Read news in NepalBhasa text-- www.hamroschool.com BACK 𑐎𑑀𑐬𑑀𑐣𑐵 𑐨𑐵𑐂𑐬𑐳 : 𑐕𑐵𑐫𑑂 𑐫𑐎𑑂𑐰 𑐮𑑂𑐫𑐵𑐫𑑂𑐩𑑂𑐴𑐟 𑐳𑑄𑐎𑑂𑐬𑐩𑐶𑐟 𑐖𑐸𑐫𑐵𑐔𑑂𑐰𑐣 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑑀𑐬𑑀𑐣𑐵 𑐨𑐵𑐂𑐬𑐳 : 𑐕𑐵𑐫𑑂 𑐫𑐎𑑂𑐰 𑐮𑑂𑐫𑐵𑐫𑑂𑐩𑑂𑐴𑐟 𑐳𑑄𑐎𑑂𑐬𑐩𑐶𑐟 𑐖𑐸𑐫𑐵𑐔𑑂𑐰𑐣 ?

𑐊𑐖𑐾𑐣𑑂𑐳𑐷- 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐎𑐵𑐬𑐞𑑄 𑐧𑐣𑑂𑐡𑐵𑐧𑐣𑑂𑐡𑐷𑐫𑐵 𑐀𑐰𑐳𑑂𑐠𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐁𑐥𑐵𑐮𑑄 𑐡𑐾𑐫𑑂𑐟 𑐏𑐸𑐮𑑂𑐮𑐵 𑐖𑐸𑐫𑐵𑐰𑐣𑐾𑐰𑑄 𑐫𑐎𑑂𑐰 𑐮𑑂𑐫𑐵𑐫𑑂𑐩𑑂𑐴𑐟 𑐳𑑄𑐎𑑂𑐬𑐩𑐶𑐟 𑐖𑐹𑐐𑐸 𑐎𑐾𑐳𑐟 𑐮𑐸𑐫𑐵𑐰𑑅𑐐𑐸 𑐡𑐸 𑑋

𑐁𑐥𑐵𑐮𑑄 𑐡𑐾𑐱𑐫𑑂 𑐟𑐫𑐵𑐟𑑅𑐐𑐸 𑐮𑐎𑐜𑐵𑐄𑐣 𑐰 𑐣𑐶𑐲𑐾𑐢𑐵𑐖𑑂𑐘𑐵 𑐦𑐸𑐎𑐸𑐰𑐵 𑐖𑐸𑐂𑐰𑑄 𑐴𑐮𑐶𑐣𑑂𑐫𑑄𑐎𑐫𑐵 𑐠𑐷𑐠𑐷 𑐠𑐵𑐫𑑂𑐫𑐵 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐀𑐥𑑂𑐰 𑐳𑑄𑐎𑑂𑐬𑐩𑐞 𑐏𑐣𑐾𑐡𑐸𑐐𑐸 𑐡𑐸 𑑋 𑐦𑐾𑐧𑑂𑐬𑐸𑐀𑐬𑐷 𑐣𑐶𑐳𑐾𑑄 𑐖𑐸𑐮𑐵𑐃 𑐟𑐎𑐫𑐵 𑐀𑐰𑐢𑐶𑐫𑐵 𑐡𑐸𑐣𑐾 𑑕 𑐣𑐶𑐳𑐾𑑄 𑑒𑑔 𑐡𑑃𑐫𑐵 𑐩𑐣𑐹𑐟𑐫𑑂 𑐳𑑄𑐟𑑂𑐬𑐩𑐞𑐫𑐵 𑐡𑐬 𑐀𑐥𑑂𑐰𑑅𑐐𑐸 𑐏𑐣𑐾𑐡𑐸 𑑋 𑑖𑑐 𑐮𑐏 𑐳𑑄𑐎𑑂𑐬𑐩𑐶𑐟𑐟𑐫𑑂 𑐟𑐠𑑂𑐫𑐵𑑄𑐎 𑐩𑐸𑑄𑐎𑐵𑑅 𑐫𑐵𑑅𑐐𑐸 𑐕𑐐𑐹 𑐀𑐣𑐸𑐳𑐣𑑂𑐢𑐵𑐣𑑄 𑐠𑐖𑑂𑐫𑐵𑑅𑐐𑐸 𑐜𑐵𑐚𑐵 𑐮𑐸𑐂𑐎𑐹𑐐𑐸 𑐏𑑅 𑑋

𑑕 𑐣𑐶𑐳𑐾𑑄 𑑑𑑔 𑐡𑑃𑐫𑐵 𑐩𑐳𑑂𑐟𑐫𑑂 𑐟𑐠𑑂𑐫𑐵𑑄𑐎 𑑐.𑑘 𑐥𑑂𑐬𑐟𑐶𑐱𑐟𑑄 𑐀𑐥𑑂𑐰𑐫𑐵 𑑔.𑑖 𑐥𑑂𑐬𑐟𑐶𑐱𑐟 𑐠𑑂𑐫𑑄𑐐𑐸 𑐡𑐸 𑑋 𑐀𑐠𑐾𑐴𑐾 𑑑𑑕 𑐣𑐶𑐳𑐾𑑄 𑑒𑑔 𑐡𑑃𑐫𑐵 𑐩𑐣𑐹𑐟𑐫𑑂 𑐟𑐠𑑂𑐫𑐵𑑄𑐎 𑑔.𑑕 𑐀𑐥𑑂𑐰𑐫𑐵 𑑑𑑕 𑐥𑑂𑐬𑐟𑐶𑐱𑐟 𑐠𑑂𑐫𑑄𑐐𑐸 𑐡𑐸 𑑋

𑐰𑐶𑐱𑑂𑐰 𑐳𑑂𑐰𑐵𑐳𑑂𑐠𑑂𑐫 𑐳𑑄𑐑𑐫𑐵 𑐎𑑀𑐨𑐶𑐜-𑑑𑑙𑐫𑐵 𑐥𑑂𑐬𑐵𑐰𑐶𑐢𑐶𑐎 𑐀𑐢𑐶𑐺𑐎𑐟 𑐩𑐵𑐬𑐶𑐫𑐵 𑐨𑐵𑐣 𑐎𑐾𑐬𑐎𑑀𑐨𑐫𑐵 𑐎𑐠𑑄 𑐩𑐴𑐵𑐩𑐵𑐬𑐷 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐡𑐠𑐸𑐂 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐏𑑃 𑐟𑐳𑐎𑑄 𑐔𑐶𑐣𑑂𑐟𑐵𑐫𑐵 𑐰𑐶𑐲𑐫 𑐏𑑅 𑑋 ‘𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐟𑐳𑐎𑑄 𑐳𑐵𑐩𑐵𑐣𑑂𑐫 𑐮𑐎𑑂𑐲𑐞 𑐰 𑐮𑐎𑑂𑐲𑐞 𑐏𑐣𑐾𑐩𑐡𑐸, 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐣𑐶𑑄𑐟𑐶𑑄 𑐰 𑐧𑐵𑑄𑐮𑐵𑐐𑐸 𑐏𑑃 𑐏𑑅 𑑋 𑐟𑐬 𑐁𑐥𑐵𑐮𑑄 𑐮𑑂𑐫𑐵𑐫𑑂𑐩𑑂𑐴𑐟 𑐧𑐸𑐬𑐵-𑐧𑐸𑐬𑐷 𑐰 𑐎𑐩𑐖𑑀𑐬 𑐩𑐣𑐹𑐟 𑐣𑐵𑐥 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐂 𑑋 𑐀𑐥𑑂𑐰 𑐮𑑂𑐫𑐵𑐫𑑂𑐩𑑂𑐴𑐟 𑐳𑑄𑐎𑑂𑐬𑐩𑐶𑐟 𑐖𑐸𑐂𑐐𑐸 𑐢𑐵𑐂𑐐𑐸 𑐄𑐩𑐶𑐳𑑄 𑐧𑐸𑐬𑐵-𑐧𑐸𑐬𑐷 𑐰𑐵 𑐎𑐩𑐖𑑀𑐬𑐟𑐫𑑂𑐟 𑐄𑐐𑐸 𑐮𑑂𑐰𑐫𑑂 𑐳𑐬𑐾 𑐫𑐵𑐫𑐾𑐦𑐂 𑐐𑐸𑐎𑐷𑑄 𑐫𑐵𑐣𑐵𑑅 𑐩𑐣𑐹𑐟 𑐳𑐷𑐦𑐂𑐐𑐸 𑐟𑐎𑑄 𑐀𑐰𑐳𑑂𑐠𑐵𑐫𑑂 𑐰𑐫𑐾𑐦𑐸,’ 𑐩𑐵𑐬𑐶𑐫𑐵𑑄 𑐢𑐫𑐵𑐡𑐷 𑑋

𑐠𑐖𑑂𑐫𑐵𑑅𑐐𑐸 𑐟𑐠𑑂𑐫𑐵𑑄𑐎 𑐴𑐶𑐮𑐵𑐰𑐣𑐵𑐔𑑂𑐰𑑄𑐐𑐸 𑐁𑐥𑐵𑐮𑑄 𑐎𑐵𑐬𑐞 𑐡𑐸𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐩𑐵𑐬𑐶𑐫𑐵𑑄 𑐢𑐫𑐵𑐡𑐷, ‘𑐕𑐐𑐹 𑐩𑐹 𑐎𑐵𑐬𑐞 𑐮𑐎𑐜𑐵𑐄𑐣 𑐦𑐸𑐎𑐸𑐰𑐵 𑐖𑐸𑐂𑐰𑑄 𑐩𑐣𑐹𑐟 𑐣𑑂𑐴𑐵𑐥𑐵 𑐠𑐾𑑄 𑐳𑐵𑐩𑐵𑐣𑑂𑐫 𑐖𑐷𑐰𑐣𑐱𑐿𑐮𑐷𑐂 𑐮𑐶𑐴𑐵𑑄𑐰𑑄𑐐𑐸𑐮𑐶𑑄 𑐏𑑅 𑑋’

‘𑐳𑐩𑐵𑐖 𑐏𑐸𑐮𑑂𑐮𑐵 𑐖𑐸𑐂𑐰𑑄 𑐩𑐣𑐹𑐟𑐫𑑂 𑐳𑑂𑐰𑐵𑐨𑐰𑐫𑑂 𑐣𑑄 𑐴𑐶𑐄𑐥𑐵 𑐰𑐮 𑑋 𑐀𑐥𑑂𑐰 𑐩𑐣𑐹𑐟 𑐥𑐶𑐴𑐵𑑄𑐰𑐣𑐾𑐐𑐸 𑐱𑐸𑐬𑐸 𑐫𑐵𑐟 𑑋 𑐀𑐦𑐶𑐳𑐫𑐵 𑐖𑑂𑐫𑐵, 𑐳𑐵𑐩𑐵𑐖𑐶𑐎 𑐖𑑂𑐫𑐵𑐫𑑂 𑐰𑐣𑐾𑐐𑐸 𑐫𑐵𑐟 𑐐𑐸𑐎𑐷𑑄 𑐫𑐵𑐣𑐵𑑅 𑐗𑐷𑐐𑐸 𑐳𑑂𑐰𑐨𑐵𑐰𑐫𑑂 𑐴𑐶𑐄𑐥𑐵 𑐰𑐮 𑑋 𑐠𑐸𑐎𑐷𑑄 𑐫𑐵𑐣𑐵𑑅 𑐀𑐥𑑂𑐰 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐨𑐵𑐂𑐬𑐳 𑐳𑐬𑐾 𑐖𑐸𑐂𑐐𑐸 𑐳𑐩𑑂𑐨𑐰𑐣𑐵 𑐡𑐟,’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐩𑐾𑐐𑐹 𑐕𑐟𑐵𑑅 𑐎𑐵𑐬𑐞 𑐢𑐵𑐂𑐐𑐸 𑐮𑑂𑐰𑐔𑑄 𑐎𑑅𑐥𑐶𑐣𑐶 𑐣𑐶𑐐𑐬𑐵𑐣𑐷 𑐫𑐵𑐫𑐾𑐐𑐸 𑐟𑐬𑐶𑐎𑐵 𑐏𑑅 𑑋 𑐣𑑂𑐴𑐵𑐥𑐵 𑐖𑐹𑐳𑐵 𑐮𑐎𑑂𑐲𑐞 𑐡𑐸𑐥𑐶𑑄 𑐰 𑐀𑐰𑐳𑑂𑐠𑐵 𑐟𑐳𑐎𑑄 𑐣𑐵𑐖𑐸𑐎 𑐖𑐹𑐥𑐶𑑄 𑐖𑐎 𑐩𑐵𑐮𑐾𑐐𑐸 𑐖𑑂𑐫𑐵 𑐖𑐸𑐮 𑑋 𑐠𑑁𑑄𑐎𑐣𑑂𑐴𑐫𑑂 𑐚𑐾𑐳𑑂𑐚 𑐫𑐵𑐫𑐾𑐐𑐸 𑐰𑑂𑐫𑐵𑐥𑐎 𑐖𑐸𑐮 𑐀𑐮𑐾 𑐮𑐎𑑂𑐲𑐞 𑐩𑐡𑐸𑐥𑐶𑑄𑐟 𑐣𑑄 𑐳𑑄𑐎𑑂𑐬𑐩𑐞 𑐖𑐹𑐐𑐸 𑐢𑐎𑐵𑑅 𑐏𑐣𑐾𑐡𑐟 𑑋

𑐰𑐶𑐱𑑂𑐰 𑐳𑑂𑐰𑐵𑐳𑑂𑐠𑑂𑐫 𑐳𑑄𑐑𑐫𑐵 𑐎𑑀𑐨𑐶𑐜-𑑑𑑙𑐫𑐵 𑐥𑑂𑐬𑐵𑐰𑐶𑐢𑐶𑐎 𑐀𑐢𑐶𑐺𑐎𑐟 𑐩𑐵𑐬𑐶𑐫𑐵 𑐨𑐵𑐣 𑐎𑐾𑐬𑐎𑑀𑐨𑑄 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐨𑐵𑐂𑐬𑐳𑐥𑐵𑐏𑐾𑑄 𑐧𑐔𑐾𑐖𑐸𑐂𑐐𑐸 𑐣𑐶𑑄𑐟𑐶𑑄 𑐳𑐵𑐰𑐢𑐵𑐣𑐷 𑐣𑐵𑐮𑐵𑐎𑐵𑐫𑐾𑐟 𑐳𑐸𑐗𑐵𑐰 𑐣𑑄 𑐧𑐶𑐫𑐵𑐡𑐷 𑑋 𑐰𑐫𑑂𑐎𑐮𑑄 𑐨𑑁𑐟𑐶𑐎 𑐡𑐸𑐬𑐷 𑐎𑐵𑐫𑐩 𑐫𑐵𑐫𑐾𑐐𑐸, 𑐧𑐬𑑀𑐧𑐬 𑐮𑑂𑐴𑐵𑑅 𑐳𑐶𑐮𑐾𑐐𑐸, 𑐩𑐵𑐳𑑂𑐎 𑐟𑐫𑐾𑐐𑐸 𑐣𑐵𑐥𑑄 𑐳𑑂𑐰𑑄𑐐𑑅 ‘𑐳𑐷’ 𑐫𑐵 𑐥𑐵𑐮𑐣𑐵 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐳𑑂𑐰𑑄𑐐𑑅 ‘𑐳𑐷’ 𑐀𑐬𑑂𑐠𑐵𑐟 𑐎𑑂𑐬𑐵𑐄𑐜𑐫𑑂 𑐩𑐰𑐣𑐾𑐐𑐸 (𑐨𑐶𑐜𑐨𑐵𑐜𑐫𑑂 𑐩𑐰𑐣𑐾𑐐𑐸), 𑐎𑑂𑐮𑑀𑐖𑑂𑐜 𑐳𑑂𑐥𑐾𑐱𑐫𑑂 𑐩𑐔𑑂𑐰𑐣𑐾𑐐𑐸 (𑐧𑐣𑑂𑐡 𑐠𑐵𑐳𑐫𑑂 𑐩𑐔𑑂𑐰𑐣𑐾𑐐𑐸) 𑐰 𑐎𑑂𑐮𑑀𑐖 𑐎𑐣𑑂𑐚𑑂𑐫𑐵𑐎𑑂𑐚 (𑐳𑐟𑐶𑐎 𑐳𑐩𑑂𑐥𑐬𑑂𑐎) 𑐫𑑂 𑐩𑐰𑐣𑐾𑐐𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS