Read news in NepalBhasa text-- www.hamroschool.com BACK 𑐠𑐶𑐩𑐶𑐂 𑐎𑐵𑐫 𑐰 𑐎𑐮𑐵𑑅𑐫𑐵𑐟 𑐳𑑂𑐫𑐵𑐣𑐵𑑅 𑐁𑐟𑑂𑐩𑐴𑐟𑑂𑐫𑐵 ! – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐠𑐶𑐩𑐶𑐂 𑐎𑐵𑐫 𑐰 𑐎𑐮𑐵𑑅𑐫𑐵𑐟 𑐳𑑂𑐫𑐵𑐣𑐵𑑅 𑐁𑐟𑑂𑐩𑐴𑐟𑑂𑐫𑐵 !

𑐠𑐶𑐩𑐶 – 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐜𑐵 𑐣𑑄. 𑑖 𑐎𑐸𑐣𑑂𑐜𑑀𑐮𑐫𑐵 𑐕𑐏𑐵 𑐕𑐾𑑃𑐫𑑂 𑐱𑐸𑐎𑑂𑐬𑐰𑐵𑑅 𑐳𑑂𑐰𑐩𑑂𑐴 𑐳𑐷𑐥𑐶𑑄 𑐮𑐸𑐂𑐎𑐹𑐐𑐸𑐮𑐶 𑐄𑐥𑐶𑑄 𑐩𑐢𑑂𑐫𑐾 𑐣𑐶𑐩𑑂𑐴𑐾𑐳𑐶𑐟 𑐳𑑂𑐫𑐵𑐣𑐵𑑅 𑐕𑐩𑑂𑐴𑐾𑐳𑑂𑐫𑐵𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐥𑑂𑐬𑐴𑐬𑐷𑐫𑐵 𑐥𑑂𑐬𑐵𑐬𑐩𑑂𑐨𑐶𑐎 𑐀𑐣𑐸𑐳𑐣𑑂𑐢𑐵𑐣𑑄 𑐏𑐣𑐾𑐡𑐸𑐐𑐸 𑐡𑐸 𑑋 𑐳𑐷𑐥𑐶𑑄 𑐕𑐐𑐹 𑐴𑐾 𑐥𑐬𑐶𑐰𑐵𑐬𑐫𑐵 𑐀𑐧𑐸, 𑐩𑐵𑑄 𑐰 𑐎𑐵𑐫𑑂 𑐏𑑅 𑑋 𑐥𑐬𑐶𑐰𑐵𑐬𑐫𑐵 𑐳𑐷𑐩𑑂𑐴 𑐮𑐶𑐳𑐾𑑄 𑐕𑐾𑑃𑐫𑑂 𑐮𑐴𑐶𑐣𑐵𑐟𑑅𑐩𑑂𑐴 𑐏𑐶𑐔𑐵 𑐕𑐩𑑂𑐴 𑐳𑐷𑐐𑐸 𑐀𑐰𑐳𑑂𑐠𑐵𑐫𑑂 𑐮𑐸𑐂𑐎𑐹𑐐𑐸 𑐏𑑅 𑑋

𑐥𑑂𑐬𑐵𑐬𑐩𑑂𑐨𑐶𑐎 𑐀𑐣𑐸𑐳𑐣𑑂𑐢𑐵𑐣 𑐎𑐠𑑄 𑐀𑐧𑐸𑐩𑑂𑐴𑐾𑐳𑑂𑐫𑐵𑑄 𑐴𑐾 𑐣𑑂𑐴𑐵𑐥𑐵𑑄 𑐎𑐵𑐫 𑐰 𑐎𑐮𑐵𑑅𑐫𑐵𑐟 𑐳𑑂𑐫𑐵𑐣𑐵𑑅 𑐠𑑅𑐩𑑂𑐴𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐏𑐣𑐾𑐡𑐸𑐐𑐸 𑐥𑑂𑐬𑐴𑐬𑐷𑐫𑐵 𑐢𑐵𑐥𑐸𑐸 𑐡𑐸 𑑋 𑐳𑐷𑐥𑐶𑐣𑐶 𑐀𑐰𑐳𑑂𑐠𑐵 𑐳𑑂𑐰𑐫𑐵𑑅 𑐠𑐖𑑂𑐫𑐵𑑅𑐐𑐸 𑐀𑐣𑐸𑐩𑐵𑐣 𑐫𑐵𑑅𑐐𑐸 𑐏𑑅 𑑋

𑐀𑐧𑐸𑐩𑑂𑐴 𑑓𑑖 𑐡𑑃𑐫𑐵 𑐳𑐸𑐡𑐷𑐥 𑐀𑐢𑐶𑐎𑐵𑐬𑐷𑑄 𑐣𑑂𑐴𑐵𑐥𑐵𑑄 𑐗𑐶𑑄𑐣𑑂𑐫𑐵𑐡𑑃 𑐡𑐸𑐩𑑂𑐴 𑐎𑐵𑐫 𑐳𑐸𑐱𑐵𑐣𑑂𑐟 𑐀𑐢𑐶𑐎𑐵𑐬𑐷 𑐰 𑐎𑐮𑐵𑑅 𑐳𑐩𑑂𑐗𑐵𑐣𑐵𑐫𑐵𑐟 𑐥𑐵𑑅 𑐠𑐾𑑄𑐖𑑂𑐫𑐵𑑅𑐐𑐸 𑐴𑐟𑐶𑐫𑐵𑐬𑑄 𑐥𑐵𑐮𑐵𑑅 𑐳𑑂𑐫𑐵𑐫𑐾𑐢𑐸𑑄𑐎𑐵𑑅 𑐮𑐶𑐥𑐵 𑐠𑑅𑐩𑑂𑐴𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐏𑐣𑐾𑐡𑐸𑐐𑐸 𑐏𑑃 𑐥𑑂𑐬𑐴𑐬𑐷𑑄 𑐢𑐵𑑅𑐐𑐸 𑐡𑐸 𑑋

𑐳𑐷𑐥𑐶𑑄 𑐳𑐎𑐳𑐶𑐫𑐵𑑄 𑐦𑑀𑐣 𑐰𑑄𑐐𑐸 𑐳𑑀𑐩𑐰𑐵𑑅 𑐣𑐶𑐳𑐾𑑄 𑐧𑐣𑑂𑐡 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐥𑐶𑑄 𑐩𑐢𑑂𑐫𑐾 𑐩𑐵𑑄𑐩𑑂𑐴 𑐰 𑐎𑐵𑐫𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐣𑑂𑐰𑐰𑐫𑐵𑑅 𑐢𑑂𑐰𑐐𑑂𑐐𑐶𑐣𑐵 𑐰𑐣𑐷𑐠𑐾 𑐔𑑂𑐰𑐣𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐀𑐧𑐸𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐢𑐵𑑅𑐳𑐵 𑐀𑐥𑐵𑐫𑑂𑐳𑐎𑑄 𑐕𑐸𑑄 𑐖𑐹𑐐𑐸 𑐏𑐣𑐾𑐩𑐡𑐸𑐣𑐶𑐐𑐸 𑐏𑑅 𑑋 𑐳𑐷𑐩𑑂𑐴 𑐳𑑂𑐰𑐫𑐾𑐧𑐮𑐫𑑂 𑐩𑐵𑑄 𑐰 𑐎𑐵𑐫 𑐳𑐷𑐐𑐸 𑐥𑑂𑐫𑐣𑑂𑐴𑐸 𑐣𑑂𑐫𑐵𑐣𑑂𑐴𑐸 𑐡𑐫𑐾𑐢𑐸𑑄𑐎𑐹𑐐𑐸 𑐰 𑐀𑐧𑐸𑐩𑑂𑐴 𑐳𑐷𑐐𑐸 𑐣𑐶𑐣𑑂𑐴𑐸𑐟𑐶 𑐖𑐎 𑐡𑐸𑐐𑐸 𑐏𑐣𑐾𑐡𑐸𑐐𑐸 𑐏𑑅 𑑋 𑐀𑐠𑐾𑐴𑐾 𑐩𑐵𑑄 𑐰 𑐎𑐵𑐫𑐩𑑂𑐴𑐾𑐳𑐶𑐟 𑐕𑑂𑐫𑐣𑐫𑑂 𑐰 𑐐𑐥𑐟𑐫𑑂 𑐴𑐟𑐶𑐫𑐵𑐬𑑄 𑐥𑐵𑐮𑐵𑐟𑑅𑐐𑐸 𑐏𑐣𑐾𑐡𑐸𑐳𑐵 𑐀𑐧𑐸𑐩𑑂𑐴𑐳𑐶𑐫𑐵 𑐳𑐷𑐩𑑂𑐴𑐫𑑂 𑐢𑐵𑑅𑐳𑐵 𑐀𑐖𑑂𑐫𑐵𑑅𑐐𑐸 𑐑𑐵𑑅 𑐕𑐸𑑄 𑐣𑑄 𑐏𑐣𑐾𑐩𑐡𑐸 𑑋 𑐧𑐬𑐸 𑐳𑐷𑐩𑑂𑐴 𑐮𑐶𑐎𑑂𑐎 𑐧𑐵𑐣𑑂𑐟𑐵 𑐫𑐵𑐣𑐵𑐟𑑅𑐐𑐸 𑐏𑐣𑐾𑐡𑐸 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐣𑑄 𑐀𑐧𑐸𑐩𑑂𑐴𑐾𑐳𑑂𑐫𑐵𑑄 𑐩𑐵𑑄 𑐰 𑐎𑐵𑐫𑐫𑐵𑐟 𑐳𑑂𑐫𑐵𑐣𑐵𑑅 𑐠𑑅𑐩𑑂𑐴 𑐰𑐶𑐲 𑐣𑐫𑐵𑑅 𑐁𑐟𑑂𑐩𑐴𑐟𑑂𑐫𑐵 𑐫𑐵𑑅𑐐𑐸 𑐏𑐣𑐾𑐡𑐸𑐐𑐸 𑐏𑑃 𑐀𑐣𑐸𑐳𑐣𑑂𑐢𑐵𑐣𑐫𑑂 𑐳𑐴𑐨𑐵𑐐𑐷 𑐕𑐩𑑂𑐴 𑐥𑑂𑐬𑐴𑐬𑐷𑑄 𑐢𑐵𑑅𑐐𑐸 𑐡𑐸 𑑋 𑐀𑐧𑐸𑐩𑑂𑐴 𑐳𑐸𑐡𑐷𑐥 𑐕𑐸𑑄 𑐃 𑐣𑑂𑐴𑑂𑐫𑐰 𑐣𑐶𑐳𑐾𑑄 𑐩𑐵𑐣𑐳𑐶𑐎 𑐟𑐣𑐵𑐰𑐫𑑂 𑐣𑑄 𑐡𑐸𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐥𑑂𑐫𑐟𑑃 𑐖𑐵𑑅𑐐𑐸 𑐕𑐾𑑃𑐫𑑂 𑐣𑐶𑐐𑐹𑐐𑐸, 𑐳𑑂𑐰𑑄𑐐𑐹𑐐𑐸 𑐰 𑐥𑑂𑐫𑑄𑐐𑐹𑐐𑐸 𑐟𑐮𑐵𑐫𑑂 𑐕𑐩𑑂𑐴 𑐕𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐮𑐸𑐂𑐎𑐹𑐐𑐸 𑐏𑑅 𑑋 𑐣𑐶𑐐𑐹𑐐𑐸 𑐟𑑃𑐫𑑂 𑐕𑐩𑑂𑐴 𑐏𑐶𑐔𑐵 𑐣𑑄 𑐳𑐷𑐣𑐵𑐔𑑂𑐰𑑄𑐐𑐸 𑐮𑐸𑐂𑐎𑐹𑐐𑐸 𑐏𑑅 𑑋 𑐕𑐾𑑃𑐫𑑂 𑐐𑐣𑑄 𑐣𑑄 𑐏𑐵𑐥𑐵𑐫𑑂 𑐔𑐸𑐎𑐸 𑐟𑐫𑐵𑐩𑐟𑑅𑐐𑐸 𑐰 𑐟𑐶𑐣𑐵 𑐖𑐎 𑐟𑑅𑐐𑐸 𑐏𑑅 𑑋

𑐳𑐸𑐡𑐷𑐥𑐫𑐵 𑐎𑐶𑐖𑐵 𑐳𑐸𑐣𑐶𑐮 𑐀𑐢𑐶𑐎𑐵𑐬𑐷 𑐱𑐸𑐎𑑂𑐬𑐰𑐵𑑅 𑐳𑐣𑐶𑐮𑐫𑑂 𑐥𑐵𑐏𑐾 𑐡𑐵𑐖𑐸𑐩𑑂𑐴𑐾𑐳𑐶𑐫𑐵 𑐕𑐾𑑃𑐫𑑂 𑐰𑑄𑐧𑐮𑐫𑑂 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐳𑐷𑐥𑐶𑑄 𑐏𑑄𑐎𑐹𑐐𑐸 𑐏𑑅 𑑋 𑐳𑐸𑐣𑐶𑐮𑐫𑐵 𑐎𑐠𑑄 𑐩𑐹 𑐮𑐸𑐏𑐵 𑐔𑐵𑐮𑐵𑐔𑑂𑐰𑑄𑐐𑐸 𑐴𑐾 𑐏𑑅𑐳𑐵 𑐠𑑅 𑐠𑐴𑐵𑑄 𑐰𑐣𑐵𑐧𑐮𑐫𑑂 𑐣𑐶𑐐𑐹𑐐𑐸 𑐟𑑃𑐫𑑂 𑐳𑑂𑐰𑐵𑐴𑐵𑐣𑐾𑐫𑐵 𑐥𑑂𑐫𑐵𑐳𑐾𑐖𑐫𑑂 𑐏𑐶𑐔𑐵 𑐳𑐶𑐣𑐵𑐔𑑂𑐰𑑄𑐐𑐸 𑐰 𑐣𑐵𑐥𑐳𑑄 𑐔𑑂𑐰𑑄𑐐𑐸 𑐎𑑂𑐰𑐠𑐵𑐫𑑂 𑐩𑐵𑑄𑐩𑑂𑐴 𑐮𑐵𑐳𑐵𑐫𑑂 𑐳𑐷𑐣𑐵𑐔𑑂𑐰𑑄𑐐𑐸, 𑐀𑐣 𑐔𑑂𑐰𑐫𑑂𑐫𑐵 𑐟𑐮𑑂𑐮𑐵𑐫𑑂 𑐎𑐵𑐫𑐩𑑂𑐴 𑐣𑑄 𑐮𑐵𑐳𑐵𑐫𑑂 𑐴𑐾 𑐳𑐷𑐣𑐵𑐔𑑂𑐰𑑄𑐐𑐸 𑐰 𑐀𑐣𑑄 𑐔𑑂𑐰𑐫𑑂 𑐨𑐸𑐟𑐹 𑐎𑑂𑐰𑐠𑐵𑐫𑑂 𑐧𑑃𑐫𑑂 𑐴𑐾 𑐀𑐧𑐸𑐩𑑂𑐴 𑐳𑐷𑐣𑐵𑐔𑑂𑐰𑑄𑐐𑐸 𑐏𑑄𑐐𑐸 𑐏𑑅 𑑋 𑐠𑑂𑐰 𑐮𑐶𑐥𑐵 𑐩𑐴𑐵𑐣𑐐𑐬𑐷𑐫 𑐥𑑂𑐬𑐴𑐬𑐷 𑐰𑐺𑐟𑑂𑐟 𑐠𑐶𑐩𑐶𑐂 𑐏𑐧𑐬 𑐫𑐵𑐫𑐾𑐰𑑄 𑐥𑑂𑐬𑐴𑐬𑐷 𑐀𑐣 𑐰𑐣𑐵𑑅 𑐀𑐣𑐸𑐳𑐣𑑂𑐢𑐵𑐣 𑐳𑐸𑐬𑐸 𑐫𑐵𑑅𑐐𑐸 𑐏𑑅 𑑋

𑐴𑐟𑑂𑐫𑐵 𑐮𑐶𑐥𑐵 𑐳𑐩𑑂𑐗𑐣𑐵𑐫𑐵𑐟 𑐀𑑄𑐐𑑅𑐥𑐵𑐏𑐾 𑐳𑑂𑐰𑐎𑐵𑑅 𑐩𑑂𑐴𑐫𑑂 𑐳𑐶𑐮𑐏𑑄 𑐟𑑂𑐰𑐥𑐸𑐫𑐵𑐟𑑅𑐐𑐸 𑐏𑑅𑐳𑐵 𑐎𑐵𑐫𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐣𑑄 𑐎𑑂𑐰𑐥𑑂𑐳𑐵𑐥𑐸𑐂𑐎𑐵𑑅 𑐬𑐵𑐩𑐣𑐵𑐩𑐷 𑐩𑑂𑐴𑐵𑐳𑐸𑐐𑐸 𑐎𑐵𑐥𑐟𑑄 𑐟𑑂𑐰𑐥𑐸𑐫𑐵𑐟𑑅𑐐𑐸 𑐏𑑅 𑑋 𑐩𑐵𑑄 𑐰 𑐎𑐵𑐫𑐩𑑂𑐴𑐾𑐳𑐶𑐫𑐵 𑐳𑐷𑐩𑑂𑐴 𑐡𑐸𑐠𑐵𑐫𑑂 𑐀𑑄𑐐𑑅, 𑐏𑐵𑐟𑐵𑐫𑑂 𑐴𑐶 𑐮𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐩𑐴𑐵𑐣𑐐𑐬𑐷𑐫 𑐀𑐥𑐬𑐵𑐢 𑐩𑐴𑐵𑐱𑐵𑐏𑐵𑐫𑐵 𑐰𑐬𑐶𑐲𑑂𑐛 𑐥𑑂𑐬𑐴𑐬𑐷 𑐄𑐥𑐬𑐷𑐎𑑂𑐲𑐎 𑐳𑐴𑐎𑐸𑐮 𑐠𑐵𑐥𑐵𑑄 𑐳𑐷𑐩𑑂𑐴 𑐳𑑂𑐰𑐩𑑂𑐴𑐾𑐳𑐶𑐫𑐵𑑄 𑐥𑑀𑐲𑑂𑐚𑐩𑐵𑐬𑑂𑐟𑐩 𑐬𑐶𑐥𑑀𑐬𑑂𑐚 𑐰 𑐏𑐶𑐔𑐵𑐫𑐵 𑐣𑑄 𑐥𑑀𑐲𑑂𑐚𑐩𑐵𑐬𑑂𑐚𑐩 𑐬𑐶𑐥𑑀𑐬𑑂𑐚 𑐰𑐮 𑐢𑐵𑐫𑐾𑐰𑑄 𑐖𑐎 𑐑𑐚𑐣𑐵𑐫𑐵 𑐧𑐵𑐬𑐾 𑐠𑐥 𑐏𑑃 𑐢𑐵𑐫𑐾𑐦𑐂𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸, ‘𑐳𑐩𑑂𑐗𑐣𑐵 𑐰 𑐳𑐸𑐱𑐵𑐣𑑂𑐟𑐫𑐵 𑐕𑑂𑐫𑐣𑐫𑑂 𑐟𑑅𑐎𑐹𑐐𑐸 𑐑𑐵𑑅 𑐡𑐸 𑑋 𑐳𑐸𑐱𑐵𑐣𑑂𑐟𑐫𑐵 𑐳𑐷𑐩𑑂𑐴 𑐮𑐵𑐣𑐵𑐔𑑂𑐰𑑄𑐐𑐸 𑐏𑐵𑐟𑐵𑐫𑑂 𑐴𑐶 𑐎𑐶𑐣𑐵𑐔𑑂𑐰𑑄𑐐𑐸 𑐮𑐵 𑐟𑐵𑐫𑐾𑐐𑐸 𑐣𑑃𑐫𑐵 𑐔𑐸𑐥𑑂𑐥𑐷 𑐣𑑄 𑐮𑐸𑐂𑐎𑐵𑐐𑐸 𑐡𑐸 𑑋 𑐩𑐵𑑄 𑐎𑐵𑐫𑐫𑐵 𑐳𑐷𑐩𑑂𑐴 𑐣𑐰𑐫𑐾𑐢𑐸𑑄𑐎𑐹𑐐𑐸 𑐰 𑐑𑐵𑐮𑐫𑑂 𑐎𑐶 𑐡𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐳𑐸𑐡𑐷𑐥𑐫𑐵 𑐳𑐷𑐩𑑂𑐴 𑐣 𑐣𑑄 𑐩𑐰𑑅𑐣𑐶, 𑐢𑑂𑐰 𑐣𑑄 𑐢𑑂𑐰𑐩𑐐𑐶𑐣𑐷 𑑋 𑐳𑐸𑐡𑐷𑐥𑐫𑐵 𑐳𑐷𑐩𑑂𑐴 𑐮𑐶𑐎𑑂𑐎 𑐡𑐸𑐐𑐸 𑐡𑐾𑐩𑐵𑐫𑑂 𑐧𑐵𑐣𑑂𑐟𑐵 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐏𑐶𑐔𑐵𑑄 𑐣𑑄 𑐧𑐵𑐣𑑂𑐟𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐨𑐸𑐟𑐸𑐮𑐷 𑐟𑐬𑐎𑐵𑐬𑐷 𑐰 𑐖𑐵 𑐡𑐸 𑑋 𑐄𑐎𑐶𑑄 𑐥𑑂𑐬𑐵𑐬𑐩𑑂𑐨𑐶𑐎 𑐀𑐣𑐸𑐳𑐣𑑂𑐢𑐵𑐣𑐫𑑂 𑐳𑐸𑐡𑐷𑐥 𑐰 𑐏𑐶𑐔𑐵 𑐰𑐶𑐲 𑐣𑐫𑐵𑑅 𑐳𑐷𑐐𑐸 𑐏𑐣𑐾𑐡𑐸 𑑋 𑐕𑐾𑑃𑐫𑐵 𑐮𑐸𑐏𑐵 𑐔𑐵𑐮𑐵𑐔𑑂𑐰𑑄𑐐𑐸𑐮𑐶𑑄 𑐥𑐶𑐣𑐾𑐫𑐵𑐥𑐶𑑄 𑐩𑐣𑐹𑐟 𑐰𑐫𑐵𑑅 𑐳𑑂𑐫𑐵𑑅𑐐𑐸 𑐏𑑅 𑐮𑐵 𑐢𑐫𑐵𑐐𑐸 𑐁𑐱𑑄𑐎𑐵 𑐫𑐵𑐫𑐾𑐠𑐵𑐫𑑂 𑐡𑐸, 𑐟𑐬 𑐑𑐚𑐣𑐵 𑐳𑑂𑐠𑐮 𑐰 𑐀𑐰𑐳𑑂𑐠𑐵 𑐳𑑂𑐰𑐫𑐾𑐧𑐮𑐫𑑂 𑐥𑐶𑐣𑐾𑐫𑐵𑐥𑐶𑑄 𑐴𑐾 𑐡𑐸𑐴𑐵𑑄 𑐰𑐫𑐵𑑅 𑐳𑑂𑐫𑐵𑑅𑐐𑐸 𑐢𑐎𑐵𑑅 𑐫𑐎𑐶𑐣 𑐫𑐵𑐣𑐵𑑅 𑐢𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋’

𑐳𑑂𑐠𑐵𑐣𑐷𑐫 𑐩𑐣𑐹𑐟𑐫𑑂𑐳𑑄 𑐣𑑄 𑐥𑑂𑐫𑐣𑑂𑐴𑐸 𑐣𑑂𑐴𑑂𑐫𑑅 𑐄𑐩𑐶𑐳𑑄 𑐎𑐶𑐬𑐵𑐣𑐵 𑐥𑐳𑑅 𑐔𑐵𑐫𑐾𑐎𑐹𑐐𑐸 𑐰 𑐣𑑂𑐴𑐶𑐣𑐫𑑂 𑐥𑐳𑑅 𑐧𑐣𑑂𑐡 𑐫𑐵𑐣𑐵 𑐰𑑄𑐐𑐸 𑐰 𑐣𑐶𑐲𑐾𑐢𑐵𑐖𑑂𑐘𑐵𑐫𑐵 𑐎𑐵𑐬𑐞𑑄 𑐄𑐥𑐶𑑄 𑐥𑐶𑐴𑐵𑑄 𑐰𑑅 𑐩𑐰𑑅 𑐢𑐫𑐵𑐐𑐸 𑐫𑐵𑐡 𑐩𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS