Read news in NepalBhasa text-- www.hamroschool.com BACK 𑐁𑑅 𑐣𑑂𑐴𑐹𑐐𑐸 𑐎𑑀𑐬𑑀𑐣𑐵 𑐎𑐾𑐣𑑂𑐡𑑂𑐬 𑐀𑐩𑐾𑐬𑐶𑐎𑐵 : 𑑘𑑐 𑐴𑐖𑐵𑐬 𑐩𑐣𑐹 𑐳𑐷 𑐦𑐂𑐐𑐸 𑐀𑐣𑐸𑐩𑐵𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑑅 𑐣𑑂𑐴𑐹𑐐𑐸 𑐎𑑀𑐬𑑀𑐣𑐵 𑐎𑐾𑐣𑑂𑐡𑑂𑐬 𑐀𑐩𑐾𑐬𑐶𑐎𑐵 : 𑑘𑑐 𑐴𑐖𑐵𑐬 𑐩𑐣𑐹 𑐳𑐷 𑐦𑐂𑐐𑐸 𑐀𑐣𑐸𑐩𑐵𑐣

𑐫𑐾𑑃 – 𑐰𑐶𑐱𑑂𑐰𑐫𑑂 𑐣𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐎𑑀𑐬𑑀𑐣𑐵 𑐨𑐵𑐂𑐬𑐳𑐫𑐵 𑐣𑑂𑐴𑐹𑐐𑐸 𑐂𑐥𑐶𑐳𑐾𑐣𑑂𑐚𑐬 𑐁𑑅 𑐀𑐩𑐾𑐬𑐶𑐎𑐵 𑐖𑐹𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑐵 𑐖𑑀𑐣 𑐴𑐥𑑂𑐎𑐶𑐣𑑂𑐳 𑐫𑐸𑐣𑐶𑐨𑐬𑑂𑐳𑐶𑐚𑐷𑑄 𑐩𑑂𑐴𑐶𑐐𑑅 𑐥𑐶𑐟 𑐧𑐶𑐄𑐐𑐸 𑐣𑑂𑐴𑐹𑐐𑐸 𑐟𑐠𑑂𑐫𑐵𑑄𑐎 𑐎𑐠𑑄 𑐀𑐩𑐾𑐬𑐶𑐎𑐵𑐫𑑂 𑐁𑑅 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐶𑐟 𑐰𑐶𑐬𑐵𑐩𑐷𑐟𑐫𑑂 𑐮𑑂𑐫𑐵𑑅 𑑘𑑕,𑑐𑑐 𑐠𑑂𑐫𑑄𑐐𑐸 𑐡𑐸 𑐐𑐸𑐐𑐸 𑐰𑐶𑐱𑑂𑐰𑐫𑑂 𑐴𑐾 𑐡𑐎𑐮𑐫𑑂 𑐀𑐥𑑂𑐰𑑅 𑐏𑑅 𑑋

𑐔𑐷𑐣𑐫𑑂 𑐳𑑄𑐎𑑂𑐬𑐩𑐶𑐟𑐫𑐵 𑐮𑑂𑐫𑐵 𑑘𑑑,𑑗𑑘𑑒 𑐠𑑂𑐫𑑄𑐐𑐸 𑐏𑑅𑐳𑐵 𑐂𑐚𑐵𑐮𑐷𑐂 𑑘𑑐,𑑕𑑘𑑙 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐔𑐷𑐣𑐫𑑂 𑐳𑐷𑐥𑐶𑐣𑐶 𑐮𑑂𑐫𑐵𑑅 𑐢𑐵𑑅𑐳𑐵 𑐔𑐷𑐣 𑐰 𑐂𑐚𑐵𑐮𑐷𑐂 𑐳𑐶𑐧𑐾𑑄 𑐎𑐩 𑐡𑐸 𑑋 𑐔𑐷𑐣𑐫𑑂 𑐳𑐷𑐥𑐶𑐣𑐶 𑐮𑑂𑐫𑐵𑑅 𑑓𑑒𑑙𑑑 𑐏𑑅𑐳𑐵 𑐂𑐚𑐵𑐮𑐷𑐂 𑑘𑑒𑑑𑑕 𑐠𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑑂 𑐢𑐵𑑅𑐳𑐵 𑑑𑑓𑑐𑑐 𑐖𑐎 𑐳𑐷𑐐𑐸 𑐡𑐸 𑑋

𑐟𑐬 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐷𑐟𑐫𑑂𑐳𑑄 𑐫𑐵𑐣𑐵𑐟𑑅𑐐𑐸 𑐀𑐣𑐸𑐩𑐵𑐣 𑐎𑐠𑑄 𑐀𑐩𑐾𑐬𑐶𑐎𑐵𑑄 𑐎𑑀𑐬𑑀𑐣𑐵𑐫𑐵 𑐩𑐺𑐟𑑂𑐫𑐸𑐡𑐬𑐫𑑂 𑐣𑑄 𑐩𑐾𑐥𑐶𑑄 𑐳𑐎𑐳𑐶𑐟𑑄 𑐟𑑂𑐫𑐵𑐎𑐷𑐐𑐸 𑐳𑐩𑑂𑐨𑐵𑐰𑐣𑐵 𑐥𑑂𑐬𑐰𑐮 𑐡𑐸 𑑋 𑐀𑐩𑐾𑐬𑐶𑐎𑐵𑐫𑑂 𑐎𑑀𑐬𑐵𑐣𑐵 𑐳𑑄𑐎𑑂𑐬𑐩𑐞𑑄 𑐎𑐫𑐵𑑅 𑑘𑑐,𑑐𑑐𑑐 𑐩𑐣𑐹𑐫𑐵 𑐖𑑂𑐫𑐵𑐣 𑐰𑐣𑐷𑐐𑐸 𑐀𑐣𑐸𑐩𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣 𑐕𑐣𑑂𑐴𑐸𑐫𑐵 𑐡𑐸𑐣𑐾 𑐴𑐾 𑐕𑐎𑑂𑐰𑐮𑑄 𑑑𑑗 𑐴𑐖𑐵𑐬𑐫𑐵 𑐮𑑂𑐫𑐵𑐏𑑄 𑐳𑑄𑐎𑑂𑐬𑐩𑐶𑐟 𑐀𑐥𑑂𑐰𑑅𑐐𑐸 𑐏𑑅 𑑋 𑐁𑑅 𑐰𑐂𑐐𑐸 𑐀𑐥𑑂𑐬𑐶𑐮 𑐩𑐴𑐶𑐣𑐵𑐫𑑂 𑐀𑐣 𑐣𑑂𑐴𑐶𑑄 𑑒𑑓𑑐𑑐 𑐩𑑂𑐴 𑐟𑐎 𑐩𑐣𑐹 𑐳𑐷 𑐦𑐂𑐐𑐸 𑐀𑐣𑐸𑐩𑐵𑐣 𑐳𑐩𑐾𑐟 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐳𑑂𑐠𑐶𑐟𑐶 𑐠𑐖𑑂𑐫𑐵𑑅𑐐𑐸 𑐏𑑅𑐳𑐵𑑄 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥𑑄 𑐡𑐾𑐱𑐫𑑂 𑐮𑐎𑐜𑐵𑐄𑐣 𑐏𑐸𑐮𑑂𑐮𑐵 𑐫𑐵𑐣𑐵𑑅 𑐩𑐣𑐹𑐟𑐫𑑂𑐟 𑐖𑑂𑐫𑐵𑐫𑑂 𑐮𑐐𑐾 𑐫𑐵𑐫𑐾𑐐𑐸 𑐧𑐶𑐔𑐵𑑅 𑐳𑐩𑐾𑐟 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐁𑑅 𑐰𑐂𑐐𑐸 𑐀𑐥𑑂𑐬𑐶𑐮 𑑑𑑒 𑐎𑐸𑐣𑑂𑐴𑐸 𑐂𑐳𑑂𑐚𑐬 𑐣𑐏𑑅𑐫𑐵 𑐮𑐳𑐟𑐵𑐫𑑂 𑐮𑐵𑐎𑐵𑑅 𑐀𑐩𑐾𑐬𑐶𑐎𑐵 𑐏𑐸𑐮𑐾 𑐫𑐵𑐫𑐾𑐐𑐸 𑐰𑐫𑑂𑐎𑑅𑐫𑐵 𑐫𑑀𑐖𑐣𑐵 𑐡𑐸 𑑋 𑐟𑐬 𑐄𑐎𑐶𑐫𑐵𑐟 𑐀𑐣𑐫𑐵 𑐁𑐥𑐵𑐮𑑄 𑐩𑐣𑐹𑐟𑐫𑑂𑐳𑑄 𑐢𑐵𑑅𑐳𑐵 𑐰𑐶𑐬𑑀𑐢 𑐫𑐵𑑅𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐷 𑐳𑑄𑐰𑐶𑐢𑐵𑐣 𑐎𑐠𑑄 𑐖𑐣𑐳𑑂𑐰𑐵𑐳𑑂𑐠𑑂𑐫 𑐳𑐩𑑂𑐧𑐣𑑂𑐢𑐷 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐀𑐢𑐶𑐎𑐵𑐬 𑐀𑐣𑐫𑐵 𑐬𑐵𑐖𑑂𑐫𑐟𑐫𑑂𑐟 𑐧𑐶𑐫𑐵𑐟𑑅𑐐𑐸 𑐖𑐸𑐫𑐵𑑅 𑐬𑐵𑐲𑑂𑐚𑑂𑐬𑐥𑐟𑐶𑑄 𑐢𑐵𑑅𑐳𑐵𑑄 𑐀𑐩𑐾𑐬𑐶𑐎𑐵 𑐟𑐟𑑂𑐎𑐵𑐮 𑐏𑐸𑐮𑐾 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐢𑐵𑑅𑐳𑐵 𑐏𑐣𑐾 𑐩𑐡𑐸𑐣𑐶 𑑋

(𑐳𑑂𑐬𑑀𑐟 : 𑐧𑐷𑐧𑐷𑐳𑐷 𑐣𑑂𑐫𑐹𑐖 𑐳𑐬𑑂𑐨𑐶𑐳)

𑐩𑐸𑐏𑑂𑐫 𑐎𑐾𑐣𑑂𑐡𑑂𑐬 𑐣𑑂𑐫𑐹𑐫𑑀𑐬𑑂𑐎 𑐐𑐣 𑐣𑐾𑐥𑐵𑑅𑐩𑐶 𑐫𑐎𑑂𑐰 𑐡𑐸
𑐠𑑁𑑄𑐎𑐣𑑂𑐴𑐫𑑂 𑐀𑐩𑐾𑐬𑐶𑐎𑐵𑐫𑐵 𑑕𑑐 𑐐𑐸𑐮𑐶𑑄 𑐬𑐵𑐖𑑂𑐫𑐫𑑂 𑐳𑑄𑐎𑑂𑐬𑐩𑐶𑐟𑐟 𑐮𑐸𑐫𑐵 𑐰𑑅𑐐𑐸 𑐡𑐸 𑑋 𑐄𑐎𑐷 𑐩𑐢𑑂𑐫𑐾 𑐣𑑄 𑐎𑐾𑐣𑑂𑐡𑑂𑐬 𑐢𑐵𑑅𑐳𑐵 𑐣𑑂𑐫𑐹𑐫𑑀𑐬𑑂𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐩𑐾𑐬𑐶𑐎𑐵𑐫𑐵 𑐎𑐸𑐮 𑐳𑑄𑐎𑑂𑐬𑐩𑐶𑐟𑐫𑐵 𑐎𑐬𑐶𑐧 𑐧𑐕𑐶 𑐣𑑂𑐫𑐹𑐫𑑀𑐬𑑂𑐎𑐫𑑂 𑐡𑐸 𑑋 𑐄𑐎𑐶𑐳𑐣𑑄 𑐀𑐣𑐫𑐵 𑐎𑑂𑐰𑐷𑐣𑑂𑐳 𑐰 𑐖𑑂𑐫𑐵𑐎𑑂𑐳𑐣 𑐴𑐵𑐂𑐚𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐳𑑄𑐎𑑂𑐬𑐩𑐶𑐟 𑐮𑐹𑐐𑐸 𑐡𑐸 𑑋 𑐠𑑂𑐰 𑐠𑐵𑐳𑐫𑑂 𑐣𑐾𑐥𑐵𑑅𑐩𑐶𑐟𑐫𑑂 𑐮𑑂𑐫𑐵𑑅 𑐣𑑄 𑐀𑐥𑑂𑐰𑑅 𑐡𑐸 𑑋 𑐣𑑂𑐫𑐹𑐫𑑀𑐬𑑂𑐎𑐫𑐵 𑐠𑐷𑐠𑐷 𑐀𑐳𑑂𑐥𑐟𑐵𑐮𑐫𑑂 𑐎𑑀𑐬𑑀𑐣𑐵 𑐳𑑄𑐎𑑂𑐬𑐩𑐶𑐟 𑐣𑑂𑐫𑐵𑐩𑑂𑐴 𑐣𑐾𑐥𑐵𑑅𑐩𑐶 𑐰𑐵𑐳𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐕𑐩𑑂𑐴 𑐳𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐣 𑐔𑑂𑐰𑑄𑐥𑐶𑑄 𑐣𑐾𑐥𑐵𑑅𑐩𑐶𑐟𑐫𑑂𑐳𑑄 𑐳𑑄𑐎𑑂𑐬𑐩𑐶𑐟 𑐣𑐾𑐥𑐵𑑅𑐩𑐶𑐟𑐫𑑂 𑐮𑑂𑐫𑐵𑑅 𑐀𑐗 𑐫𑐎𑑂𑐰 𑐡𑐫𑐾𑐩𑐵𑑅 𑐢𑐎𑐵𑑅 𑐀𑐣𑐸𑐩𑐵𑐣 𑐫𑐵𑑅𑐐𑐸 𑐡𑐸 𑑋

(𑐣𑐾. 𑐳𑑄. 𑑑𑑑𑑔𑑐 𑐔𑑁𑐮𑐵𑐠𑑂𑐰 𑑓 / 𑐰𑐶. 𑐳𑑄 𑑒𑑐𑑗𑑖 𑐔𑐿𑐟 𑑑𑑔, 𑐱𑐸𑐎𑑂𑐬𑐰𑐵𑑅)

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS