𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵𑐫𑐵 𑐟𑑅𑐩𑐸𑑃𑐖𑑂𑐫𑐵 𑐎𑑂𑐰𑐔𑐵𑐮
𑐫𑐾𑑃- 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵𑐫𑐵 𑑑𑑙 𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵 𑐖𑐹𑐩 𑐳𑐦𑑂𑐚𑐰𑐾𑐬𑐥𑐵𑐏𑐾𑑄 𑐨𑐬𑑂𑐔𑐸𑐀𑐮 𑐬𑐸𑐥𑑄 𑐳𑑀𑐩𑐰𑐵𑑅 𑐎𑑂𑐰𑐔𑐵𑑅𑐐𑐸 𑐡𑐸 𑑋
𑐫𑐖𑑂𑐘 𑐩𑐵𑐣 𑐱𑐵𑐎𑑂𑐫𑐫𑐵 𑐣𑐵𑐫𑑅𑐳𑐸𑐂 𑐡𑐶𑐰𑐵𑐎𑐬 𑐢𑑁𑐨𑐡𑐾𑐮 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵𑐥𑐵𑐏𑐾𑑄 𑐀𑐩𑐾𑐬𑐶𑐎𑐵𑐫𑐵 𑐣𑐶𑐟𑐶𑑄 𑐣𑐾𑐥𑐵𑐮𑐷 𑐬𑐵𑐖𑐡𑐸𑐟 𑐜𑐵. 𑐀𑐬𑑂𑐖𑐸𑐣 𑐎𑐸𑐩𑐵𑐬 𑐎𑐵𑐬𑑂𑐎𑐷 𑐩𑐹𑐥𑐵𑐴𑐵𑑃 𑐎𑐠𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋
𑐄𑐀𑐬𑑂𑐐𑐣𑐵𑐂𑐖𑐾𑐱𑐣𑑄 𑐣𑐾𑐥𑐵𑐮𑐨𑐵𑐲𑐵𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑄 𑐠𑑅𑐟 𑐥𑑂𑐬𑐨𑐵𑐰𑐶𑐟 𑐫𑐵𑑅𑐐𑐸 𑐏𑑃 𑐎𑐣𑐵𑐡𑐶𑐳𑐾 𑐠𑐠𑐾 𑐣𑐾𑐥𑐵𑐮𑐨𑐵𑐲𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐮 𑐢𑐵𑑅𑐳𑐵 𑐠𑑅𑐥𑐶𑐣𑐶𑐐𑐸 𑐣𑑂𑐴𑐹𑐐𑐸 𑐥𑐸𑐳𑑂𑐟𑐵 𑐮𑑂𑐫𑐵𑐩𑑂𑐴𑐟𑐫𑑂𑐳𑑄 𑐳𑐫𑐾𑐎𑐵𑑅 𑐨𑐵𑐲𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐟𑐶𑐧𑑅𑐖𑐸𑐂𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐣𑐾𑐥𑐵𑑅𑐫𑐵 𑐳𑑄𑐳𑑂𑐎𑐺𑐟𑐶–𑐳𑑄𑐳𑑂𑐎𑐵𑐬 𑐀𑐩𑐾𑐬𑐶𑐎𑐵𑐫𑑂 𑐣𑑄 𑐣𑑂𑐴𑑂𑐫𑐧𑑂𑐫𑐵 𑐩𑑂𑐴𑐳𑐷𑐎𑐵 𑐧𑐶𑐫𑐵𑐔𑑂𑐰𑑄𑐐𑐸 𑐔𑑂𑐰𑐕𑐵𑐫𑐾 𑐧𑐴𑑅𑐐𑐸 𑐏𑑃 𑐎𑐵𑐣𑐵𑐡𑐶𑐮 𑐡𑐎𑐮𑐾 𑐀𑐥𑑂𑐰 𑐳𑑄𑐐𑐛𑐶𑐟–𑐳𑐎𑐺𑐫–𑐳𑐔𑐾𑐟 𑐣𑐵𑐥𑑄 𑐠𑑅𑐥𑐶𑐣𑐶𑐐𑐸 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶, 𑐥𑐬𑐩𑑂𑐥𑐬𑐵𑐫𑐵𑐟 𑐩𑑂𑐰𑐵𑐎𑐵𑐟𑐫𑐾𑐩𑐵𑑅 𑐢𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐳𑑄𑐐𑐛𑐣 𑐡𑐸𑐟𑐵𑐰𑐵𑐳𑐥𑐵𑐏𑐾𑑄 𑐏𑑄𑐎𑐵 𑐔𑑂𑐰𑑄𑐐𑐸 𑐣𑐵𑑄 𑐎𑐵𑐫𑐾 𑐩𑐵𑐮𑐢𑐵𑑅𑐳𑐵 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐱𑐣 𑐀𑐦 𑐀𑐩𑐾𑐬𑐶𑐎𑐵 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐀𑐬𑑂𑐐𑐣𑐵𑐂𑐖𑐾𑐱𑐣𑐫𑐵 𑐰𑐵𑐬𑑂𑐲𑐶𑐎 𑐥𑑂𑐬𑐟𑐶𑐰𑐾𑐡𑐣 𑐩𑐴𑐾𑐣𑑂𑐡𑑂𑐬 𑐥𑑂𑐬𑐢𑐵𑐣, 𑐁𑐬𑑂𑐠𑐶𑐎 𑐥𑑂𑐬𑐟𑐶𑐰𑐾𑐡𑐣 𑐬𑐵𑐖𑐾𑐱 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐐𑐟𑐶𑐰𑐶𑐢𑐶 𑐧𑐵𑐬𑐾 𑐣𑐾𑐥𑐵𑑅 𑐡𑐾𑐫𑑂 𑐎𑐖𑐶 𑐎𑐶𑐬𑐞 𑐎𑐾𑐣 𑐬𑐘𑑂𑐖𑐶𑐟𑑄 𑐎𑐣𑐵𑐡𑐶𑐮𑐳𑐵 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐰 𑐎𑑂𑐰𑐵𑐬𑐶𑐚𑐶𑐣𑐫𑐵 𑐧𑐵𑐬𑐾 WNO 𑐫𑐵 𑐣𑐵𑐫𑑅 𑐳𑐶𑐖𑐣 𑐱𑑂𑐬𑐾𑐲𑑂𑐛𑑄 𑐎𑐷𑐣𑑀𑐚 𑐣𑑂𑐰𑐔𑐹 𑐟𑐫𑐵𑐡𑐷𑐐𑐸 𑐏𑑅 𑑋
𑐡𑐫𑐵 𑐬𑐟𑑂𑐣 𑐱𑐵𑐎𑑂𑐫𑐫𑐵 𑐣𑐵𑐫𑑅𑐳𑐸𑐂 𑐬𑐟𑑂𑐣 𑐎𑐵𑐖𑐷 𑐱𑐵𑐎𑑂𑐫 𑐰 𑐬𑐵𑐩 𑐮𑐵𑐮 𑐱𑑂𑐬𑐾𑐲𑑂𑐛 𑐳𑑂𑐰𑐩𑑂𑐴𑐳𑐶𑐐𑐸 𑐥𑐸𑐔𑐮𑑄 𑐣𑑂𑐴𑐹𑐐𑐸 𑐖𑑂𑐫𑐵𑐳𑐣𑐵 𑐥𑐸𑐔𑑅 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐡𑐸 𑑋 𑐫𑐖𑑂𑐘 𑐩𑐵𑐣 𑐱𑐵𑐎𑑂𑐫𑐫𑐵 𑐣𑐵𑐫𑑅, 𑐩𑐴𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐩𑐹𑐣𑑂𑐰𑐎𑐹, 𑐬𑐵𑐖𑐾𑐱 𑐮𑐵𑐮 𑐱𑑂𑐬𑐾𑐲𑑂𑐛 𑐣𑑂𑐰𑐎𑐹, 𑐕𑑂𑐫𑐵𑐘𑑂𑐖𑐾 𑐄𑐡𑐫 𑐱𑑂𑐬𑐾𑐲𑑂𑐛, 𑐡𑐵𑑄𑐨𑐬𑐶𑑄 𑐡𑐶𑐰𑐵𑐎𑐬 𑐢𑑁𑐨𑐡𑐾𑐮, 𑐮𑑂𑐫𑐹 𑐕𑑂𑐫𑐵𑐘𑑂𑐖𑐾 𑐧𑐧𑐷𑐟𑐵 𑐱𑑂𑐬𑐾𑐲𑑂𑐛, 𑐡𑐸𑐖𑑅 𑐎𑐠𑑄 𑐣𑐰𑐶𑐣 𑐬𑐘𑑂𑐖𑐶𑐟, 𑐳𑐸𑐐𑐣𑑂𑐢 𑐱𑑂𑐬𑐾𑐲𑑂𑐛, 𑐩𑐬𑑂𑐎𑐣𑑂𑐡𑐾𑐫 𑐩𑐵𑐣 𑐥𑑂𑐬𑐢𑐵𑐣𑐥𑐶𑑄 𑐡𑐸𑐠𑑂𑐫𑐵𑐐𑐸 𑐣𑑂𑐴𑐹𑐐𑐸 𑐥𑐸𑐔𑑅 𑐣𑐷𑐳𑑂𑐰𑑄𑐐𑐸 𑐡𑐸𑐸 𑑋
LEAVE YOUR COMMENTS