Read news in NepalBhasa text-- www.hamroschool.com BACK 𑐧𑐸𑐮𑐸𑐫𑐵 𑐔𑐣𑑂𑐡𑑂𑐬𑐨𑐿𑐬𑐰 𑐖𑐵𑐟𑑂𑐬𑐵 𑐣𑑄 𑐳𑑂𑐠𑐐𑐶𑐟 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐸𑐮𑐸𑐫𑐵 𑐔𑐣𑑂𑐡𑑂𑐬𑐨𑐿𑐬𑐰 𑐖𑐵𑐟𑑂𑐬𑐵 𑐣𑑄 𑐳𑑂𑐠𑐐𑐶𑐟

𑐫𑐾𑑃 (𑐬𑐵𑐳𑐳) –𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐳𑐩𑑂𑐨𑐵𑐰𑐶𑐟 𑐖𑑀𑐏𑐶𑐩 𑐣𑑂𑐫𑑄𑐎𑐾 𑐩𑐧𑐶𑐂𑐟 𑐮𑐎𑐜𑐵𑐄𑐣 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐧𑐸𑐮𑐸𑐐𑐵𑐩𑐫𑑂 𑐖𑐸𑐂𑐐𑐸 𑐣𑐵𑑄𑐖𑐵𑑅𑐐𑐸 𑐔𑐣𑑂𑐡𑑂𑐬𑐨𑐿𑐬𑐰 𑐖𑐵𑐟𑑂𑐬𑐵 𑐣𑑄 𑐳𑑂𑐠𑐐𑐶𑐟 𑐖𑐹𑐐𑐸 𑐡𑐸 𑑋 𑐡𑑃𑐫𑑂𑐡𑐳𑑄 𑐔𑐿𑐟𑐫𑐵 𑐊𑐎𑐵𑐡𑐱𑐶 𑐣𑐶𑐳𑐾𑑄 𑐟𑑂𑐬𑐫𑑀𑐡𑐱𑐷𑐟𑐎 𑐳𑑂𑐰𑐣𑑂𑐴𑐸𑐫𑑄𑐎𑑄 𑐐𑑀𑐡𑐵𑐰𑐬𑐷 𑐣𑐐𑐬𑐥𑐵𑐮𑐶𑐎𑐵𑐫𑐵 𑐔𑐵𑐥𑐵𑐐𑐵𑐄𑑃 𑐧𑐸𑐮𑐸𑐂 𑐠𑑂𑐰 𑐖𑐵𑐟𑑂𑐬𑐵 𑐖𑐸𑐂𑐐𑐸 𑐏𑑅 𑑋

𑐠𑐸𑐐𑐸𑐳𑐷 𑐖𑐵𑐟𑑂𑐬𑐵 𑐩𑐖𑐸𑐂𑐐𑐸 𑐖𑐸𑐂𑐰𑑄 𑐡𑑂𑐫𑑅𑐥𑐵𑑅𑐮𑐵𑑅𑐥𑐶𑑄𑐟 𑐥𑐬𑐵𑐩𑑂𑐥𑐬𑐵𑐐𑐟 𑐬𑐸𑐥𑑄 𑐡𑑂𑐫𑑅 𑐖𑐎 𑐥𑐸𑐖𑑂𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐰𑐜𑐵𑐢𑑂𑐫𑐎𑑂𑐲 𑐣𑐷𑐮𑐧𑐴𑐵𑐡𑐸𑐬 𑐡𑐾𑐱𑐵𑐬𑑄 𑐎𑐣𑐵𑐡𑐷𑐐𑐸 𑐡𑐸 𑑋
𑐳𑑂𑐠𑐵𑐣𑐷𑐫𑑗𑑔 𑐡𑑃𑐫𑐵 𑐧𑐵𑐳𑐸𑐡𑐾𑐰 𑐎𑐬𑑂𑐩𑐵𑐔𑐵𑐬𑑂𑐫𑑄 𑐢𑐵𑑅𑐎𑐠𑑄 𑐔𑐵𑐥𑐵𑐐𑐵𑐄𑑃 𑐳𑑂𑐠𑐵𑐥𑐣𑐵 𑐖𑐸𑐂 𑐣𑑂𑐴𑑂𑐫𑑅 𑐴𑐾 𑐧𑐸𑐮𑐸𑐐𑐵𑑄 𑐡𑐸𑐐𑐸 𑐏𑑅 𑑋 𑐧𑐸𑐮𑐸𑐐𑐵𑑄𑐫𑐵𑐟 𑐱𑐶𑐰𑐥𑐸𑐬 𑐣𑑄 𑐢𑐵𑐂𑐐𑐸 𑐏𑑅 𑑋 𑐩𑐴𑐵𑐩𑐘𑑂𑐖𑐸𑐱𑑂𑐬𑐷𑑄 𑐳𑐣𑑂𑐟𑐵𑐣𑐾𑐱𑑂𑐰𑐬 𑐩𑐴𑐵𑐡𑐾𑐰𑐫𑐵 𑐳𑐷𑐩𑐵𑐣𑐵, 𑐧𑐵𑐜𑐾𑐐𑐵𑑄𑐫𑐵 𑐡𑐠𑐸𑐂 𑐥𑐴𑐵𑐜 𑐰 𑐔𑑀𑐨𑐵𑐬𑐫𑐵 𑐥𑐴𑐵𑐜𑐫𑐵𑐟 𑐟𑐵𑐣𑑂𑐟𑑂𑐬𑐶𑐎 𑐟𑐬𑐰𑐵𑐬𑑄 𑐥𑐵𑐮𑐵𑑅 𑐡𑐴𑐫𑐵 𑐮𑑅 𑐥𑐶𑐎𑐵𑐐𑐸 𑐢𑐫𑐵𑐐𑐸 𑐎𑐶𑑄𑐰𑐡𑐣𑑂𑐟𑐷 𑐠𑐣 𑐡𑐸 𑑋 𑐠𑑂𑐰 𑐡𑐴 𑐳𑐸𑐎𑐾 𑐖𑐸𑐂 𑐣𑑂𑐴𑑂𑐫𑑅 𑐴𑐾 𑐣𑐵𑐐𑐬𑐵𑐖𑐫𑐵𑐟 𑐟𑐫𑐾𑐩𑐵𑑅 𑐢𑐫𑐵𑐐𑐸 𑐮𑑂𑐫𑐵𑐏𑑄 𑐣𑐵𑐐𑐫𑐵𑐟 𑐟𑑅𑐐𑐸𑐮𑐶𑑄 𑐄𑐐𑐸 𑐠𑐵𑐫𑑂𑐫𑐵 𑐣𑐵𑑄 𑐣𑐵𑐐𑐡𑐴 𑐖𑐹𑐰𑐣 𑑋 𑐐𑐸𑐐𑐸 𑐢𑐵𑐥𑐵𑐏𑐾𑐮𑐫𑑂 𑐡𑐸 𑑋

𑐮𑑅 𑐳𑐸𑐎𑐾 𑐖𑐸𑐂𑐢𑐸𑑄𑐎𑐵𑑅 𑐡𑐎𑑂𑐲𑐶𑐞 𑐨𑐾𑐐𑐫𑐵 𑐕𑐐𑐹 𑐐𑐵𑑄 𑐩𑐵𑑅 𑐢𑐎𑐵𑑅 𑐄𑐐𑐸 𑐐𑐵𑑄𑐫𑐵 𑐣𑐵𑑄 𑐱𑐶𑐰𑐥𑐸𑐬 𑐢𑐎𑐵𑑅 𑐟𑑅𑐐𑐸 𑐏𑑅 𑑋 𑐮𑑅 𑐳𑐸𑐎𑐾 𑐖𑐸𑐂𑐢𑐸𑑄𑐎𑐵𑑅 𑐠𑐸𑐐𑐸 𑐠𑐵𑐳𑐫𑑂 𑐥𑐱𑐸𑐥𑐟𑐶 𑐩𑐴𑐵𑐡𑑂𑐫𑑅 𑐄𑐟𑑂𑐥𑐟𑑂𑐟𑐶 𑐖𑐹𑐐𑐸 𑐢𑐫𑐵𑐐𑐸 𑐎𑐶𑑄𑐰𑐡𑐣𑑂𑐟𑐷 𑐣𑑄 𑐡𑐸 𑑋 𑐧𑐸𑐮𑐸𑐐𑐵𑑄𑐫𑐵 𑐥𑐹𑐬𑑂𑐰𑐥𑐵𑐏𑐾 𑐩𑐴𑐵𑐡𑑂𑐫𑑅 𑐣𑑄 𑐡𑐸 𑑋

𑐧𑐸𑐮𑐸𑐐𑐵𑑄𑐫𑐵 𑐕𑐩𑑂𑐴 𑐩𑐣𑐸𑐏𑑄 𑐧𑐡𑐩𑐵𑐳𑐷 𑐫𑐵𑑅𑐐𑐸𑐮𑐶𑑄 𑐰𑐫𑐵𑐐𑐸 𑐏𑑂𑐰𑐵𑑅 𑐳𑑂𑐰𑐫𑐾𑐩𑐏𑐸 𑐳𑐎𑐳𑐶𑐣𑑄 𑐄𑐐𑐸 𑐠𑐵𑐫𑑂 𑐟𑑂𑐰𑑅𑐟𑐵 𑐰𑑄𑐐𑐸𑐮𑐶𑑄 𑐩𑐴𑐵𑐡𑑂𑐫𑑅 𑐣𑑄 𑐠𑐣𑑄 𑐥𑐱𑐸𑐥𑐟𑐶𑐂 𑐰𑑄𑐐𑐸 𑐎𑐶𑑄𑐰𑐡𑐣𑑂𑐟𑐷 𑐡𑐸𑐐𑐸 𑐏𑑃 𑐣𑑄 𑐎𑐬𑑂𑐩𑐵𑐔𑐵𑐬𑑂𑐫𑑄 𑐎𑐣𑐵𑐡𑐶𑐮 𑑋 𑐧𑐸𑐮𑐸𑐐𑐵𑐩𑑄 𑐩𑐴𑐵𑐡𑑂𑐫𑑅 𑐰 𑐳𑑂𑐠𑐵𑐣𑐷𑐫 𑐩𑐣𑐹𑐟 𑐡𑐣𑐵𑐰𑑄𑐐𑐸𑐮𑐶𑑄 𑐐𑐵𑑄𑐫𑐵 𑐱𑐹𑐣𑑂𑐫 𑐖𑐸𑐫𑐵𑑅 𑐐𑑂𑐫𑐵𑐣𑐵𑐥𑐸𑐫𑐵 𑐰𑐮 𑑋 𑐠𑐸𑐎𑐶𑐫𑐵 𑐟𑑅𑐡𑑃 𑐮𑐶𑐥𑐵 𑐐𑐵𑐩𑐫𑑂 𑐔𑑂𑐰𑑄𑐐𑐸 𑐦𑐸𑐎𑑂𑐎 𑐕𑐾𑑃 𑐡𑐸𑐣𑐵𑐰𑐣 𑑋 𑐄𑐧𑐮𑐫𑑂 𑐀𑐣 𑐕𑐐𑐹 𑐥𑐬𑐶𑐰𑐵𑐬 𑐖𑐎 𑐔𑑂𑐰𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐐𑐵𑑄𑐫𑐵 𑐏𑐶𑐄𑑃𑐳𑐾 𑐔𑑂𑐰𑐣𑐵𑑅 𑐧𑐸𑐮𑐸𑐫𑐵 𑐰𑑄𑐐𑐸𑐸𑐮𑐶𑑄 𑐄𑐎𑐶𑐫𑐵𑐟 𑐱𑐶𑐰𑐥𑐸𑐬 𑐧𑐸𑐮𑐸𑐳𑐶𑐔𑑂𑐰 𑐀𑐬𑑂𑐠𑐵𑐟 𑐧𑐸𑐮𑐸 𑐢𑐎𑐵𑑅 𑐣𑐵𑑄 𑐟𑑅𑐐𑐸 𑐏𑑅 𑑋

𑐧𑐸𑐮𑐸𑐐𑐵𑐩𑐫𑑂 𑐁𑐟𑐎𑑄 𑐕𑐸 𑐣𑑄 𑐱𑐶𑐮𑐵𑐥𑐟𑑂𑐬 𑐩𑐮𑐹𑐣𑐶𑐐𑐸𑐮𑐶𑑄 𑐠𑑂𑐰 𑐖𑐵𑐟𑑂𑐬𑐵 𑐐𑐸𑐧𑐮𑐫𑑂 𑐳𑐸𑐣𑐵𑑄 𑐣𑑂𑐫𑐵𑐫𑐾𑐎𑐹𑐐𑐸 𑐢𑐫𑐵𑐐𑐸 𑐳𑐷𑐩𑐡𑐸𑐣𑐶𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐧𑐸𑐮𑐸𑐐𑐵𑑄𑐫𑐵 𑐕𑐐𑐹 𑐀𑐖𑐹𑐔𑐵𑐫𑐵𑐥𑐸𑐐𑐸 𑐱𑐎𑑂𑐟𑐶 𑐣𑑄 𑐡𑐸 𑐢𑐵𑐂 𑑋 𑐠𑑂𑐰 𑐐𑐵𑐩𑐫𑑂 𑐔𑑂𑐰𑑄𑐐𑐸 𑐕𑐸𑑄 𑐣𑑄 𑐥𑐸𑐮𑐵𑑄𑐐𑐸 𑐳𑐵𑐩𑐵𑐣 𑐥𑐶𑐣𑐾 𑐩𑐾𑐠𑐵𑐫𑑂 𑐫𑑄𑐎𑐮 𑐢𑐵𑐫𑐾𑐰𑑄 𑐧𑐵𑑄𑐩𑐮𑐵𑐎 𑐳𑑅 𑐟𑐵𑐫𑐾𑐡𑐫𑐵𑐰𑐂 𑑋 𑐄𑐎𑐶𑑄 𑐠𑐠𑐾 𑐧𑐵𑑄𑐩𑐮𑐵𑐎 𑐳𑑅 𑐧𑐷 𑐢𑐫𑐵𑐐𑐸 𑐳𑐶𑐄𑐥𑐶𑑄 𑐩𑐣𑐹𑐟𑐫𑑂𑐳𑑄 𑐠𑐣𑑄 𑐕𑐸𑑄 𑐣𑑄 𑐥𑐸𑐮𑐵𑑄𑐐𑐸 𑐳𑐵𑐩𑐵𑐣 𑐥𑐶𑐣𑐾 𑐫𑑄𑐎𑐷𑐩𑐏𑐸 𑐢𑐵𑐂 𑑋 𑐠𑐣𑐫𑐵 𑐐𑐵𑑄𑐫𑐵 𑐳𑐵𑐩𑐵𑐣 𑐥𑐶𑐣𑐾 𑐐𑐵𑐩𑐫𑑂 𑐫𑑄𑐎𑐮𑐎𑐶 𑐔𑐕𑐶 𑐡𑑂𑐫𑐣𑐾 𑐦𑐂𑐩𑐏𑐸 𑐢𑐫𑐵𑐐𑐸 𑐧𑐸𑐮𑐸𑐰𑐵𑐳𑐷𑐟𑐫𑑂 𑐢𑐵𑐥𑐹 𑐀𑐗𑑄 𑐡𑐣𑐶 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS