𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐮𑑀𑐎 𑐳𑐵𑐴𑐶𑐟𑑂𑐫 𑐨𑐰𑐣𑐫𑐵 𑐣𑐶𑑄𑐟𑐶𑑄 𑐳𑐟𑑂𑐫𑐩𑑀𑐴𑐣𑐫𑐵 𑐕𑐾𑑃

𑐫𑐮 – 𑐮𑑀𑐎 𑐳𑐵𑐴𑐶𑐟𑑂𑐫𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐟𑐵𑐟𑐸𑐣𑐵𑑅 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑑄𑐐𑐸 𑐮𑑀𑐎 𑐳𑐵𑐴𑐶𑐟𑑂𑐫 𑐥𑐬𑐶𑐲𑐡𑑂𑐫𑐵 𑐁𑑅 𑐠𑑅𑐐𑐸 𑐴𑐾 𑐨𑐰𑐣 𑐣𑐶𑐬𑑂𑐩𑐵𑐞 𑐖𑐸𑐂𑐐𑐸 𑐖𑐹𑐐𑐸 𑐡𑐸 𑑋 𑐥𑐬𑐶𑐲𑐡𑑂𑐫𑐵 𑐳𑑄𑐳𑑂𑐠𑐵𑐥𑐎𑐮𑐶𑐳𑐾𑑄 𑐳𑑄𑐬𑐎𑑂𑐲𑐎 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵 𑐠𑐣𑐫𑐵 𑐧𑐏𑐸𑑄𑐧𑐴𑐵𑐮𑐫𑑂 𑐔𑑂𑐰𑑄𑐐𑐸 𑐥𑐸𑐏𑑂𑐬𑑂𑐫𑑁𑐮𑐷 𑐕𑐾𑑃 ‘𑐮𑑀𑐎 𑐳𑐵𑐴𑐶𑐟𑑂𑐫 𑐨𑐰𑐣’𑐫𑑂 𑐬𑐸𑐥𑐵𑐣𑑂𑐟𑐬𑐞 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋

𑐄𑐎𑐶𑐫𑐵 𑐣𑐶𑑄𑐟𑐶𑑄 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐖𑑀𑐱𑐷𑑄 𑐠𑑅𑐐𑐸 𑐨𑐵𑐐𑐫𑑂 𑐮𑐵𑑅𑐐𑐸 𑑒 𑐁𑐣𑐵 𑑒 𑐥𑐿𑐳𑐵 𑑒 𑐡𑐵𑐩𑐫𑐵 𑐕𑐾𑑃 𑐮𑑀𑐎 𑐳𑐵𑐴𑐶𑐟𑑂𑐫 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐥𑐬𑐶𑐲𑐡𑑂𑐫𑐵𑐟 𑐡𑐵𑐣 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐠𑑁𑑄𑐎𑐣𑑂𑐴𑐫𑑂 𑐰𑐫𑑂𑐎𑑅 𑐔𑑂𑐰𑐣𑐵𑐔𑑂𑐰𑑄𑐐𑐸 𑐕𑐾𑑃 𑐠𑐸𑐣𑐵𑑅 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐰𑑄𑐐𑐸 𑐰𑐶𑐴𑐷𑐰𑐵𑑅 𑐳𑐵𑐂𑐟 𑐥𑐸𑐖𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐏𑑅𑐳𑐵 𑐣𑑂𑐴𑐹𑐐𑐸 𑐨𑐰𑐣𑐫𑐵 𑐣𑐶𑐬𑑂𑐩𑐵𑐞 𑐥𑑂𑐬𑐎𑑂𑐬𑐶𑐫𑐵 𑐣𑑄 𑐫𑐵𑐎𑐣𑑄 𑐣𑑂𑐴𑑂𑐫𑐵𑐎𑐷𑐐𑐸 𑐖𑐹𑐐𑐸 𑐡𑐸 𑑋

𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐖𑐹𑐐𑐸 𑐥𑐸𑐖𑐵𑐫𑑂 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐖𑑀𑐱𑐷 𑐠𑑅𑐴𑐾 𑐳𑐬𑐶𑐎 𑐖𑐸𑐫𑐵𑐡𑐷𑐐𑐸 𑐏𑑅𑐳𑐵 𑐄𑐐𑐸 𑐂𑐮𑐫𑑂 𑐥𑐬𑐶𑐲𑐡𑑂𑐫𑐵 𑐥𑐡𑐵𑐢𑐶𑐎𑐵𑐬𑐷 𑐮𑐐𑐵𑐫𑐟𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋 𑐥𑐬𑐶𑐲𑐡𑑂𑐫𑐵 𑐳𑑄𑐳𑑂𑐠𑐵𑐥𑐎𑐮𑐶𑐳𑐾𑑄 𑐠𑑁𑑄𑐎𑐣𑑂𑐴𑐫𑑂 𑐳𑑄𑐬𑐎𑑂𑐲𑐎 𑐖𑐸𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐰𑐫𑑂𑐎𑐮𑑄 𑐠𑑅𑐐𑐸 𑐨𑐵𑐐𑐫𑑂 𑐮𑐵𑑅𑐐𑐸 𑐖𑐐𑑂𑐐𑐵 𑐮𑑀𑐎 𑐳𑐵𑐴𑐶𑐟𑑂𑐫 𑐥𑐬𑐶𑐲𑐡𑑂𑐫𑐵 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐡𑐵𑐣 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐨𑐰𑐣 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐳𑐵𑑄𑐳𑐡 𑐎𑐺𑐲𑑂𑐞𑐮𑐵𑐮 𑐩𑐴𑐬𑑂𑐖𑐣𑑄 𑐳𑐵𑑄𑐳𑐡 𑐎𑑀𑐲𑐥𑐵𑐏𑐾𑑄 𑑕𑑐 𑐐𑐹 𑐮𑐵𑐏 𑐟𑐎𑐵 𑐡𑐵𑑄 𑐧𑐶𑐫𑐵𑐡𑐷𑐐𑐸 𑐖𑐹𑐐𑐸 𑐡𑐸 𑑋

𑐥𑑂𑐫𑐟𑑃𑐖𑐵𑑅𑐫𑐵 𑐄𑐐𑐸 𑐨𑐰𑐣𑐫𑐵 𑐎𑑂𑐰𑐫𑑂𑐫𑐵 𑐟𑐮𑑂𑐮𑐵𑐫𑑂 𑐥𑐬𑐶𑐲𑐡𑑂𑐫𑐵 𑐖𑑂𑐫𑐵𑐎𑐹 𑐡𑐂𑐳𑐵 𑐣𑐶𑐟𑑃𑐖𑐵𑐮𑐫𑑂 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐖𑑀𑐱𑐷 𑐔𑑂𑐰𑐣𑐵𑐡𑐷 𑑋 𑐀𑐠𑐾 𑐴𑐾 𑐖𑑀𑐱𑐷𑐫𑐵 𑐠𑐷𑐠𑐷 𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑐵 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐳𑑂𑐰𑐟𑑃𑐖𑐵𑐮𑐫𑑂 𑐳𑐦𑐹𑐢𑐸𑐎𑐹𑐎𑐠𑑄 𑐣𑐶𑐬𑑂𑐩𑐵𑐞 𑐫𑐵𑐂𑐐𑐸 𑐖𑐹𑐐𑐸 𑐡𑐸𑐳𑐵 𑐥𑑂𑐫𑐟𑑃𑐖𑐵𑐮𑐫𑑂 𑐰𑐫𑑂𑐎𑑅 𑐠𑐩𑑂𑐴𑑄 𑐳𑑄𑐎𑐮𑐣 𑐫𑐵𑐣𑐵𑐡𑐷𑐐𑐸 𑐳𑐦𑐹, 𑐀𑐨𑐶𑐮𑐾𑐏, 𑐡𑐳𑑂𑐟𑐵𑐰𑐾𑐖𑐟 𑐁𑐡𑐶 𑐟𑐫𑐾𑐐𑐸 𑐫𑑀𑐖𑐣𑐵 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐰𑐂𑐐𑐸 𑐀𑐳𑐵𑐬𑐟𑐎𑐫𑐵 𑐡𑐸𑐣𑐾 𑐨𑐰𑐣𑐫𑐵 𑐣𑐶𑐟𑑃𑐖𑐵𑑅 𑐟𑐎 𑐣𑐶𑐬𑑂𑐩𑐵𑐞 𑐎𑑂𑐰𑐔𑐵𑐫𑐾𑐎𑐾𑐐𑐸𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐵𑐔𑑂𑐰𑐣𑐵𑐐𑐸 𑐥𑐬𑐶𑐲𑐡𑑂𑐫𑐵 𑐣𑐵𑐫𑑅 𑐥𑑂𑐬𑐵. 𑐥𑑂𑐬𑐾𑐩𑐱𑐵𑐣𑑂𑐟𑐶 𑐟𑐸𑐮𑐵𑐢𑐬𑑄 𑐎𑐣𑐵𑐡𑐶𑐮 𑑋