𑐳𑑂𑐰𑐣𑐶𑐐𑐮𑐫𑑂 𑐩𑐾𑐫𑑂 𑐮𑐵 𑐕𑐵𑐫𑑂 𑐀𑐨𑐵𑐰 𑐖𑐸𑐮 ?
𑐫𑐾𑑃 – 𑐧𑐖𑐵𑐬𑐫𑑂 𑐩𑐾𑐫𑑂 𑐩𑐰𑐫𑐾𑐰𑑄 𑐫𑐾𑑃𑐫𑐵 𑐁𑐥𑐵𑐮𑑄 𑐢𑐫𑐵𑐠𑐾𑑄 𑐠𑐾𑑄 𑐩𑐾𑐫𑑂𑐫𑐵 𑐮𑐵 𑐥𑐳𑑅 𑐧𑐣𑑂𑐡 𑐖𑐹𑐐𑐸 𑐡𑐸 𑑋 𑐰𑑄𑐐𑐸 𑐔𑐿𑐟 𑑒𑑔 𑐐𑐟𑐾 𑐟𑐎 𑐫𑐾𑑃𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐕𑐸𑑄 𑐕𑐸𑑄 𑐩𑐾𑐫𑑂𑐫𑐵 𑐮𑐵 𑐩𑐷𑐐𑐸 𑐥𑐳𑑅 𑐔𑐵𑑅𑐐𑐸 𑐏𑑅𑐳𑐵𑑄 𑐩𑑂𑐴𑐶𑐐𑑅 𑐣𑐶𑐳𑐾𑑄 𑐢𑐵𑑅𑐳𑐵 𑐦𑐸𑐎𑑂𑐎𑑄 𑐢𑐫𑐵𑐠𑐾𑑄 𑐥𑐳𑑅 𑐧𑐣𑑂𑐡 𑐖𑐹𑐐𑐸 𑐡𑐸 𑑋
𑐰𑑂𑐫𑐵𑐥𑐵𑐬𑐷𑐟𑐫𑑂 𑐎𑐠𑑄 𑐰𑑄𑐐𑐸 𑐔𑐿𑐟 𑑑𑑑 𑐐𑐟𑐾 ‘𑐮𑐎𑐜𑐵𑐄𑐣’ 𑐱𑐸𑐬𑐸 𑐖𑐸𑐂𑐢𑐸𑑄𑐎𑐵𑑅 𑐕𑐸𑑄 𑐣𑑂𑐴𑐶𑑄 𑐥𑐳𑑅 𑐧𑐣𑑂𑐡 𑐖𑐹𑐐𑐸 𑐏𑑅𑐳𑐵 𑐥𑐵𑐴𑐵𑑃𑐔𑑅¥𑐴𑐾𑐫𑐵 𑐣𑐶𑑄𑐟𑐶𑑄 𑐴𑐫𑐵𑐟𑑅𑐐𑐸 𑐩𑐾𑐫𑑂 𑐮𑑂𑐫𑐣𑐵𑐔𑑂𑐰𑑄𑐐𑐸 𑐮𑐎𑐜𑐵𑐄𑐣 𑐮𑐶𑐥𑐵 𑐣𑑄 𑐕𑐸𑑄 𑐣𑑂𑐴𑐶 𑐟𑐎 𑐩𑐾𑐫𑑂𑐫𑐵 𑐮𑐵 𑐣𑑂𑐫𑐵𑐫𑐾 𑐡𑐸𑐐𑐸 𑐏𑑅 𑑋 𑐁𑑅 𑐢𑐵𑑅𑐳𑐵 𑐰𑑂𑐫𑐵𑐥𑐵𑐬𑐷𑐟𑐫𑑂𑐳𑑄 𑐴𑐫𑐵𑐟𑑅𑐥𑐶𑑄 𑐩𑐾𑐫𑑂 𑐡𑐎𑑂𑐰𑑄 𑐩𑐡𑐫𑐾𑐰𑑄 𑐮𑐵 𑐥𑐳𑑅 𑐧𑐣𑑂𑐡 𑐖𑐹𑐰𑑄𑐐𑐸 𑐏𑑅 𑑋
𑐳𑑂𑐰𑐣𑐶𑐐𑑅𑐫𑐵 𑐰𑑂𑐫𑐵𑐥𑐵𑐬𑐷𑐟𑐫𑑂𑐳𑑄 𑐧𑐵𑐬𑐵𑐫𑐵 𑐖𑐶𑐟𑐥𑐸𑐬𑑄 𑐩𑐾𑐫𑑂 𑐣𑑂𑐫𑐵𑐣𑐵 𑐴𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅, 𑐟𑐬 𑐮𑐎𑐜𑐵𑐄𑐣 𑐱𑐸𑐬𑐸 𑐖𑐸𑐂𑐢𑐸𑑄𑐎𑐵𑑅 𑐖𑐶𑐟𑐥𑐸𑐬𑐫𑐵 𑐩𑐾𑐫𑑂𑐫𑐵 𑐴𑐵𑐚𑐧𑐖𑐵𑑅 𑐣𑑄 𑐧𑐣𑑂𑐡 𑐖𑐸𑐂𑐐𑐸 𑐳𑑂𑐰𑐣𑐶𑐐𑐮𑐫𑑂 𑐩𑐾𑐫𑑂 𑐴𑐫𑐾𑐐𑐸 𑐣𑑄 𑐡𑐶𑐄𑐐𑐸 𑐏𑑅 𑑋
𑐳𑑂𑐰𑐣𑐶𑐐𑑅𑐫𑐵 𑐰𑑂𑐫𑐵𑐥𑐵𑐬𑐷𑐟𑐫𑑂𑐳𑑄 𑐴𑐥𑑂𑐟𑐵𑐫𑑂 𑐣𑐶𑐎𑑅 𑐖𑐶𑐟𑐥𑐸𑐬𑐫𑐵 𑐴𑐵𑐚 𑐧𑐖𑐵𑐬𑑄 𑐩𑑂𑐫𑐾𑐫𑑂 𑐣𑑂𑐫𑐵𑐣𑐵 𑐴𑐂𑐐𑐸 𑐏𑑅 𑑋 𑐄𑐎𑐠𑑄 𑐴𑐾 𑐣𑐾𑐥𑐵𑐮𑐐𑐘𑑂𑐖 𑐰 𑐳𑐥𑑂𑐟𑐬𑐷𑐫𑐵 𑐳𑐏𑐸𑐰𑐵 𑐴𑐵𑐚 𑐧𑐖𑐵𑐬𑑄 𑐣𑑄 𑐳𑑂𑐰𑐣𑐶𑐐𑐮𑐫𑑂 𑐩𑑂𑐫𑐾𑐫𑑂 𑐁𑐥𑐹𑐬𑑂𑐟𑐶 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐮𑐎𑐜𑐵𑐄𑐣𑐫𑐵 𑐎𑐵𑐬𑐞𑑄 𑐠𑑂𑐰 𑐣𑐶𑐐𑐸𑐮𑐶𑑄 𑐴𑐵𑐚 𑐧𑐖𑐵𑑅 𑐣𑑄 𑐧𑐣𑑂𑐡 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐩𑐾𑐫𑑂𑐫𑐵 𑐁𑐫𑐵𑐟 𑐠𑐥𑑂𑐥 𑐖𑐹𑐰𑑄𑐐𑐸 𑐏𑑅 𑑋
𑐠𑑂𑐰 𑐧𑐵𑐴𑐾𑐎 𑐳𑑂𑐰𑐣𑐶𑐐𑑅 𑐖𑑅𑐏𑑅𑐫𑐵 𑐐𑐵𑐩𑑄 𑐣𑑄 𑐴𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵𑑄 𑐮𑐎𑐜𑐵𑐄𑐣𑐫𑐵 𑐎𑐵𑐬𑐞𑑄 𑐐𑐵𑐩𑑄 𑐣𑑄 𑐩𑐾𑐫𑑂 𑐴𑐫𑐾𑐟 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑑂𑐫𑐵𑐥𑐵𑐬𑐷𑐟𑐫𑑂 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐠𑑅𑐥𑐶𑑄 𑐴𑐾 𑐐𑐵𑐩𑐫𑑂 𑐰𑐣𑐵𑑅 𑐩𑐾𑐫𑑂 𑐣𑑂𑐫𑐵𑑅𑐰𑐣𑐾𑐐𑐸 𑐣𑑄 𑐳𑐩𑑂𑐨𑐰 𑐩𑐡𑐸, 𑐰𑐶𑐔𑑁𑐮𑐶𑐫𑐵 𑐥𑐵𑐏𑐾𑑄 𑐣𑑂𑐫𑐵𑐫𑐾𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐳𑐵𑑄 𑐣𑑄 𑐩𑐾𑐫𑑂𑐫𑐵 𑐨𑐵𑑅 𑐠𑐴𑐵𑑄 𑐰𑑄𑐐𑐸𑐮𑐶𑑄 𑐣𑑂𑐫𑐵𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋
𑐰𑐶𑐔𑑁𑐮𑐶𑐫𑐵𑐥𑐵𑐏𑐾𑑄 𑐐𑐵𑐩𑑄 𑐩𑐾𑐫𑑂 𑐴𑐫𑐾𑐩𑐵𑐮 𑐢𑐵𑑅𑐳𑐵 𑐕𑐐𑐹 𑐎𑐶𑐮𑑀 𑐮𑐵𑐫𑐵 𑐨𑐵𑑅 𑐏𑐸𑐳𑑅 𑐣𑐶𑐳𑐾𑑄 𑐣𑑂𑐴𑐫𑑂𑐳𑑄 𑐟𑐎 𑐟𑐹𑐰𑐂𑐐𑐸 𑐏𑑃 𑐢𑐵𑐳𑐾𑑄 𑐄𑐎𑐠𑑄 𑐮𑐵𑑅 𑐩𑐷𑐐𑐸 𑐰𑑂𑐫𑐰𑐴𑐵𑐬𑐶𑐎 𑐩𑐖𑐹𑐐𑐸 𑐏𑑃 𑐄𑐩𑐶𑐳𑑄 𑐢𑐵𑑅𑐐𑐸 𑐡𑐸 𑑋 𑐐𑐵𑐩𑑄 𑐩𑐾𑐫𑑂 𑐴𑐫𑐵𑑅 𑐠𑐶𑐎𑐾𑐐𑐸 𑐨𑐵𑐰𑑄 𑐩𑐶𑐮 𑐢𑐵𑑅𑐳𑐵 𑐳𑐬𑐎𑐵𑐬𑑄 𑐎𑐵𑐬𑐧𑐵𑐴𑐷 𑐫𑐵𑐂, 𑐀𑐠𑐾 𑐖𑐸𑐫𑐵𑑅 𑐣𑑄 𑐰𑑂𑐫𑐵𑐥𑐵𑐬𑐷𑐟 𑐐𑐵𑐩𑑄 𑐩𑐾𑐫𑑂 𑐴𑐫𑐾𑐟 𑐐𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐳𑑂𑐰𑐣𑐶𑐐𑐮𑐫𑑂 𑐁𑐥𑐵𑐮𑑄 𑐢𑐫𑐵𑐠𑐾𑑄 𑐩𑐾𑐫𑑂 𑐡𑐸𑐟 𑐴𑐂𑐐𑐸 𑐧𑐖𑐵𑑅 𑐖𑐶𑐟𑐥𑐸𑐬𑐫𑑂 𑐣𑑄 𑐨𑐵𑐬𑐟𑑄 𑐩𑐾𑐫𑑂 𑐁𑐥𑐹𑐬𑑂𑐟𑐶 𑐖𑐸𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐰𑑂𑐫𑐵𑐥𑐵𑐬𑐷𑐟𑐫𑑂 𑐎𑐠𑑄 𑐮𑐎𑐜𑐵𑐄𑐣 𑐎𑑂𑐰𑐔𑐵𑐫𑐾 𑐢𑐸𑑄𑐎𑐵𑑅 𑐣𑑄 𑐳𑑂𑐰𑐣𑐶𑐐𑐮𑐫𑑂 𑐕𑐸𑑄 𑐣𑑂𑐴𑐶𑑄 𑐩𑐾𑐫𑑂𑐫𑐵 𑐮𑐵 𑐩𑐡𑐫𑐾𑐦𑐸 𑑋 𑐨𑐵𑐬𑐟𑑄 𑐖𑐶𑐟𑐥𑐸𑐬𑐫𑑂 𑐩𑐾𑐫𑑂 𑐕𑑂𑐰𑐫𑐵 𑐩𑐴𑐮 𑐢𑐵𑑅𑐳𑐵 𑐳𑑂𑐰𑐣𑐶𑐐𑐮𑐫𑑂 𑐣𑑄 𑐮𑐵𑐫𑐵 𑐀𑐨𑐵𑐰 𑐖𑐸𑐂 𑑋
𑐳𑐬𑐎𑐵𑐬𑐷 𑐟𑐠𑑂𑐫𑐵𑑄𑐎 𑐎𑐠𑑄 𑐳𑑂𑐰𑐣𑐶𑐐𑐮𑐫𑑂 𑐖𑐎 𑐣𑑂𑐴𑐶𑑄 𑐣𑑂𑐴𑐫𑑂𑐳𑑅 𑐣𑐶𑐳𑐾𑑄 𑐔𑑂𑐫𑐵𑐳𑑅 𑐩𑐾𑐫𑑂 𑐏𑐥𑐚 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑂𑐰 𑐦𑐸𑐎𑑂𑐎𑑄 𑐩𑐾𑐫𑑂𑐫𑐵 𑐳𑑂𑐬𑑀𑐟 𑐢𑐵𑑅𑐳𑐵 𑐨𑐵𑐬𑐟 𑐮𑐶𑐳𑐾 𑐳𑐷𑐩𑐵𑐣𑐵 𑐳𑑂𑐰𑐵𑑅𑐐𑐸 𑐴𑐵𑐚 𑐧𑐖𑐵𑑅 𑐴𑐾 𑐏𑑅 𑑋
LEAVE YOUR COMMENTS