Read news in NepalBhasa text-- www.hamroschool.com BACK 𑐠𑑁𑑄 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵, 𑐁𑐱𑐶𑐲𑑂𑐩𑐵 𑐎𑐷𑐬𑑂𑐟𑐶𑐮𑐎𑑂𑐲𑑂𑐩𑐷 𑐖𑐸𑐫𑐵 𑐩𑑂𑐴𑐶𑐟𑐷𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐠𑑁𑑄 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵, 𑐁𑐱𑐶𑐲𑑂𑐩𑐵 𑐎𑐷𑐬𑑂𑐟𑐶𑐮𑐎𑑂𑐲𑑂𑐩𑐷 𑐖𑐸𑐫𑐵 𑐩𑑂𑐴𑐶𑐟𑐷𑐐𑐸

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐐𑑂𑐰𑐳𑐵𑐮𑐫𑑂 𑐣𑐾. 𑐳𑑄. 𑑑𑑑𑑔𑑐 𑐡𑐶𑐮𑑂𑐮𑐵𑐠𑑂𑐰 𑐡𑐱𑐩𑐶 , 𑐀𑐳𑐵𑐬 𑑑𑑖 𑐐𑐟𑐾 𑐠𑑁𑑄 𑐕𑐐𑐹 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐧𑑂𑐰𑐖𑑂𑐫𑐵𑐫𑑂  𑐣𑑂𑐴𑑂𑐫𑐧𑑂𑐰𑐂𑐐𑐸 𑐕𑐥𑐸 𑐥𑑂𑐫𑐵𑐏𑐣𑐫𑑂 𑐣𑐾𑐰𑐵𑑅 𑐳𑑄𑐎𑐶𑐥𑐵𑐫𑐵 𑐮𑑀𑐎𑑄𑐴𑑂𑐰𑐵𑐩𑑂𑐴 𑐴𑐶𑐬𑑀𑐂𑐣 𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑑄 𑐋𑐟𑐶𑐴𑐵𑐳𑐶𑐎 𑐥𑐵𑐟𑑂𑐬 𑐎𑐷𑐬𑑂𑐟𑐶𑐮𑐎𑑂𑐲𑑂𑐩𑐷 𑐖𑐸𑐫𑐵𑑅 𑐩𑑂𑐴𑐶𑐟𑐾𑐟𑑂𑐫𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐳𑐡𑐳𑑂𑐫 𑐳𑐔𑐶𑐰  𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐩𑐮𑑂𑐮 𑐎𑐾 𑐳𑐸𑐣𑑂𑐡𑐬𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐎𑐠𑑄 𑐠𑐸𑐐𑐸𑐳𑐷 𑐠𑑂𑐰 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵𑐖𑐎 𑐩𑐖𑐸𑐳𑐾 𑐎𑐵𑐳𑐵𑐫𑑂 𑐴𑐾 𑐎𑐠𑑄 𑐖𑐸𑐂𑐩𑐵𑑅𑐐𑐸 𑐏𑑅𑐳𑐵𑑄 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐞𑐫𑐵 𑐐𑑂𑐫𑐵𑐔𑐶𑐎𑐸 𑐰 𑐮𑐎𑐜𑐵𑐄𑐣𑐫𑐵 𑐎𑐵𑐬𑐞𑑄 𑐫𑐵𑐣𑐵 𑐠𑐠𑐾 𑐮𑐶𑐎𑐸𑐣𑐾 𑐩𑐵𑐮𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑐳𑐵𑑅 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐜𑐾𑐩𑐷𑐫𑐵 𑐐𑑂𑐰𑐳𑐵𑐮𑐫𑑂 𑐖𑐸𑐂𑐟𑑂𑐫𑑄𑐐𑐸 𑐠𑑂𑐰 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵 𑐟𑐵𑐮𑐵𑐎𑐾𑐟 𑐊𑐎𑐾𑐜𑐾𑐩𑐷𑐫𑐵 𑐥𑑂𑐬𑐵𑐖𑑂𑐘 𑐡𑐸𑐖𑑅 𑐧𑐷𑐬𑐥𑑂𑐬𑐳𑐵𑐡 𑐨𑐣𑑂𑐳𑐵𑐬𑐷𑐫𑐵 𑐎𑐖𑐶𑐳𑐸𑐂 𑐕𑐐𑐹 𑐥𑐸𑐔𑑅 𑐣𑐶𑐳𑑂𑐰𑐣𑐵 𑐟𑑅𑐐𑐸 𑐡𑐸 𑑋

𑐧𑑂𑐰𑐖𑑂𑐫𑐵  𑐥𑐸𑐔𑑅𑐫𑐵 𑐡𑐸𑐖𑑅 𑐰𑐶𑐖𑐫𑐬𑐟𑑂𑐣 𑐀𑐳𑑄𑐧𑐬𑐾𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐎𑐠𑑄 𑐠𑑂𑐰 𑐂𑐮𑐫𑑂 𑐏𑐣𑐾𑐡𑐫𑐵 𑐔𑑂𑐰𑑄𑐐𑐸 𑐰𑐶𑐲𑐩 𑐥𑐬𑐶𑐳𑑂𑐠𑐶𑐟𑐶𑐂 𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵𑐫𑐵𑐟 𑐐𑐸𑐮𑐶 𑐟𑑅𑐖𑐶𑐎𑑂𑐎 𑐫𑐵𑐫𑐾𑐩𑐵𑑅𑐐𑐸 𑐏𑑅 𑐄𑐮𑐶 𑐟𑑅𑐖𑐶𑐎 𑐫𑐵𑐫𑐾𑐩𑐏𑑄𑐳𑐵 𑐠𑑁𑑄𑐫𑐵 𑐥𑑂𑐬𑐰𑐶𑐢𑐷𑐫𑐵 𑐮𑐶𑐢𑑄𑐳𑐵 𑐎𑐫𑐵 𑐠𑑂𑐰 𑐧𑑂𑐰𑐖𑑂𑐫𑐵 𑐣𑐾𑐥𑐵𑑅 𑐔𑑂𑐫𑐵𑐣𑐮 𑐜𑐶𑐳 𑐴𑑀𑐩𑐥𑐵𑐏𑐾𑑄 𑐚𑐾𑐮𑐶𑐨𑐶𑐖𑐣 𑐮𑐵𑐂𑐨 𑐥𑑂𑐬𑐳𑐵𑐬𑐞 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐠𑑂𑐰 𑐧𑑂𑐰𑐖𑑂𑐫𑐵 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐵𑐴𑐶𑐟𑑂𑐫 𑐧𑐶𑐎𑐵𑐳 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶𑐂 𑐖𑐸𑐂𑐟𑑂𑐫𑑄𑐐𑐸 𑐏𑑅𑐳𑐵 𑐧𑑂𑐰𑐖𑑂𑐫𑐵 𑐎𑐷𑐥𑐸𑐫𑐵 𑐬𑐵𑐬𑐵𑐴𑐶𑐮 𑐳𑑂𑐎𑐸𑐮𑐫𑐵 𑐣𑐵𑐚𑐎 𑐑𑐬𑐥𑐵𑐏𑐾𑑄 𑐮𑐵𑐂𑐨 𑐎𑑂𑐫𑐣𑐶𑐐𑐸 𑐐𑑂𑐰𑐳𑐵𑑅 𑐡𑐸 𑑋

𑐕𑐢𑐵 𑐥𑑂𑐫𑐵𑐏𑑄 𑐧𑑂𑐰𑐖𑑂𑐫𑐵𑐫𑑂 𑐣𑑂𑐴𑑂𑐫𑐧𑑂𑐰𑐂𑐐𑐸 𑐥𑑂𑐫𑐵𑐏𑐣𑐫𑑂 𑐬𑐵𑐩𑐎𑐺𑐲𑑂𑐞 𑐏𑐜𑐐𑐷𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶 𑐔𑑂𑐰𑐫𑐵𑐡𑐷𑐐𑐸 “𑐎𑐷𑐬𑑂𑐟𑐶𑐮𑐎𑑂𑐲𑑂𑐩𑐷”𑐂  𑐁𑐱𑐶𑐲𑑂𑐩𑐵 𑐣𑐎𑑅𑐩𑐶𑑄 𑐋𑐟𑐶𑐴𑐵𑐳𑐶𑐎 𑐥𑐵𑐟𑑂𑐬 𑐎𑐷𑐬𑑂𑐟𑐶𑐮𑐎𑑂𑐲𑑂𑐩𑐷 𑐖𑐸𑐫𑐵 𑐩𑑂𑐴𑐶𑐟𑐾𑐟𑑂𑐫𑑄𑐐𑐸 𑐡𑐸𑐳𑐵 𑐠𑐸𑐎𑐾 𑐬𑐵𑐩𑐎𑐺𑐲𑑂𑐞 𑐏𑐜𑑂𑐐𑐷, 𑐎𑐺𑐲𑑂𑐞𑐨𑐎𑑂𑐟 𑐩𑐴𑐬𑑂𑐖𑐣 𑐰 𑐄𑐖𑐫 𑐱𑐵𑐴𑐷𑐫𑐵 𑐨𑐸𑐩𑐶𑐎𑐵 𑐡𑐂 𑑋

𑐣𑐵𑑄𑐖𑐵𑐩𑑂𑐴 𑐳𑑄𑐎𑐶𑐥𑐵𑐎𑑅𑐩𑐶 𑐳𑐸𑐬𑐾𑐣𑑂𑐡𑑂𑐬 𑐟𑐸𑐮𑐵𑐢𑐬𑐫𑐵 𑐔𑑂𑐰𑐳𑐵 𑐰 𑐣𑐶𑐬𑑂𑐡𑐾𑐱𑐣 𑐡𑐸𑐐𑐸  “𑐜𑐵 𑐎𑐵𑐣𑑂𑐕𑐵𑐨𑐵𑐂” 𑐥𑑂𑐫𑐵𑐏𑐣𑐫𑑂 𑐬𑐣𑑂𑐖𑐣𑐵 𑐳𑐶𑐟𑐶𑐏𑐸, 𑐬𑐵𑐩𑐬𑐵𑐖𑐵 𑐨𑐵𑐩, 𑐬𑑀𑐴𑐣 𑐥𑑂𑐬𑐖𑐵𑐥𑐟𑐶, 𑐀𑐣𑑂𑐣𑐥𑐹𑐬𑑂𑐞 𑐡𑐬𑑂𑐱𑐣𑐢𑐵𑐬𑐶 𑐀𑐮𑐾 𑐣𑐵𑑄𑐖𑐵𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐱𑐱𑐷𑐎𑐮𑐵 𑐩𑐵𑐣𑐣𑑂𑐢𑐬𑑄 𑐔𑑂𑐰𑐫𑐵𑐡𑐷𑐐𑐸 𑐀𑐮𑐾 𑐣𑐵𑑄𑐖𑐵𑐩𑑂𑐴 𑐳𑑄𑐎𑐶𑐥𑐵𑐎𑑅𑐩𑐶 𑐁𑐬𑑂𑐫𑐩 𑐣𑐎𑑅𑐩𑐶𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 “𑐔𑐣𑑂𑐡𑑂𑐬𑐴𑐵𑐬”   𑐥𑑂𑐫𑐵𑐏𑐣𑐫𑑂 𑐣𑐐𑐶𑐣𑐵 𑐖𑑀𑐱𑐷, 𑐳𑐸𑐬𑐖 𑐰𑑂𑐫𑐣𑑂𑐖𑐣𑐎𑐵𑐬, 𑐬𑐸𑐥𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐬𑑀𑐖𑐶𑐣𑐵 𑐳𑐸𑐰𑐵𑐮, 𑐀𑐣𑑂𑐣𑐥𑐸𑐬𑑂𑐣𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛, 𑐳𑐬𑐳𑑂𑐰𑐟𑐶 𑐩𑐵𑐣𑐣𑑂𑐢𑐬 𑐡𑐸𑐠𑑂𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸𑐳𑐵𑑅 𑐠𑑂𑐰 𑐧𑑂𑐰𑐖𑑂𑐫𑐵𑐫𑑂 𑐬𑐵𑐖𑐾𑐱 𑐱𑐵𑐎𑑂𑐫𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 𑐬𑐒𑑂𑐐𑐎𑐬𑑂𑐩𑐶 𑐬𑐵𑐩𑐎𑐺𑐲𑑂𑐞 𑐢𑐶𑐣𑐵𑑄 𑐣𑑄 𑐔𑑂𑐰𑐫𑐵𑐡𑐷𑐐𑐸 “𑐠𑑂𑐰𑐥𑐸 𑐎𑐬𑑂𑐩”, 𑐳𑐣𑑂𑐔𑐵𑐬𑐎𑑅𑐩𑐶 𑐰 𑐬𑐒𑑂𑐐𑐎𑐬𑑂𑐩𑐶  𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶𑐫𑐵 𑐔𑑂𑐰𑐳𑐵 𑐰 𑐣𑐶𑐬𑑂𑐡𑐾𑐱𑐣𑐫𑑂 “𑐧𑐸𑑃𑐏𑑂𑐫𑐵𑑅𑐔𑐵” 𑐫𑑂  𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶, 𑐐𑐷𑐟𑐵 𑐥𑑂𑐬𑐖𑐵𑐥𑐟𑐶, 𑐖𑐸𑐣𑐸 𑐥𑑂𑐬𑐖𑐵𑐥𑐟𑐶, 𑐳𑐎𑐸𑐣𑑂𑐟𑐮𑐵 𑐩𑐴𑐬𑑂𑐖𑐣, 𑐳𑐶𑐟𑐵𑐬𑐵𑐩 𑐩𑐵𑐎𑑅, 𑐣𑐵𑑄𑐖𑐵𑐩𑑂𑐴 𑐎𑐮𑐵𑐎𑑅𑐩𑐶 𑐬𑐵𑐖𑐸 𑐳𑑂𑐫𑑅𑐳𑑂𑐫𑑅𑐫𑐵 𑐔𑑂𑐰𑐳𑐵 𑐰 𑐣𑐶𑐬𑑂𑐡𑐾𑐱𑐣𑐫𑑂 “𑐟𑐬𑐎𑐵𑐬𑐷 𑐧𑐣𑑂𑐖𑐵” 𑐥𑑂𑐫𑐵𑐏𑐣𑐫𑑂 𑐨𑐶𑐩𑐳𑐾𑐣 𑐬𑐶𑐳𑐵𑐮 𑐰 𑐳𑐸𑐬𑐾𑐱 𑐳𑑂𑐠𑐵𑐥𑐶𑐟 𑐀𑐮𑐾 𑐳𑐵𑐴𑐶𑐟𑑂𑐫𑐎𑐵𑐬 𑐰 𑐳𑐣𑑂𑐔𑐵𑐬𑐎𑑅𑐩𑐶 𑐩𑐷𑐣𑐵 𑐧𑐖𑑂𑐬𑐵𑐔𑐵𑐬𑑂𑐫𑐫𑐵 𑐔𑑂𑐰𑐳𑐵𑑅 𑐰 𑐰𑐬𑐶𑐲𑑂𑐛 𑐬𑐒𑑂𑐐𑐎𑐬𑑂𑐩𑐶 𑐰 𑐳𑑄𑐎𑐶𑐥𑐵𑐎𑑅𑐩𑐶 𑐥𑐰𑐣 𑐖𑑀𑐱𑐷𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 “𑐮𑐶𑐠𑐸”  𑐥𑑂𑐫𑐵𑐏𑐣𑐫𑑂 𑐱𑑀𑐨𑐵 𑐩𑐴𑐬𑑂𑐖𑐣,𑐀𑐣𑑂𑐣𑐸 𑐩𑐴𑐬𑑂𑐖𑐣, 𑐫𑐵𑐳𑐶𑐣𑐵 𑐩𑐴𑐬𑑂𑐖𑐣  𑐰 𑐔𑑂𑐰𑐩𑐶 𑐬𑐵𑐖𑐾𑐣𑑂𑐡𑑂𑐬𑐎𑐸𑐩𑐵𑐬 𑐥𑐸𑐟𑐵𑐫𑐵 𑐔𑑂𑐰𑐳𑐵𑐫𑑂 𑐬𑐰𑐶 𑐩𑐴𑐬𑑂𑐖𑐣𑐫𑐵 𑐣𑐶𑐬𑑂𑐡𑐾𑐱𑐣𑐫𑑂 “𑐠𑑁𑐎𑐣𑑂𑐴𑐾” 𑐣𑐵𑑄𑐫𑐵𑐐𑐸 𑐕𑐥𑐸 𑐕𑐢𑐵 𑐥𑑂𑐫𑐵𑐏𑑄 𑐡𑐸𑐠𑑂𑐫𑐵𑐣𑐵 𑐔𑑂𑐰𑑄𑐐𑐸 𑐡𑐸𑐳𑐵𑑅 𑐄𑐎𑐾   𑐥𑑂𑐫𑐵𑐏𑑄 𑐩𑑂𑐰𑑅 𑐎𑐠𑑄 𑐎𑐺𑐲𑑂𑐞 𑐩𑐴𑐬𑑂𑐖𑐣, 𑐰𑐶𑐣𑐶𑐟𑐵 𑐏𑐜𑑂𑐐𑐷, 𑐳𑐸𑐢𑐵 𑐩𑐴𑐬𑑂𑐖𑐣 , 𑐬𑑀𑐱𑐣 𑐱𑐵𑐎𑑂𑐫 𑐰 𑐬𑐖𑐶𑐣 𑐩𑐴𑐬𑑂𑐖𑐣𑑄 𑐧𑑂𑐰𑐟𑐶 𑐎𑐫𑐵 𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS