Read news in NepalBhasa text-- www.hamroschool.com BACK 𑐩𑐣𑐥𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐥𑐵𑐬𑐶𑐟 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐣𑐥𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐥𑐵𑐬𑐶𑐟

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐥𑐵𑐏𑐾𑑄 𑐩𑐴𑐵𑐣𑐐𑐬 𑐡𑐸𑐣𑐾𑐫𑐵 𑐦𑐸𑐎𑑂𑐎𑑄 𑐳𑑂𑐎𑐹𑐮𑐫𑑂 𑑑 𑐟𑐐𑐶𑑄𑐣𑐶𑐳𑐾𑑄 𑑘 𑐟𑐐𑐶𑑄 𑐟𑐎 𑐧𑑂𑐰𑑄𑐎𑐷𑐐𑐸 𑐳𑑂𑐠𑐵𑐣𑐷𑐫 𑐰𑐶𑐲𑐫𑐩𑐵 𑐥𑐵𑐛𑑂𑐫𑐎𑑂𑐬𑐩 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐸 𑑋

𑐱𑐸𑐎𑑂𑐬𑐰𑐵𑑅 𑐔𑑂𑐰𑑄𑐐𑐸 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐧𑐿𑐛𑐎𑑄 𑐄𑐎𑐶𑐫𑐵𑐟 𑐳𑐬𑑂𑐰𑐳𑐩𑑂𑐩𑐟𑑄 𑐥𑐵𑐬𑐶𑐟 𑐫𑐵𑑅𑐐𑐸 𑐏𑑅 𑑋 𑐳𑐬𑐎𑐵𑐬𑐥𑐵𑐏𑐾𑑄 𑑑 𑐟𑐐𑐶𑑄𑐣𑐶𑐳𑐾𑑄 𑑘 𑐟𑐐𑐶𑑄 𑐟𑐎 𑐧𑑂𑐰𑑄𑐎𑐷𑐐𑐸 𑑑𑑐𑑐 𑐥𑐹𑐬𑑂𑐞𑐵𑐒𑑂𑐎𑐫𑐵 𑐳𑑂𑐠𑐵𑐣𑐷𑐫 𑐰𑐶𑐲𑐫𑐫𑐵 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐐𑐸 𑐮𑐶𑐳𑐾𑑄 𑐳𑐦𑐹 𑐕𑐵𑐥𑐾 𑐫𑐵𑐫𑐾𑐐𑐸 𑐟𑐎𑐫𑐵 𑐀𑐢𑐶𑐎𑐵𑐬 𑐳𑑂𑐠𑐵𑐣𑐷𑐫 𑐟𑐴𑐫𑐵𑐟 𑐧𑐶𑐫𑐵𑐟𑑅𑐐𑐸 𑐡𑐸𑑋 𑐄𑐐𑐸 𑐴𑐾 𑐀𑐢𑐶𑐎𑐵𑐬 𑐥𑑂𑐬𑐫𑑀𑐐 𑐫𑐵𑐣𑐵𑑅 𑐫𑐾𑑃 𑐩𑐣𑐥𑐵𑑄 ‘𑐫𑐾𑑃 𑐡𑐾𑐫𑑂 𑐩𑑂𑐴𑐳𑐷𑐎𑐵’ 𑐣𑐵𑑄𑐐𑐸 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑑅𑐐𑐸 𑐏𑑅 𑑋 𑐫𑐾𑑃 𑐡𑐾𑐫𑑂𑐫𑐵 𑐩𑑂𑐴𑐳𑐷𑐎𑐵 𑐧𑐷𑐐𑐸 𑐰𑐶𑐲𑐫 𑐖𑐹𑐐𑐸𑐮𑐶𑑄 𑐄𑐐𑐸 𑐥𑐵𑐛𑑂𑐫𑐎𑑂𑐬𑐩 𑐠𑐣𑐫𑐵 𑐳𑑂𑐠𑐵𑐣𑐷𑐫 𑐨𑐵𑐲𑐵 𑐣𑐾𑐥𑐵𑐮𑐨𑐵𑐲𑐵𑑄 𑐧𑑂𑐰𑑄𑐎𑐾𑐐𑐸 𑐣𑐶𑐬𑑂𑐞𑐫 𑐫𑐾𑑃 𑐩𑐣𑐥𑐵𑑄 𑐫𑐵𑑅𑐐𑐸 𑐏𑑅 𑑋

𑐄𑐐𑐸 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐩𑐣𑐥𑐵𑑄 𑐐𑐛𑐣 𑐫𑐵𑑅𑐐𑐸 𑐥𑐵𑐛𑑂𑐫𑐎𑑂𑐬𑐩 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐱𑐸𑐎𑑂𑐬𑐰𑐵𑑅 𑐫𑐾𑑃 𑐩𑐣𑐥𑐵𑐫𑐵 𑐥𑑂𑐬𑐩𑐸𑐏 𑐮𑐶𑐳𑐾𑑄 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐣𑑄 𑐥𑑂𑐬𑐩𑐸𑐏 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑐫𑐵𑐟 𑐠𑑅𑐥𑐶𑐣𑐶 𑐥𑑂𑐬𑐟𑐶𑐰𑐾𑐡𑐣 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐧𑐿𑐛𑐎𑑄 𑐄𑐎𑐶𑐫𑐵𑐟 𑐥𑐵𑐬𑐶𑐟 𑐫𑐵𑑅𑐐𑐸 𑐏𑑅 𑑋 𑐁𑑅 𑐄𑐐𑐸 𑐴𑐾 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐎𑐾𑐐𑐸 𑐮𑐵𑐐𑐶𑑄 𑐩𑐣𑐥𑐵𑐫𑐵 𑐎𑐵𑐬𑑂𑐫𑐥𑐵𑐮𑐶𑐎𑐵 𑐧𑐿𑐛𑐎𑑄 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂 𑑋 𑐰𑐫𑐵𑑄 𑐮𑐶𑐥𑐵 𑐫𑐾𑑃 𑐡𑐾𑐫𑑂𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 (𑐣𑐶𑐖𑐷) 𑐦𑐸𑐎𑑂𑐎𑑄𑐳𑑂𑐎𑐹𑐮𑐫𑑂 𑐠𑑂𑐰 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵 𑐖𑐸𑐂 𑑋

𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐜𑐵. 𑐔𑐸𑐣𑑂𑐡𑐵 𑐰𑐖𑑂𑐬𑐵𑐔𑐵𑐬𑑂𑐫𑑄 𑐎𑐣𑐵𑐡𑐷𑐎𑐠𑑄 𑐄𑐐𑐸 𑐥𑐵𑐛𑑂𑐫𑐎𑑂𑐬𑐩 𑐎𑐠𑑄 𑐁𑑅 𑐳𑐦𑐹 (𑐥𑐵𑐛𑑂𑐫𑐥𑐸𑐳𑑂𑐟𑐎) 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐳𑐦𑐹 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐣𑑄 𑐀𑐣𑑂𑐟𑐶𑐩 𑐔𑐬𑐞𑐫𑑂 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐱𑐸𑐎𑑂𑐬𑐰𑐵𑑅 𑐔𑑂𑐰𑑄𑐐𑐸 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐧𑐿𑐛𑐎𑑄 𑐁𑑅 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐹𑐮𑐫𑑂 𑐠𑑂𑐰 𑐳𑐦𑐹 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑐩𑐵𑑅𑐥𑐶𑑄 𑐱𑐶𑐎𑑂𑐲𑐎 𑐕𑐣𑑁𑐚 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐣𑑄 𑐕𑐐𑐹 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐡𑐸𑑋

𑐀𑐠𑐾 𑐴𑐾 𑐥𑐵𑐛𑑂𑐫𑐳𑐦𑐹 𑐟𑐫𑐵𑐬 𑐖𑐸𑐮 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐕𑐵𑐥𑐾 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐣𑑄 𑐕𑐐𑐹 𑐳𑐩𑐶𑐟𑐶 𑐐𑐛𑐣 𑐫𑐵𑑅𑐐𑐸 𑐡𑐸𑑋 𑐣𑐶𑐐𑐸𑐮𑐶𑑄 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐩𑐣𑐥𑐵𑐫𑐵 𑐄𑐥𑐩𑐾𑐫𑐬 𑐴𑐬𑐶𑐥𑑂𑐬𑐨𑐵 𑐏𑐜𑑂𑐐𑐷 𑐱𑑂𑐬𑐾𑐲𑑂𑐛 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐩𑐣𑐥𑐵 𑐡𑐸𑐣𑐾𑐫𑐵 𑐦𑐸𑐎𑑂𑐎𑑄 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐹𑐮𑐫𑑂 𑐠𑑂𑐰 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐮𑐵𑐐𑐶𑑄 𑑑𑑓𑑕 𑐩𑑂𑐴 𑐱𑐶𑐎𑑂𑐲𑐎 𑐩𑐵𑐮𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸  𑐩𑐣𑐥𑐵𑑄 𑐳𑐵𑐩𑐸𑐡𑐵𑐫𑐶𑐎 𑐳𑑂𑐎𑐹𑐮𑐟𑐫𑑂𑐟 𑐥𑐵𑐛𑑂𑐫𑐳𑐦𑐹 𑐣𑐶𑑅𑐱𑐸𑐮𑑂𑐎 𑐧𑐷𑐐𑐸 𑐟𑐬 𑐣𑐶𑐖𑐷 𑐳𑑂𑐎𑐹𑐮𑐟𑐫𑑂𑐟 𑐢𑐵𑑅𑐳𑐵 𑐣𑐩𑐹𑐣𑐵 𑐖𑐎 𑐧𑐷𑐐𑐸 𑐰 𑐄𑐥𑐶𑑄 𑐠𑑅𑐥𑐶𑑄𑐳𑑄 𑐴𑐾 𑐳𑐦𑐹 𑐕𑐵𑐥𑐾 𑐫𑐵𑐫𑐾 𑐩𑐵𑑅𑐐𑐸 𑐣𑐶𑐬𑑂𑐞𑐫 𑐣𑑄 𑐫𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS