Read news in NepalBhasa text-- www.hamroschool.com BACK 𑐧𑐸𑑄𑐐𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐕𑐸 𑐖𑐸𑐂 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐸𑑄𑐐𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐕𑐸 𑐖𑐸𑐂 ?

𑐫𑐮– 𑐴𑐮𑐶𑐩𑐫𑑂 𑐣𑐵𑑄𑐖𑐵𑑅𑐐𑐸 𑐣𑐾𑐥𑐵𑑅𑐫𑐵 𑐴𑐾 𑐡𑐎𑐮𑐫𑑂 𑐟𑐵𑑅𑐴𑐵𑐎𑑅𑐐𑐸 𑐖𑐵𑐟𑑂𑐬𑐵 𑐧𑐸𑑄𑐐𑑅𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐠𑐸𑐐𑐸𑐳𑐷 𑐕𑐸 𑐖𑐸𑐂 𑐢𑐫𑐵𑐐𑐸 𑐀𑐣𑑂𑐫𑑀𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑑀𑐬𑑀𑐣𑐵 𑐨𑐵𑐂𑐬𑐳 𑐳𑑄𑐎𑑂𑐬𑐩𑐞 𑐥𑐣𑐾𑐟 𑐳𑐬𑐎𑐵𑐬𑑄 𑐟𑐫𑐵𑐟𑑅𑐐𑐸 𑐮𑐎𑐜𑐵𑐄𑐣𑐫𑐵 𑐎𑐵𑐬𑐞𑑄 𑐠𑐷𑐠𑐷 𑐠𑐵𑐳𑐫𑑂 𑐖𑐸𑐂𑐩𑐵𑑅𑐐𑐸 𑐖𑐵𑐟𑑂𑐬𑐵 𑐡𑐎𑑂𑐰 𑐢𑐫𑐵𑐠𑐾𑑄 𑐡𑐶𑐄𑐐𑐸 𑐀𑐰𑐳𑑂𑐠𑐵𑐫𑑂 𑐁𑑅 𑐧𑐸𑑄𑐐𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐣𑑄 𑐥𑐹𑐰𑑄𑐎 𑐴𑐾 𑐡𑐶𑐎𑐾𑐐𑐸 𑐏𑑅𑐎𑐶 𑐳𑐵𑐩𑐵𑐣𑑂𑐫 𑐎𑐠𑑄 𑐖𑐎 𑐴𑐣𑐾𑐐𑐸 𑐏𑑅 𑐢𑐫𑐵𑐐𑐸 𑐀𑐣𑑂𑐫𑑀𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐧𑐸𑑄𑐐𑐡𑑂𑐫𑑅 𑐖𑐵𑐟𑑂𑐬𑐵𑐫𑐵 𑐣𑐶𑐫𑐩 𑐎𑐠𑑄 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸𑐫𑐵𑑄 𑐎𑐣𑑂𑐴𑐫𑑂 𑐎𑐸𑐣𑑂𑐴𑐸 𑐰𑐂𑐐𑐸 𑐰𑐿𑐱𑐵𑐏 𑑑𑑒 𑐐𑐟𑐾 𑐡𑑂𑐫𑑅𑐫𑐵𑐟 𑐬𑐠𑐫𑑂 𑐧𑐶𑐖𑑂𑐫𑐵𑐎𑐾𑐩𑐵𑑅𑐐𑐸 𑐏𑑅 𑑋 𑐟𑐬 𑐮𑐎𑐜𑐵𑐄𑐣𑐫𑐵 𑐎𑐵𑐬𑐞𑑄 𑐁𑑅𑐟𑐎 𑐬𑐠 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐩𑐡𑐸𑐣𑐶 𑑋 𑐳𑐬𑐎𑐵𑐬𑑄 𑑑𑑕 𑐐𑐟𑐾 𑐟𑐎 𑐮𑐎𑐜𑐵𑐄𑐣 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐟𑐫𑐾𑐢𑐸𑑄𑐎𑐹𑐐𑐸 𑐰 𑐠𑑂𑐰 𑐮𑐶𑐥𑐵 𑐣𑑄 𑐮𑐎𑐜𑐵𑐄𑐣 𑐠𑐥 𑐖𑐸𑐂𑐦𑐸𑐐𑐸 𑐀𑐰𑐳𑑂𑐠𑐵𑐫𑑂 𑐟𑐸𑐬𑐸𑐣𑑂𑐟 𑐬𑐠 𑐡𑐫𑐾𑐎𑐾𑐐𑐸 𑐳𑐩𑑂𑐨𑐵𑐰𑐣𑐵 𑐣𑑄 𑐩𑐡𑐸𑐣𑐶 𑑋 𑐀𑐠𑐾 𑐖𑐹𑐐𑐸𑐮𑐶𑑄 𑐁𑑅 𑐡𑑂𑐫𑑅𑐫𑐵𑐟 𑐡𑐾𑐐𑐮𑑄 𑐥𑐶𑐟𑐧𑐶𑐖𑑂𑐫𑐵𑐎𑐾𑐐𑐸 𑐎𑐶 𑐥𑐶𑐟𑐧𑐶𑐩𑐖𑑂𑐫𑐵𑐎𑐾𑐐𑐸 𑐢𑐫𑐵𑐐𑐸 𑐏𑑃 𑐣𑑄 𑐎𑑂𑐰𑑅𑐕𑐶𑐂 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑐣𑐶 𑑋

𑐥𑐵𑑄𑐖𑐸 𑐀𑐩𑐬 𑐬𑐵𑐖 𑐱𑐵𑐎𑑂𑐫 𑐟𑑅𑐧𑐴𑐵𑐮𑐫𑑂 𑑋

𑐠𑑁𑑄𑐎𑐣𑑂𑐴𑐫𑑂 𑐧𑐸𑑄𑐐𑐡𑑂𑐫𑑅𑐫𑐵 𑐥𑐵𑑅𑐮𑐵𑑅 𑐖𑐸𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐥𑐵𑑄𑐖𑐸 𑐀𑐩𑐬 𑐬𑐵𑐖 𑐱𑐵𑐎𑑂𑐫𑐫𑐵 𑐎𑐠𑑄 𑐡𑑂𑐫𑑅 𑐥𑐶𑐟𑐧𑐶𑐩𑐖𑑂𑐫𑐵𑐎𑐮 𑐢𑐵𑑅𑐳𑐵 𑐡𑑂𑐫𑑅𑐥𑐵𑑅 𑐔𑑂𑐰𑐣𑐾𑐐𑐸 𑐖𑑂𑐫𑐵𑐫𑑂 𑐴𑐾 𑐐𑑀𑐮𑐩𑐵𑐮 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋 𑐧𑐸𑑄𑐐𑑅𑐡𑑂𑐫𑑅𑐫𑐵 𑐥𑐵𑑅𑐮𑐵𑑅 𑐖𑐸𑐂𑐥𑐶𑑄 𑑓𑑑 𑐩𑑂𑐴 𑐥𑐵𑑄𑐖𑐸𑐥𑐶𑑄 𑐩𑐢𑑂𑐫𑐾 𑐡𑐾𑐐𑐮𑐫𑑂 𑐥𑐵𑑅 𑐔𑑂𑐰𑐣𑐷𑐩𑑂𑐴 𑐰 𑐬𑐠𑐫𑑂 𑐥𑐵𑑅 𑐔𑑂𑐰𑐣𑐷𑐩𑑂𑐴 𑐀𑐮𑐐 𑐀𑐮𑐐 𑐴𑐾 𑐖𑐸𑐂 𑑋 𑐁𑑅 𑐡𑐾𑐐𑐮𑑄 𑐡𑑂𑐫𑑅 𑐥𑐶𑐟𑐧𑐶𑐩𑐖𑑂𑐫𑐵𑐎𑐮 𑐢𑐵𑑅𑐳𑐵 𑐡𑑂𑐫𑑅𑐥𑐵𑑅𑐮𑐵𑑅 𑐳𑐸 𑐔𑑂𑐰𑐣𑐾𑐐𑐸 𑐢𑐫𑐵𑐐𑐸 𑐴𑐾 𑐐𑑀𑐮𑐩𑐵𑐮 𑐖𑐹𑐰𑐣𑐾𑐦𑐸 𑑋 𑐀𑐠𑐾𑐴𑐾 𑐡𑑂𑐫𑑅 𑐧𑐸𑑄𑐐𑐫𑑂 𑐐𑐸𑐧𑐮𑐫𑑂 𑐮𑐶𑐟 𑐫𑑄𑐎𑐾𑐐𑐸 𑐢𑐫𑐵𑐐𑐸 𑐏𑑃 𑐣𑑄 𑐐𑑀𑐮𑐩𑐵𑐮 𑐖𑐹𑐰𑐣𑐷 𑑋 𑐧𑐸𑑄𑐐𑑅𑐫𑑂 𑐖𑐸𑐂𑐐𑐸 𑐩𑐾𑐩𑐾𑐐𑐸 𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐣𑑄 𑐧𑐸𑑄𑐐𑐡𑑂𑐫𑑅𑐫𑐵𑐟 𑐧𑐸𑑄𑐐𑐫𑑂 𑐠𑑂𑐫𑑄𑐎𑐾𑐩𑐵𑑅 𑑋 𑐬𑐠𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐡𑑂𑐫𑑅 𑐥𑐶𑐴𑐵𑑄 𑐧𑐶𑐩𑐖𑑂𑐫𑐵𑐎𑐮 𑐢𑐵𑑅𑐳𑐵 𑐡𑑂𑐫𑑅 𑐐𑐸𑐧𑐮𑐫𑑂 𑐧𑐸𑑄𑐐𑐫𑑂 𑐫𑑄𑐎𑐾𑐐𑐸 𑐣𑑄 𑐢𑐵𑐫𑐾𑐦𑐂 𑐩𑐏𑐸 𑑋

𑐧𑐸𑑄𑐐𑐡𑑂𑐫𑑅 𑐠𑑁𑑄𑐎𑐣𑑂𑐴𑐫𑑂 𑐫𑐮𑐫𑐵 𑐟𑑅𑐧𑐴𑐵𑐮𑐫𑑂 𑐧𑐶𑐖𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋 𑐡𑑂𑐫𑑅𑐫𑐵𑐟 𑐬𑐷𑐟𑐶𑐟𑐶𑐠𑐶 𑐎𑐠𑑄 𑐴𑐾 𑐡𑐾𑐐𑐮𑑄 𑐥𑐶𑐟𑐧𑐶𑐖𑑂𑐫𑐵𑐎𑐵𑑅 𑐬𑐠𑐫𑑂 𑐟𑐫𑐾𑐐𑐸 𑐠𑐵𑐫𑑂 𑐥𑐹𑐔𑑂𑐰𑐫𑐵 𑐦𑐮𑑂𑐔𑐵𑐫𑑂 𑐖𑐎𑐳𑐵𑑄 𑐟𑐫𑐾𑐩𑐵𑑅𑐐𑐸 𑐰 𑐮𑐶𑐥𑐵 𑐮𑐎𑐜𑐵𑐄𑐣 𑐔𑐵𑐫𑐾𑐢𑐸𑑄𑐎𑐵𑑅 𑐬𑐠 𑐴𑐾 𑐡𑐫𑐾𑐎𑐾𑐩𑐦𑐸𑐳𑐵𑑄 𑐏𑐟𑐫𑑂 𑐖𑐎 𑐟𑐫𑐵𑑅 𑐳𑐵𑑄 𑐡𑐾𑐫𑑂 𑐔𑐵𑑅𑐴𑐶𑐎𑐾𑐩𑐵𑑅𑐐𑐸 𑐧𑐶𑐔𑐵𑑅 𑐥𑐵𑑄𑐖𑐸 𑐱𑐵𑐎𑑂𑐫𑐫𑐵 𑐡𑐸 𑑋 𑐟𑐬 𑐕𑐸 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐁𑑅𑐟𑐎 𑐳𑐴𑐮𑐴 𑐟𑐎𑑄 𑐩𑐖𑐹𑐣𑐶𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋

𑐧𑐸𑑄𑐐𑐡𑑂𑐫𑑅𑐫𑐵 𑐬𑐠 𑐡𑐫𑐾𑐎𑐾𑐟 𑐥𑐹𑐔𑑂𑐰𑐫𑑂 𑐴𑐫𑐵𑐟𑑅𑐐𑐸 𑐳𑐶𑑃 𑑋

𑐬𑐠 𑐡𑐫𑐾𑐎𑐾𑐐𑐸 𑐣𑑂𑐴𑐶 𑐎𑐸𑐣𑑂𑐴𑐸 𑐐𑐸𑐠𑐶 𑐳𑑄𑐳𑑂𑐠𑐵𑐣, 𑐖𑑂𑐫𑐵𑐥𑐸 𑐳𑐩𑐵𑐖, 𑐖𑐶𑐮𑑂𑐮𑐵 𑐥𑑂𑐬𑐱𑐵𑐳𑐣 𑐎𑐵𑐬𑑂𑐫𑐵𑐮𑐫, 𑐥𑐵𑑄𑐖𑐸𑐥𑐶𑑄 𑐰 𑐳𑐬𑑀𑐎𑐵𑐬𑐰𑐵𑐮𑐵 𑐥𑐎𑑂𑐲 𑐔𑑂𑐰𑐣𑐵𑑅 𑐧𑐿𑐛𑐎 𑐫𑐵𑐣𑐵𑑅 𑐮𑐎𑐜𑐵𑐄𑐣 𑐳𑐶𑐢𑐫𑐾𑐎𑐵𑑅 𑐎𑑂𑐲𑐩𑐵 𑐥𑐸𑐖𑐵 𑐫𑐵𑐣𑐵𑑅 𑐬𑐠 𑐡𑐫𑐾𑐎𑐾𑐐𑐸 𑐎𑑂𑐰𑑅𑐕𑐶𑐣𑐵𑑅𑐐𑐸 𑐰𑐎𑑂𑐟𑐰𑑂𑐫 𑐣𑑄 𑐖𑐵𑐬𑐷 𑐫𑐵𑑅𑐐𑐸 𑐏𑑅 𑑋 𑐄𑐧𑐮𑐫𑑂 𑐰𑐿𑐱𑐵𑐏 𑑓 𑐐𑐟𑐾 𑐟𑐎 𑐖𑐎 𑐮𑐎𑐜𑐵𑐄𑐣 𑐢𑐫𑐵𑐟𑑅𑐐𑐸𑐮𑐶𑑄 𑐬𑐠 𑐡𑐫𑐾𑐎𑐾𑐟 𑐕𑐸𑑄 𑐨𑐔𑐵 𑐳𑐶𑑃 𑐴𑐫𑐵𑑅 𑐬𑐠 𑐡𑐫𑐾𑐎𑐾𑐐𑐸 𑐠𑐵𑐫𑑂 𑐴𑐵𑐩𑑂𑐰𑑅 𑐎𑐷 𑐟𑐵𑐫𑐾𑐐𑐸 𑐢𑐎𑐵𑑅 𑐥𑑂𑐫𑑄𑐐𑑅 𑐠𑐵𑑄 𑐟𑐫𑐵𑑅 𑐰𑐶𑐢𑐶𑐥𑐹𑐬𑑂𑐰𑐎 𑐥𑐸𑐖𑑂𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐖𑐹𑐐𑐸 𑐏𑑅 𑑋 𑐟𑐬 𑐮𑐎𑐜𑐵𑐄𑐣 𑐠𑐥 𑐖𑐸𑐂𑐢𑐸𑑄𑐎𑐵𑑅 𑐁𑑅 𑐕𑐸 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐢𑐵𑑅𑐳𑐵 𑐧𑐿𑐛𑐎 𑐟𑐎𑑄 𑐩𑐖𑐹𑐣𑐶𑐐𑐸 𑐏𑑃 𑐥𑐵𑑄𑐖𑐸 𑐱𑐵𑐎𑑂𑐫𑑄 𑐎𑐣𑐵𑐡𑐶𑐮 𑑋

𑐧𑐸𑑄𑐐𑐡𑑂𑐫𑑅𑐫𑐵 𑐬𑐠 𑐡𑐫𑐾𑐎𑐾𑐟 𑐥𑐹𑐔𑑂𑐰𑐫𑑂 𑐴𑐵𑐩𑑂𑐰𑐎𑐷 𑐟𑐫𑐵𑐟𑑅𑐐𑐸 𑑋

𑐰𑐫𑑂𑐎𑑅𑐫𑐵 𑐎𑐠𑑄 𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐫𑐵𑐫𑐾𑐩𑐵𑑅𑐐𑐸 𑐩𑐾𑐩𑐾𑐐𑐸 𑐥𑐸𑐖𑐵, 𑐰𑐶𑐢𑐶𑐰𑐶𑐢𑐵𑐣 𑐦𑐸𑐎𑑂𑐎𑑄 𑐠𑑁𑑄𑐎𑐣𑑂𑐴𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐡𑑂𑐫𑑅 𑐖𑐵𑐟𑑂𑐬𑐵𑐫𑐵 𑐂𑐮𑐫𑑂 𑐴𑐹𑐮𑐩𑐹𑐮 𑐖𑐸𑐂𑐐𑐸𑐮𑐶𑑄 𑐖𑐎 𑐖𑐵𑐟𑑂𑐬𑐵 𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐰𑑄𑐐𑐸 𑐮𑑂𑐴𑐸𑐟𑐶 𑐥𑐸𑐣𑑂𑐴𑐶 𑐎𑐣𑑂𑐴𑐸 𑐮𑐎𑐜𑐵𑐄𑐣𑐫𑐵 𑐀𑐰𑐳𑑂𑐠𑐵𑐫𑑂 𑐴𑐾 𑐮𑐐𑑄𑐏𑑂𑐫𑐮𑐫𑑂 𑐧𑐸𑑄𑑄𑐐𑑅𑐡𑑂𑐫𑑅𑐫𑐵 𑐣𑑂𑐴𑐰𑑄 𑐖𑐹𑐐𑐸 𑐡𑐸 𑑋 𑐁𑑅 𑐡𑐾𑐐𑐮𑐫𑑂 𑐴𑐾 𑐟𑐫𑐵𑑅 𑐧𑐸𑑄𑐐𑐡𑑂𑐫𑑅𑐫𑐵 𑐮𑑃𑐥𑐸 𑐕𑐵𑐫𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐮𑑃𑐥𑐸 𑐕𑐵𑐫𑐾𑐐𑐸 𑐖𑑂𑐫𑐵 𑐩𑑄𑐐𑐮𑐰𑐵𑑅 𑐟𑐎 𑐣𑑂𑐴𑑂𑐫𑐵𑐂 𑑋 𑐡𑑂𑐫𑑅 𑐖𑐵𑐟𑑂𑐬𑐵𑐫𑐵 𑐣𑐶𑑄𑐟𑐶𑑄 𑐎𑑂𑐰𑐡𑐸𑐰𑐵𑐮𑐫𑑂 𑐰𑐣𑐵𑑅 𑐡𑑂𑐫𑑅 𑐎𑐵𑑅𑐰𑐣𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐂𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐎𑑂𑐰𑐡𑐸𑐰𑐵𑐮𑐫𑑂 𑐰𑐣𑐵𑑅 𑐡𑑂𑐫𑑅 𑐎𑐵𑑅𑐰𑐣𑐾𑐐𑐸 𑐖𑑂𑐫𑐵 𑐩𑐵𑑄𑐫𑐵 𑐏𑑂𑐰𑐵𑑅 𑐳𑑂𑐰𑐫𑐾𑐐𑐸 𑐍𑑄𑐳𑐷 𑐎𑐸𑐣𑑂𑐴𑐸 𑐖𑐸𑐂𑐳𑐵 𑐎𑐣𑑂𑐴𑐫𑑂 𑐥𑐵𑐬𑐸 𑐎𑐸𑐣𑑂𑐴𑐸 𑐠𑑂𑐫𑑄𑐎𑑅 𑐴𑐂 𑑋

𑐔𑐵𑐎𑐸𑐧𑐵𑑅𑐡𑑂𑐫𑑅𑐫𑐵 𑐬𑐠𑐫𑐵 𑐑𑑅𑐩𑐵𑑅 𑐴𑐶𑐮𑐾𑐟 𑐴𑐫𑐵𑐟𑑅𑐐𑐸 𑐳𑐶𑑃𑐐𑑂𑐰𑑄 𑑋

𑐧𑐸𑑄𑐐𑐡𑑂𑐫𑑅𑐫𑐵 𑐮𑐶𑐳𑐾𑑄 𑐖𑐵𑐟𑑂𑐬𑐵 𑐫𑐵𑐂𑐩𑑂𑐴 𑐔𑐵𑐎𑐸𑐧𑐵𑑅𑐡𑑂𑐫𑑅 (𑐩𑐷𑐣𑐣𑐵𑐠)𑐫𑐵 𑐬𑐠 𑐡𑐫𑐾𑐎𑐾𑐟 𑐣𑑄 𑐳𑐶𑑃 𑐴𑐫𑐵𑐟𑑅𑐐𑐸 𑐡𑐸 𑑋 𑐠𑐸𑐐𑐸𑐳𑐷 𑐩𑐷𑐣𑐣𑐵𑐠 𑐔𑐵𑐎𑐸𑐧𑐵𑑅𑐡𑑂𑐫𑑅𑐫𑐵 𑐬𑐠𑐫𑑂 𑐑𑑅𑐩𑐵𑑅 𑐴𑐶𑐮𑐾𑐐𑐸 𑐣𑐶𑑄𑐟𑐶𑑄 𑐟𑑅𑐐𑑂𑐰𑑅 𑐳𑐶𑑃 𑐴𑐫𑐵𑐟𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐧𑐸𑑄𑐐𑑅𑐡𑑂𑐫𑑅𑐫𑐵 𑐬𑐠 𑐴𑐾 𑐩𑐡𑐫𑐾𑐎𑐹𑐣𑐶𑐐𑐸𑐮𑐶𑑄 𑐠𑐣 𑐣𑑄 𑐬𑐠 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐩𑐖𑐹𑐣𑐶 𑑋 𑐟𑐬 𑐠𑐣 𑐣𑑄 𑐬𑐠 𑐡𑐫𑐾𑐎𑐾 𑐣𑑂𑐴𑑂𑐫𑑅 𑐫𑐵𑐫𑐾𑐩𑐵𑑅𑐐𑐸 𑐰𑐶𑐢𑐶 𑐎𑐠𑑄 𑐴𑐵𑐩𑑂𑐰𑑅𑐎𑐶 𑐟𑐫𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐔𑐵𑐎𑐸𑐧𑐵𑑅𑐡𑑂𑐫𑑅𑐫𑐵 𑐣𑑄 𑐮𑑃𑐥𑐸 𑐕𑐵𑐫𑐾𑐐𑐸 𑐖𑑂𑐫𑐵 𑐢𑐵𑑅𑐳𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS