Read news in NepalBhasa text-- www.hamroschool.com BACK 𑐮𑐸𑑃 𑐡𑐸𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵 𑐐𑐵𑐜𑐷 𑐚𑐵𑐥 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐮𑐸𑑃 𑐡𑐸𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵 𑐐𑐵𑐜𑐷 𑐚𑐵𑐥

𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳) – 𑐫𑐾𑑃𑐫𑐵 𑐰𑑂𑐫𑐳𑑂𑐟 𑐱𑐴𑐬𑐫𑑂 𑐩𑑂𑐴𑐶𑐐𑑅 𑐕𑐐𑑅 𑐐𑐵𑐜𑐷 𑐮𑐸𑑃 𑐰 𑐥𑐾𑐳𑑂𑐟𑑀𑐮 𑐡𑐸𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵𑑅 𑐧𑐶𑐳𑐶𑐄𑑃 𑐰𑐣𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸𑑋 𑐫𑐾𑑃𑐫𑐵 𑐎𑐩𑐮𑐵𑐡𑐷 𑐮𑐸𑑃𑐫𑐵 𑐧𑐶𑐳𑑂𑐎𑐸𑐚 𑐰 𑐣𑐶𑐥𑐸 𑐥𑐾𑐳𑑂𑐟𑑀𑐮 𑐟𑐫𑐵𑐟𑑅𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵𑑅 𑐕𑐐𑑅 𑐳𑑂𑐬𑑂𑐎𑑀𑐥𑐶𑐫𑑀 𑐐𑐵𑐜𑐷 𑐧𑐶𑐳𑐶𑐄𑑃 𑐰𑑄𑐐𑐸 𑐏𑑅 𑑋 𑐥𑑂𑐬𑐴𑐬𑐷𑑄 𑐔𑐾𑐎𑐖𑐵𑑃𑐔 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐰𑑄 𑐧𑐵 𑑖 𑐔 𑑕𑑕𑑑𑑙 𑐣𑑄.𑐫𑐵 𑐐𑐵𑐜𑐷 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵 𑐧𑐶𑐳𑐶𑐄𑑃 𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐥𑑂𑐬𑐴𑐬𑐷𑑄 𑐧𑐬𑐵𑐩𑐡 𑐫𑐵𑑅𑐐𑐸 𑐄𑐐𑐸 𑐗𑑀𑐮𑐵𑐫𑑂 𑐣𑑂𑐴𑐵𑐥𑐵𑑄 𑑑𑑕 𑐎𑐶𑐮𑑀 𑐮𑐸𑑃 𑐡𑐸𑐐𑐸 𑐢𑐵𑑅𑐐𑐸 𑐏𑑅𑐳𑐵𑑄 𑐮𑐶𑐥𑐵 𑐣𑐾𑐥𑐵𑐮 𑐬𑐟𑑂𑐣 𑐟𑐠𑐵 𑐁𑐨𑐸𑐲𑐞 𑐩𑐴𑐵𑐳𑑄𑐑𑐫𑑂 𑐫𑐵𑐣𑐵𑐔𑑂𑐰𑑄𑐐𑐸 𑐥𑐬𑐷𑐎𑑂𑐲𑐞𑐫𑑂 𑐧𑐵𑐐𑐹 𑐎𑐶𑐮𑑀 𑐖𑐎 𑐮𑐸𑑃 𑐖𑐹𑐐𑐸 𑐰 𑐩𑐾𑐐𑐸 𑐳𑐵𑐝𑐾 𑑑𑑔 𑐎𑐶𑐮𑑀 𑐢𑐵𑑅𑐳𑐵 𑐰𑐴𑐮𑐫𑑂 𑐮𑐸𑑃 𑐨𑐸𑐣𑐵𑑅 𑐮𑐸𑑃𑐫𑐵 𑐧𑐶𑐳𑑂𑐎𑐸𑐚 𑐠𑐾𑑄 𑐡𑐫𑐾𑐎𑐵𑐟𑑅𑐐𑐸 𑐳𑐷𑐡𑐸𑐐𑐸 𑐏𑑅 𑑋

𑐎𑐵𑐛𑐩𑐵𑐜𑑁𑑄 𑐥𑑂𑐬𑐴𑐬𑐷𑑄 𑐥𑐬𑐶𑐳𑐬𑑄 𑐩𑑂𑐴𑐶𑐐𑑅 𑐴𑐾 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣 𑐫𑐵𑐣𑐵𑑅 𑐮𑐸𑑃 𑐡𑐸𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵𑑅 𑐐𑐵𑐜𑐷 𑐧𑐶𑐳𑐶𑐄𑑃𑐐𑐸 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐏𑑅 𑑋 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂𑐊 𑐳𑐊𑐳𑐥𑐷 𑐱𑑂𑐫𑐵𑐩 𑐖𑑂𑐘𑐰𑐵𑐮𑐷𑑄 𑑑𑑕 𑐎𑐶𑐮𑑀 𑐮𑐸𑑃 𑐡𑐸𑐐𑐸 𑐢𑐵𑑅𑐐𑐸 𑐄𑐐𑐸 𑐗𑑀𑐮𑐵𑐫𑑂 𑐔𑑂𑐰𑑄𑐐𑐸 𑐧𑐵𑐐𑐹 𑐎𑐾𑐖𑐷 𑐮𑐸𑑃 𑐖𑐎 𑐳𑐎𑑂𑐎𑐮𑐷 𑐖𑐹𑐐𑐸 𑐰 𑐩𑐾𑐐𑐸 𑐣𑐎𑑂𑐎𑐮𑐷 𑐖𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑑅𑐫𑐵 𑐎𑐠𑑄 𑐄𑐐𑐸 𑐗𑑀𑐮𑐵𑐫𑑂 𑑔𑑒 𑐮𑐵𑐏 𑑙 𑐴𑐖𑐵𑐬 𑐟𑐎𑐵 𑐧𑐬𑐵𑐧𑐬𑐫𑐵 𑐮𑐸𑑃 𑐰 𑑑𑑕 𑐮𑐵𑐏 𑑕𑑖 𑐴𑐖𑐵𑐬 𑐟𑐎𑐵 𑐧𑐬𑐵𑐧𑐬𑐫𑐵 𑐰𑐴𑐮𑐶𑐳𑐾𑑄 𑐐𑑀𑐮𑐷 𑐟𑐫𑐵𑐩𑐟𑑅𑐐𑐸 𑐣𑐶𑐥𑐸 𑐥𑐾𑐳𑑂𑐟𑑀𑐮 𑐧𑐬𑐵𑐩𑐡 𑐖𑐹𑐐𑐸 𑐏𑑅 𑑋

𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐊𑐳𑐊𑐳𑐥𑐷 𑐖𑑂𑐘𑐰𑐵𑐮𑐷𑑄 𑐔𑐾𑐎𑐖𑐵𑑃𑐔 𑐕𑐮𑐾 𑐫𑐵𑐣𑐵𑑅 𑐧𑐶𑐳𑐶𑐄𑑃 𑐰𑑄𑐐𑐸 𑐐𑐵𑐜𑐷𑐫𑐵𑐟 𑐥𑐶𑐕𑐵 𑐫𑐵𑑅𑐳𑐵𑑄 𑐗𑑀𑐮𑐵 𑐰𑐵𑑄𑐕𑑂𑐰𑐫𑐾𑐰𑑄 𑐥𑑂𑐬𑐴𑐬𑐷𑑄 𑐗𑑀𑐮𑐵𑐫𑑂 𑐎𑐾𑐣𑑂𑐡𑑂𑐬𑐷𑐟 𑐖𑐹𑐧𑐮𑐫𑑂𑐐𑐵 𑐜𑐷𑐫𑐵𑐟 𑐖𑑂𑐰𑐣𑐾𑐩𑐦𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐠𑐸𑐮𑐶𑐩𑐕𑐶 𑐮𑐸𑑃 𑐰 𑐥𑐾𑐳𑑂𑐟𑑀𑐮 𑐟𑐫𑐵𑐟𑑅𑐐𑐸 𑐗𑑀𑐮𑐵 𑐰𑐵𑑄𑐕𑑂𑐰𑐫𑐵 𑐧𑐶𑐳𑐶𑐄𑑃 𑐰𑑄𑐐𑐸 𑐐𑐵𑐜𑐷𑐫𑐵𑐟 𑐥𑑂𑐬𑐴𑐬𑐷𑑄 𑐖𑑂𑐰𑐣𑐾 𑐩𑐦𑐸𑐐𑐸 𑐏𑑃𑐫𑑂 𑐢𑐵𑑅𑐳𑐵 𑐳𑐸𑐬𑐎𑑂𑐲𑐵𑐰𑐶𑐡𑑂𑐟𑐫𑑂𑐳𑑄 𑐁𑐱𑑂𑐔𑐬𑑂𑐫 𑐥𑑂𑐰𑑄𑐎𑐹𑐐𑐸 𑐡𑐸𑑋 𑐫𑐾𑑃 𑐠𑐾𑑄𑐖𑑂𑐫𑐵𑑅𑐐𑐸 𑐠𑐵𑐫𑑂 𑐠𑐵𑐳𑐫𑑂 𑐳𑐶𑐳𑐶 𑐎𑑂𑐫𑐵𑐩𑐾𑐬𑐵 𑐟𑐫𑐵𑐟𑑅𑐐𑐸 𑐱𑐴𑐬𑐫𑑂 𑐟𑐎𑑄 𑐀𑐥𑐵𑐫𑑂 𑐩𑐕𑐶𑐐𑑂𑐰𑑅𑐐𑐸 𑐐𑐵𑐜𑐶𑐫𑐵𑐟 𑐐𑐣 𑐰𑑄𑐐𑐸 𑐢𑐫𑐵𑐐𑐸 𑐮𑐸𑐂𑐎𑐾𑐩𑐦𑐸𑐐𑐸 𑐢𑐫𑐵𑐐𑐸 𑐥𑑂𑐬𑐴𑐬𑐷𑐫𑐵 𑐀𑐳𑐦𑐮𑐟𑐵 𑐖𑐹𑐐𑐸 𑐏𑑃 𑐳𑐸𑐬𑐎𑑂𑐲𑐵𑐰𑐶𑐡𑑂𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋

𑐐𑐵𑐜𑐷𑐫𑐵𑐟 𑐖𑑂𑐰𑐣𑐾𑐩𑐦𑐸𑐐𑐸 𑐢𑐵𑑅𑐐𑐸𑐮𑐶𑑄 𑐠𑑂𑐰 𑐑𑐚𑐣𑐵𑐫𑑂 𑐴𑐾 𑐱𑑄𑐎𑐵𑐳𑑂𑐥𑐡 𑐖𑐹𑐐𑐸 𑐴𑐾𑐜𑐎𑑂𑐰𑐵𑐬𑑂𑐚𑐬𑐫𑐵 𑐴𑐾 𑐥𑑂𑐬𑐴𑐬𑐷𑐟𑐫𑑂 𑐢𑐵𑐥𑐹 𑐡𑐸𑑋 𑐊𑐳𑐊𑐳𑐥𑐷 𑐖𑑂𑐘𑐰𑐵𑐮𑐷𑑄 𑐢𑐵𑑅𑐳𑐵 𑐠𑑂𑐰 𑐑𑐚𑐣𑐵𑐫𑑂 𑐳𑑄𑐮𑐐𑑂𑐣𑐥𑐶𑑄 𑐣𑐎𑑂𑐎𑐮𑐷 𑐮𑐸𑑃 𑐩𑐷𑐥𑐶𑑄 𑐐𑐶𑐬𑑀𑐴 𑐖𑐸𑐂𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸𑑋 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐣𑐎𑑂𑐎𑐮𑐷 𑐮𑐸𑑃 𑐰𑐵𑑄𑐕𑑂𑐰𑐫𑐵𑑅 𑐳𑐎𑑂𑐎𑐮𑐷 𑐮𑐸𑑃 𑐖𑑂𑐰𑐣𑐵𑑅 𑐧𑐶𑐳𑐶𑐄𑑃 𑐰𑑄𑐐𑐸 𑐣𑑄 𑐖𑐸𑐂𑐦𑐸 𑐢𑐎𑐵𑑅 𑐣𑑂𑐫𑑄𑐐𑐸 𑐣𑑂𑐴𑑂𑐫𑐳𑐮𑐫𑑂 𑐢𑐵𑑅𑐳𑐵 𑐰𑐫𑑂𑐎𑐮𑑄 𑐠𑑂𑐰 𑐧𑐵𑐬𑐾 𑐀𑐣𑐸𑐳𑐣𑑂𑐢𑐵𑐣 𑐮𑐶𑐥𑐵 𑐴𑐾 𑐖𑐎 𑐳𑐷𑐡𑐂𑐐𑐸 𑐮𑐶𑐳𑑅 𑐧𑐶𑐫𑐵𑐡𑐷𑐐𑐸 𑐡𑐸𑑋 𑐥𑑂𑐬𑐴𑐬𑐷𑑄 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐐𑐵𑐜𑐷𑐫𑐵 𑐣𑑄𑐩𑑂𑐧𑐬 𑐢𑐵𑑅𑐳𑐵𑑄 𑐐𑐵𑐜𑐷𑐢𑐣𑐷𑐫𑐵 𑐣𑐵𑑄 𑐢𑐵𑑅𑐳𑐵 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐩𑐡𑐸𑐣𑐶 𑑋

𑐥𑑂𑐬𑐴𑐬𑐷𑐫𑐵 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐮𑑃𑐫𑐵 𑐨𑐵𑑅 𑐟𑐔𑑂𑐰𑑅𑐐𑐸𑐮𑐶𑑄 𑐔𑐶𑐣𑐶𑐫𑐵𑑃 𑐣𑐵𑐎𑐵𑑄 𑐀𑐰𑐿𑐢𑐝𑑄𑐐𑑄 𑐮𑐸𑑃 𑐴𑐫𑐵𑐔𑑂𑐰𑑄𑐥𑐶𑑄𑐳𑑄 𑐨𑐔𑐵 𑐡𑑄𑐎𑑄 𑐩𑐷𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐶𑐫𑐵 𑐮𑐧𑑅 𑐎𑐵𑐫𑐾𑐟 𑐣𑐎𑑂𑐎𑐮𑐷 𑐮𑐸𑑃 𑐩𑐷𑐐𑐸 𑐐𑐶𑐬𑑀𑐴 𑐳𑐎𑑂𑐬𑐶𑐫 𑐖𑐹𑐐𑐸 𑐀𑐣𑐸𑐩𑐵𑐣 𑐥𑑂𑐬𑐴𑐬𑐷𑐫𑐵 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS