Read news in NepalBhasa text-- www.hamroschool.com BACK ‘𑐬𑐵𑐖𑑂𑐫𑐥𑐵𑐏𑐾𑑄 𑐄𑐥𑐮𑐧𑑂𑐢 𑐳𑐸𑐰𑐶𑐢𑐵 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐫𑐵𑐐𑐸 𑐣𑑄 𑐀𑐢𑐶𑐎𑐵𑐬 𑐏𑑅’ – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

‘𑐬𑐵𑐖𑑂𑐫𑐥𑐵𑐏𑐾𑑄 𑐄𑐥𑐮𑐧𑑂𑐢 𑐳𑐸𑐰𑐶𑐢𑐵 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐫𑐵𑐐𑐸 𑐣𑑄 𑐀𑐢𑐶𑐎𑐵𑐬 𑐏𑑅’

𑐫𑐾𑑃 – 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐣𑑂𑐴𑐹𑐐𑐸 𑐮𑐫𑑂𑐥𑑁 𑐥𑐶𑐡𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵𑑄 𑐠𑑁𑑄 𑐕𑐐𑐹 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 ‘𑐣𑐾𑐰𑐵𑑅 𑐖𑑅’ 𑐮𑐫𑑂𑐥𑑁 𑐰𑐶𑐩𑑀𑐔𑐣 𑐫𑐵𑑅𑐐𑐸 𑐡𑐸 𑑋 𑐥𑑂𑐬𑐟𑐶𑐣𑐶𑐢𑐶 𑐳𑐨𑐵 𑐰 𑐥𑑂𑐬𑐡𑐾𑐱 𑐳𑐨𑐵𑐫𑐵 𑐣𑐾𑐰𑐵𑑅 𑐳𑐵𑑄𑐳𑐡 𑐮𑐶𑐳𑐾𑑄 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐳𑐎𑑂𑐬𑐶𑐫 𑐰𑐬𑐶𑐲𑑂𑐛 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐥𑐶𑑄𑐳𑑄 𑐩𑑄𑐎𑐵𑑅 𑐎𑐠𑑄 ‘𑐣𑐾𑐰𑐵𑑅 𑐖𑑅’ 𑐮𑐫𑑂𑐥𑑁𑐫𑐵 𑐳𑐵𑐣𑐸𑐎𑐵𑐖𑐷 𑐰𑐶𑐱𑐾𑐲𑐵𑐒𑑂𑐎 𑐰𑐶𑐩𑑀𑐔𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐡𑐵𑑄𑐨𑐬𑐶𑑄 𑐩𑐡𑐸𑐩𑑂𑐴 𑐳𑐵𑐣𑐸𑐎𑐵𑐖𑐷 𑐩𑐴𑐬𑑂𑐖𑐣𑐫𑐵 𑐡𑐎𑐶𑐮𑐵𑐫𑑂 𑐮𑐵𑐎𑐵𑑅 𑐳𑐵𑐣𑐸𑐎𑐵𑐖𑐷 𑐰𑐶𑐱𑐾𑐲𑐵𑑄𑐎 𑐥𑐶𑐠𑑄𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐳𑐵𑑄𑐳𑐡 𑐎𑐺𑐲𑑂𑐞𑐐𑑀𑐥𑐵𑐮 𑐱𑑂𑐬𑐾𑐲𑑂𑐛𑑄 𑐬𑐵𑐖𑑂𑐫𑐥𑐵𑐏𑐾𑑄 𑐳𑑄𑐔𑐵𑐬 𑐎𑑂𑐲𑐾𑐟𑑂𑐬𑐫𑑂 𑐄𑐥𑐮𑐧𑑂𑐢 𑐳𑐸𑐰𑐶𑐢𑐵 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐥𑐶𑐣𑐶𑐐𑐸 𑐣𑑄 𑐀𑐢𑐶𑐎𑐵𑐬 𑐏𑑅 𑐢𑐫𑐵𑐡𑐷𑐐𑐸 𑐡𑐸 𑑋 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐥𑐶𑑄𑐳𑑄 𑐣𑑄 𑐬𑐵𑐖𑑂𑐫𑐥𑐵𑐏𑐾𑑄 𑐄𑐥𑐮𑐧𑑂𑐢 𑐳𑑂𑐰𑐵𑐳𑑂𑐠𑑂𑐫 𑐮𑐐𑐵𑐫𑐟𑐫𑐵 𑐠𑐷𑐠𑐷 𑐳𑐸𑐰𑐶𑐢𑐵 𑐠𑑅𑐐𑐸 𑐀𑐢𑐶𑐎𑐵𑐬 𑐎𑐠𑑄 𑐎𑐵𑐫𑐾𑐩𑐵𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮, ‘𑐰𑐶𑐱𑐾𑐲 𑐫𑐵𑐣𑐵𑑅 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐥𑐶𑑄𑐳𑑄 𑐳𑑂𑐰𑐵𑐳𑑂𑐠𑑂𑐫 𑐳𑐩𑑂𑐧𑐣𑑂𑐢𑐶 𑐳𑐩𑐳𑑂𑐫𑐵 𑐖𑐸𑐂𑐧𑐮𑐫𑑂 𑐬𑐵𑐖𑑂𑐫𑐥𑐵𑐏𑐾𑑄 𑐄𑐥𑐮𑐧𑑂𑐢 𑐳𑐸𑐰𑐶𑐢𑐵 𑐎𑐵𑐫𑐾𑐐𑐸𑐥𑐵𑐏𑐾 𑐢𑑂𑐫𑐵𑐣 𑐴𑐾 𑐩𑐧𑐶𑐄𑐐𑐸 𑐏𑐣𑐾𑐡𑐸 𑑋 𑐰 𑐳𑐸𑐰𑐶𑐢𑐵 𑐢𑐫𑐵𑐐𑐸 𑐮𑐵 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐟𑐫𑑂𑐐𑐸 𑐣𑑄 𑐀𑐢𑐶𑐎𑐵𑐬 𑐏𑑅 𑑋’

𑐰𑐬𑐶𑐲𑑂𑐛 𑐥𑐟𑑂𑐬𑐎𑐵𑐬 𑐥𑐸𑐲𑑂𑐎𑐬 𑐩𑐵𑐠𑐾𑐩𑐵𑑄 𑐣𑐾𑐰𑐵𑑅 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐣𑐾𑐰𑐵𑑅 𑐥𑐟𑑂𑐬𑐥𑐟𑑂𑐬𑐶𑐎𑐵𑐟 𑐥𑐶𑐡𑐣𑐷𑐐𑐸 𑐟𑐬 𑐣𑐶𑐬𑐣𑑂𑐟𑐬𑐟𑐵 𑐩𑑂𑐴𑑀 𑐴𑐾 𑐖𑐎 𑐏𑐣𑐾𑐡𑐫𑐵𑐔𑑂𑐰𑑄𑐐𑐸 𑐳𑐣𑑂𑐡𑐬𑑂𑐨 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐢𑐫𑐵𑐡𑐶𑐮, ‘𑐥𑐟𑑂𑐬𑐎𑐵𑐬 𑐡𑐧𑐹 𑐠𑐾𑑄𑐖𑑂𑐫𑐵𑑅𑐐𑐸 𑐳𑑄𑐐𑐛𑐣 𑐰𑐶𑐎𑐵𑐳 𑐖𑐸𑐂𑐢𑐸𑑄𑐎𑐵𑑅 𑐁𑑅 𑐥𑐶𑐡𑐣𑐵𑐔𑑂𑐰𑑄𑐐𑐸 𑐥𑐟𑑂𑐬𑐶𑐎𑐵 𑐣𑐶𑐬𑐣𑑂𑐟𑐬 𑐣𑑂𑐴𑑂𑐫𑐵𑑅𑐰𑐣𑐷𑐐𑐸 𑐮𑐶𑐳𑐾𑑄 𑐡𑐶𑐣𑐵𑐔𑑂𑐰𑑄𑐐𑐸 𑐥𑐟𑑂𑐬𑐶𑐎𑐵𑐟 𑐣𑑄 𑐴𑐵𑐎𑐣𑑄 𑐣𑑂𑐴𑑂𑐫𑐵𑐎𑐾𑐐𑐸 𑐰𑐵𑐟𑐵𑐰𑐬𑐞 𑐡𑐫𑐾𑐎𑐾𑐩𑐵𑑅 𑑋’ 𑐥𑐟𑑂𑐬𑐎𑐵𑐬𑐟𑐫𑑂𑐐𑐸 𑐴𑐎𑐴𑐶𑐟𑐫𑐵 𑐳𑑅 𑐠𑑂𑐰𑐫𑐾𑐎𑐾𑐟 𑐣𑐷𑐳𑑂𑐰𑑄𑐐𑐸 𑐳𑑄𑐳𑑂𑐠𑐵𑑄 𑐣𑐾𑐰𑐵𑑅 𑐮𑐫𑑂𑐥𑑁 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑃𑐫𑑂 𑐥𑐟𑑂𑐬𑐎𑐵𑐬 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑐵𑐫𑑅 𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐣𑐾𑐰𑐵𑑅 𑐖𑑅 𑐮𑐫𑑂𑐥𑑁 𑐳𑐵𑐣𑐸𑐎𑐵𑐖𑐷 𑐰𑐶𑐱𑐾𑐲𑐵𑐒𑑂𑐎 𑐥𑐶𑐠𑐣𑐵𑑅 𑐕𑐩𑑂𑐴 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐫𑐵𑐟 𑐀𑐩𑐬 𑐡𑐫𑐾𑐎𑐾𑐐𑐸 𑐖𑑂𑐫𑐵𑐫𑑂 𑐥𑐟𑑂𑐬𑐎𑐵𑐬 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵𑑄 𑐫𑑀𑐐𑐡𑐵𑐣 𑐧𑐶𑐄𑐐𑐸 𑐧𑐶𑐔𑐵𑑅 𑐰𑐫𑑂𑐎𑐮𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐣𑐾𑐰𑐵𑑅 𑐖𑑅 𑐮𑐫𑑂𑐥𑑁𑐫𑐵 𑐳𑐩𑑂𑐥𑐵𑐡𑐎 𑐮𑐶𑐳𑐾𑑄 𑐥𑐟𑑂𑐬𑐎𑐵𑐬 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐣𑑂𑐰𑐎𑐹 𑐧𑐶𑐬𑐵𑐖𑐎𑐵𑐖𑐷 𑐬𑐵𑐖𑑀𑐥𑐵𑐢𑑂𑐫𑐵𑐫𑑄 𑐳𑑄𑐔𑐵𑐬 𑐎𑑂𑐲𑐾𑐟𑑂𑐬𑐫𑐵𑐟 𑐬𑐵𑐖𑑂𑐫𑐫𑐵 𑐥𑑂𑐫𑑄𑐐𑐹𑐐𑐸 𑐀𑑄𑐐 𑐎𑐠𑑄 𑐎𑐵𑐂𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐡𑐾𑐫𑑂 𑐳𑑄𑐑𑐷𑐫𑐟𑐵𑐫𑑂 𑐰𑐣𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐥𑑂𑐬𑐡𑐾𑐱 𑑓 𑐫𑑂 𑐣𑐾𑐰𑐵𑑅 𑐳𑑄𑐔𑐵𑐬 𑐎𑑂𑐲𑐾𑐟𑑂𑐬𑐫𑐵 𑐠𑐵𑐫𑑂𑐫𑐵 𑐰𑐶𑐲𑐫𑐫𑑂 𑐣𑐾𑐰𑐵𑑅 𑐳𑐵𑑄𑐳𑐡𑑂𑐥𑐶𑑄𑐳𑑄 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐣𑐾𑐰𑐵𑑅 𑐳𑑄𑐔𑐵𑐬 𑐏𑑂𑐫𑑅𑐫𑐵 𑐮𑐶𑐳𑐾𑑄 𑐣𑐾𑐰𑐵𑑅 𑐳𑑄𑐔𑐵𑐬 𑐳𑐩𑑂𑐰𑐡𑑂𑐢 𑐳𑑄𑐐𑐛𑐣, 𑐣𑐾𑐰𑐵𑑅 𑐳𑑄𑐔𑐵𑐬 𑐐𑐺𑐴𑐫𑐵𑐟 𑐐𑑂𑐰𑐵𑐴𑐵𑐮𑐶𑐫𑐵 𑐣𑐶𑑄𑐟𑐶𑑄 𑐥𑐴𑐮 𑐫𑐵𑐫𑐾𑐟 𑐰𑐫𑑂𑐎𑐮𑑄 𑐩𑐵𑐐 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐳𑐎𑐸𑐳 𑐫𑐵𑐳𑐾𑑄 𑐥𑐟𑑂𑐬𑐎𑐵𑐬 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐕𑑂𑐫𑐵𑐘𑑂𑐖𑐾 𑐥𑑂𑐬𑐖𑐷𑐟 𑐱𑐵𑐎𑑂𑐫𑑄 𑐩𑐡𑐸𑐩𑑂𑐴 𑐥𑐟𑑂𑐬𑐎𑐵𑐬 𑐳𑐵𑐣𑐸𑐎𑐵𑐖𑐷 𑐩𑐴𑐬𑑂𑐖𑐣𑑄 𑐣𑐾𑐰𑐵𑑅 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐧𑐶𑐄𑐐𑐸 𑐫𑑀𑐐𑐡𑐵𑐣𑐫𑐵𑐟 𑐮𑐸𑐩𑑄𑐎𑐸𑐳𑐾𑑄 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶𑐫𑐵 𑐣𑐶𑐟𑐶𑑄 𑐳𑐵𑐣𑐸𑐎𑐵𑐖𑐷 𑐎𑐮𑑂𑐫𑐵𑐞 𑐎𑑀𑐲 𑐡𑐫𑐾𑐎𑐾𑐢𑐸𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐄𑐐𑐸 𑐎𑑀𑐲𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐣𑑄 𑐕𑑂𑐫𑐵𑐣𑑂𑐖𑐾 𑐱𑐵𑐎𑑂𑐫𑑄 𑐁𑐰𑑂𑐴𑐵𑐣 𑐫𑐵𑐣𑐵𑐡𑐶𑐮 𑑋 𑐠𑑂𑐰𑐫𑐵𑑄 𑐮𑐶𑐥𑐵 𑐩𑐡𑐸𑐩𑑂𑐴 𑐳𑐵𑐣𑐸𑐎𑐵𑐖𑐷 𑐩𑐴𑐬𑑂𑐖𑐣𑐫𑐵 𑐮𑐸𑐩𑐣𑑂𑐟𑐶𑐂 𑐩𑐶𑐜𑐶𑐫𑐵 𑐎𑐥 𑐦𑐸𑐚𑐳𑐮 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐣𑑄 𑐱𑐵𑐎𑑂𑐫𑑄 𑐫𑐵𑐣𑐵𑐡𑐶𑐮 𑑋

𑐥𑐟𑑂𑐬𑐎𑐵𑐬 𑐡𑐧𑐹 𑐫𑐾𑑃 𑐖𑐶𑐮𑑂𑐮𑐵𑐫𑐵 𑐣𑐵𑐫𑑅 𑐣𑐵𑐟𑐶𑐎𑐵𑐖𑐷 𑐩𑐴𑐬𑑂𑐖𑐣𑑄 𑐟𑑅𑐢𑑄𑐐𑐸 𑐳𑑄𑐔𑐵𑐬 𑐐𑐺𑐴𑐥𑐵𑐏𑐾𑑄 𑐣𑑄 𑐣𑐾𑐰𑐵𑑅𑐮𑐐𑐵𑐫𑐟 𑐖𑐣𑐖𑐵𑐟𑐶 𑐐𑐟𑐶𑐰𑐶𑐢𑐶𑐫𑐵 𑐳𑐩𑐵𑐔𑐵𑐬 𑐥𑑂𑐬𑐎𑐵𑐱𑐣 𑐫𑐵𑐫𑐾𑐐𑐸𑐮𑐶𑐂 𑐔𑑂𑐫𑐹𑐟𑐵𑑅 𑐎𑑂𑐫𑐣𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶 𑐰 𑐣𑐾𑐰𑐵𑑅 𑐳𑑄𑐔𑐵𑐬 𑐐𑐺𑐴𑐫𑐵𑐟 𑐢𑐶𑐳𑐶𑐮𑐵𑐎𑐵 𑐫𑑄𑐎𑐾𑐟 𑐠𑑅𑐥𑐶𑑄 𑐣𑑂𑐴𑑂𑐫𑐵𑐧𑑂𑐮𑐾𑑄 𑐎𑑂𑐬𑐶𑐫𑐵𑐱𑐷𑐮 𑐖𑐸𑐫𑐵𑐔𑑂𑐰𑐣𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑐵𑐫𑑅 𑐩𑐴𑐬𑑂𑐖𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐟𑐶𑐣𑐶𑐢𑐶 𑐳𑐨𑐵 𑐳𑐡𑐳𑑂𑐫 𑐖𑐷𑐰𑐣𑐬𑐵𑐩 𑐱𑑂𑐬𑐾𑐲𑑂𑐛, 𑐥𑑂𑐬𑐡𑐾𑐱 𑐳𑐨𑐵 𑐳𑐡𑐳𑑂𑐫𑐥𑐶𑑄 𑐧𑐳𑐣𑑂𑐟 𑐩𑐵𑐣𑐣𑑂𑐢𑐬 𑐰 𑐬𑐵𑐖𑐾𑐱 𑐱𑐵𑐎𑑂𑐫, 𑐥𑐹𑐬𑑂𑐰 𑐬𑐵𑐖𑑂𑐫𑐩𑐣𑑂𑐟𑑂𑐬𑐷 𑐟𑐷𑐬𑑂𑐠𑐬𑐵𑐩 𑐜𑑄𑐐𑑀𑐮, 𑐰𑐬𑐶𑐲𑑂𑐛 𑐥𑐟𑑂𑐬𑐎𑐵𑐬 𑐳𑐸𑐬𑐾𑐱𑐎𑐶𑐬𑐞 𑐩𑐵𑐣𑐣𑑂𑐢𑐬, 𑐬𑐵𑐖𑐸 𑐱𑐵𑐎𑑂𑐫 𑐰 𑐳𑐸𑐖𑐷𑐰 𑐰𑐖𑑂𑐬𑐵𑐔𑐵𑐬𑑂𑐫𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS