Read news in NepalBhasa text-- www.hamroschool.com BACK 𑐕𑐾𑑃𑐫𑑂 𑐩𑐳𑑂𑐟 𑐕𑐸 𑐫𑐵𑐣𑐵𑐔𑑂𑐰𑐣 ? 𑐀𑐣𑐮𑐵𑐂𑐣𑐫𑑂 𑐣𑐾𑐰𑐵𑑅𑐨𑐵𑐳𑑄 𑐩𑐳𑑂𑐟𑐫𑑂 𑐳𑐦𑐹 𑐧𑑂𑐰𑑄𑐎𑐵𑐡𑐶𑐳𑑄 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐕𑐾𑑃𑐫𑑂 𑐩𑐳𑑂𑐟 𑐕𑐸 𑐫𑐵𑐣𑐵𑐔𑑂𑐰𑐣 ? 𑐀𑐣𑐮𑐵𑐂𑐣𑐫𑑂 𑐣𑐾𑐰𑐵𑑅𑐨𑐵𑐳𑑄 𑐩𑐳𑑂𑐟𑐫𑑂 𑐳𑐦𑐹 𑐧𑑂𑐰𑑄𑐎𑐵𑐡𑐶𑐳𑑄

𑐫𑐾𑑃 – 𑐎𑑀𑐬𑑀𑐣𑐵 𑐨𑐵𑐂𑐬𑐳 (𑐎𑑀𑐨𑐶𑐜-𑑑𑑙)𑐫𑐵 𑐎𑐵𑐬𑐞𑑄 𑐰𑑄𑐐𑐸 𑐩𑑄𑐐𑐮𑐰𑐵𑑅 𑐣𑐶𑐳𑐾𑑄 𑐣𑐾𑐥𑐵𑑅 𑐮𑐎𑐜𑐵𑐄𑐣𑐫𑐵 𑐀𑐰𑐳𑑂𑐠𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐎𑑀𑐬𑑀𑐣𑐵𑐫𑐵 𑐳𑑄𑐎𑑂𑐬𑐩𑐞 𑐖𑐸𑐂𑐦𑐸𑐐𑐸 𑐢𑐵𑐳𑐾𑑄 𑐕𑐰𑐵𑑅𑐫𑐵 𑐣𑐶𑑄𑐟𑐶𑑄 𑐕𑐾𑑃 𑐣𑑄 𑐥𑐶𑐴𑐵𑑄𑐩𑐰𑐣𑐾𑐟 𑐂𑐣𑐵𑐥 𑐫𑐵𑑅𑐐𑐸 𑐏𑑅 𑑋 𑐁𑑅 𑐟𑐎 𑐥𑑂𑐫𑐩𑑂𑐴 𑐣𑐾𑐥𑐵𑑅𑐩𑐶 𑐫𑐵𑐎𑐾 𑐠𑐸𑐐𑐸 𑐨𑐵𑐂𑐬𑐳 𑐏𑐣𑐾𑐰𑑄 𑐳𑐬𑐎𑐵𑐬𑑄 𑐮𑐎𑐜𑐵𑐄𑐣𑐫𑐵 𑐃 𑐀𑐗 𑐠𑐥 𑐫𑐵𑐂𑐐𑐸 𑐳𑑄𑐎𑐾𑐟 𑐧𑐶𑐄𑐐𑐸 𑐡𑐸 𑑋

𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐕𑐾𑑃𑐫𑑂 𑐔𑑂𑐰𑐣𑐵𑑅 𑐕𑐶𑐐𑐸 𑐩𑐳𑑂𑐟 𑐕𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 ? 𑐕𑐶𑐟𑑅 𑐣𑑄 𑐩𑐳𑑂𑐟𑐫𑑂𑐟 𑐕𑐸𑑄 𑐬𑐔𑐣𑐵𑐟𑑂𑐩𑐎 𑐖𑑂𑐫𑐵 𑐫𑐵𑐎𑐾𑐡𑐸𑐳𑐵 𑐰𑐵 𑐕𑐸𑑄 𑐱𑐶𑐎𑑂𑐲𑐵 𑐧𑐷𑐐𑐸 𑐖𑑂𑐫𑐵 𑐫𑐵𑐫𑐾𑐡𑐸𑐳𑐵 𑐖𑐶𑐄 𑐢𑐎𑐵𑑅 𑐧𑐶𑐔𑐵𑑅 𑐖𑐎𑑄 𑐰𑐫𑐵𑐔𑑂𑐰𑑄𑐐𑐸 𑐩𑐡𑐸𑐮𑐵 ? 𑐫𑐡𑐶 𑐀𑐠𑐾 𑐏𑑅𑐳𑐵 𑐠𑑅 𑐩𑐳𑑂𑐟𑐫𑑂𑐟 𑐠𑑅𑐐𑐸 𑐩𑐵𑑄𑐨𑐵𑐳𑑄 𑐴𑐾 𑐩𑐳𑑂𑐟𑐫𑑂 𑐧𑐵𑐏𑑄 𑐧𑑂𑐰𑑄𑐎𑐵𑐡𑐶𑐳𑑄 𑑋 𑐴𑐵𑐣𑑄 𑐠𑐖𑑂𑐫𑐵𑑅𑐐𑐸 𑐂𑐮𑐫𑑂 𑐐𑐣 𑐰𑐣𑐵𑑅 𑐀𑐖𑑂𑐫𑐵𑑅𑐐𑐸 𑐳𑐦𑐹 𑐩𑐵𑐮𑐾𑐐𑐸 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐣𑐵𑐡𑐶𑐮 𑐖𑐸𑐂 𑑋

𑐀𑐖𑑂𑐫𑐵𑑅𑐐𑐸 𑐳𑐦𑐹 𑐕𑐶𑑄 𑐥𑐶𑐴𑐵𑑄𑐰𑐣𑐵 𑐣𑑂𑐫𑐵𑑅 𑐰𑐣𑐾𑐐𑐸 𑐰𑐵 𑐳𑐸𑑄 𑐣𑐵𑐥 𑐎𑐵𑑅𑐰𑐣𑐾𑐐𑐸 𑐁𑐰𑐱𑑂𑐫𑐎𑐟𑐵 𑐩𑐡𑐸 𑑋 𑐕𑐶𑑄 𑐕𑐾𑑃 𑐔𑑂𑐰𑐣𑐵 𑐳𑐶𑐟𑐶𑐎𑑄 𑐴𑐾 𑐀𑐖𑑂𑐫𑐵𑑅𑐐𑐸 𑐳𑐦𑐹 𑐧𑑂𑐰𑐣𑐵𑐡𑐷𑐦𑐂 𑑋 𑐰 𑐣𑑄 𑐫𑐂𑐥𑐸𑐐𑐸 𑐔𑐶𑐟𑑂𑐬 𑐳𑐴𑐶𑐟 𑑋 𑐮𑐾𑐚𑑂𑐳 𑐬𑐶𑐜 𑐊𑐳𑐶𑐫𑐵𑑄 (Lets Read Asia) 𑐕𑐶𑐐𑐸 𑐠𑑂𑐰 𑐂𑐔𑑂𑐕𑐵 𑐥𑐹𑐰𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐾𑐚𑑂𑐳 𑐬𑐶𑐜 𑐊𑐳𑐶𑐫𑐵𑐫𑐵 𑐧𑐾𑐰𑐳𑐵𑐂𑐚𑐫𑑂 𑑗𑑐𑐥𑐸 𑐳𑑂𑐰𑐫𑐵𑑄 𑐀𑐥𑑂𑐰 𑐩𑐳𑑂𑐟𑐫𑑂 𑐧𑐵𑐏𑑄𑐫𑐵 𑐳𑐦𑐹𑐟 𑐣𑐾𑐥𑐵𑐮𑐨𑐵𑐳𑑄 𑐄𑐥𑐮𑐧𑑂𑐢 𑐡𑐸 𑑋 𑐧𑐾𑐰𑐳𑐵𑐂𑐚𑐫𑑂 𑐰𑐣𑐾𑐟 𑐠𑐣 𑐎𑑂𑐮𑐶𑐎 𑐫𑐵𑐣𑐵𑐡𑐶𑐳𑑄 𑑋

𑐁𑑅 𑐰𑐶𑐱𑑂𑐰𑐣𑑂𑐫𑑄𑐎 𑐩𑐴𑐵𑐩𑐵𑐬𑐷 𑐖𑐸𑐫𑐵𑐔𑑂𑐰𑑄𑐐𑐸 𑐎𑑀𑐬𑑀𑐣𑐵 𑐨𑐵𑐂𑐬𑐳 𑐳𑐩𑑂𑐧𑐣𑑂𑐢𑐶 𑐳𑐦𑐹 𑐣𑑄 𑐩𑐳𑑂𑐟𑐫𑑂𑐟 𑐠𑐸𑐂𑐎𑐾𑐐𑐸 𑐣𑐶𑑄𑐟𑐶𑑄 𑐠𑐸𑐎𑐷 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐡𑐸 𑑋 𑐠𑐸𑐎𑐷 𑐖𑐣𑐎𑐰𑐶 𑐡𑐸𑐬𑑂𑐐𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐔𑑂𑐰𑐫𑐵𑐡𑐷𑐐𑐸 𑐥𑐸𑐮𑐸𑐥𑐸𑐮𑐸 𑐐𑐾𑐬𑐵, 𑐏𑐵𑐔𑐵 𑐴𑑃𑐫𑑂𑐔𑐵, 𑐴𑐾 𑐩𑐵𑐎𑑅 𑐣𑐶𑐳𑐾𑑄 𑐎𑐫𑐵𑑅 𑐣𑐾𑐰𑐵𑑅𑐟𑐫𑑂 𑐨𑑀𑐚𑑀 𑐖𑐵𑐟𑑂𑐬𑐵 𑐟𑐎𑐫𑐵 𑐩𑐳𑑂𑐟𑐫𑑂 𑐳𑐦𑐹 𑐄𑐥𑐮𑐧𑑂𑐢 𑐡𑐸 𑑋 𑐀𑐠𑐾𑐴𑐾 𑐩𑐾𑐩𑐾𑐐𑐹 𑐡𑐾𑐫𑑂𑐫𑐵 𑐩𑐳𑑂𑐟𑐫𑑂 𑐳𑐦𑐹𑐫𑐵𑐟 𑐨𑐵𑐫𑑂 𑐴𑐷𑐎𑐵𑑅 𑐣𑐾𑐰𑐵𑑅 𑐨𑐵𑐳𑑄 𑐟𑐫𑐵𑐟𑑅𑐐𑐸 𑐩𑐳𑑂𑐟𑐫𑑂 𑐳𑐦𑐹 𑐣𑑄 𑐄𑐥𑐮𑐧𑑂𑐢 𑐡𑐸 𑑋

𑐠𑐸𑐐𑐸 𑐴𑐾 𑐧𑐾𑐰𑐳𑐵𑐂𑐚𑐫𑑂 𑐏𑐳 𑐣𑐾𑐥𑐵𑐮𑐷, 𑐠𑐵𑐬𑐹, 𑐟𑐵𑐩𑐵𑐒, 𑐀𑑄𑐐𑑂𑐬𑐾𑐖𑐷, 𑐧𑑄𑐮𑐵𑐐𑐷 𑐣𑐵𑐥𑑄 𑐁𑐥𑐵𑐮𑑄 𑐊𑐳𑐶𑐫𑐵𑐮𑐷 𑐡𑐾𑐫𑑂𑐫𑐵 𑐨𑐵𑐳𑑄 𑐩𑐳𑑂𑐟𑐫𑑂 𑐳𑐦𑐹 𑐟𑐫𑐵𑐟𑑅𑐐𑐸 𑐡𑐸 𑑋 𑐮𑐾𑐚𑑂𑐳 𑐬𑐶𑐜 𑐊𑐳𑐶𑐫𑐵𑐫𑐵 𑐩𑑀𑐧𑐵𑐂𑐮 𑐊𑐥 𑐜𑐵𑐄𑐣𑐮𑑀𑐜 𑐫𑐵𑐣𑐵𑑅 𑐩𑑀𑐧𑐵𑐂𑐮𑐫𑑂 𑐣𑑄 𑐕𑐶𑑄 𑐩𑐳𑑂𑐟𑐫𑑂𑐟 𑐠𑐖𑑂𑐫𑐵𑑅𑐐𑐸 𑐳𑐦𑐹 𑐧𑑂𑐰𑑄𑐎𑐵𑐡𑐶𑐦𑐂 𑑋

𑐏𑐳 𑐨𑐵𑐳𑑄 𑐃-𑐥𑐸𑐳𑑂𑐟𑐎𑐵𑐮𑐫
𑐃-𑐥𑐸𑐳𑑂𑐟𑐎𑐵𑐮𑐫𑑄 𑐣𑐶𑑅𑐱𑐸𑐎𑑂𑐮 𑐬𑐸𑐥𑑄 𑐏𑐳 𑐣𑐾𑐥𑐵𑐮𑐷 𑐨𑐵𑐳𑑄 𑐳𑐦𑐹 𑐧𑑂𑐰𑐣𑐾𑐐𑐸 𑐳𑐸𑐰𑐶𑐢𑐵 𑐱𑐸𑐬𑐸 𑐫𑐵𑑅𑐐𑐸 𑐡𑐸 𑑋 𑐄𑐐𑐸 𑐀𑐣𑐮𑐵𑐂𑐣𑐫𑑂 𑐏𑐸𑐡𑑂𑐰𑐮𑑄 𑐩𑐮𑑂𑐫𑐵𑐎 𑐳𑐦𑐹𑐟 𑐟𑐫𑐵𑐟𑑅𑐐𑐸 𑐡𑐸 𑑋 𑐄𑐐𑐸 𑐀𑐣𑐮𑐵𑐂𑐣𑐫𑑂 𑐩𑐳𑑂𑐟𑐫𑑂 𑐣𑐶𑑄𑐟𑐶𑑄 𑑑 𑐟𑐐𑐶𑑄 𑐣𑐶𑐳𑐾𑑄 𑑑𑑐 𑐟𑐐𑐶𑑄 𑐟𑐎𑐫𑐵 𑐥𑐵𑐛𑑂𑐫𑐎𑑂𑐬𑐩 𑐣𑑄 𑐟𑐫𑐵𑐟𑑅𑐐𑐸 𑐡𑐸 𑑋 𑐄𑐎𑐷 𑐳𑐦𑐹 𑐖𑐎 𑐩𑐏𑐳𑐾𑑄 𑐨𑐶𑐜𑐶𑐫𑑀 𑐳𑑂𑐰𑐫𑐵 𑐳𑑂𑐫𑐣𑐵𑐎𑐵𑐫𑐾𑐦𑐂𑐐𑐸𑐸 𑐳𑐸𑐧𑐶𑐢𑐵 𑐟𑐎𑑄 𑐄𑐥𑐮𑐧𑑂𑐢 𑐫𑐵𑐎𑐵𑐟𑑅𑐐𑐸 𑐡𑐸 𑑋 𑐠𑐸𑐐𑐸 𑐧𑐾𑐰𑐳𑐵𑐂𑐟𑐫𑑂 𑐳𑑂𑐰𑐾𑐟 𑐠𑐣 𑐎𑑂𑐮𑐶𑐎 𑐫𑐵𑐣𑐵𑐡𑐶𑐳𑑄 𑑋

(𑐣𑐾. 𑐳𑑄. 𑑑𑑑𑑔𑑐 𑐔𑑁𑐮𑐵𑐠𑑂𑐰 𑑔 / 𑐰𑐶. 𑐳𑑄 𑑒𑑐𑑗𑑖 𑐔𑐿𑐟 𑑑𑑕, 𑐱𑐣𑐶𑐰𑐵𑑅)

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS