𑐐𑑂𑐰𑐮𑐫𑐵 𑐥𑐶𑑄𑐐𑐮𑐵𑐩𑐵𑐃𑐫𑐵 𑐖𑐵𑐟𑑂𑐬𑐵𑐫𑑂 𑐎𑑀𑐲𑐫𑐵 𑐥𑑄𑐐𑑅
𑐫𑐾𑑃- 𑐐𑑂𑐰𑐮 𑐡𑐾𑐱𑐫𑑂 𑐣𑑂𑐫𑐵𑐫𑐾𑐎𑐷𑐐𑐸 𑐥𑐶𑑄𑐐𑐮𑐵𑐩𑐵𑐃 (𑐰𑐖𑑂𑐬𑐾𑐱𑑂𑐰𑐬 𑐩𑐵𑐟𑐵) 𑐫𑐵 𑐖𑐵𑐟𑑂𑐬𑐵 𑐣𑑂𑐴𑑂𑐫𑐵𑐎𑐾𑐟 𑐳𑐩𑐳𑑂𑐫𑐵 𑐖𑐹𑐐𑐸 𑐡𑐸 𑑋 𑐥𑐱𑐸𑐥𑐟𑐶 𑐎𑑂𑐲𑐾𑐟𑑂𑐬 𑐰𑐶𑐎𑐵𑐳 𑐎𑑀𑐲𑑄 𑐖𑐵𑐟𑑂𑐬𑐵𑐫𑐵 𑐩𑐸𑐁𑐧𑑂𑐖𑐵 𑐩𑐧𑐶𑐄𑐐𑐸𑐮𑐶𑑄 𑐠𑐸𑐐𑐸 𑐡𑑃𑐫𑑂 𑐄𑐐𑐸 𑐖𑐵𑐟𑑂𑐬𑐵 𑐣𑑂𑐴𑑂𑐫𑐵𑐎𑐾 𑐩𑐦𑐂𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐖𑐵𑐟𑑂𑐬𑐵𑐮𑐶𑐳𑐾 𑐳𑐬𑑀𑐎𑐵𑐬 𑐡𑐸𑐥𑐶𑑄𑐳𑑄 𑐢𑐵𑑅𑐐𑐸 𑐡𑐸 𑑋
𑐡𑐾𑐱𑑀𑐡𑑂𑐢𑐵𑐬 𑐥𑐸𑐖𑐵 𑐳𑑄𑐔𑐵𑐮𑐣 𑐳𑐩𑐶𑐟𑐶𑑄 𑐕𑐐𑐹 𑐰𑐶𑐖𑑂𑐘𑐥𑑂𑐟𑐷 𑐖𑐵𑐬𑐷 𑐫𑐵𑐳𑐾𑑄 𑐎𑑀𑐲𑑄 𑐠𑑅𑐥𑐶𑑄 𑐩𑐸𑐁𑐧𑑂𑐖𑐵 𑐩𑐧𑐶𑐄𑐐𑐸𑐮𑐶𑑄 𑐖𑐵𑐟𑑂𑐬𑐵 𑐣𑑂𑐴𑑂𑐫𑐵𑐎𑐾𑐟 𑐴𑐾 𑐳𑐩𑐳𑑂𑐫𑐵 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐳𑐎𑐮 𑐥𑑂𑐬𑐵𑐞𑐷𑐫𑐵 𑐎𑐮𑑂𑐫𑐵𑐞𑐫𑐵 𑐎𑐵𑐩𑐣𑐵 𑐫𑐵𑐳𑐾𑑄 𑐰𑐵𑐦𑐫𑑂, 𑐩𑐶, 𑐮𑑅 𑐰 𑐮𑑂𑐰𑐔𑑄 𑐎𑐂𑐐𑐸 𑐨𑐫𑑂 𑐩𑐡𑐫𑐾𑐩𑐵 𑐢𑐂𑐐𑐸 𑐎𑐵𑐩𑐣𑐵 𑐫𑐵𑐳𑐾𑑄 𑐠𑑂𑐰 𑐖𑐵𑐟𑑂𑐬𑐵 𑐫𑐵𑐂𑐐𑐸 𑐏𑑅𑐳𑐵 𑐖𑐵𑐟𑑂𑐬𑐵 𑐫𑐵𑐫𑐾 𑐳𑑂𑐰𑐫𑐵𑑄 𑐥𑑂𑐫𑐣𑑂𑐴𑐸 𑐣𑑂𑐴𑑂𑐫𑑅 𑐰𑐿𑐡𑐶𑐎 𑐰 𑐟𑐵𑐣𑑂𑐟𑑂𑐬𑐶𑐎 𑐰𑐶𑐢𑐶𑐎𑐠𑑄 𑐥𑐸𑐖𑐵 𑐫𑐵𑐫𑐾𑐩𑐵𑑅𑐐𑐸 𑐥𑑂𑐬𑐔𑐮𑐣 𑐡𑐸 𑑋 𑐠𑐠𑐾 𑐥𑐸𑐖𑐵 𑐫𑐵𑐂𑐐𑐸𑐫𑐵𑐟 𑐡𑐾𑐱𑑀𑐡𑑂𑐢𑐵𑐬 𑐥𑐸𑐖𑐵 𑐢𑐵𑐂 𑑋
𑐔𑐶𑐮𑑂𑐮𑐵𑐐𑐵 𑐡𑑂𑐰𑐵𑐡𑐱𑐶𑐫𑐵 𑐡𑐶𑐣𑐫𑑂 𑐖𑐸𑐂𑐐𑐸 𑐥𑐶𑑄𑐐𑐮𑐵𑐩𑐵𑐃𑐫𑐵 𑐖𑐵𑐟𑑂𑐬𑐵 𑐥𑐬𑐩𑑂𑐥𑐬𑐵𑐫𑑂 𑐖𑐵𑐟𑐷𑐫 𑐳𑐡𑑂𑐨𑐵𑐰𑐎𑐠𑑄 𑐧𑑂𑐬𑐵𑐩𑑂𑐴𑐞, 𑐎𑑂𑐲𑐾𑐟𑑂𑐬𑐷, 𑐰𑐿𑐱𑑂𑐫 𑐰 𑐱𑐸𑐡𑑂𑐬 𑐥𑑂𑐫𑑄𑐐𑐹 𑐰𑐬𑑂𑐞𑐫𑐵𑐥𑐶𑑄 𑐔𑑂𑐰𑐣𑐵𑑅 𑐥𑐸𑐖𑐵𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐥𑐬𑐩𑑂𑐥𑐬𑐵 𑐡𑐸 𑑋𑐳𑐩𑐶𑐟𑐶𑑄 𑐖𑐵𑐬𑐷 𑐫𑐵𑑅𑐐𑐸 𑐰𑐶𑐖𑑂𑐘𑐥𑑂𑐟𑐷𑐂 𑐥𑐱𑐸𑐥𑐟𑐶 𑐎𑑂𑐲𑐾𑐟𑑂𑐬 𑐰𑐶𑐎𑐵𑐳 𑐎𑑀𑐲𑑄 𑐠𑑅𑐥𑐶𑐣𑐶 𑐥𑐸𑐬𑑂𑐏𑐵 𑐥𑐸𑐖𑐵 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐟𑐫𑐵 𑐠𑐎𑐹𑐐𑐸 𑐖𑐐𑑂𑐐𑐵 𑐀𑐢𑐶𑐐𑑂𑐬𑐴𑐞 𑐫𑐵𑐣𑐵𑑅 𑐄𑐎𑐶𑐫𑐵 𑐩𑐸𑐁𑐧𑑂𑐖𑐵 𑐩𑐧𑐶𑐄𑐐𑐸𑐮𑐶𑑄 𑐖𑐵𑐟𑑂𑐬𑐵 𑐡𑐷𑐎𑐾𑐩𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸 𑑋
𑑒𑑐𑑗𑑐 𑐳𑐵𑐮𑐫𑑂 𑐎𑑀𑐲𑑄 𑐖𑐵𑐟𑑂𑐬𑐵 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐟𑐫𑐵𑐟𑑅𑐐𑐸 𑑑𑑓 𑐬𑑀𑐥𑐣𑐷 𑐖𑐐𑑂𑐐𑐵 𑐀𑐢𑐶𑐐𑑂𑐬𑐴𑐞 𑐫𑐵𑑅𑐐𑐸 𑐏𑑅 𑑋 𑐖𑐐𑑂𑐐𑐵 𑐀𑐢𑐶𑐐𑑂𑐬𑐴𑐞 𑐫𑐵𑐫𑐾 𑐣𑑂𑐴𑑂𑐫𑑅 𑐄𑐐𑐸 𑐖𑐐𑑂𑐐𑐵𑐫𑐵 𑐁𑐫𑐳𑑂𑐟𑐵𑐥𑐵𑐏𑐾𑑄 𑐴𑐾 𑐖𑐵𑐟𑑂𑐬𑐵 𑐳𑑄𑐔𑐵𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐰𑐫𑐵𑑄 𑐮𑐶𑐥𑐵 𑐖𑐵𑐟𑑂𑐬𑐵𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐥𑑂𑐫𑑄𑐐𑐸𑐮𑐶𑑄 𑐰𑐬𑑂𑐞𑐫𑐵𑐥𑐶𑑄𑐳𑑄 𑐠𑑅𑐠𑑅𑐐𑐸 𑐴𑐾 𑐁𑐫𑐳𑑂𑐬𑑀𑐟𑐥𑐵𑐏𑐾𑑄 𑐖𑐵𑐟𑑂𑐬𑐵 𑐳𑑄𑐔𑐵𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐁𑑅 𑐰𑐫𑐵𑑅 𑐖𑐵𑐟𑑂𑐬𑐵 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐳𑐩𑐳𑑂𑐫𑐵 𑐖𑐹𑐐𑐸 𑐳𑐩𑐶𑐟𑐶𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋
𑐖𑐵𑐟𑑂𑐬𑐵 𑐡𑐶𑐟 𑐢𑐵𑑅𑐳𑐵 𑐳𑑂𑐰𑐣𑐶𑐐𑑅𑐫𑐵 𑐴𑐾 𑐁𑐥𑐵𑐮𑑄 𑐖𑐵𑐟𑑂𑐬𑐵 𑐥𑐬𑐩𑑂𑐥𑐬𑐵𑐫𑑂 𑐟𑐎𑑄 𑐮𑐶𑐔𑑂𑐰𑑅 𑐮𑐵𑐂𑐐𑐸𑐮𑐶𑑄 𑐎𑑀𑐲𑑄 𑐢𑑂𑐫𑐧𑐵 𑐄𑐥𑐮𑐧𑑂𑐢 𑐩𑐫𑐵𑑅𑐳𑐵𑑄 𑐠𑑅𑐥𑐶𑐣𑐶𑐐𑐸 𑐴𑐾 𑐁𑐫𑐳𑑂𑐬𑑀𑐟𑑄 𑐖𑐵𑐟𑑂𑐬𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐣𑑄 𑐰𑐶𑐖𑑂𑐘𑐥𑑂𑐟𑐷𑐂 𑐢𑐫𑐵𑐟𑑅𑐐𑐸 𑐡𑐸 𑑋 𑐰𑐶𑐖𑑂𑐘𑐥𑑂𑐟𑐷𑐂 𑐢𑐫𑐵𑐟𑑅𑐐𑐸 𑐡𑐸, 𑐖𑐵𑐟𑑂𑐬𑐵 𑐡𑐶𑐎𑐾 𑐩𑐖𑐶𑐄 𑐢𑐂𑐐𑐸 𑐖𑐣𑐔𑐵𑐴𑐣𑐵𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 𑐠𑑅𑐥𑐶𑑄𑐳𑑄 𑐠𑐸𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐟𑐬, 𑐮𑐶𑐥𑐵 𑐰𑐣𑐵𑑅 𑐠𑐸𑐎𑐶𑑄 𑐮𑐵𑐂𑐐𑐸 𑐮𑐶𑐔𑑂𑐰𑑅𑐥𑑂𑐬𑐟𑐶 𑐳𑑂𑐰𑐫𑑄 𑐎𑑀𑐲 𑐴𑐾 𑐖𑐶𑐩𑑂𑐩𑐾𑐰𑐵𑐬 𑐖𑐸𑐂 𑑋’
𑐩𑑂𑐴𑐫𑑂𑐫𑐵𑐟 𑐢𑐵𑑅𑐳𑐵 𑐩𑐸𑐁𑐧𑑂𑐖𑐵 𑐧𑐷𑐢𑐸𑑄𑐎𑐹𑐐𑐸 𑐟𑐬 𑐐𑐸𑐠𑑂𑐫𑐵𑑅𑐟𑐫𑑂𑐟 𑐢𑐵𑑅𑐳𑐵 𑐧𑐷𑐟 𑐀𑐮𑐩𑐮 𑐫𑐵𑐣𑐵𑐔𑑂𑐰𑑄𑐐𑐸 𑐢𑐵𑐳𑐾𑑄 𑐎𑑀𑐲𑑄 𑐢𑐵𑑅𑐎𑐠𑑄 𑐳𑑄𑐳𑑂𑐠𑐵 𑐡𑐬𑑂𑐟𑐵 𑐫𑐵𑐣𑐵𑑅 𑐧𑐿𑑄𑐎 𑐏𑐵𑐟𑐵 𑐟𑐎𑑄 𑐔𑐵𑐫𑐾𑐎𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐥𑐸𑐖𑐵 𑐳𑑄𑐔𑐵𑐮𑐣𑐫𑐵 𑐣𑐶𑑄𑐟𑐶𑑄 𑐳𑐩𑐶𑐟𑐶𑐫𑐵 𑐣𑐵𑐩𑐫𑑂 𑐢𑑂𑐫𑐧𑐵 𑐖𑐩𑑂𑐩𑐵 𑐫𑐵𑐫𑐾𑐟 𑐎𑑀𑐲 𑐮𑐶𑐔𑐶𑐮𑐵𑐔𑑂𑐰𑑄𑐐𑐸 𑐳𑐩𑐶𑐟𑐶𑑄 𑐢𑐵𑑅𑐐𑐸 𑐡𑐸 𑑋
LEAVE YOUR COMMENTS