Read news in NepalBhasa text-- www.hamroschool.com BACK 𑐏𑑀𑐣𑐵 𑐡𑐾𑐫𑑂𑐫𑐵 𑐐𑑁𑐬𑐰 – 𑐡𑐾𑐰 𑐧𑐴𑐵𑐡𑐸𑐬 𑐜𑑄𑐐𑑀𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐏𑑀𑐣𑐵 𑐡𑐾𑐫𑑂𑐫𑐵 𑐐𑑁𑐬𑐰 – 𑐡𑐾𑐰 𑐧𑐴𑐵𑐡𑐸𑐬 𑐜𑑄𑐐𑑀𑐮

𑐧𑑁 𑐣𑑂𑐴𑐸𑐔𑑂𑐕𑐾𑐬𑐵𑐖 𑐜𑑄𑐐𑑀𑐮 𑐰 𑐩𑐵𑑄 𑐔𑐶𑐬𑐶𑐩𑐿𑑄 𑐜𑑄𑐐𑑀𑐮𑐫𑐵 𑐎𑑀𑐏𑑄 𑐰𑐶.𑐳𑑄. 𑑑𑑙𑑙𑑓 𑐦𑐵𑐐𑐸𑐞 𑐱𑐸𑐎𑑂𑐮 𑐟𑑂𑐬𑐶𑐫𑑀𑐡𑐱𑐷 𑐏𑐸𑐣𑑂𑐴𑐸 𑐫𑐮 𑐖𑐶𑐮𑑂𑐮𑐵𑐫𑐵 𑐋𑐟𑐶𑐴𑐵𑐳𑐶𑐎 𑐠𑐵𑐫𑑂𑐧𑐵𑐫𑑂 𑐏𑑀𑐣𑐵 𑐡𑐾𑐳𑐫𑑂 𑐖𑐣𑑂𑐩 𑐖𑐸𑐫𑐵𑐡𑐷𑐩𑑂𑐴 𑐴𑐣𑐾𑐧𑐴𑑅𑐩𑑂𑐴 𑐳𑐩𑐵𑐖𑐳𑐾𑐰𑐷 𑐨𑐵𑐖𑐸 𑐡𑐾𑐰 𑐧𑐴𑐵𑐡𑐸𑐬 𑐜𑑄𑐐𑑀𑐮 𑐣𑐾𑐥𑐵𑐮 𑐳𑐩𑑂𑐰𑐟𑑂 𑑑𑑑𑑔𑑐 𑐎𑑁𑐮𑐵𑐠𑑂𑐰 𑐥𑐵𑐬𑐸 𑐰𑐶.𑐳𑑄. 𑑒𑑐𑑗𑑗 𑐎𑐵𑐬𑑂𑐟𑐶𑐎 𑑑 𑐐𑐟𑐾 𑐁𑐎𑐵𑐗𑐵𑐎𑐵𑑄 𑐩𑐣𑑂𑐟𑑋 𑐣𑐾𑐰𑐵𑑅 𑐖𑐵𑐟𑐶, 𑐨𑐵𑐲𑐵, 𑐢𑐬𑑂𑐩, 𑐳𑑄𑐳𑑂𑐎𑐺𑐟𑐶 𑐏𑑂𑐫𑐮𑐫𑑂 𑐩𑐔𑐵 𑐮𑑂𑐫𑐵𑐫𑑂𑐩𑑂𑐴 𑐧𑐿𑑄𑐳𑑄𑐣𑐶𑐳𑐾𑑄 𑐩𑐡𑑂𑐡𑐶𑐎 𑐣𑑂𑐴𑑂𑐫𑐔𑐶𑐮𑐵𑑅 𑐳𑐩𑐵𑐖 𑐰 𑐬𑐵𑐲𑑂𑐚𑑂𑐬𑐫𑐵 𑐣𑐶𑐩𑑂𑐟𑐶𑑄 𑐰𑐫𑑂𑐎𑐮𑑄 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐡𑐸𑑋 𑐏𑑀𑐣𑐵𑐫𑐵 𑐥𑐬𑐩𑑂𑐥𑐬𑐵 𑐎𑐠𑑄 𑐩𑐣𑑂𑐟𑑂𑐬𑐷 𑐎𑐸𑐣𑐵𑐩𑑄 𑐳𑐩𑑂𑐩𑐵𑐣𑐩𑑂𑐴 𑐰𑐫𑑂𑐎𑐮𑑄 𑐱𑐶𑐎𑑂𑐲𑐵𑐫𑑂 𑐚𑑂𑐬𑐷𑐎𑐟𑐎 𑐥𑐵𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋 ‘𑐱𑐶𑐎𑑂𑐲𑐵 𑐴𑐾 𑐳𑐩𑐵𑐖𑐫𑐵 𑐖𑑅’ 𑐏𑑅 𑐢𑐿𑐐𑐸 𑐳𑐶𑐡𑑂𑐢𑐵𑐣𑑂𑐟 𑐖𑑂𑐰𑐣𑐵𑑅 𑐰𑐫𑑂𑐎𑑅 𑐬𑐸𑐡𑑂𑐬𑐵𑐫𑐞𑐷 𑐩𑐵𑐢𑑂𑐫𑐵𑐩𑐶𑐎 𑐰𑐶𑐡𑑂𑐫𑐵𑐮𑐫 𑐳𑐘𑑂𑐔𑐵𑐮𑐎 𑐳𑐩𑐶𑐟𑐶 𑐰 𑐫𑐸𑐰𑐵 𑐥𑑂𑐬𑐟𑐶𑐨𑐵 𑐰𑐶𑐡𑑂𑐫𑐵 𑐩𑐣𑑂𑐡𑐶𑐬 𑐩𑐵. 𑐰𑐶. 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐖𑐸𑐫𑐵𑑅 𑐥𑐮𑐶𑐳𑑂𑐠𑐵 𑐫𑐵𑐫𑐾𑐟 𑐰 𑐣𑑂𑐴𑑂𑐫𑐵𑐎𑐾𑐟 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐐𑐸𑐛𑐷 𑐣𑐶𑐬𑑂𑐞𑐵𑐾𑐡𑑂𑐰𑐵𑐬 𑐊𑐰𑑄 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶 𑐰 𑐨𑐎𑑂𑐟𑐥𑐸𑐬 𑐰𑐶𑐎𑐵𑐳 𑐥𑐬𑐶𑐫𑑀𑐖𑐣𑐵𑐫𑑂 𑐣𑐶𑐐𑐹 𑐡𑐱𑐎𑑄 𑐩𑐫𑐵𑐎 𑐠𑐷𑐠𑐷 𑐖𑐶𑐩𑑂𑐩𑐾𑐰𑐵𑐬 𑐥𑐡𑐫𑑂 𑐔𑑂𑐰𑐣𑐵𑑅 𑐣𑐾𑐥𑐵𑑅𑐫𑐵 𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐥𑐡𑐵 𑐨𑐶𑑄𑐎𑐾𑐐𑐸 𑐰 𑐥𑐸𑐣𑑅𑐣𑐶𑐬𑑂𑐩𑐵𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐰𑐫𑑂𑐎𑐮𑑄 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐐𑐸 𑐏𑑅 𑑋 𑐕𑐩𑑂𑐴 𑐳𑐔𑑂𑐔𑐵 𑐣𑐶𑐳𑑂𑐎𑐮𑑄𑐎𑐩𑑂𑐴 𑐰 𑐂𑐩𑐵𑐣𑑂𑐡𑐵𑐬𑐩𑑂𑐴 𑐬𑐵𑐲𑑂𑐚𑑂𑐬 𑐳𑐾𑐰𑐎 𑐎𑐠𑑄 𑐰𑐫𑑂𑐎𑑅𑐫𑐵 𑐰𑑂𑐫𑐎𑑂𑐟𑐶𑐟𑑂𑐰 𑐣𑐶𑐬𑑂𑐩𑐵𑐞 𑐖𑑂𑐰𑐷 𑐦𑐸𑐐𑐸 𑐗𑐷 𑐳𑐎𑐳𑐶𑐐𑐸 𑐣𑐶𑐩𑑂𑐟𑐶𑑄 𑐐𑑁𑐬𑐰𑐫𑐵 𑐏𑑃 𑐏𑑅 𑑋

𑐰𑐶.𑐳𑑄. 𑑒𑑐𑑐𑑘 𑐳𑐵𑐮𑑄 𑐎𑐶𑐳𑐵𑐣 𑐳𑑄𑐐𑐛𑐣𑐫𑐵 𑐳𑐡𑐳𑑂𑐫 𑐖𑐸𑐫𑐵𑑅 𑐬𑐵𑐖𑐣𑐿𑐟𑐶𑐎 𑐔𑐾𑐟𑐣𑐵 𑐠𑐣𑐾𑐐𑐸 𑐖𑑂𑐫𑐵𑐫𑑂 𑐣𑑄 𑐰𑐫𑑂𑐎𑑅 𑐣𑑂𑐴𑑂𑐫𑐔𑐶𑐮𑐵𑑅 𑐡𑐷𑐐𑐸 𑐡𑐸𑑋 𑐏𑑀𑐎𑐣𑐵 𑐐𑐵𑐄𑑃 𑐥𑐘𑑂𑐔𑐵𑐫𑐟𑐫𑐵 𑐰𑐜𑐵 𑐳𑐨𑐵𑐳𑐡, 𑐰𑐜𑐵 𑐀𑐢𑑂𑐫𑐎𑑂𑐲 𑐰 𑐎𑐵𑐬𑑂𑐫𑐨𑐵𑐬 𑐥𑑂𑐬𑐢𑐵𑐣𑐥𑐘𑑂𑐔 𑐖𑐸𑐫𑐵𑑅 𑐣𑑄 𑐟𑑅𑐡𑑃 𑐩𑐕𑐶 𑐄𑐐𑐸 𑐮𑐵𑐐𑐵𑐫𑐵 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞 𑐰 𑐳𑐩𑐵𑐖 𑐄𑐣𑑂𑐠𑐵𑐣𑐫𑐵 𑐖𑑂𑐫𑐵𑐫𑑂 𑐟𑐳𑐎𑑄 𑐩𑐾𑐴𑐣𑐟 𑐫𑐵𑐣𑐵𑑅 𑐣𑑂𑐴𑑂𑐫𑐔𑐶𑐮𑐵𑐡𑐷𑐐𑐸 𑐡𑐸 𑑋 𑐠𑐠𑐾 𑐴𑐾 𑐰𑐫𑑂𑐎𑐮𑑄 𑐄𑐐𑐸 𑐮𑐵𑐐𑐵𑐫𑐵 𑐢𑐵𑐬𑑂𑐩𑐶𑐎 𑐰𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐣𑑄 𑐄𑐮𑑂𑐮𑐾𑐏𑐣𑐷𑐫 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐡𑐸𑑋 𑐖𑐶𑐟𑐵𑐥𑐸𑐬 𑐐𑐣𑑂𑐢𑐎𑐸𑐚𑐷 𑐰𑐶𑐴𑐵𑐬𑐫𑑂 𑐣𑑄 𑐀𑐢𑑂𑐫𑐎𑑂𑐲 𑐖𑐸𑐫𑐵𑑅 𑐟𑐣, 𑐩𑐣, 𑐢𑐣 𑐥𑐵𑐣𑐵𑑅 𑐖𑐐𑑂𑐐𑐵 𑐔𑐹𑐮𑐵𑐎𑐵𑑅 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐵𑐥𑐣𑐵𑐥𑑄 𑐧𑑂𑐫𑐰𑐳𑑂𑐠𑐵𑐥𑐣𑐫𑐵 𑐖𑑂𑐫𑐵𑐫𑑂 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐡𑐸𑑋 𑐨𑐶𑐮𑐾𑐖 𑐎𑑀𑐬 𑐏𑑀𑐎𑐣𑐵, 𑐮𑐶𑐢𑑄𑐳𑐵 𑐳𑐴𑐎𑐵𑐬𑐷 𑐳𑑄𑐳𑑂𑐠𑐵𑐫𑐵 𑐳𑑄𑐳𑑂𑐠𑐵𑐥𑐎 𑐖𑐸𑐫𑐵𑑅 𑐰 𑐳𑐶𑐎𑐵𑐮𑐷 𑐩𑐣𑑂𑐡𑐶𑐬 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶 𑐰 𑐏𑑀𑐎𑐣𑐵 𑐎𑐵𑐬𑑂𑐫 𑐰𑐶𑐣𑐵𑐫𑐎 𑐳𑐜𑐎 𑐣𑐶𑐬𑑂𑐩𑐵𑐞 𑐳𑐩𑐶𑐟𑐶𑐂 𑐀𑐢𑑂𑐫𑐎𑑂𑐲 𑐖𑐸𑐫𑐵𑑅
𑐳𑐾𑐰𑐵𑐩𑐹𑐮𑐎 𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐮𑐶𑐢𑑄𑐳𑐵 𑐥𑐵𑐳𑐵 𑐥𑐸𑐔𑑅 𑐏𑑀𑐣𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐎𑐠𑑄 𑐰𑐫𑑂𑐎𑑅 𑐣𑐾𑐰𑐵𑑅 𑐬𑐵𑐲𑑂𑐚𑑂𑐬𑐶𑐫 𑐳𑑄𑐐𑐛𑐣, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐳𑑄𑐳𑑂𑐠𑐵𑐥𑐎 𑐖𑑅 𑐖𑐸𑐫𑐵𑐡𑐷𑐩𑑂𑐴 𑐰𑐫𑑂𑐎𑐮𑑄 𑐣𑑂𑐴𑐹𑐡𑑃 𑐳𑐩𑐵𑐬𑑀𑐴 𑐳𑐩𑐶𑐟𑐶 𑐏𑑀𑐣𑐵𑐫𑐵 𑐣𑐵𑐫𑑅 𑐖𑐸𑐫𑐵𑑅 𑐄𑐐𑐸 𑐮𑐵𑐐𑐵𑐫𑑂 𑐣𑐾𑐥𑐵𑐮 𑐳𑐩𑑂𑐰𑐟𑑂 𑐥𑑂𑐬𑐔𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐡𑐸𑑋 𑐋𑐟𑐶𑐴𑐵𑐳𑐶𑐎 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐏𑑀𑐣𑐵 𑐡𑐾𑐫𑐵𑐟 𑐰𑐶𑐱𑑂𑐰 𑐳𑐩𑑂𑐥𑐡𑐵 𑐢𑐮𑐏𑐫𑑂 𑐡𑐸𑐠𑑂𑐫𑐵𑐎𑐾𑐩𑐵𑑅 𑐢𑐎𑐵𑑅 𑐟𑑅𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐰𑐫𑑂𑐎𑐮𑑄 𑐳𑑅 𑐠𑑂𑐰𑐫𑐾𑐎𑐵𑑅 𑐗𑐵𑐫𑐵𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶 𑐫𑐮 𑐖𑐶𑐮𑑂𑐮𑐵𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐖𑐸𑐫𑐵𑑅 𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶 𑐣𑐾𑐥𑐵𑑅 𑐠𑑂𑐰 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐾𑐟 𑐰𑐫𑑂𑐎𑐮𑑄 𑐟𑑅𑐢𑑄𑐐𑐸 𑐴𑐶𑐔𑑅𑐟𑐶 𑐴𑐵𑐫𑐾𑐎𑐵𑐡𑐷𑐐𑐸 𑐡𑐸𑑋 𑐠𑐸𑐎𑐠𑑄 𑐴𑐾 𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶𑐥𑐵𑐏𑐾𑑄 𑐮𑐸𑐩𑑂𑐰𑐶𑐣𑐷 𑐣𑐶𑐬𑑂𑐩𑐵𑐞 𑐖𑐹𑐐𑐸 𑐥𑐮𑐶𑐳𑑂𑐰𑐵𑑄 𑐥𑐸𑐏𑐹 𑐢𑐳𑑂𑐰𑐵𑐎𑐾𑐟 𑐡𑐸𑐖𑑅 𑐖𑐸𑐫𑐵𑑅 𑐰𑐫𑑂𑐎𑐮𑑄 𑐱𑑂𑐬𑐩 𑐰𑑂𑐫𑐰𑐳𑑂𑐠𑐵𑐥𑐣𑐫𑑂 𑐟𑑅𑐢𑑄𑐐𑐸 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶𑑄 𑐰𑐫𑑂𑐎𑑅𑐫𑐵𑐟 𑐳𑑄𑐬𑐎𑑂𑐲𑐎𑐎𑐠𑑄 𑐴𑐣𑐵𑐧𑐣𑐵 𑐟𑐫𑐵𑐟𑑅𑐐𑐸 𑐡𑐸𑑋 𑐮𑐶𑐳𑐾𑑄 𑐟𑐵𑐟𑑂𑐎𑐵𑐮𑐷𑐣 𑐳𑐩𑑂𑐩𑐵𑐣𑐣𑐷𑐫 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐱𑐸𑐱𑐷𑐮 𑐎𑑀𑐂𑐬𑐵𑐮𑐵𑑄𑐖𑐸𑐥𑐵𑐏𑐾𑑄 𑐰𑐫𑑂𑐎𑑅𑐫𑐵𑐟 𑐩𑐴𑐵𑐐𑐸𑐠𑐶𑐫𑐵 𑐳𑑂𑐰𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵𑐫𑑂 𑐳𑐩𑑂𑐩𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐳𑐹𑐔𑐎 𑐡𑐷𑐥 𑐩𑐞𑑂𑐜𑐮𑐷𑐥𑐵𑐏𑐾𑑄 ‘𑐬𑐵𑐲𑑂𑐚𑑂𑐬𑐶𑐫 𑐧𑑁𑐡𑑂𑐢 𑐥𑐸𑐬𑐸𑐳𑑂𑐎𑐵𑐬𑑄’ 𑐰 𑐐𑐞𑐧𑐴𑐵𑐮 𑐩𑐴𑐵𑐰𑐶𑐴𑐵𑐬𑐥𑐵𑐏𑐾𑑄 ‘𑐢𑐬𑑂𑐩 𑐰𑐶𑐖𑐫 𑐥𑐡𑐣𑐩𑑄’ 𑐳𑐩𑑂𑐩𑐵𑐣𑐷𑐟 𑐖𑐸𑐫𑐵𑐡𑐷𑐐𑐸 𑐡𑐸𑑋 𑐠𑐸𑐎𑐠𑑄 𑐴𑐾 𑐰𑐫𑑂𑐎𑑅𑐫𑐵𑐟 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹, 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐩𑑄𑐎𑐵𑑅 𑐳𑑄𑐑𑐬𑑂𑐲 𑐳𑐩𑐶𑐟𑐶, 𑐖𑑂𑐫𑐵𑐥𑐸 𑐩𑐴𑐵𑐐𑐸𑐠𑐶 𑐣𑐾𑐥𑐵𑑅, 𑐫𑐮 𑐖𑐶𑐮𑑂𑐮𑐵 𑐳𑐩𑐶𑐟𑐶, 𑐮𑐶𑐢𑑄𑐳𑐵 𑐥𑐵𑐳𑐵 𑐥𑐸𑐔𑑅, 𑐱𑑂𑐬𑐷 𑐬𑐸𑐡𑑂𑐬𑐵𑐫𑐞𑐷 𑐳𑑂𑐰𑐬𑑂𑐞 𑐖𑐫𑐣𑑂𑐟𑐷 𑐳𑐩𑐶𑐟𑐶, 𑐥𑑂𑐬𑐾𑐩-𑐩𑑀𑐴𑐣 𑐳𑐶𑐬𑐥𑐵𑑅 𑐐𑐸𑐠𑐶, 𑐥𑐶𑐳 𑐐𑐵𑐬𑑂𑐜𑐾𑐣 𑐳𑐾𑐎𑐾𑐞𑑂𑐜𑐬𑐷 𑐳𑑂𑐎𑐸𑐮 𑐁𑐡𑐶 𑐳𑑄𑐑 𑐳𑑄𑐳𑑂𑐠𑐵𑑄 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐢𑐬𑑂𑐩, 𑐱𑐶𑐎𑑂𑐲𑐵 𑐏𑑂𑐫𑐮𑐫𑑂 𑐰𑐫𑑂𑐎𑐮𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐡𑐬 𑐫𑐵𑐣𑐵𑑅 𑐟𑑅𑐖𑐶𑐎 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐡𑐸 𑑋

𑐰𑐫𑑂𑐎𑑅 𑐕𑐩𑑂𑐴 𑐟𑑅𑐢𑑄𑐩𑑂𑐴 𑐳𑐵𑑄𑐳𑑂𑐎𑐺𑐟𑐶𑐎𑐎𑑅𑐩𑐶 𑐣𑑄 𑐏𑑅 𑑋 𑐰𑐫𑑂𑐎𑑅 𑐠𑑅 𑐱𑑂𑐬𑐡𑑂𑐢𑐾𑐫 𑐐𑐸𑐬𑐸 𑐮𑐵𑐮 𑐩𑐴𑐬𑑂𑐖𑐣𑐥𑐵𑐏𑐾𑑄 𑐡𑐶𑐎𑑂𑐲𑐶𑐟 𑐖𑐸𑐫𑐵𑑅 𑐠𑑅 𑐴𑐾 𑐩𑐹𑐐𑐸𑐬𑐸 𑐖𑐸𑐫𑐵𑑅 𑐔𑑂𑐫𑐵𑐡𑑃 𑐣𑑂𑐴𑑂𑐫𑑅𑐟𑐶𑐣𑐶 𑐣𑑂𑐴𑐣𑐵 𑐰𑐣𑐾𑐟𑑂𑐫𑑄𑐐𑐸 𑐏𑑀𑐣𑐵𑐫𑐵 𑐩𑐴𑐟𑑂𑐰𑐥𑐹𑐬𑑂𑐞𑐐𑐸 𑐥𑐬𑐩𑑂𑐥𑐬𑐵𑐐𑐟 𑐟𑐵𑐣𑑂𑐟𑑂𑐬𑐶𑐎𑐫𑐸𑐎𑑂𑐟 𑐨𑐶𑑄𑐥𑑂𑐫𑐵𑐏𑑄 ‘𑐊𑐎𑐵𑐡𑐱𑐶 𑐰𑑂𑐬𑐟’ 𑐳𑑂𑐫𑐣𑐵𑑅 𑐎𑑂𑐫𑐣𑐾𑐐𑐸 𑐣𑐵𑐥𑑄 𑐣𑑂𑐴𑐹𑐥𑐸𑐳𑑂𑐟𑐵𑐫𑐵𑐟 𑐴𑐳𑑂𑐟𑐵𑐟𑐬𑐞 𑐫𑐵𑐫𑐾𑐐𑐸 𑐋𑐟𑐶𑐴𑐵𑐳𑐶𑐎 𑐖𑑂𑐫𑐵 𑐖𑐹𑐐𑐸 𑐏𑑅 𑑋  𑐰𑐫𑑂𑐎𑐮𑑄 𑐣𑐾𑐰𑐵𑑅 𑐳𑑄𑐐𑐷𑐟 𑐰𑐶𑐎𑐵𑐳𑐫𑐵 𑐏𑑃 𑐖𑐎 𑐮𑑂𑐴𑐵𑐣𑐵𑐩𑐡𑐷 𑐠𑑅𑐩𑑂𑐴𑑄 𑐴𑐾 𑐡𑐵𑐦𑐵𑐫𑐵 𑐏𑐶𑑄 𑐠𑐵𑐫𑐾𑐐𑐸, 𑐧𑐵𑐳𑐸𑐬𑐷 𑐰 𑐎𑐵𑐬𑑂𑐣𑐾𑐳 𑐥𑐸𑐂𑐐𑐸 𑐳𑐫𑐾𑐎𑐵𑑅 𑐳𑑂𑐫𑐣𑐵𑑅 𑐠𑐸𑐎𑐷𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐣𑑂𑐴𑑂𑐫𑐠𑐣𑐾𑐧𑐴 𑐖𑐸𑐂𑐎 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐠𑐸𑐎𑐠𑑄 𑐴𑐾 𑐰𑐫𑑂𑐎𑑅 𑐕𑐐𑐹 𑐖𑐩𑐵𑐣𑐵𑐫𑑂 𑐟𑐳𑐎𑑄 𑐧𑐵𑑄𑐮𑐵𑑅𑐩𑑂𑐴 𑐴𑐶𑐬𑑀 𑐎𑐠𑑄 𑐣𑐵𑑄𑐖𑐵𑑅𑐩𑑂𑐴 𑐕𑐩𑑂𑐴 𑐳𑑂𑐫𑐮𑑂𑐮𑐵𑑅𑐩𑑂𑐴 𑐣𑐵𑐳𑐮𑑄𑐮𑐷𑐩𑑂𑐴 𑐎𑐮𑐵𑐎𑐵𑐬 𑐣𑑄 𑐏𑑅 𑑋 𑐰𑐫𑑂𑐎𑑅 𑐬𑐵𑐩𑐵𑐫𑐞 𑐥𑑂𑐫𑐵𑐏𑐣𑐫𑑂 𑐡𑐱𑐬𑐠 𑐖𑐸𑐫𑐵𑑅, 𑐮𑐰𑐎𑐸𑐱 𑐥𑑂𑐫𑐵𑐏𑐣𑐫𑑂 𑐧𑐵𑐮𑑂𑐩𑐷𑐎𑐷 𑐖𑐸𑐫𑐵𑑅 𑐳𑐦𑐮 𑐀𑐨𑐶𑐣𑐫 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐊𑐎𑐵𑐡𑐱𑐷 𑐨𑐶𑑄𑐥𑑂𑐫𑐵𑐏𑑄𑐫𑐵 𑐣𑐵𑐥𑐣𑐵𑐥𑑄 𑐱𑑂𑐬𑐰𑐞𑐎𑐸𑐩𑐵𑐬, 𑐥𑐵𑐞𑑂𑐜𑐰 𑐬𑐵𑐖𑐵, 𑐨𑐎𑑂𑐟𑐥𑑂𑐬𑐮𑑂𑐴𑐵𑐡, 𑐎𑐰𑐶𑐬𑐎𑐸𑐩𑐵𑐬 𑐥𑑂𑐫𑐵𑐏𑑄, 𑐰𑐶𑐱𑐣𑑂𑐟𑐬 𑐥𑑂𑐫𑐵𑐏𑑄, 𑐩𑐢𑐸𑐩𑐵𑐮𑐟𑐷 𑐥𑑂𑐫𑐵𑐏𑑄𑐫𑐵 𑐩𑐹𑐐𑐸𑐬𑐸 𑐖𑐸𑐫𑐵𑑅 𑐳𑑂𑐫𑐣𑐵𑐡𑐷𑐐𑐸 𑐏𑑅 𑑋

𑐠𑐸𑐎𑐠𑑄 𑐰𑐫𑑂𑐎𑑅𑐫𑐵 𑐖𑐷𑐰𑐣 𑐡𑐸𑐰𑐵𑐮𑐵𑑅 𑐳𑑂𑐰𑐫𑐾𑐧𑐮𑐫𑑂 𑐰𑐫𑑂𑐎𑑅 𑐕𑐩𑑂𑐴 𑐣𑐾𑐰𑐵𑑅 𑐖𑐵𑐟𑐶, 𑐨𑐵𑐲𑐵, 𑐢𑐬𑑂𑐩𑐫𑐵 𑐳𑑂𑐫𑐮𑑂𑐮𑐵𑑅𑐩𑑂𑐴 𑐴𑐵𑐩𑐵 𑐏𑑅 𑐢𑐎𑐵𑑅 𑐢𑐵𑐫𑐾𑐩𑐵𑑅 𑑋 𑐰𑐫𑑂𑐎𑑅 𑐣𑐾𑐰𑐵𑑅 𑐳𑐩𑐵𑐖𑐫𑐵 𑐣𑐶𑑄𑐟𑐶𑑄 𑐖𑐎 𑐩𑐏𑐸 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐣𑐶𑐩𑑂𑐟𑐶𑑄 𑐴𑐾 𑐠𑑅𑐐𑐸 𑐖𑐷𑐰𑐣 𑐥𑐵𑐣𑐵𑐡𑐷𑐩𑑂𑐴 𑐬𑐵𑐲𑑂𑐚𑑂𑐬 𑐳𑐾𑐰𑐷 𑐏𑑅 𑑋 𑐏𑑀𑐣𑐵 𑐡𑐾𑐫𑑂𑐫𑐵 𑐐𑑁𑐬𑐰 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS