𑐳𑑂𑐫𑑁𑐡𑐵𑐫𑑂 𑐩𑑄𑐳𑐶𑐬 𑑑 𑐐𑐟𑐾 𑐮𑐵𑐂𑐐𑐸 𑐟𑐶𑐠𑐶 𑐎𑐸𑐣𑑂𑐴𑐸 𑐣𑑂𑐴𑐹𑐡𑑃 𑐴𑐣𑐾𑐐𑐸 𑐰 𑐳𑑂𑐰𑐣𑑂𑐟𑐶 𑐣𑐏𑑅 𑐢𑐵𑑅𑐳𑐵 𑐠𑑅𑐠𑑅𑐐𑐸 𑐥𑐬𑐩𑑂𑐥𑐬𑐵𑐎𑐠𑑄 𑐣𑑂𑐫𑐵𑐫𑐾𑐎𑐵 𑐰𑐣𑐾𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐠𑑅𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐳𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐬𑐩𑐾𑐱 𑐥𑐶𑐫𑐵 𑐰 𑐳𑐸𑐬𑐾𑐱 𑐎𑐶𑐬𑐞𑐥𑐶𑑄𑐳𑑄 𑐣𑐏𑑅 𑐣𑑂𑐫𑐵𑐫𑐾𑐎𑐾𑐐𑐸 𑐟𑐶𑐠𑐶 𑐠𑐷𑐠𑐷 𑐎𑐠𑑄 𑐥𑐶𑐴𑐵𑑄 𑐰𑑅𑐐𑐸 𑐢𑐂𑐐𑐸 𑐣𑐾𑐰𑐵𑑅 𑐡𑐸𑐣𑐾𑐫𑐵 𑐰𑐶𑐰𑐵𑐡 𑐩𑐏𑐸𑐳𑐾𑑄 𑐰𑐶𑐰𑐶𑐢𑐟𑐵𑐫𑐵 𑐔𑐶𑑄 𑐖𑐹𑐐𑐸 𑐎𑐵𑐬𑐞𑑄 𑐄𑐎𑐶𑐫𑐵𑐟 𑐰𑐶𑐰𑐶𑐢 𑐎𑐠𑑄 𑐴𑐾 𑐣𑑂𑐫𑐵𑐫𑐾𑐎𑐵 𑐫𑑄𑐎𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐣𑐾𑐰𑐵𑑅 𑐖𑐵𑐟𑐶 𑐀𑐣𑐾𑐎 𑐎𑐠𑑄𑐫𑐵 𑐰𑐶𑐰𑐶𑐢𑐟𑐵𑑄 𑐖𑐵𑑅𑐐𑐸 𑐳𑐩𑐸𑐡𑐵𑐫 𑐖𑐹𑐐𑐸 𑐎𑐵𑐬𑐞𑑄 𑐟𑐶𑐠𑐶𑐫𑐵 𑐐𑐞𑐣𑐵 𑐫𑐵𑐫𑐾𑐐𑐸 𑐰𑐶𑐢𑐶𑐂 𑐣𑑄 𑐰𑐶𑐰𑐶𑐢𑐟𑐵 𑐡𑐸𑐐𑐸𑐮𑐶𑑄 𑐄𑐎𑐶𑐫𑐵𑐟 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐫𑐵 𑐴𑐾 𑐕𑐐𑐹 𑐕𑐐𑐹 𑐀𑑄𑐐𑐫𑐵 𑐬𑐸𑐥𑐫𑑂 𑐳𑑂𑐰𑐷𑐎𑐵𑐬 𑐫𑐵𑐣𑐵 𑐰𑐣𑐾 𑐩𑐵𑑅𑐐𑐸 𑐰 𑐠𑐸𑐎𑐶𑑄 𑐣𑐾𑐰𑐵𑑅 𑐊𑐎𑐟𑐵𑐫𑐵𑐟 𑐎𑑂𑐰𑐵𑐟𑐸𑐎𑐷𑐐𑐸 𑐧𑐶𑐔𑐵𑑅 𑐣𑑄 𑐀𑐣 𑐰𑑅𑐐𑐸 𑐏𑑅 𑑋

𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐠𑐸𑐐𑐸𑐳𑐷 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐡𑐫𑐾𑐎𑐾 𑐧𑐶𑐄𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩𑐫𑐵 𑐥𑑂𑐫𑑄𑐐𑐹𑐐𑐸 𑐟𑐐𑐶𑐩𑐫𑑂 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐳𑐩𑑂𑐧𑐣𑑂𑐢𑐷 𑐥𑐵𑐛 𑐣𑑄 𑐡𑐸𑐠𑑂𑐫𑐵𑑅𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑐵𑐫𑑅 𑐱𑑂𑐫𑐵𑐩𑐎𑐺𑐲𑑂𑐞 𑐩𑐵𑐣𑐣𑑂𑐢𑐬𑑄 𑐣𑑂𑐴𑐹𑐡𑑃 𑐣𑑂𑐴𑑂𑐫𑐵𑐐𑐸 𑐬𑐹𑐥𑑄 𑐴𑐣𑐾𑐐𑐸 𑐫𑐵𑑅𑐳𑐵𑑄 𑐄𑐎𑐷 𑐳𑐬𑐎𑐵𑐬𑐷 𑐳𑐴𑐨𑐵𑐐𑐶𑐟𑐵 𑐕𑐸𑐚𑐾 𑐫𑐵𑐎𑐾 𑐩𑐖𑐶𑐄𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐮𑐳𑐵 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹𑐫𑐵 𑐣𑐵𑐫𑑅 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐠𑐸𑐐𑐸𑐳𑐷𑐫𑐵 𑐣𑑂𑐴𑐹𑐡𑑃𑐫𑐵𑐟 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑐥𑐵𑐏𑐾𑑄 𑐀𑐥𑑂𑐰𑑅 𑐠𑐵𑐫𑑂 𑐧𑐶𑐫𑐵𑑅 𑐫𑑄𑐎𑐾𑐩𑐵𑑅𑐐𑐸 𑐧𑐶𑐔𑐵𑑅 𑐟𑐫𑐵𑐡𑐶𑐮 𑑋 𑐄𑐩𑐾𑐱 𑐳𑑂𑐠𑐵𑐥𑐶𑐟𑑄 𑐳𑐴𑐖𑐷𑐎𑐬𑐞 𑐫𑐵𑐣𑐵𑐡𑐷𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐜𑐵. 𑐥𑐸𑐲𑑂𑐥𑐬𑐵𑐖 𑐬𑐵𑐖𑐎𑐬𑑂𑐞𑐶𑐎𑐵𑐬, 𑐳𑐸𑐬𑐾𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐴𑐶𑐬𑐵𑐎𑐵𑐖𑐷 𑐩𑐴𑐬𑑂𑐖𑐣𑐥𑐶𑑄𑐳𑑄 𑐣𑑄 𑐧𑐶𑐔𑐵𑑅 𑐟𑐫𑐵𑐡𑐷𑐐𑐸 𑐏𑑅 𑑋

𑐩𑑄𑐎𑐵𑑅 𑐀𑐥𑐶𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹, 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐾𑑃, 𑐩𑑄𑐎𑐵𑑅 𑐏𑐮 𑐫𑐮, 𑐬𑐵𑐲𑑂𑐚𑑂𑐬𑐶𑐫 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶-𑑑𑑑𑑔𑑑, 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶 𑐫𑐮 𑐰 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣𑐥𑐵𑐏𑐾𑑄 𑐴𑐳𑑂𑐟𑐵𑐎𑑂𑐲𑐬 𑐫𑐵𑐫𑐾𑐐𑐸 𑐳𑐴𑐩𑐟𑐶 𑐣𑑄 𑐩𑐸𑑃𑐖𑑂𑐫𑐵𑐫𑑂 𑐖𑐹𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS