Read news in NepalBhasa text-- www.hamroschool.com BACK 𑐧𑐮𑐶𑐄𑐜 𑐀𑐨𑐶𑐣𑐾𑐟𑐵𑐫𑐵 𑐁𑐟𑑂𑐩𑐴𑐟𑑂𑐫𑐵𑑄 𑐮𑑂𑐴𑑂𑐰𑑄𑐐𑐸 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫𑐫𑐵 𑐧𑐴𑐳 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐮𑐶𑐄𑐜 𑐀𑐨𑐶𑐣𑐾𑐟𑐵𑐫𑐵 𑐁𑐟𑑂𑐩𑐴𑐟𑑂𑐫𑐵𑑄 𑐮𑑂𑐴𑑂𑐰𑑄𑐐𑐸 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫𑐫𑐵 𑐧𑐴𑐳

𑐧𑐷𑐧𑐷𑐳𑐷 – 𑐧𑐮𑐶𑐄𑐜 𑐀𑐨𑐶𑐣𑐾𑐟𑐵 𑐳𑐸𑐱𑐵𑐣𑑂𑐟 𑐳𑐶𑑄𑐴 𑐬𑐵𑐖𑐥𑐸𑐟𑑄 𑐁𑐂𑐟𑐰𑐵𑑅 𑐁𑐟𑑂𑐩𑐴𑐟𑑂𑐫𑐵 𑐫𑐵𑐫𑐾𑐰𑑄 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫𑐫𑐵 𑐧𑐵𑐬𑐾 𑐧𑐴𑐳 𑐳𑐸𑐬𑐸 𑐖𑐹𑐐𑐸 𑐡𑐸 𑑋 𑑓𑑔𑐡𑑃𑐫𑐵 𑐀𑐨𑐶𑐣𑐾𑐟𑐵 𑐁𑐂𑐟𑐰𑐵𑑅 𑐩𑐸𑐩𑑂𑐧𑐃𑐫𑐵 𑐠𑑅𑐐𑐸 𑐕𑐾𑑃𑐫𑑂 𑐳𑐶𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐮𑐹𑐐𑐸 𑐏𑑅 𑑋 𑐑𑐚𑐣𑐵𑐫𑐵𑐟 𑐥𑑂𑐬𑐴𑐬𑐷𑑄 𑐁𑐟𑑂𑐩𑐴𑐟𑑂𑐫𑐵 𑐖𑐸𑐂𑐦𑐸𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋

𑐑𑐚𑐣𑐵 𑐮𑐶𑐥𑐵 𑐀𑐨𑐶𑐣𑐾𑐟𑐵𑐫𑐵 𑐦𑑂𑐫𑐵𑐣 𑐰 𑐧𑐮𑐶𑐄𑐜𑐎𑐬𑑂𑐩𑐷𑐟𑐫𑑂𑐳𑑄 𑐡𑐸𑑅𑐏 𑐥𑑂𑐰𑑄𑐎𑐵𑑅 𑐣𑑂𑐴𑑂𑐫𑐵𑑅𑐐𑐸 𑐧𑐴𑐳 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫𑐫𑐵𑐥𑐵𑐏𑐾 𑐴𑐶𑐮𑐵𑐰𑑄𑐐𑐸 𑐡𑐸 𑑋

𑐜𑐶𑐥𑑂𑐬𑐾𑐳𑐣𑐫𑐵 𑐰𑐶𑐬𑐸𑐡𑑂𑐢 𑐮𑑂𑐰𑐫𑐾𑐩𑐵𑑅 𑐢𑐎𑐵𑑅 𑐏𑐸𑐮𑑂𑐮𑐵 𑐬𑐸𑐥𑑄 𑐢𑐫𑐵𑐔𑑂𑐰𑐩𑑂𑐴 𑐧𑐮𑐶𑐄𑐜 𑐀𑐨𑐶𑐣𑐾𑐟𑐺 𑐡𑐶𑐥𑐶𑐎𑐵 𑐥𑐵𑐜𑐸𑐎𑑀𑐞𑑄 𑐠𑐸𑐎𑐷𑐫𑐵 𑐧𑐵𑐬𑐾 𑐳𑐬𑑀𑐎𑐵𑐬 𑐎𑑂𑐫𑐣𑐾𑐩𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

‘𑐏𑑃𑐮𑑂𑐴𑐵𑐧𑑄𑐮𑐵 𑐫𑐵𑐣𑐵𑐡𑐶𑐳𑑄, 𑐀𑐨𑐶𑐰𑑂𑐫𑐎𑑂𑐟 𑐫𑐵𑐣𑐵𑐡𑐶𑐳𑑄, 𑐐𑑂𑐰𑐵𑐴𑐵𑐮𑐶𑐫𑐵 𑐣𑐶𑑄𑐟𑐶𑑄 𑐢𑐫𑐵𑐡𑐶𑐳𑑄’ 𑐥𑐵𑐜𑐸𑐎𑑀𑐞𑑄 𑐠𑑅𑐐𑐸 𑐂𑐣𑑂𑐳𑑂𑐚𑐵𑐐𑑂𑐬𑐵𑐩𑐫𑑂 𑐔𑑂𑐰𑐫𑐵𑐡𑐷, ‘𑐮𑐸𑐩𑑄𑐎𑐵𑐡𑐶𑐳𑑄, 𑐕𑐶 𑐫𑐵𑐎𑐔𑐵 𑐩𑐏𑐸 𑑋 𑐗𑐷𑐥𑐶𑑄 𑐦𑐸𑐎𑑂𑐎𑑄 𑐠𑐸𑐎𑐷 𑐣𑐵𑐥𑑄 𑐡𑐸 𑑋 𑐀𑐮𑐾 𑐡𑐎𑐮𑐫𑑂 𑐩𑐴𑐟𑑂𑐰𑐥𑐹𑐬𑑂𑐞, 𑐀𑐣 𑐁𑐱𑐵 𑐡𑐸 𑑋’

𑐳𑐸𑐱𑐵𑐣𑑂𑐟 𑐳𑐶𑑄𑐴 𑐬𑐵𑐖𑐥𑐸𑐟𑐣𑐵𑐥 ‘𑐥𑐶𑐎𑐾’ 𑐳𑑄𑐎𑐶𑐥𑐵𑐫𑑂 𑐩𑑂𑐴𑐶𑐟𑐸𑐩𑑂𑐴 𑐀𑐨𑐶𑐣𑐾𑐟𑐺 𑐀𑐣𑐸𑐱𑑂𑐎𑐵 𑐱𑐬𑑂𑐩𑐵𑑄 𑐔𑑂𑐰𑐫𑐵𑐡𑐷, ‘𑐖𑐶 𑐟𑐳𑐎𑑄 𑐡𑐸𑑅𑐏𑐷 𑐰 𑐄𑐡𑐵𑐳 𑐖𑐸𑐫𑐵𑐔𑑂𑐰𑐣𑐵 𑐕𑐵𑐫𑑂 𑐢𑐵𑑅𑐳𑐵 𑐗𑐷 𑐠𑐖𑑂𑐫𑐵𑑅𑐐𑐸 𑐮𑐎𑐳𑐫𑑂 𑐩𑑂𑐰𑐵𑐣𑐵𑐔𑑂𑐰𑐣𑐵 𑐐𑐸𑐎𑐷𑑄 𑐗𑐷𑐎𑐾 𑐡𑐫𑐵𑐔𑑂𑐰𑑄𑐐𑐸 𑐕𑐸𑑄 𑐣𑑄 𑐳𑐩𑐳𑑂𑐫𑐵𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋’

𑐨𑐵𑐬𑐟𑐷𑐫 𑐳𑐩𑐵𑐖𑐫𑑂 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫 𑐳𑐩𑐳𑑂𑐫𑐵𑐫𑐵 𑐧𑐵𑐬𑐾 𑐐𑐟𑐮 𑐧𑐸𑐗𑐵𑐃𑐫𑐵 𑐎𑐵𑐬𑐞𑑄 𑐠𑐸𑐎𑐷𑐫𑐵 𑐧𑐵𑐬𑐾 𑐏𑑃𑐮𑑂𑐴𑐵𑐫𑑂 𑐟𑐳𑐎𑑄 𑐠𑐵𑐎𑐹𑐐𑐸 𑐏𑑃 𑐩𑐾𑐥𑐶𑑄 𑐁𑐥𑐮𑑄 𑐩𑐣𑐹𑐟𑐫𑑂𑐳𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

‘𑐨𑐵𑐬𑐟𑐫𑑂 𑐩𑐵𑐣𑐶𑐳𑐎 𑐳𑐩𑐳𑑂𑐫𑐵 𑐧𑐵𑐬𑐾𑐫𑐵 𑐧𑐴𑐳 𑐐𑐣 𑐠𑑂𑐫𑐣𑐾𑐩𑐵𑑅𑐐𑐸 𑐏𑑅 𑐰𑐳𑑂𑐰𑐫𑐵𑑄 𑐎𑑀𑐱𑑁𑑄 𑐡𑐹𑐬𑐷 𑐟𑐵𑐥𑐵 𑑋 𑐠𑑁𑑄 𑐳𑐸𑐱𑐵𑐣𑑂𑐟 𑐳𑐷𑐐𑐸 𑐧𑐵𑐬𑐾 𑐡𑐸𑑅𑐏 𑐥𑑂𑐫𑑄𑐎𑐵𑐔𑑂𑐰𑑄𑐥𑐶𑑄 𑐎𑐫𑑁𑑄 𑐎𑐣𑑂𑐴𑐫𑑂 𑐠𑑅𑐥𑐶𑑄𑐳𑑄 𑐩𑑂𑐴𑐳𑐶𑐄𑐥𑐶𑑄 𑐳𑐸𑑄 𑐀𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐰𑐣 𑐢𑐵𑑅𑐳𑐵 𑐄𑐩𑐶𑐐𑐸 𑐴𑐾 𑐧𑐵𑑄𑐩𑐮𑐵𑐐𑐸 𑐏𑑃𑐮𑑂𑐴𑐵𑐣𑐵𑐔𑑂𑐰𑐣𑐷 𑑋,’ 𑐡 𑐂𑐣𑑂𑐜𑐶𑐫𑐣 𑐂𑐎𑑂𑐳𑐥𑑂𑐬𑐾𑐱𑐫𑐵 𑐳𑐴𑐬 𑐳𑐩𑑂𑐥𑐵𑐡𑐎 𑐬𑐵𑐴𑐸𑐮 𑐳𑐨𑐬𑐰𑐵𑐮𑑄 𑐚𑑂𑐰𑐷𑐚 𑐫𑐵𑐣𑐵𑐡𑐷 𑑋

𑐩𑐾𑐩𑑂𑐴 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐥𑑂𑐬𑐫𑑀𑐎𑐬𑑂𑐟𑐵 𑐣𑐹𑐬𑐷𑐣 𑐰𑑀𑐖𑐬𑑄 𑐢𑐵𑐮, ‘𑐫𑐡𑐶 𑐄𑐡𑐵𑐳 𑐖𑐸𑐫𑐵𑐔𑑂𑐰𑑄𑐳𑐵 𑐠𑐸𑐎𑐷𑑄 𑐫𑐵𑐎𑐣 𑐥𑐶𑐴𑐵𑑄𑐰𑐵𑑅 𑐢𑐎𑐵 𑐴𑐵𑐮𑐵𑐖𑐎 𑐔𑑂𑐰𑐣𑐷𑐐𑐸 𑐩𑐵𑐣𑐳𑐶𑐎𑐟𑐵 𑐳𑑂𑐰𑐫𑐵𑑄 𑐨𑐵𑐬𑐟𑐫𑐵 𑐕𑐾𑑃𑐏𑐵 𑐕𑐾𑑃𑐏𑐵𑐫𑑂 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷𑐩𑐵𑑅 𑑋’

𑐀𑐠𑐾𑐏𑐳𑐵𑑄 𑐨𑐵𑐬𑐟𑐫𑐵 𑐩𑐵𑐣𑐳𑐶𑐎 𑐳𑑂𑐰𑐵𑐳𑑂𑐠𑑂𑐫 𑐎𑐵𑐣𑐹𑐣 𑐰 𑐣𑐷𑐟𑐶 𑐎𑐾𑐣𑑂𑐡𑑂𑐬𑐫𑐵 𑐣𑐶𑐬𑑂𑐡𑐾𑐱𑐎 𑐜𑐵. 𑐳𑑀𑐩𑐶𑐟𑑂𑐬𑐵 𑐥𑐵𑐠𑐬𑐾𑑄 𑐧𑐷𑐧𑐷𑐳𑐣𑐵𑐥 𑐏𑑃𑐮𑑂𑐴𑐵𑐧𑑄𑐮𑐵 𑐫𑐵𑐳𑐾𑑄 𑐄𑐡𑐵𑐱𑐷𑐣𑐟𑐵 𑐰 𑐁𑐟𑑂𑐩𑐴𑐟𑑂𑐫𑐵𑐫𑐵 𑐧𑐵𑐬𑐾 𑐏𑑃𑐮𑑂𑐴𑐵𑐫𑐾𑐐𑐸 𑐁𑐰𑐱𑑂𑐫𑐎 𑐖𑐹𑐳𑐵𑑄 𑐨𑐵𑐬𑐟 𑐠𑐖𑑂𑐫𑐵𑑅𑐐𑐸 𑐡𑐾𑐱𑐫𑑂 𑐣𑐶𑐐𑐹 𑐰𑐶𑐲𑐫 𑐮𑑂𑐰𑐵𑐎𑐕𑑂𑐫𑐵𑐫𑐾𑐩𑐖𑐶𑐄𑐐𑐸 𑐏𑑂𑐫𑐵𑐔𑑂𑐰𑑅 𑐧𑐶𑐫𑐵𑐡𑐷 𑑋

‘𑐀𑐣𑐸𑐳𑐣𑑂𑐢𑐵𑐣𑑄 𑐧𑐾𑐮𑐵𑐫𑐟 𑐰 𑐫𑐸𑐬𑑀𑐥𑐫𑑂 𑐜𑐶𑐥𑑂𑐬𑐾𑐱𑐣𑐫𑐵 𑐎𑐵𑐬𑐞𑑄 𑑘𑑐 𑐥𑑂𑐬𑐟𑐶𑐱𑐟 𑐁𑐟𑑂𑐩𑐴𑐟𑑂𑐫𑐵 𑐖𑐸𑐂𑐐𑐸 𑐫𑐵𑑅 𑑋 𑐟𑐬 𑐩𑐾𑐩𑐾𑐐𑐹 𑐁𑐥𑐮𑑄 𑐠𑐵𑐫𑑂 𑐖𑐳𑑂𑐟𑐿 𑐨𑐵𑐬𑐟𑐫𑑂 𑐁𑐟𑑂𑐩𑐴𑐟𑑂𑐫𑐵 𑐫𑐵𑐂𑐐𑐸 𑐩𑐾𑐐𑐹 𑐠𑐷𑐠𑐷 𑐎𑐵𑐬𑐞 𑐡𑐸 𑑋’ 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐠𑐣 𑐁𑐟𑑂𑐩𑐴𑐟𑑂𑐫𑐵 𑐫𑐵𑐂𑐥𑐶𑑄𑐣𑐶 𑐟𑐠𑑂𑐫𑐵𑐒𑐎 𑐟𑐳𑐎𑑄 𑐥𑐵𑑅 𑑋’

‘𑐖𑐳𑑂𑐟𑐿, 𑐮𑑂𑐫𑐵𑐳𑐾 𑐩𑐶𑐳𑐵𑐟 𑐳𑐷𑐐𑐸 𑐥𑑂𑐬𑐩𑐸𑐏 𑐎𑐵𑐬𑐞 𑐁𑐟𑑂𑐩𑐴𑐟𑑂𑐫𑐵 𑐏𑑅 𑑋 𑐐𑐸𑐮𑐶𑑄 𑐁𑐰𑐾𑐐𑐫𑑂 𑐰𑐫𑐵 𑐠𑑂𑐰 𑐖𑑂𑐫𑐵 𑐫𑐵𑐂𑐳𑐵 𑐑𑐬𑐾𑐮𑐸 𑐴𑐶𑐳𑐵𑑄 𑐩𑐾𑐐𑐹 𑐩𑐴𑐟𑑂𑐰𑐥𑐹𑐬𑑂𑐞 𑐥𑐎𑑂𑐲 𑐏𑑅 𑑋 𑐀𑐠𑐾𑐴𑐾, 𑑑𑑘𑐡𑑃 𑐳𑑂𑐰𑐫𑐵𑑄 𑐩𑑂𑐴𑑀 𑐄𑐩𑐾𑐬𑐫𑐵𑐥𑐶𑑄𑐟 𑐥𑐬𑐷𑐎𑑂𑐲𑐵𑐫𑐵 𑐟𑐣𑐵𑐰 𑐕𑐐𑐹 𑐥𑑂𑐬𑐩𑐸𑐏 𑐎𑐵𑐬𑐞 𑐏𑑅, 𑐀𑐠𑐾𑐮𑐵 𑐐𑑂𑐬𑐵𑐩𑐶𑐞 𑐨𑐵𑐬𑐟𑐫𑑂 𑐔𑑂𑐰𑑄𑐥𑐶𑑄 𑐎𑐶𑐳𑐵𑐣𑐟𑐫𑑂𑐳𑑄 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵𑐫𑐵 𑐎𑐵𑐬𑐞𑑄 𑐠𑑅𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋,’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐚𑐶𑐨𑐷 𑐰 𑐦𑐶𑐮𑑂𑐩 𑐣𑐶𑐐𑐹𑐮𑐶𑑄 𑐏𑑂𑐫𑐮𑐫𑑂 𑐫𑐵𑑅𑐐𑐸 𑐎𑐮𑐵𑐎𑐵𑐬𑐶𑐟𑐵𑐫𑐵 𑐣𑐶𑑄𑐟𑐶𑑄 𑐥𑑂𑐬𑐏𑑂𑐫𑐵𑐟 𑐬𑐵𑐖𑐥𑐸𑐟 𑐣𑐵𑑄𑐖𑐵𑑅𑐩𑑂𑐴 𑐎𑑂𑐬𑐶𑐎𑐾𑐚 𑐎𑐵𑐳𑐵𑐩𑐶𑐫𑐵 𑐖𑐷𑐰𑐣𑐷 𑐩𑑂𑐴𑐶𑐟𑐸𑐐𑐸 ‘𑐊𑐳𑐊𑐳 𑐢𑑀𑐣𑐷 : 𑐡 𑐀𑐣𑐚𑑀𑐮𑑂𑐜 𑐳𑑂𑐚𑑀𑐬𑐷’𑐫𑐵 𑐣𑐶𑑄𑐟𑐶𑑄 𑐩𑐣𑐹𑐟𑐫𑑂𑐳𑑄 𑐀𑐥𑑂𑐰 𑐩𑑂𑐴𑐳𑐶𑐄 𑑋

𑐬𑐵𑐖𑐥𑐸𑐟𑐫𑐵 𑐀𑐣𑑂𑐟𑐶𑐩 𑐳𑑄𑐳𑑂𑐎𑐵𑐬 𑐳𑑀𑐩𑐰𑐵𑑅 𑐖𑐸𑐂 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS