Read news in NepalBhasa text-- www.hamroschool.com BACK 𑐧𑐾𑐮𑐵𑐫𑐟-𑐔𑐷𑐣 : 𑐰𑑂𑐫𑐵𑐥𑐵𑐬 𑐫𑐵𑐫𑐾𑐐𑐸 𑐎𑐶 𑐰𑐶𑐰𑐵𑐡 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐾𑐮𑐵𑐫𑐟-𑐔𑐷𑐣 : 𑐰𑑂𑐫𑐵𑐥𑐵𑐬 𑐫𑐵𑐫𑐾𑐐𑐸 𑐎𑐶 𑐰𑐶𑐰𑐵𑐡

𑐖𑐳𑑂𑐚𑐶𑐣 𑐴𑐵𑐬𑑂𑐥𑐬, 𑐧𑐷𑐧𑐳𑐷

𑐧𑐾𑐮𑐵𑐫𑐟𑑄 𑐴𑑄𑐐𑐎𑑄𑐐𑐫𑑂 𑐮𑐵𑐐𑐹 𑐫𑐵𑑅𑐐𑐸 𑐣𑑂𑐴𑐹𑐐𑐸 𑐬𑐵𑐲𑑂𑐚𑑂𑐬𑐶𑐫 𑐳𑐸𑐬𑐎𑑂𑐲𑐵 𑐎𑐵𑐣𑐹𑐣𑐫𑐵 𑐩𑐸𑐡𑑂𑐡𑐵𑐫𑐵𑐟 𑐎𑐫𑐵𑑅 𑐰𑐫𑐵 𑐮𑐶𑐳𑐾𑑄 𑐠𑑅𑐥𑐶𑐣𑐶𑐐𑐸 𑐥𑑂𑐬𑐟𑑂𑐫𑐬𑑂𑐥𑐞 𑐳𑐣𑑂𑐢𑐶 𑐀𑐣𑐶𑐱𑑂𑐔𑐶𑐟𑐎𑐵𑐮𑐫𑐵 𑐣𑐶𑑄𑐟𑐶𑑄 𑐣𑐶𑐮𑐩𑑂𑐧𑐣 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐩𑑄𑐐𑐮𑐰𑐵𑑅 𑐫𑐵𑐟 𑑋 𑐴𑑄𑐐𑐎𑑄𑐐𑐫𑑂 𑐮𑐵𑐐𑐹 𑐫𑐵𑑅𑐐𑐸 𑐳𑐸𑐬𑐎𑑂𑐲𑐵 𑐎𑐵𑐣𑐹𑐣𑐫𑐵 𑐩𑐸𑐡𑑂𑐡𑐵𑐫𑑂 𑐧𑐾𑐮𑐵𑐫𑐟 𑐰 𑐔𑐷𑐣𑐫𑐵 𑐡𑐠𑐸𑐂𑐫𑐵 𑐳𑑂𑐰𑐵𑐥𑐸𑐟𑐶𑑄 𑐫𑐎𑑂𑐰 𑐴𑐾 𑐴𑐶𑐄𑐥𑐵𑑅 𑐰𑑅𑐐𑐸 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰𑐫𑐵𑑄 𑐣𑑂𑐴𑑂𑐫𑐰 𑐠𑑂𑐰 𑐣𑐶𑐐𑐹 𑐡𑐾𑐫𑑂𑐫𑐵 𑐳𑑂𑐰𑐵𑐥𑐹 𑐢𑐵𑑅𑐳𑐵 𑐠𑐠𑐾 𑐩𑐏𑐸 𑑋

𑐰𑑄𑐐𑐸 𑐣𑐶𑐐𑐹 𑐡𑐱𑐎 𑐡𑐸𑐣𑐾 𑐧𑐾𑐮𑐵𑐫𑐟 𑐰 𑐔𑐷𑐣 𑐡𑐠𑐸𑐂 𑐁𑐬𑑂𑐠𑐶𑐎 𑐳𑑂𑐰𑐵𑐥𑐸𑐟𑐶 𑐟𑑅𑐢𑑄𑐐𑐸 𑐳𑐸𑐢𑐵𑐬 𑐖𑐹𑐐𑐸 𑐡𑐸𑑋 𑐳𑐣𑑂 𑑒𑑐𑑐𑑐 𑐫𑑂 𑐔𑐷𑐣 𑐧𑐾𑐮𑐵𑐫𑐟𑐫𑐵 𑑒𑑖 𑐍 𑑄 𑐣𑐶𑐬𑑂𑐫𑐵𑐟 𑐧𑐖𑐵𑑅 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅, 𑐟𑐬 𑐁𑑅 𑐠𑑂𑐰 𑐏𑐸𑐐𑐹𑐐𑐸 𑐠𑐵𑐳𑐫𑑂 𑐠𑑂𑐫𑑄 𑐰𑐫𑐾𑐢𑐸𑑄𑐎𑐹𑐐𑐸 𑐡𑐸𑑋 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐫𑐵 𑐰𑑂𑐫𑐵𑐥𑐵𑐬 𑐰𑑄𑐐𑐸 𑐕𑐸𑑄 𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐎𑐷𑐬𑑂𑐟𑐶𑐩𑐵𑐣𑐷 𑐳𑑂𑐟𑐬𑐫𑑂 𑐧𑐵𑑄𑐮𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐷 𑐡𑐎𑐮𑐫𑑂𑐨𑑁 𑐟𑐶𑐎 𑐣𑐶𑐬𑑂𑐩𑐵𑐞𑐫𑐵 𑐁𑐫𑑀𑐖𑐣𑐵 𑐰 𑐱𑐶𑐎𑑂𑐲𑐵𑐫𑑂 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐡𑐸 𑑋

𑐟𑐬 𑐚𑐾𑐮𑐶𑐎𑐩 𑐣𑐾𑐚𑐰𑐬𑑂𑐎𑐫𑑂 𑐧𑐾𑐮𑐵𑐫𑐟𑐷 𑐳𑐬𑐎𑐵𑐬𑑄 𑐔𑐷𑐣𑐶𑐫𑐵 𑐎𑐩𑑂𑐥𑐣𑐷 𑐴𑐸𑐰𑐵𑐰𑐾𑐫𑐵 𑑕 𑐖𑐷 𑐳𑐩𑑂𑐧𑐣𑑂𑐢𑐷 𑐥𑑂𑐬𑐰𑐶𑐢𑐶 𑐰 𑐩𑐾𑐳𑐶𑐣𑐬𑐷 𑐳𑐵𑐩𑐵𑐣 𑐕𑑂𑐫𑐮𑐾𑐐𑐸 𑐏𑑃𑐫𑑂 𑐠𑑅𑐐𑐸 𑐣𑐶𑐬𑑂𑐞𑐫 𑐴𑐶𑐮𑐾𑐰𑑄 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐂 𑐟𑐣𑐵𑐰 𑐟𑐔𑑂𑐰𑐫𑐾𑐎𑐵𑐧𑐶𑐄𑐐𑐸 𑐡𑐸𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐂 𑐁𑐬𑑂𑐠𑐶𑐎 𑐳𑑂𑐰𑐵𑐥𑐸𑐟𑐶𑑄 𑐰𑐫𑐵𑐔𑑂𑐰𑑄𑐐𑐸 𑐦𑐵𑐂𑐡𑐵𑐫𑑂 𑐁𑑅 𑐏𑐟𑐬𑐵 𑐏𑐣𑐾 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐰𑑄𑐐𑐸 𑐡𑑃𑐫𑑂 𑐔𑐷𑐣 𑐧𑐾𑐮𑐵𑐫𑐟𑐫𑐵 𑐏𑐸𑐐𑐹𑐐𑐸 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐣𑐶𑐬𑑂𑐫𑐵𑐟 𑐧𑐖𑐵𑑅𑐐𑐸 𑐖𑐹𑐐𑐸 𑐏𑑅 𑑋 𑐧𑐾𑐮𑐵𑐫𑐟𑐫𑐵 𑐬𑐵𑐲𑑂𑐚𑑂𑐬𑐶𑐫 𑐟𑐠𑑂𑐫𑐵𑑄𑐎 𑐰𑐶𑐨𑐵𑐐𑐫𑐵 𑐎𑐠𑑄 𑐠𑑂𑐰 𑐰𑑂𑐫𑐵𑐥𑐵𑐬 𑑓𑑐.𑑗 𑐀𑐬𑑂𑐧 𑐥𑐵𑐄𑐞𑑂𑐜𑐫𑐵 𑐟𑐎 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐏𑑅 𑑋 𑐔𑐷𑐣𑐫𑐵 𑐣𑐶𑑄𑐟𑐶𑑄 𑐧𑐾𑐮𑐵𑐫𑐟𑑄 𑐣𑐶𑐬𑑂𑐫𑐵𑐟 𑐖𑐸𑐂𑐐𑐸 𑐠𑑂𑐰 𑐎𑐷𑐬𑑂𑐟𑐶𑐩𑐵𑐣𑐷 𑐳𑑂𑐟𑐬𑐫𑐵 𑐏𑑅 𑑋 𑑒𑑐𑑑𑑘𑐫𑑂 𑐠𑑂𑐰 𑑒𑑓.𑑔 𑐀𑐬𑑂𑐧 𑐥𑐵𑐄𑐞𑑂𑐜 𑐠𑑂𑐫𑑄𑐐𑐸 𑐏𑑅 𑑋 𑐀𑐠𑐾𑐴𑐾 𑐁𑐫𑐵𑐟𑐫𑐵 𑐩𑐵𑐩𑐶𑐮𑐵𑐫𑑂 𑐣𑑄 𑐔𑐷𑐣 𑐧𑐾𑐮𑐵𑐫𑐟𑐫𑐵 𑐥𑑂𑐫𑑄𑐐𑐹𑐐𑐸 𑐡𑐎𑐮𑐫𑑂 𑐟𑑅𑐢𑑄𑐐𑐸 𑐡𑐾𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐳𑐣𑑂 𑑒𑑐𑑑𑑙 𑐫𑑂 𑐔𑐷𑐣𑑄 𑐧𑐾𑐮𑐵𑐫𑐟𑐫𑑂 𑐖𑐸𑐂𑐐𑐸 𑐁𑐫𑐵𑐟 𑑒 𑑙 𑐀𑐬𑑂𑐧 𑐥𑐵𑐄𑐞𑑂𑐜 𑐡𑐸𑐐𑐸 𑐏𑑅 𑑋

𑐧𑐾𑐂𑐖𑐶𑐒𑑂𑐐𑐫𑐵 𑐔𑐶𑐫𑐸𑑄𑐐 𑐎𑑄𑐐 𑐐𑑂𑐬𑐾𑐖𑐸𑐊𑐚 𑐳𑑂𑐎𑐹𑐮 𑐀𑐦 𑐧𑐶𑐖𑐣𑐾𑐱𑐫𑑂 𑐀𑐬𑑂𑐠𑐱𑐵𑐳𑑂𑐟𑑂𑐬𑐫𑐵 𑐥𑑂𑐬𑐵𑐢𑑂𑐫𑐵𑐥𑐎 𑐮𑐾𑐳𑑂𑐮𑐷 𑐫𑑄𑐐𑑄 𑐧𑐶𑐧𑐶𑐳𑐷𑐮𑐶𑐳𑐾 𑐏𑑃 𑐮𑑂𑐴𑐵𑐳𑐾𑑄 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐂𑐫𑐵 𑐟𑐣𑐵𑐧𑐫𑐵 𑐀𑐳𑐬 𑐰𑑂𑐫𑐵𑐥𑐵𑐬𑐫𑑂 𑐮𑐵𑐫𑐾 𑐩𑐖𑐶𑐄𑐐𑐸 𑐏𑑃 𑐢𑐫𑐵𑐡𑐷 𑑋 𑐰𑐫𑑂𑐎𑐮𑑄 𑐣𑐶𑐐𑐹 𑐡𑐾𑐫𑑂 𑐡𑐠𑐸𑐫𑐵 𑐟𑐣𑐵𑐰𑑄 𑐧𑐾𑐮𑐵𑐫𑐟𑐫𑑂 𑐄𑐔𑑂𑐔 𑐱𑐶𑐎𑑂𑐲𑐵 𑐎𑐵𑑅𑐰𑐣𑐷𑐥𑐶𑑄 𑐔𑐶𑐣𑐶𑐫𑐵𑑃𑐟 𑐰 𑐧𑐾𑐮𑐵𑐫𑐟𑐫𑑂 𑐴𑐧 𑐡𑐫𑐾𑐎𑐷𑐥𑐶𑑄 𑐔𑐶𑐣𑐶𑐫𑐵 𑐎𑐩𑑂𑐥𑐣𑐷𑐟𑐫𑑂𑐟 𑐟𑑅𑐢𑑄𑐐𑐸 𑐀𑐳𑐬 𑐮𑐵𑐫𑐾𑐦𑐸𑐐𑐸 𑐏𑑃 𑐢𑐫𑐵𑐡𑐷 𑑋

𑐧𑐾𑐮𑐵𑐫𑐟𑐫𑑂 𑐨𑑁𑐟𑐶𑐎 𑐣𑐶𑐬𑑂𑐩𑐵𑐞𑐫𑑂 𑐔𑐷𑐣𑐫𑐵 𑐟𑑅𑐢𑑄𑐐𑐸 𑐨𑐹𑐩𑐶𑐎𑐵 𑐡𑐸𑑋 𑐠𑐸𑐎𑐷 𑐣𑑂𑐫𑐹𑐎𑑂𑐮𑐶𑐫𑐬 𑐥𑐵𑐰𑐬 𑐳𑐩𑑂𑐧𑐣𑑂𑐢𑐷 𑐁𑐫𑑀𑐖𑐣𑐵 𑐟𑐎𑑄 𑐮𑐵𑑅 𑑋 𑐳𑐩𑐬𑐳𑐾𑐚𑐫𑑂 𑑒𑑐 𑐀𑐬𑑂𑐧 𑐥𑐵𑐄𑐞𑑂𑐜𑐫𑐵 𑐮𑐐𑐵𑐣𑐷𑐂 𑐴𑐶𑑄𑐎𑐮𑐾 𑐥𑑀𑐂𑐣𑑂𑐚 𑐣𑑂𑐫𑐹𑐎𑑂𑐮𑐶𑐫𑐬 𑐥𑐵𑐰𑐬 𑐳𑑂𑐚𑐾𑐱𑐣 𑐡𑐫𑐾𑐎𑐾𑐐𑐸𑐮𑐷 𑐔𑐷𑐣𑐫𑐵 𑐖𑐣𑐬𑐮 𑐣𑑂𑐫𑐹𑐎𑑂𑐮𑐶𑐫𑐬 𑐥𑐵𑐰𑐬 (𑐳𑐷𑐖𑐷𑐊𑐣𑑄) 𑐁𑑄𑐱𑐶𑐎 𑐬𑐸𑐥𑑄 𑐰𑐶𑐟𑑂𑐟𑐷𑐫 𑐐𑑂𑐰𑐵𑐴𑐵𑐮𑐶 𑐣𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐔𑐷𑐣𑐫𑐵 𑐠𑑂𑐰 𑐳𑐬𑐎𑐵𑐬𑐷 𑐎𑐩𑑂𑐥𑐣𑐷𑑄 𑐳𑐸𑐦𑑀𑐮𑑂𑐎𑐫𑐵 𑐳𑐵𑐫𑐖𑐰𑐾𑐮𑐫𑑂 𑐔𑑂𑐰𑑄𑐐𑐸 𑐩𑐾𑐐𑐸 𑐕𑐐𑐹 𑐥𑑂𑐮𑐵𑐣𑑂𑐚𑐫𑑂 𑑒𑑐 𑐥𑑂𑐬𑐟𑐶𑐱𑐟 𑐱𑐾𑐫𑐬 𑐟𑐫𑐾𑐦𑐸𑐐𑐸 𑐀𑐰𑐳𑑂𑐠𑐵 𑐡𑐸𑑋 𑐀𑐠𑐾𑐴𑐾 𑐐𑐸𑐮𑐶𑐏𑐾 𑐣𑑂𑐫𑐹𑐎𑑂𑐮𑐶𑐫𑐬 𑐥𑐵𑐰𑐬 𑐥𑑂𑐬𑑀𑐖𑐾𑐎𑑂𑐚𑐳𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐕𑐐𑐹 𑐊𑐎𑐵𑐂𑐮𑐫𑑂 𑐠𑑂𑐰 𑐎𑐩𑑂𑐥𑐣𑐷𑐫𑐵 𑐧𑐴𑐸𑐩𑐟 𑐱𑐾𑐫𑐬 𑐡𑐸 𑑋

𑐀𑐠𑐾𑐴𑐾 𑐔𑐷𑐣𑐫𑐵 𑐳𑐬𑐎𑐵𑐬𑐷 𑐎𑐩𑑂𑐥𑐣𑐷 𑐳𑐵𑐰𑐬𑐾𑐣 𑐰𑐾𑐮𑑂𑐚 𑐦𑐣𑑂𑐜 𑐔𑐵𑐂𑐣 𑐂𑐣𑐨𑐾𑐳𑑂𑐚𑐩𑐾𑐣𑑂𑐚 𑐎𑐬𑑂𑐥𑑀𑐬𑐾𑐱𑐣 (𑐳𑐷𑐁𑐂𑐳𑐷)𑐫𑐵 𑐠𑐾𑐩𑑂𑐳 𑐰𑐵𑐚𑐬𑐫𑑂 𑑘.𑑗 𑐥𑑂𑐬𑐟𑐶𑐱𑐟𑐫𑐵 𑐱𑐾𑐫𑐬 𑐡𑐸𑑋 𑐀𑐠𑐾𑐴𑐾  𑐮𑐣𑑂𑐡𑐣𑐫𑐵 𑐴𑐶𑐠𑑂𑐬𑑀 𑐰𑐶𑐩𑐵𑐣𑐳𑑂𑐠𑐮𑐫𑐵 𑐳𑑂𑐰𑐵𑐩𑐶𑐟𑑂𑐰𑐫𑐵 𑐴𑐎 𑐡𑐸𑐐𑐸 𑐎𑐩𑑂𑐥𑐣𑐷𑐂 𑐣𑑄 𑐳𑐶𑐁𑐂𑐳𑐷𑐫𑐵 𑑑𑑐 𑐥𑑂𑐬𑐟𑐶𑐱𑐟 𑐮𑐐𑐵𑐣𑐷 𑐡𑐸𑑋 𑐧𑐾𑐮𑐵𑐫𑐟𑐫𑐵 𑐣𑐬𑑂𑐠 𑐳𑐷 𑐁𑐫𑐮 𑐥𑑂𑐬𑑀𑐜𑐎𑑂𑐳𑐣𑐫𑑂 𑐣𑑄 𑐔𑐷𑐣𑐫𑐵 𑐣𑐾𑐱𑐣𑐮 𑐀𑐦𑐱𑑀𑐬 𑐁𑐫𑐮 𑐎𑐬𑑂𑐥𑑀𑐬𑐾𑐱𑐣 (𑐳𑐷𑐊𑐣𑐌𑐌𑐳𑐷)𑐫𑐵 𑐱𑐾𑐫𑐬 𑐡𑐸 𑑋

𑐧𑐾𑐮𑐵𑐫𑐟𑐫𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐔𑐶𑐣𑐶𑐫𑐵𑑃 𑐰𑐶𑐡𑑂𑐫𑐵𑐠𑐷𑐟𑐫𑑂 𑐮𑑂𑐫𑐵𑑅 𑑒𑑐𑑐𑑖𑐫𑐵 𑐳𑑂𑐰𑐫𑐵𑑄 𑐳𑑂𑐰𑐡𑐸𑐐𑑄 𑐀𑐥𑑂𑐰𑐫𑐾𑐢𑐸𑑄𑐎𑐹𑐐𑐸 𑐡𑐸𑑋 𑐣𑐾𑐱𑐣𑐮 𑐂𑐣𑑂𑐲𑑂𑐚𑐶𑐔𑑂𑐫𑐹𑐚 𑐀𑐦 𑐂𑐎𑑀𑐣𑑀𑐩𑐶𑐎𑑂𑐳 𑐊𑐞𑑂𑐜 𑐳𑑀𑐱𑐮 𑐬𑐶𑐳𑐬𑑂𑐔 (𑐊𑐣𑐁𑐃𑐁𑐃𑐊𑐳𑐁𑐬)𑐫𑐵 𑐟𑐠𑑂𑐫𑐵𑑄𑐎𑑄 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐏𑑃 𑐳𑐷𑐡𑐂 𑑋 𑐧𑐾𑐮𑐵𑐫𑐟𑐫𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐰 𑐳𑑂𑐎𑐹𑐮𑐫𑑂 𑐚𑑂𑐫𑐸𑐳𑐣 𑐱𑐸𑐮𑑂𑐎𑐫𑐵 𑐣𑐶𑑄𑐟𑐶𑑄 𑐖𑐎 𑐔𑐶𑐣𑐶𑐫𑐵𑑃 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐡𑑃𑐫𑑂 𑑑.𑑗 𑐀𑐬𑑂𑐧 𑐥𑐵𑐄𑐞𑑂𑐜𑐫𑐵 𑐫𑑀𑐐𑐡𑐵𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐄𑐎𑐶𑑄 𑐰𑐶𑐖𑑂𑐘𑐟𑐫𑑂𑐳𑑄 𑐫𑐡𑐶 𑐔𑐶𑐣𑐶𑐫𑐵𑑃 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐧𑐾𑐮𑐵𑐫𑐟𑐫𑑂 𑐰𑐫𑐾𑐟 𑐥𑐣 𑐢𑐵𑑅𑐳𑐵 𑐧𑐾𑐮𑐵𑐫𑐟𑐫𑐵 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐟𑐫𑑂𑐳𑑄 𑐟𑑅𑐢𑑄𑐐𑐸 𑐁𑐬𑑂𑐠𑐶𑐎 𑐣𑑀𑐎𑑂𑐳𑐵𑐣𑐷 𑐦𑐫𑐾𑐩𑐵𑐮𑐷𑐐𑐸 𑐔𑐾𑐟𑐵𑐰𑐣𑐷 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑑄𑐑𑐵𑐂𑐫𑐵 𑐩𑐵𑐬𑑂𑐎𑐾𑐚 𑐂𑐣𑑂𑐚𑐾𑐮𑐶𑐖𑐾𑐣𑑂𑐳 𑐦𑐬𑑂𑐩 𑐂𑐩𑐬𑑂𑐖𑐶𑐒𑑂𑐐 𑐳𑑂𑐚𑑂𑐬𑐾𑐚𑐾𑐖𑐷𑐫𑐵 𑐥𑑂𑐬𑐰𑐎𑑂𑐟𑐵𑐫𑐵 𑐎𑐠𑑄 𑐰𑐶𑐡𑐾𑐱𑐷 𑐰𑐶𑐡𑑂𑐫𑐵𑐬𑑂𑐠𑐷 𑐩𑐢𑑂𑐫𑐾 𑐔𑐷𑐣𑑄 𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐮𑑂𑐫𑐵𑑅 𑐡𑐎𑐮𑐫𑑂 𑐀𑐥𑑂𑐰𑑅 𑐡𑐸𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐧𑐾𑐮𑐵𑐫𑐟𑐫𑐵 𑐱𑐿𑐎𑑂𑐲𑐶𑐎 𑐳𑑄𑐳𑑂𑐠𑐵𑑄𑐫𑑂 𑐧𑐵𑑄𑐩𑐮𑐵𑑅𑐐𑐸 𑐀𑐳𑐬 𑐮𑐵𑐫𑐾𑐦𑐸𑑋 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐮𑐵𑐐𑐟 𑐥𑐶𑐎𑐵𑐫𑐾𑐟 𑐴𑐾 𑐩𑐾𑐐𑐸 𑐎𑐩𑐵𑐂𑐫𑐵 𑐳𑑂𑐬𑑀𑐟 𑐩𑐵𑐮𑐾 𑐩𑐵𑐮𑐾𑐦𑐸 𑑋  𑐠𑑂𑐰 𑐴𑐾 𑐡𑐠𑐸𑐂 𑐧𑑂𑐬𑐶𑐚𑐶𑐳 𑐎𑐵𑐄𑐣𑑂𑐳𑐶𑐮𑑄 𑐣𑐶𑐐𑐹 𑐡𑐾𑐫𑑂𑐫𑐵 𑐟𑐣𑐵𑐰𑐫𑐵 𑐎𑐵𑐬𑐞𑑄 𑐔𑐶𑐣𑐶𑐫𑐵𑑃 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐟 𑐥𑐶𑐟𑐶𑐣𑐾𑐐𑐸 𑐕𑐸𑑄 𑐣𑐷𑐟𑐶 𑐩𑐡𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸𑑋 𑐎𑐵𑐄𑐣𑑂𑐳𑐶𑐮𑐫𑐵 𑐥𑑂𑐬𑐰𑐎𑑂𑐟𑐵𑑄 𑐧𑐶𑐧𑐶𑐳𑐷𑐮𑐶𑐳𑐾 𑐏𑑃 𑐮𑑂𑐴𑐵𑐳𑐾𑑄 𑐢𑐫𑐵𑐡𑐷𑐐𑐸 𑐡𑐸, ‘𑐟𑐟𑑂𑐎𑐵𑐮𑐶𑐣 𑐬𑐵𑐖𑐣𑐷𑐟𑐶𑐎 𑐀𑐰𑐳𑑂𑐠𑐵𑐫𑐵 𑐎𑐵𑐬𑐞𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑑅 𑐧𑑂𑐰𑐣𑐾𑐐𑐸 𑐟𑐵𑑅𑐴𑐵𑐎𑑅𑐐𑐸 𑐂𑐮𑐫𑑂 𑐮𑐶𑐔𑑂𑐰𑑅 𑐮𑐵𑐂𑐐𑐸 𑐏𑐣𑐾𑐩𑐡𑐸𑑋 𑐧𑐾𑐮𑐵𑐫𑐟 𑐣𑑂𑐴𑑂𑐫𑐵𑐧𑐮𑐾𑑄 𑐔𑐶𑐣𑐶𑐫𑐵𑑃 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂 𑐣𑐶𑑄𑐟𑐶𑑄 𑐩𑐴𑐟𑑂𑐰𑐥𑐹𑐬𑑂𑐞 𑐠𑐵𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋’

𑐰𑑄𑐐𑐸 𑐩𑐵𑐬𑑂𑐔𑐫𑑂 𑐖𑐎 𑐧𑐾𑐮𑐵𑐫𑐟𑐷 𑐳𑑂𑐚𑐶𑐮 𑐎𑐩𑑂𑐥𑐣𑐷𑐫𑐵𑐟 𑐔𑐷𑐣𑐫𑐵 𑐖𑐶𑑄𑐐𑑂𑐫𑐵 𑐐𑐸𑑂𑐬𑐥𑑄 𑐣𑑂𑐫𑐵𑐣𑐵𑐎𑐵𑑅𑐐𑐸 𑐡𑐸𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐎𑐩𑑂𑐥𑐣𑐷𑐫𑐵 𑐳𑑂𑐰𑐡𑑂𑐰𑐮𑑄 𑐩𑐮𑑂𑐫𑐵𑐎 𑐬𑑀𑐖𑐐𑐵𑐬 𑐧𑐔𑐾 𑐖𑐹𑐐𑐸 𑐡𑐸𑑋 𑐔𑐷𑐣𑐶𑐫𑐵 𑐎𑐩𑑂𑐥𑐣𑐷𑑄 𑐠𑑅𑐥𑐶𑑄𑐳𑑄 𑐣𑑂𑐫𑐵𑐣𑐵𑐐𑐸 𑐎𑐩𑑂𑐥𑐣𑐷𑐫𑐵𑐟 𑐀𑐗 𑐁𑐢𑐸𑐣𑐶𑐎 𑐡𑐫𑐾𑐎𑐾𑐟 𑑑 𑐀𑐬𑑂𑐧 𑐥𑐵𑐄𑐞𑑂𑐜𑑄 𑐩𑐮𑑂𑐫𑐵𑐎 𑐠𑐥 𑐮𑐐𑐵𑐣𑐷 𑐫𑐵𑐫𑐾𑐐𑐸 𑐏𑑃 𑐢𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑑋 𑐀𑐠𑐾𑐴𑐾 𑐧𑑂𑐮𑐵𑐫𑑂𑐎 𑐎𑑂𑐫𑐵𑐧 𑐡𑐫𑐾𑐎𑐷𑐐𑐸 𑐊𑐮𑐚𑐷𑐁𑐃𑐂𑐵𑐟 𑐣𑑄 𑐔𑐷𑐣𑐫𑐵 𑐎𑐩𑑂𑐥𑐣𑐷 𑐐𑐶𑐮𑐶𑑄 𑐣𑑂𑐫𑐵𑐣𑐵𑐎𑐵𑑅𑐐𑐸 𑐡𑐸𑑋 𑐠𑐸𑐎𑐶𑐫𑐵 𑐮𑐶𑐳𑐾𑑄 𑐄𑐮𑑂𑐰𑐬𑐴𑑂𑐫𑐵𑐥𑑂𑐚𑐣 𑐰𑐵𑐣𑑂𑐜𑐬𑑂𑐳 𑐦𑐸𑐚𑐧𑐮 𑐎𑑂𑐮𑐧𑐫𑐵𑐟 𑐣𑑄 𑐔𑐷𑐣𑐫𑐵 𑐦𑑀𑐳𑐸𑐣 𑐂𑐣𑑂𑐚𑐬𑐣𑐾𑐱𑐣𑐮𑑄 𑐣𑑂𑐫𑐵𑐣𑐵𑐎𑐵𑑅𑐐𑐸 𑐡𑐸 𑑋

𑐚𑐾𑐎𑑂𑐣𑑀𑐮𑑀𑐖𑐷 𑐎𑐩𑑂𑐥𑐣𑐷 𑐴𑐸𑐰𑐵𑐰𑐾 𑐧𑐾𑐮𑐵𑐫𑐟𑐫𑑂 𑐕𑐐𑐹 𑐴𑐵𑐂𑐥𑑂𑐬𑑀𑐦𑐵𑐂𑐮 𑐰 𑐟𑐵𑑅𑐃 𑐣𑑂𑐴𑑂𑐫𑐰 𑐣𑐶𑐳𑐾𑑄 𑐮𑐐𑐵𑐣𑐷 𑐫𑐵𑐣𑐵𑐔𑑂𑐰𑑄𑐐𑐸 𑐎𑐩𑑂𑐥𑐣𑐷 𑐏𑑅 𑑋 𑐧𑐾𑐮𑐵𑐫𑐟𑐫𑑂 𑐴𑐸𑐰𑐵𑐰𑐾𑐫𑐵 𑐳𑐩𑑂𑐧𑐣𑑂𑐢 𑐳𑐣𑑂 𑑒𑑐𑑐𑑕 𑐣𑐶𑐳𑐾𑑄 𑐴𑐾 𑐡𑐸𑑋 𑐟𑐬 𑐁𑑅 𑐴𑐸𑐰𑐵𑐰𑐾𑐫𑐵 𑑕 𑐖𑐷 𑐥𑑂𑐬𑐰𑐶𑐢𑐷 𑐧𑐾𑐮𑐵𑐫𑐟𑐫𑑂 𑐰𑐂𑐩𑐏𑐸𑐟, 𑐀𑐫𑑂𑐳𑐵𑑄 𑐣𑑄 𑐁𑑅 𑐣𑑄 𑐐𑐸𑐮𑐶𑐏𑐾 𑐴𑐸𑐰𑐵𑐰𑐾𑐫𑐵 𑐥𑑂𑐬𑐰𑐶𑐢𑐶𑑄 𑐧𑐾𑐮𑐵𑐫𑐟𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑑁𑑄𑐎𑐣𑑂𑐴𑐫𑑂 𑐡𑐎𑐮𑐫𑑂 𑐔𑐬𑑂𑐔𑐵𑐫𑑂 𑐰𑐫𑐵𑐔𑑂𑐰𑑄𑐐𑐸 𑐎𑐩𑑂𑐥𑐣𑐷 𑐴𑐸𑐰𑐵𑐰𑐾 𑐖𑐹𑐳𑐵𑑄 𑐧𑐾𑐮𑐵𑐫𑐟𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐴𑐸𑐰𑐵𑐰𑐾 𑐕𑐐𑐹 𑐖𑐎 𑐚𑐾𑐎𑑂𑐣𑑀𑐮𑑀𑐖𑐶 𑐎𑐩𑑂𑐥𑐣𑐷 𑐩𑐏𑐸, 𑐩𑐾𑐐𑐸 𑐣𑑄 𑐫𑐎𑑂𑐰 𑐠𑐖𑑂𑐫𑐵𑑅𑐐𑐸 𑐎𑐩𑑂𑐥𑐣𑐷 𑐡𑐸 𑐐𑐸𑐎𑐶𑑄 𑐧𑐾𑐮𑐵𑐫𑐟 𑐰 𑐔𑐷𑐣𑐫𑐵𑐟 𑐳𑑂𑐰𑐵𑐣𑐵𑐟𑑅𑐐𑐸 𑐡𑐸𑑋 𑐔𑐷𑐣𑐫𑐵 𑐧𑐾𑐮𑐵𑐫𑐟𑐷 𑐴𑐵𑐂𑐚𑐾𑐎 𑐎𑐩𑑂𑐥𑐣𑐷𑐥𑐵𑐏𑐾𑐫𑐵 𑐁𑐎𑐬𑑂𑐲𑐞 𑐐𑐸𑐮𑐶 𑐡𑐸 𑐢𑐫𑐵𑐐𑐸 𑐏𑑃 𑐮𑐵 𑐳𑐣𑑂 𑑒𑑐𑑑𑑗 𑐫𑑂 𑐔𑐶𑐥 𑐡𑐫𑐾𑐎𑐷𑐐𑐸 𑐂𑐩𑐿𑐖𑐶𑐣𑐾𑐱𑐣 𑐚𑐾𑐎𑑂𑐣𑑀𑐮𑑀𑐖𑐷𑐫𑐵𑐟 𑐣𑑂𑐫𑐵𑐣𑐵𑐎𑐵𑑅𑐐𑐸𑐮𑐶𑑄 𑐣𑑄 𑐏𑐣𑐾𑐡𑐸 𑑋

𑐏𑐫𑑂𑐟 𑐮𑐵 𑐧𑐾𑐮𑐵𑐫𑐟𑐫𑑂 𑐰𑐫𑐵𑐔𑑂𑐰𑑄𑐐𑐸 𑐀𑐥𑑂𑐰𑑅𑐠𑐾𑑄 𑐮𑐐𑐵𑐣𑐷 𑐎𑐩𑑂𑐥𑐣𑐷 𑐔𑐶𑐣𑐶𑐫𑐵𑑃 𑐎𑐩𑑂𑐥𑐣𑐷 𑐰 𑐔𑐶𑐣𑐶𑐫𑐵𑑃 𑐳𑐬𑐎𑐵𑐬𑐫𑐵 𑐊𑐎𑐵𑐃 𑐖𑐸𑐫𑐵𑐔𑑂𑐰𑑄𑐐𑐸 𑐎𑐩𑑂𑐥𑐣𑐷 𑐡𑐸, 𑐟𑐬 𑐧𑐾𑐮𑐵𑐫𑐟𑐷 𑐎𑐩𑑂𑐥𑐣𑐷𑐟 𑐣𑑄 𑐔𑐷𑐣𑐫𑑂 𑐩𑑂𑐴𑑀 𑐩𑐖𑐹 𑑋 𑐊𑐣𑐬𑑂𑐖𑐷 𑐎𑐵𑐬 𑐄𑐟𑑂𑐥𑐵𑐡𑐣, 𑐦𑐬𑑂𑐩𑐵𑐳𑑂𑐫𑐸𑐚𑐶𑐎𑐮𑑂𑐳 𑐰 𑐦𑐵𑐂𑐣𑐾𑐣𑑂𑐳𑐶𑐫𑐮 𑐳𑐬𑑂𑐨𑐶𑐳 𑐠𑐾𑑄𑐖𑑂𑐫𑐵𑑅𑐐𑐸 𑐎𑑂𑐲𑐾𑐟𑑂𑐬𑐫𑑂 𑐧𑐾𑐮𑐵𑐫𑐟𑐷 𑐎𑐩𑑂𑐥𑐣𑐷 𑐄𑐮𑑂𑐮𑐾𑐏𑑂𑐫 𑐩𑐵𑐟𑑂𑐬𑐵𑐫𑑂 𑐡𑐸𑑋 𑐰𑑄𑐐𑐸 𑐡𑑃𑐫𑑂 𑐖𑐎 𑐖𑐬𑑂𑐩𑐣𑐷𑐂 𑐔𑐷𑐣𑐫𑐵 𑐬𑐵𑐖𑐡𑐹𑐟𑑄 𑐏𑑂𑐫𑐵𑐔𑑂𑐰𑑅 𑐧𑐶𑐳𑐾𑑄 𑐢𑐵𑑅𑐐𑐸 𑐏𑑅, 𑐫𑐡𑐶 𑐖𑐬𑑂𑐩𑐣𑐷𑑄 𑑕 𑐖𑐷 𑐣𑐾𑐚𑐰𑐬𑑂𑐎𑐫𑑂 𑐴𑐸𑐰𑐵𑐰𑐾𑐫𑐵𑐟 𑐥𑑂𑐬𑐟𑐶𑐧𑐣𑑂𑐢 𑐟𑐮 𑐢𑐵𑑅𑐳𑐵 𑐖𑐬𑑂𑐩𑐣𑐷𑐫𑐵 𑐎𑐵𑐬 𑐎𑐩𑑂𑐥𑐣𑐷𑐟𑐫𑑂𑐳𑑄 𑐣𑑄 𑐧𑐵𑑄𑐩𑐮𑐵𑑅𑐐𑐸 𑐮𑐶𑐔𑑂𑐰𑑅 𑐦𑐫𑐾𑐩𑐵𑐮𑐷 𑑋

𑐠𑑂𑐰 𑐢𑐵𑐥𑐹 𑐥𑐶𑐴𑐵𑑄 𑐰𑐫𑐾𑐰𑑄 𑐔𑐷𑐣𑑄 𑐩𑐾𑐩𑐾𑐐𑐸 𑐡𑐾𑐱𑐫𑑂 𑐣𑑄 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵 𑐫𑐵𑐫𑐾𑐦𑐸 𑐢𑐫𑐵𑐐𑐸 𑐐𑑂𑐫𑐵𑑅𑐔𑐶𑐎𑐸 𑐧𑑂𑐰𑐮𑑄𑐐𑐸 𑐡𑐸𑑋 𑐳𑑄𑐑𑐵𑐂𑐮𑐫𑑂 𑐔𑑂𑐰𑑄𑐐𑐸 𑐩𑐵𑐬𑑂𑐎𑐾𑐚 𑐂𑐣𑑂𑐚𑐾𑐮𑐶𑐖𑐾𑐣𑑂𑐳 𑐦𑐬𑑂𑐩 𑐂𑐩𑐬𑑂𑐖𑐶𑑄𑐐 𑐳𑑂𑐚𑑂𑐬𑐾𑐚𑐾𑐖𑐷𑐫𑐵 𑐥𑑂𑐬𑐰𑐎𑑂𑐟𑐵𑐫𑐵 𑐎𑐠𑑄 𑐔𑐶𑐣𑐶𑐫𑐵𑑃𑐟 𑐬𑐵𑐲𑑂𑐚𑑂𑐬𑐶𑐫 𑐴𑐷𑐟𑐫𑐵 𑐁𑐢𑐵𑐬𑐫𑑂 𑐳𑐸𑐫𑐵𑐟𑑄 𑐧𑐴𑐶𑐲𑑂𑐎𑐵𑐬 𑐫𑐵𑐫𑐾𑐐𑐸 𑐏𑑃𑐫𑑂 𑐟𑐳𑐎𑑄 𑐣𑑂𑐴𑑂𑐫𑑅𑐣𑐾 𑐮𑐵𑑅 𑑋 𑐟𑐬 𑐔𑐷𑐣𑐫𑐵 𑐧𑑂𑐬𑐶𑐚𑐶𑐱 𑐔𑑂𑐫𑐵𑐩𑑂𑐧𑐬 𑐀𑐦 𑐎𑐩𑐬𑑂𑐳𑐫𑐵 𑐩𑑂𑐫𑐵𑐣𑐾𑐖𑐶𑐒𑑂𑐐 𑐜𑐵𑐂𑐬𑐾𑐎𑑂𑐚𑐬 𑐳𑑂𑐚𑐶𑐨𑐣 𑐮𑐶𑑄𑐔𑐫𑐵𑐟 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵 𑐰𑐫𑐾𑐐𑐸 𑐥𑐵𑐏𑐾𑑄 𑐧𑐔𑐾 𑐖𑐸𑐂𑐐𑐸 𑐰𑐶𑐱𑑂𑐰𑐵𑐳 𑐡𑐸𑑋 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸, ‘𑐧𑐾𑐮𑐵𑐫𑐟𑐷 𑐀𑐚𑑀𑐩𑑀𑐚𑐶𑐰 𑐩𑑂𑐫𑐵𑐣𑐸𑐦𑑂𑐫𑐵𑐎𑑂𑐔𑐬𑑂𑐳𑐫𑐵𑐟 𑐧𑐾𑐮𑐵𑐫𑐟𑐷 𑐳𑐬𑐎𑐵𑐬𑐫𑐵 𑐣𑐶𑐬𑑂𑐞𑐫𑐫𑐵 𑐎𑐵𑐬𑐞𑑄 𑐣𑐶𑐱𑐵𑐣𑐵𑐫𑑂 𑐮𑐵𑐎𑐷𑐩𑐏𑐸 𑐢𑐫𑐵𑐐𑐸 𑐰𑐶𑐱𑑂𑐰𑐵𑐳 𑐡𑐸 𑑋’

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS