𑐩𑐵𑐣𑐎𑐺𑐲𑑂𑐞 𑐰𑐵𑐰𑐵𑐫𑐵𑐟 𑐐𑑂𑐰𑐵𑐴𑐵𑐮𑐶 𑐮𑑅𑐮𑑂𑐴𑐵𑐟

𑐫𑐾𑑃 – 𑐄𑐳𑐵𑑃𑐫𑑂 𑐩𑐡𑐫𑐵𑑅 𑐁𑐬𑑂𑐠𑐶𑐎 𑐳𑐩𑐳𑑂𑐫𑐵𑐫𑑂 𑐮𑐵𑐣𑐵𑐔𑑂𑐰𑑄𑐩𑑂𑐴 𑐣𑐾𑐥𑐵𑐮𑐨𑐵𑐲𑐵𑐫𑐵 𑐴𑐵𑐳𑑂𑐫𑐱𑑂𑐬𑐺𑐒𑑂𑐏𑐮𑐵 ‘𑐏𑑂𑐰𑐟𑐵𑐧𑐖𑐶’𑐫𑐵 𑐮𑑀𑐎𑑄𑐴𑑂𑐰𑐵𑑅𑐩𑑂𑐴 𑐎𑐮𑐵𑐎𑐵𑐬 𑐩𑐵𑐣𑐎𑐺𑐲𑑂𑐞 𑐰𑐵𑐰𑐵𑐫𑐵𑐟 𑐠𑑁𑑄 𑐐𑑂𑐰𑐵𑐴𑐵𑐮𑐶 𑐎𑐠𑑄 𑑑 𑐮𑐵𑐏 𑑒𑑒 𑐴𑐖𑐵𑐬 𑐰 𑐣𑑂𑐫𑐵𑐳𑑅 𑐟𑐎𑐵 𑐮𑑅𑐮𑑂𑐴𑐵𑑅𑐐𑐸 𑐡𑐸 𑑋

𑐣𑐾𑐥𑐵𑑅 𑐧𑐿𑑄𑐎𑑂𑐰𑐾𑐚𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐩𑐵𑐣𑐎𑐺𑐲𑑂𑐞 𑐰𑐵𑐰𑐵 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅𑐫𑐵 𑐎𑐖𑐶 𑐳𑐸𑐬𑐾𑐣𑑂𑐡𑑂𑐬 𑐟𑐸𑐮𑐵𑐢𑐬𑑄 𑐐𑑂𑐰𑐵𑐴𑐵𑐮𑐶 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑑅𑐫𑐵𑐟 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑐣𑐶 𑐣𑐵𑑄 𑐣𑑂𑐫𑑄𑐎𑐸𑐳𑐾𑑄 𑐣𑐵𑑄𑐢𑐮𑑅 𑐣𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐵𑑄𑐖𑐵𑑅𑐩𑑂𑐴 𑐴𑐵𑐳𑑂𑐫𑐎𑐮𑐵𑐎𑐵𑐬 𑐐𑐞𑐾𑐱 𑐳𑐵𑐫𑑂𑐩𑐶𑑄 𑐨𑐵𑐖𑐸 𑐰𑐵𑐰𑐵𑐫𑐵𑐟 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑑅 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐡𑐷𑐥𑐶𑐣𑐶 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋
𑐳𑑄𑐫𑑀𑐖𑐎 𑐟𑐸𑐮𑐵𑐢𑐬𑑄 𑐳𑐸𑑄 𑐣𑑄 𑐎𑐮𑐵𑐎𑐵𑐬𑐥𑐶𑑄𑐟 𑐠𑐠𑐾 𑐳𑐩𑐳𑑂𑐫𑐵 𑐖𑐸𑐂𑐧𑐮𑐫𑑂 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐰𑐿𑐱𑐵𑐏 𑑒𑑒 𑐐𑐟𑐾 𑐐𑐵𑐫𑐶𑐎𑐵 𑐡𑐶𑐥𑐵 𑐩𑐴𑐬𑑂𑐖𑐣 𑐩𑑂𑐫𑐸𑐖𑐶𑐎𑐮 𑐂𑐨𑐶𑐣𑐶𑑄𑐐 𑐫𑐵𑐫𑐾 𑐟𑑂𑐫𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐫𑐵𑐎 𑐊𑐞𑑂𑐜 𑐫𑐟𑐶 𑐴𑑀𑐚𑐮𑐫𑑂 𑐖𑐸𑐂𑐐𑐸 𑐠𑑂𑐰 𑐖𑑂𑐫𑐵𑐗𑑂𑐰𑐮𑑄 𑐰𑑅𑐐𑐸 𑐢𑑂𑐫𑐧𑐵 𑐣𑐾𑐰𑐵𑑅 𑐎𑐮𑐵𑐎𑐵𑐬 𑐳𑑂𑐰𑐵𑐳𑑂𑐠𑑂𑐫 𑐎𑑀𑐲𑐫𑐵 𑐥𑐮𑐶𑐳𑑂𑐠𑐵 𑐫𑐵𑐫𑐾𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐄𑐐𑐸 𑐎𑑀𑐲𑐫𑑂 𑐳𑐸𑐏𑐵𑐰𑐟𑐶 𑐩𑐮𑑂𑐚𑐷 𑐥𑑂𑐬𑑀𑐜𑐎𑑂𑐳𑐣 𑐥𑐵𑐏𑐾𑑄 𑐠𑐥 𑑑 𑐮𑐏 𑐟𑐎𑐵 𑐡𑐵𑑄 𑐟𑐫𑐾𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐄𑐐𑐸 𑐎𑑀𑐲𑐫𑐵 𑐄𑐮𑐾𑐖𑑂𑐫𑐵 𑐏𑑂𑐫𑐵𑐮𑐶𑐖𑐸𑐖𑐸 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛 𑐰 𑐴𑐬𑐶𑐰𑑄𑐱 𑐁𑐔𑐵𑐬𑑂𑐫𑐫𑐵 𑐮𑑂𑐴𑐵𑐟𑑄 𑐄𑐮𑐾𑐖𑑂𑐫𑐵 𑐖𑐸𑐂𑐐𑐸 𑐖𑐵𑐣𑐎𑐵𑐬𑐷 𑐣𑑄 𑐧𑐶𑐄𑐐𑐸 𑐏𑑅 𑑋