Read news in NepalBhasa text-- www.hamroschool.com BACK 𑐧𑑂𑐫𑐵𑐴𑐵 𑐮𑐶𑐥𑐵 𑐧𑐵𑑅𑐬𑑂‍𑐴𑐵𑑅 𑐟𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑑂𑐫𑐵𑐴𑐵 𑐮𑐶𑐥𑐵 𑐧𑐵𑑅𑐬𑑂‍𑐴𑐵𑑅 𑐟𑐮

𑐖𑐶𑐐𑐸 𑐖𑐣𑑂𑐩 𑐫𑐾𑑃𑐫𑐵 𑐟𑑄𑐐𑐵𑐮𑐫𑑂 𑐖𑐹𑐐𑐸 𑐏𑑅 𑑋 𑐀𑐧𑐮𑐫𑑂 𑐀𑐣 𑐕𑐔𑐵𑑅𑐮𑑄 𑐧𑐸𑑃𑐫𑐵 𑐧𑐸𑑃 𑑋 𑐕𑐾𑑃 𑐁𑐥𑐵𑑅 𑐩𑐡𑐸𑑋 𑐳𑐸𑐥𑑁𑐫𑐵 𑐕𑐾𑑃 𑐖𑐎 𑑋 𑐳𑐟𑑅 𑐰 𑐡𑑂𑐫𑑅 𑐕𑐾𑑃 𑐡𑐸𑑋 𑐀𑐳𑑄𑐫𑐵 𑐳𑐵𑐫𑑂𑐩𑐶𑐟𑐫𑑂 𑐡𑐶𑐐𑐸𑐡𑑂𑐫𑑅 𑐕𑐾𑑃 𑐣𑑄 𑐡𑐸𑑋 𑑙𑑐 𑐳𑐵𑐮𑐫𑐵 𑐨𑐸𑐏𑐵𑐫𑑂 𑐧𑑂𑐰𑑅𑐧𑐮𑐫𑑂 𑐖𑐶𑐩𑐶 𑐧𑐵𑑅 𑐔𑐸𑐬𑑀𑐚 𑐣𑑂𑐫𑐵𑑅 𑐰𑐣𑐵𑐐𑐸 𑐴𑑃 ! 𑐀𑐧𑐮𑐫𑑂 𑐨𑐸𑐏𑐵𑐫𑑂 𑐧𑑂𑐰𑐮 𑐴𑑃 ! 𑐧𑑂𑐰𑐵𑑃𑐫𑑂 𑐧𑑂𑐰𑐵𑑃𑐫𑑂 𑐕𑐾𑑃𑐥𑐵𑐏𑐾 𑐰𑐫𑐵 𑐴𑑃 ! 𑐖𑐶𑐩𑐶 𑐟𑐟𑐵𑐫𑐵𑐟 𑐳𑐟𑑅𑐫𑐵 𑐣𑑂𑐴𑑂𑐫𑑅𑐣𑐾 𑐔𑑂𑐰𑑄𑐐𑐸 𑐳𑐶𑐩𑐵𑑄 𑐮𑑂𑐴𑐵𑐟 𑐮𑐶𑐥𑐵 𑐳𑐎𑐮𑐾𑑄 𑐖𑐵𑐣𑐵𑑅 𑐄𑐡𑑂𑐢𑐵𑐬 𑐫𑐵𑐟 𑐢𑐫𑐵𑐡𑐷𑐐𑐸𑑋 𑐀𑐧𑐮𑐫𑑂 𑐖𑐶𑐩𑐶 𑐧𑐵𑑅 𑐣𑐷𑐡𑑃 𑐡𑐟 𑐴𑑃 ! 𑐖𑐶𑐩𑐶 𑐣𑑄 𑐳𑐸𑐥𑑁𑐫𑐵 𑐣𑐶𑐟𑑃𑐖𑐵𑑅𑐐𑐸 𑐕𑐾𑑃 𑑋 𑐨𑐸𑐏𑐵𑐔𑑄 𑐖𑐶𑐩𑐶 𑐕𑐾𑑃 𑐥𑐵𑑅𑐟𑐵𑑅 𑐖𑐸𑐂𑐎 𑐡𑐸𑐣𑑋 𑐕𑐾𑑃 𑐩𑐡𑐫𑐾𑐰𑑄 𑐖𑐶𑐥𑐶𑑄 𑐳𑐵𑐫𑑂𑐩𑐶𑐟𑐫𑑂𑐐𑐸 𑐦𑐮𑑂𑐔𑐵𑐫𑑂 𑐔𑑂𑐰𑑄 𑐰𑐣𑐵 𑑋 𑐖𑐶𑐥𑐶𑑄 𑐡𑑂𑐫𑑅𑐥𑐵𑑅 𑐣𑑄 𑐔𑑂𑐰𑐣𑐵 𑑋 𑐡𑑂𑐫𑑅𑐫𑐵𑐠𑐵𑐫𑑂 𑐢𑑂𑐫𑐧𑐵 𑐕𑐵𑐂𑐥𑐶𑑄 𑐁𑐥𑐵𑑅 𑐩𑐡𑐸𑑋 𑐢𑐶𑐧𑑂𑐕𑐐𑑅 𑐡𑐵𑑄 𑐕𑐵𑐟𑐎𑐶 𑐟𑑅𑐢𑑄 𑐟𑐵𑐂𑐐𑐸𑑋 𑐁𑐥𑐵𑑅 𑐫𑐵𑐣𑐵𑑅 𑐳𑐩𑐫𑑂, 𑐨𑑂𑐰𑐫𑑂 𑐧𑑂𑐰 𑐴𑐾 𑐕𑐵𑐫𑐾 𑐴𑐂𑐐𑐸𑑋

𑐖𑐶𑐩𑐶 𑐩𑐵𑑄 𑐐𑐸𑐬𑐸𑐒𑐣𑐷 𑑋 𑐧𑐵𑑅𑐫𑐵 𑐡𑐬𑐰𑐵𑐬𑐫𑑂 𑐖𑑂𑐫𑐵 𑑋 𑐀𑐣 𑐧𑑂𑐫𑐵𑐞𑑂𑐜𑐧𑐵𑐖𑐵 𑐠𑐵𑐂𑐐𑐸𑑋 𑐥𑐮𑑂𑐚𑐣 𑐖𑐵𑐐𑐶𑐬 𑐢𑐵𑐂 𑑋 𑐩𑐵𑑄𑐫𑐵 𑐡𑐬𑐰𑐵𑐬𑐫𑑂 𑐳𑐸𑐳𑐵𑐬𑐾 𑐖𑑂𑐫𑐵 𑑋 𑐀𑐣𑑄 𑐴𑐾 𑐧𑐵𑑅𑐣𑑄 𑐩𑐵𑑄𑐫𑐵𑐟 𑐴𑑅𑐐𑐸 𑐢𑐵𑐂 𑑋 𑐥𑐵𑐖𑐸 𑐣𑑄 𑐣𑐵𑐬𑐵𑑄𑐴𑐶𑐟𑐶𑐂 𑐥𑐸𑐮𑐶𑐳 𑑋 𑐧𑐵𑑅 𑐣𑑄 𑐩𑐵𑑄𑐫𑐵𑐟 𑐴𑐫𑐾𑐰𑑄 𑐧𑐵𑑅𑐫𑐵𑐟 𑐖𑑂𑐰𑐣𑐵 𑐫𑑄𑐎𑐮 𑐴𑑃 ! 𑐀𑐣 𑐎𑐸𑐣𑐵 𑐟𑐮 𑐴𑑃 ! 𑐮𑐶𑐥𑐵 𑐧𑐵𑑅𑐫𑐵𑐟 𑐟𑑂𑐰𑑅𑐟𑐮 𑑋 𑐩𑐵𑑄𑐫𑐵𑐟 𑐢𑑂𑐫𑐧𑐵 𑐧𑐶𑐫𑐵𑑅 𑐖𑑂𑐫𑐵𑑄 𑐮𑐶𑐎𑐫𑐵 𑐴𑐮 𑐴𑑃 ! 𑐖𑐶𑐩𑐶 𑐧𑐵𑐖𑑂𑐫𑐵 (𑐩𑐵𑑄𑐫𑐵 𑐧𑐵𑑅) 𑐐𑐵𑑄𑐫𑐵 𑐥𑐘𑑂𑐔 𑑋 𑐧𑐵𑑅𑐣𑐵𑐥 𑐰𑐫𑐾𑐢𑐸𑑄𑐎𑐵𑑅 𑐩𑐵𑑄 𑐕𑐎𑑂𑐰𑑅 𑐣𑐶𑐎𑑂𑐰𑑅 𑐐𑐵𑐩𑐫𑑂 𑐰𑑄 𑑋 𑐖𑐶𑐟𑑅 𑐣𑑄 𑐕𑐎𑑂𑐰𑑅 𑐧𑑂𑐰𑐣𑐵 𑐫𑑄𑐎𑐹𑐐𑐸 𑐡𑐸𑑋 𑐟𑐬 𑐐𑐣 𑐢𑐎𑐵𑑅 𑐩𑐳𑐶𑐄𑑋

𑐖𑐶 𑐣𑑄 𑐧𑐵𑑅𑐣𑐵𑐥 𑐡𑐬𑐰𑐵𑐬𑐫𑑂 𑐰𑐣𑐵 𑑋 𑐟𑐥𑑂𑐫𑑄𑐎 𑐡𑐸𑐴𑐵𑑄 𑐰𑐣𑐾𑐐𑐸𑑋 𑐟𑐥𑑂𑐫𑑄𑐎 𑐥𑐶𑐴𑐵𑑄 𑐰𑐫𑐾𑐐𑐸𑑋 𑐐𑐣𑑄 𑐠𑐷𑐎𑐷 𑐩𑐏𑐸𑑋 𑐧𑑂𑐰𑑅𑐟𑐵𑐫𑑂 𑐑𑑂𑐫𑑅 𑐟𑐸𑐮𑐸𑐟𑐸𑐮𑐸 𑐰𑐫𑐾𑐎 𑐖𑐵 𑐖𑐵𑐫𑐾𑐎 𑐟𑐫𑐵𑐧𑐷 𑑋 𑐂𑐩𑐶𑐳𑑄 𑐧𑑂𑐰𑑅𑐐𑐸 𑐖𑑂𑐫𑐵 𑐖𑐎 𑐫𑐵𑐫𑐾𑐐𑐸𑑋 𑐟𑑄 𑐔𑐵𑐫𑐾 𑐩𑐖𑐶𑐄𑑋 𑐖𑐶𑐩𑐶 𑐎𑐶𑐖𑐵 𑐕𑐩𑑂𑐴 𑐣𑑄 𑐡𑐸𑑋 𑐣𑑂𑐴𑐵𑐥𑐵𑐫𑐵 𑐃 𑐮𑑂𑐰𑐔𑑄 𑐎𑐮𑐎𑐶 𑐰𑐵𑐳𑑅 𑐣𑐎𑐾𑐩𑐵𑑅 𑐢𑐂𑐐𑐸 𑐩𑐳𑐶𑐄𑑋 𑐎𑐶𑐖𑐵 𑐐𑐮𑐫𑑂 𑐖𑐸𑐫𑐵 𑐰𑐣𑑋 𑐕𑐸 𑐖𑐹 𑐕𑐸 𑐖𑐹 𑐢𑐫𑐵 𑐖𑐸𑐮 𑑋 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐐𑑄𑐳𑐶 𑐖𑐸𑐖𑐸𑑄 𑐰𑐣𑑋 𑐄𑐎𑐶𑑄 𑐴𑐾 𑐎𑐶𑐖𑐵 𑐩𑑄𑐟 𑑋

𑐖𑐶 𑐔𑑂𑐫𑐵𑐡𑑃 𑐦𑐸𑐟𑑋 𑐀𑐧𑐮𑐫𑑂 𑐖𑐶𑐩𑐶 𑐕𑐾𑑃𑐫𑑂 𑐡𑐬𑐵𑐨𑐟𑐗𑐮 𑑋 𑐳𑐸 𑐢𑐎𑐵𑑅 𑐖𑐶𑑄 𑐩𑑂𑐴𑐩𑐳𑐶𑐄𑑋 𑐖𑐶𑐩𑐶 𑐥𑐵𑐳𑐵𑐥𑐶𑑄 𑐳𑐎𑐮𑐾𑑄 𑐧𑑅𑐩𑐣𑐷𑐟𑑋 𑐂𑐥𑐶𑑄 𑐖𑐶 𑐳𑑂𑐰𑐫𑐵𑑄 𑐔𑐮𑐵𑐏 𑑋 𑐂𑐩𑐶𑐳𑑄 𑐖𑐶𑐟𑑅 𑐢𑐵𑐮, ‘𑐀𑐧 𑐟𑐶𑐩𑐷𑐮𑐵𑐃 𑐡𑐸𑐮𑐴𑐷 𑐧𑐣𑐵𑐊𑐬 𑐮𑐐𑑂𑐕 𑑋’ 𑐢𑐫𑐵𑑅 𑐂𑐩𑐶 𑐕𑐾𑑃𑐫𑑂 𑐳𑐸𑐔𑐸𑐎𑐾 𑐫𑑄𑐎𑐮 𑑋 𑐖𑐶𑐩𑐶 𑐩𑐵𑑄 𑐐𑐸𑐬𑐸𑐒𑐣𑐷 𑐖𑐹𑐐𑐸𑐮𑐶𑑄 𑐖𑐹𑐐𑐸𑐮𑐶𑑄 𑐣𑐾𑐰𑐵𑑅 𑐨𑐵𑐫𑑂 𑐩𑐮𑑂𑐴𑐵𑐣𑐵 𑑋 𑐥𑐵𑐳𑐵𑐥𑐶𑑄 𑐣𑑄 𑐳𑐎𑐮𑐾𑑄 𑐧𑑅𑐩𑐣𑐷 𑑋 𑐄𑐎𑐶𑑄 𑐏𑐫𑑂𑐨𑐵𑐳𑑄 𑐴𑐾 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐫𑐾𑐐𑐸𑑋 𑐖𑐶 𑐔𑑂𑐫𑐵𑐡𑑃 𑐦𑐸𑐂𑐰𑑄 𑐫𑐾𑑃𑐫𑐵 𑐡𑐮𑐵𑐕𑐶𑐂 𑐧𑐶𑐫𑐵𑐴𑐮 𑑋 𑐡𑐬𑐵𑐨𑐟𑑄 𑐖𑐶𑐟𑑅 𑐮𑑃𑐢𑐸𑐕𑐶𑑄 𑐧𑐸𑐫𑐵 𑐴𑐮 𑑋 𑐐𑐣 𑐫𑑄𑐎𑐾𑐟𑑂𑐫𑑄𑐐𑐸 𑐕𑐸𑑄 𑐩𑐳𑐶𑐄𑑋 𑐠𑐩𑑂𑐴𑑄 𑐮𑑃 𑐣𑑄 𑐩𑑂𑐴𑐩𑐳𑐶𑐄𑑋 𑐳𑐸𑐣𑐳𑐵𑐣 𑐮𑑃𑐥𑐸𑑋 𑐕𑐩𑑂𑐴 𑐣𑐶𑐩𑑂𑐴 𑐮𑑃𑐫𑑂 𑐖𑐹𑐥𑐶𑑄 𑐡𑐸𑑋 𑐟𑐶𑐣𑐶𑐏𑑂𑐫𑐮𑐫𑑂 𑐠𑑂𑐫𑐣𑐾𑐰𑑄 𑐗𑐶𑐮𑐶𑐩𑐶𑐮𑐶 𑐩𑐟 𑐏𑐣𑐾𑐡𑐟𑑋 𑐀𑐣 𑐠𑑂𑐫𑐣𑐾𑐰𑑄 𑐖𑐶𑐟𑑅 𑐡𑐶𑐎𑐮 𑑋 𑐖𑐶𑐟𑑅 𑐖𑐬𑐷 𑐡𑐸𑐐𑐸 𑐮𑐵𑐎𑐵𑑄 𑐣𑑂𑐴𑑂𑐫𑐵𑐎𑐵𑐟𑑅𑐐𑐸𑑋 𑐀𑐣 𑐠𑑂𑐫𑑄𑐧𑐮𑐫𑑂 𑐖𑐶𑐐𑐸 𑐕𑐥𑐵 𑐮𑐵𑐎𑐵𑑄 𑐩𑐡𑐸𑑋 𑐄𑐏𑐾𑑄𑐠𑐸𑐏𑐾𑑄 𑐳𑑂𑐰𑐮 𑑋 𑐮𑐸𑐂𑐎𑐾 𑐩𑐦𑐸𑐟𑑋 𑐀𑐣𑑄𑐮𑐶 𑐕𑐾𑑃𑐫𑑂 𑐡𑐸𑐟 𑐴𑐮 𑑋

𑐣𑑂𑐴𑐹𑐐𑐸 𑐕𑐾𑑃 𑐖𑐎 𑐩𑐏𑐸𑑋 𑐖𑐶𑐐𑐸 𑐮𑐵𑐐𑐶𑑄 𑐨𑐵𑐫𑑂 𑐣𑑄 𑐣𑑂𑐴𑐹𑐐𑐸𑑋 𑐏𑐫𑑂 𑐨𑐵𑐫𑑂 𑐖𑐎 𑐮𑑂𑐴𑐵𑐂𑐩𑑂𑐴 𑐖𑐶 𑑋 𑐀𑐣 𑐔𑑂𑐰𑑄𑐥𑐶𑑄 𑐳𑐎𑐳𑐶𑐣𑑄 𑐏𑐫𑑂 𑐨𑐵𑐫𑑂 𑐩𑐳𑑅 𑑋 𑐩𑐵𑐖𑐸𑑄 𑐮𑐵 𑐗𑐣 𑐕𑐟𑐶𑑄 𑐩𑐳𑑅 𑑋 𑐖𑐶 𑐩𑐵𑐖𑐸𑐣𑐵𑐥 𑐔𑑂𑐰𑐣𑐾𑐩𑐵𑑅𑐩𑑂𑐴𑑋 𑐖𑐶𑑄 𑐢𑐵𑑅𑐐𑐸 𑐩𑐵𑐖𑐸𑑄 𑐩𑐠𑐹 𑑋 𑐩𑐵𑐖𑐸𑑄 𑐢𑐵𑑅𑐐𑐸 𑐖𑐶𑑄 𑐩𑐠𑐹 𑑋 𑐠𑐣𑐫𑐵𑐥𑐶𑑄 𑐳𑐎𑐮𑐾𑑄 𑐣𑐾𑐰𑐵𑑅 𑐏𑑃 𑐮𑑂𑐴𑐵𑐂𑐥𑐶𑑄 𑑋 𑐐𑐣𑑄 𑐰𑐣𑐾𑐧𑐮𑐫𑑂 𑐠𑐷 𑐩𑐟𑑂𑐫𑑅 𑐢𑐵𑐂𑐐𑐸𑑋 ‘𑐠𑐷 𑐩𑐖𑐶𑐄, 𑐠𑐷 𑐩𑐟𑑂𑐫𑑅’ 𑐢𑐵𑑅𑐐𑐸 𑐟𑐎𑑄 𑐩𑐠𑐹 𑑋

𑐖𑐶 𑐎𑐵𑐣𑑂𑐕𑐶𑐩𑑂𑐴 𑐨𑑁𑐩𑐔𑐵 𑑋 𑐖𑑂𑐫𑐵 𑐡𑐎𑑂𑐰 𑐟𑐟𑐵𑑅𑐖𑐸𑐥𑐶𑑄𑐳𑑄 𑐫𑐵𑐂𑐐𑐸𑑋 𑐨𑐵𑐬𑐵𑐔𑐶𑐥 𑐳𑐶𑐮𑐾𑐐𑐸 𑐖𑑂𑐫𑐵 𑐖𑐎 𑐖𑐶𑑄 𑐫𑐵𑐫𑐾𑐐𑐸𑑋 𑐀𑐧𑐮𑐫𑑂 𑐎𑐳𑐶𑐂 𑐖𑐵 𑐠𑐸𑐂𑐐𑐸𑑋 𑐩𑐵𑐖𑐸𑑄 𑐖𑐶𑐟𑑅 𑐎𑐳𑐶 𑐳𑐶𑐮𑐾𑐐𑐸 𑐖𑑂𑐫𑐵 𑐧𑐶𑐮 𑑋 𑐖𑐶𑑄 𑐎𑐳𑐶 𑐟𑐖𑑂𑐫𑐵𑐫𑐾 𑐫𑑅 𑐢𑐂𑐐𑐸 𑐩𑐳𑐶𑐄𑑋 𑐳𑐶𑐮𑐾𑐟 𑐖𑑂𑐰𑐣𑐵𑑅 𑐧𑑃𑐫𑑂 𑐟𑐫𑐾𑐰𑑄 𑐟𑐖𑑂𑐫𑐵𑐟𑑋 𑐎𑐳𑐶 𑐟𑐖𑑂𑐫𑐵𑐫𑐾𑐰𑑄 𑐖𑐶 𑐐𑑂𑐫𑐵𑐟𑑋 𑐩𑐵𑐖𑐸𑑄 𑐕𑐸𑑄 𑐩𑐢𑐵𑑅 𑑋 𑐀𑐣𑑄𑐮𑐶𑐥𑐵 𑐟𑐶𑐣𑐶 𑐖𑐶𑑄 𑐴𑑀𑐳 𑐟𑐫𑐵𑑅 𑐖𑑂𑐫𑐵 𑐫𑐵𑐣𑐵 𑑋

𑐧𑑂𑐫𑐵𑐴𑐵 𑐮𑐶𑐥𑐵 𑐎𑐾𑐴𑐾𑑄𑐨𑐟𑐣𑐵𑐥 𑐖𑐶𑐟𑑅 𑐣𑑄 𑐧𑐵𑑅𑐬𑑂‍𑐴𑐵𑑅 𑐟𑐮 𑑋 𑐎𑐾𑐴𑐾𑑄𑐨𑐟𑐫𑐵𑐟 𑐗𑐶𑐣𑐶𑐣𑑂𑐴𑐸 𑐎𑐸𑐟𑑋 𑐖𑐶𑐟𑑅 𑐕𑐣𑑂𑐴𑐸 𑐎𑐸𑐣𑑋 𑐖𑐶𑐟𑑅 𑐧𑐵𑑅𑐬𑑂‍𑐴𑐵𑑅 𑐟𑑅𑐧𑐮𑐫𑑂 𑐩𑐵𑑄𑐫𑐵 𑐥𑑂𑐰𑐵𑐠𑐫𑑂 𑐡𑐸𑑋 𑐥𑑂𑐰𑐵𑐠𑐫𑑂 𑐡𑐸𑐩𑑂𑐴 𑐩𑐵𑑄𑐫𑐵𑐟 𑐧𑐵𑑅𑐬𑑂‍𑐴𑐵𑑅 𑐏𑑂𑐫𑐵𑑅 𑐟𑐫𑐾𑐎𑐮 𑑋 𑐐𑐸𑐮𑐶𑐳𑐶𑐣𑑄 𑐥𑑂𑐰𑐵𑐠𑐫𑑂 𑐡𑐸𑐩𑑂𑐴𑑄 𑐧𑐵𑑅𑐬𑑂‍𑐴𑐵𑑅𑐏𑑂𑐫𑐵𑑅 𑐟𑐫𑐾 𑐩𑐖𑐶𑐄 𑐢𑐵𑐮𑑄 𑐩𑐵𑐖𑐸 𑐩𑐵𑐣𑐾 𑐩𑐖𑐹 𑑋 𑐩𑐵𑐖𑐸𑑄 𑐩𑐵𑑄𑐫𑐵𑐟 𑐴𑐾 𑐧𑐵𑑅𑐬𑑂‍𑐴𑐵𑑅𑐏𑑂𑐫𑐵𑑅 𑐟𑐫𑐾𑐎𑐾𑐧𑐶𑐮 𑑋 𑐧𑐴𑐣𑐶 𑐏𑐸𑐟𑐵𑑅 𑐂𑐮𑑄𑐣𑐶𑐳𑐾𑑄 𑐩𑐵𑑄𑐫𑐵 𑐴𑐶 𑐎𑐸𑐴𑐵𑑄 𑐰𑐮 𑑋 𑐎𑐾𑐴𑐾𑑄 𑐕𑐩𑑂𑐴 𑐧𑐸𑐂𑐎𑐵𑑅 𑐩𑐵𑑄 𑐩𑑄𑐟𑑋 𑐎𑐾𑐴𑐾𑑄 𑐣𑑄 𑐮𑐟𑑂𑐫𑐵𑐟𑐶 𑐩𑑂𑐰𑐵𑐟𑑋 𑐀𑐣𑑄𑐮𑐶 𑐩𑑄𑐟 𑑋

𑐕𑐾𑑃𑐫𑑂 𑐖𑐶𑐟𑑅 𑐳𑐎𑐳𑐶𑐣𑑄 𑐩𑐵𑐫𑐵 𑐫𑐵𑑅 𑑋 𑐧𑑂𑐫𑐵𑐴𑐵 𑐫𑐵𑐣𑐵 𑐰𑐫𑐾𑐢𑐸𑑄𑐎𑐵𑑅 𑐣𑑄 𑐟𑑂𑐰𑐵𑐮𑐫𑑂 𑐩𑑂𑐴𑐶𑐟𑑅 𑐖𑐸𑐫𑐵 𑑋 𑐕𑐸𑑄 𑐡𑑃 𑐮𑐶𑐥𑐵 𑐕𑐾𑑃𑐖𑑂𑐫𑐵 𑐣𑑄 𑐳𑐫𑐾𑐎𑐵 𑐫𑑄𑐎𑐵 𑑋 𑐕𑐾𑑃𑐫𑑂 𑐳𑐎𑐳𑐶𑐣𑑄 𑐳𑐸𑐂𑐎𑐵𑑅 𑐖𑑂𑐫𑐵 𑐫𑐵𑐂𑐐𑐸𑑋 𑐥𑐵𑐂𑐣𑑂𑐚, 𑐎𑑀𑐚, 𑐧𑑂𑐮𑐵𑐄𑐖 𑐳𑐎𑐟𑐵𑑄 𑐳𑐸𑐂𑐐𑐸𑑋 𑐀𑐧𑐮𑐫𑑂 𑐮𑑂𑐴𑐵𑑅𑐫𑐵 𑐩𑐾𑐳𑐶𑐣𑑋 𑐖𑐶𑑄 𑐣𑑄 𑐮𑑄 𑐳𑐸𑐫𑐵 𑑋 𑐀𑐧𑐮𑐫𑑂 𑐁𑐥𑐵𑑅 𑐫𑐵𑐣𑐵𑑅 𑐑𑐵𑑃𑐑𑐬 𑐳𑐸𑐂𑐥𑐶𑑄 𑐡𑐸𑑋 𑐩𑑀𑐴𑐣𑐶 𑐰 𑐥𑐵𑐴𑐵𑑄𑐔𑑅𑐬𑑂‍𑐴𑐾𑐫𑐵 𑐂𑐮𑐫𑑂 𑐰𑐳𑑅 𑐳𑐸𑐂𑐎𑑅 𑐰𑐂𑐥𑐶𑑄 𑐁𑐥𑐵𑑅 𑐡𑐸𑑋 𑐮𑑄 𑐳𑐸𑐂𑐐𑐸 𑐂𑐮𑐫𑑂 𑐖𑑂𑐫𑐵𑐮𑐵 𑐣𑑄 𑐩𑑂𑐴𑑀 𑑋 𑐧𑑂𑐮𑐵𑐄𑐖 𑐕𑐥𑐵𑑅𑐫𑐵 𑐣𑑂𑐫𑐵𑐳𑐸𑐎𑐵 𑐖𑑂𑐫𑐵𑐮𑐵 𑑋 𑐎𑐩𑐶𑐖𑐫𑐵 𑐣𑑂𑐴𑐫𑑂𑐩𑑂𑐰𑑅, 𑐳𑑂𑐰𑐬𑑂𑐎𑐵 𑐠𑑂𑐫𑑄𑐧𑐮𑐫𑑂 𑐟𑐳𑐎𑑄 𑐠𑐶𑐎𑐾 𑐢𑐵𑐮 𑑋 𑐰𑐳𑑅 𑐳𑐸𑐫𑐵𑑅 𑐂𑐳𑑂𑐟𑑂𑐬𑐷 𑐟𑐫𑐾𑐩𑐵𑐮 𑑋 𑐄𑐎𑐶𑑄 𑐐𑑂𑐰𑐵𑐬𑐵 𑐎𑐳𑑅𑐬𑐷𑐂 𑐴𑑂𑐫𑑄𑐐𑑂𑐰𑐵𑑅 𑐟𑐫𑐵𑑅 𑐎𑑂𑐰𑐵𑐎𑐾𑐐𑐸𑑋 𑐄𑐎𑐶𑑄 𑐂𑐳𑑂𑐟𑑂𑐬𑐷 𑐟𑐫𑐾𑐐𑐸 𑑋

𑐄𑐐𑐸 𑐃 𑐣𑑂𑐴𑐶𑑄 𑐏𑐵𑐣𑐵𑑅 𑐣𑑂𑐴𑐶𑑄 𑐣𑐫𑐾𑐩𑐵𑑅𑐐𑐸𑑋 𑐩𑐵𑐖𑐸 𑐣𑑂𑐴𑐶𑑄𑐣𑑂𑐴𑐶𑑄 𑐥𑐳𑑅 𑐰𑐣𑐷 𑑋 𑐣𑑂𑐴𑐶𑐫𑐵𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐣𑑂𑐫𑐵𑐣𑐵 𑐴𑐂𑐐𑐸𑑋 𑐕𑐩𑑂𑐰𑑅𑐫𑐵 𑐗𑐶𑐎𑐮𑐾 𑐳𑐶𑑃 𑐧𑐶𑐄𑑋 𑐕𑐩𑐣𑐵 𑐖𑐵𑐎𑐶𑐫𑐵 𑐕𑐩𑑂𑐰𑑅 𑐟𑐹 𑑋 𑐖𑐶𑑄 𑐖𑑂𑐫𑐵 𑐫𑐵𑐣𑐵𑑅 𑐨𑐔𑐵 𑐨𑐔𑐵 𑐢𑑂𑐫𑐾𑐧𑐵 𑐩𑐸𑐣𑐾𑐐𑐸 𑐫𑐵𑐣𑐵 𑑋 𑐖𑐶𑑄 𑐕𑐳𑐸𑐎𑐵, 𑐕𑐩𑑂𑐰𑑅 𑐫𑐵𑐫𑐵𑑄 𑐁𑐱𑐵𑐎𑐵𑐖𑐷 𑐟𑑅𑐧𑐵𑑅𑐫𑐵𑐟 𑐧𑐷𑐐𑐸𑑋 𑐖𑐶𑐐𑐸 𑐢𑑂𑐫𑐧𑐵 𑐟𑑅𑐧𑐵𑑅𑐣𑑄 𑐩𑐸𑐣𑐵 𑐟𑐂 𑑋 𑐣𑑂𑐫𑐫𑑂𑐟𑐎𑐵 𑐡𑐵𑑄 𑐡𑐫𑐾𑐰𑑄 𑐡𑐫𑐾𑐰𑑄 𑐖𑐶𑐟𑑅 𑐮𑐸𑑃 𑐣𑑂𑐫𑐵𑐣𑐵 𑐧𑐷 𑑋 𑐠𑐠𑐾 𑐫𑐵𑐣𑐵𑑅 𑐖𑐶𑑄 𑐮𑐸𑑃 𑐣𑑂𑐫𑐵𑐣𑐵 𑐟𑐫𑐵 𑑋 𑐮𑐶𑐥𑐵 𑐡𑐬𑐵𑐨𑐟𑑄 𑐕𑐾𑑃 𑐡𑐣𑐾 𑐩𑐵𑐮 𑐢𑐵𑐮 𑑋 𑐖𑐶𑑄 𑐠𑑅𑐎𑐾 𑐡𑐸𑐐𑐸 𑐮𑐸𑑃 𑐧𑐶𑐫𑐵 𑑋 𑐕𑐾𑑃 𑐡𑐣𑐾𑐟 𑐐𑑂𑐰𑐵𑐴𑐵𑐮𑐶 𑐖𑐸𑐮 𑑋

𑐡𑐬𑐵𑐨𑐟𑑄 𑐖𑐶𑐟𑑅 𑐟𑐳𑐎𑑄 𑐩𑐵𑐫𑐵 𑐫𑐵𑑅 𑑋 𑐠𑑅𑐕𑐾𑑃𑐫𑑂 𑐰𑐣𑐾 𑐟𑑂𑐫𑐮𑐎𑐶 𑐳𑑃 𑐕𑑂𑐫𑑄𑐎𑐷 𑑋 𑐣𑐵𑐥𑑄 𑐮𑑂𑐴𑐵𑑅 𑐖𑑂𑐰𑐣𑐵𑑅 𑐕𑐾𑑃𑐫𑑂 𑐟𑐎 𑐟𑐫𑐾 𑐫𑑄𑐎𑐷 𑑋 𑐡𑐬𑐵𑐨𑐟𑑄 𑐴𑐾 𑐖𑐶𑑄 𑐫𑐵𑐬𑑂𑐮𑐶𑐧 𑐣𑑄 𑐡𑐫𑐾𑐎𑐵𑐧𑐶𑐮 𑑋 𑐕𑐣𑑂𑐴𑐸 𑐖𑐶 𑐠𑑅 𑐴𑐾 𑐰𑐣𑐾 𑐳𑐮 𑐖𑐸𑐂 𑐢𑐎𑐵𑑅 𑐫𑐵𑐎𑑅𑐔𑐵 𑐕𑑂𑐰𑐫𑐵 𑐧𑐶𑐄𑐐𑐸𑑋 𑐖𑐶 𑐮𑐵 𑐐𑐣 𑐮𑐵𑐟 𑐐𑐣𑑋 𑐢𑐵𑐫𑐾 𑐴𑐾 𑐩𑐦𑐸 𑑋 𑐮𑐶𑐥𑐵 𑐖𑐶𑐟𑑅 𑐩𑐵𑑅𑐩𑐵𑑅 𑐖𑐸𑐂 𑐩𑐵𑐮 𑑋

𑐕𑐣𑑂𑐴𑐸 𑐖𑐶 𑐕𑐾𑑃𑐫𑑂 𑐣𑑄 𑐮𑐶𑐴𑐵𑑄 𑐰𑐫𑐵𑐔𑑂𑐰𑐣𑐵𑐐𑐸𑑋 𑐮𑑃𑐥𑐸 𑐗𑐶𑐗𑐵𑑄𑐩𑐶𑐗𑐵𑑄 𑐡𑑄 𑑋 𑐮𑐵𑐖𑐶𑐩𑑂𑐥𑐵𑐚𑐥𑐵𑐏𑐾 𑐟𑐩𑐵𑐐𑐸 𑐰𑑄𑐐𑐮𑐳𑐶𑐩𑐵 𑐡𑐸𑑋 𑐧𑐴𑐣𑐶 𑐏𑐶𑐄𑑃𑐳𑐾 𑐔𑑂𑐰𑐣𑐾𑐢𑐸𑑄𑐎𑐮 𑑋 𑐄𑐐𑐸 𑐳𑐶𑐩𑐵𑐥𑐵𑐏𑐾 𑐨𑐎𑐸𑑄𑐐𑑂𑐰𑐵𑐬𑐵 𑐕𑐐𑑅 𑐕𑐎𑑂𑐰𑑅 𑐄𑐏𑐾 𑐕𑐎𑑂𑐰𑑅 𑐠𑐸𑐏𑐾 𑐠𑑂𑐰𑐵𑐣𑐵𑐔𑑂𑐰𑐣𑑋 𑐩𑐣𑐹 𑐏𑐣𑐾𑐩𑐡𑐸𑑋 𑐨𑐎𑐸𑑄𑐐𑑂𑐰𑐵𑐬𑐵 𑐖𑐎 𑐄𑐏𑐾𑑄𑐠𑐸𑐏𑐾𑑄 𑐰𑐣𑐵𑐔𑑂𑐰𑐣𑑋 𑐖𑐶 𑐟𑐳𑐎𑑄 𑐐𑑂𑐫𑐵𑐟𑑋 𑐐𑑂𑐫𑐵𑐐𑑂𑐫𑐵𑑄 𑐕𑐾𑑃𑐫𑑂 𑐠𑑂𑐫𑑄𑐎𑐵 𑑋 𑐕𑐾𑑃𑐫𑑂 𑐠𑑂𑐫𑐣𑐾𑐰𑑄 𑐏𑑃 𑐎𑐣𑐵 𑑋 𑐳𑐎𑐳𑐶𑐣𑑄 𑐨𑐎𑐸𑑄𑐐𑑂𑐰𑐵𑐬𑐵 𑐏𑑂𑐫𑐵𑑅 𑐰𑑅𑐐𑐸 𑐢𑐵𑐮 𑑋 𑐖𑐶𑐩𑐶 𑐩𑐶𑐖𑑄 𑐁𑐏𑑅 𑐳𑑅 𑑋 𑐄𑐎𑐶𑑄 𑐳𑐩𑐗𑐡𑐵𑐬 𑐖𑐹 𑑋 𑐖𑐶𑐟𑑅 𑐣𑑄 𑐁𑐏𑑅 𑐧𑑂𑐰𑑄𑐎𑐾𑐟 𑐳𑑂𑐰𑑅𑐐𑐸 𑐏𑑅 𑑋 𑐖𑐶𑑄 𑐁𑐏𑑅 𑐧𑑂𑐰𑑄𑐐𑐸 𑐏𑐣𑐾𑐰𑑄 𑐩𑐵𑐖𑐸𑑄 𑐧𑑂𑐰𑑅𑐧𑐶𑐮 𑑋 𑐁𑐏𑑅 𑐧𑑂𑐰𑐣𑐾𑐐𑐸 𑐖𑑂𑐰𑐮𑑄 𑐰𑐵𑑄𑐕𑑂𑐰𑐫𑐵 𑐧𑐶𑐮 𑑋 ‘𑐕𑐸 𑐧𑐾𑐱𑑂𑐫𑐵 𑐖𑐸𑐂𑐟 𑐁𑐏𑑅 𑐧𑑂𑐰𑐣𑐾𑐐𑐸 𑐮𑐵?’ 𑐢𑐎𑐵𑑅 𑐧𑑂𑐰𑑅𑐧𑐶𑐮 𑑋 𑐀𑐣𑑄𑐮𑐶𑐥𑐵 𑐩𑐧𑑂𑐰𑐣𑐵 𑑋 𑐮𑐶𑐥𑐵 𑐮𑐵 𑐕𑐾𑑃𑐖𑑂𑐫𑐵𑑄 𑐴𑐾 𑐠𑐶𑐎𑑂𑐎 𑐖𑐸𑐮 𑑋 𑐣𑑂𑐴𑐵𑐥𑐵 𑐖𑐵𑐟𑑂𑐬𑐵 𑐰𑐮 𑐎𑐶 𑐟𑐳𑐎𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄 𑑋 𑐖𑐶 𑐑𑑀𑐜𑐵𑐖𑐵𑐟𑑂𑐬𑐵 𑐖𑐸𑐮 𑐎𑐶 𑐳𑐶𑐩𑐵𑐫𑑂 𑐐𑐫𑐵𑑅 𑐳𑑂𑐰𑑅𑐰𑐣𑐾𑐐𑐸𑑋 𑐕𑐣𑑂𑐴𑐸 𑐖𑐶 𑐳𑐶𑐩𑐵𑑄 𑐎𑐸𑐟𑐸𑑄𑐰𑐮, 𑐀𑐣𑑄𑐮𑐶𑐥𑐵 𑐖𑐵𑐟𑑂𑐬𑐵 𑐳𑑂𑐰𑑅𑐰𑐣𑐾𑐐𑐸 𑐴𑐾 𑐟𑑂𑐰𑑅𑐟𑐵 𑑋

𑐣𑑂𑐴𑑂𑐫𑐧𑑂𑐰𑑅𑐩𑑂𑐴 : 𑐳𑐸𑐣𑐶𑐟𑐵 𑐩𑐵𑐣𑐣𑑂𑐢𑐬

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS