Read news in NepalBhasa text-- www.hamroschool.com BACK 𑐫𑐸𑐊𑐃 𑐫𑑀𑐩𑐬𑐶 𑐥𑐸𑐣𑑂𑐴𑐶 𑐣𑑂𑐫𑐵𑐫𑐾𑐎𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐫𑐸𑐊𑐃 𑐫𑑀𑐩𑐬𑐶 𑐥𑐸𑐣𑑂𑐴𑐶 𑐣𑑂𑐫𑐵𑐫𑐾𑐎𑐮

𑐣𑐾𑐰𑐵𑑅𑐟𑐫𑑂 𑐩𑐴𑐟𑑂𑐰𑐥𑐹𑐬𑑂𑐞 𑐣𑐏𑑅 𑐫𑑀𑐩𑐬𑐶 𑐥𑐸𑐣𑑂𑐴𑐶 𑐫𑐸𑐊𑐃 𑐣𑑄 𑐣𑑂𑐫𑐵𑐫𑐾𑐎𑐹𑐐𑐸 𑐡𑐸 𑑋 𑐠𑐣 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶 𑐳𑑄𑐳𑑂𑐎𑐺𑐟𑐶, 𑐥𑐬𑐩𑑂𑐥𑐬𑐵 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑑅 𑐣𑑄 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑑅 𑐰𑑄𑐐𑐸 𑑑𑑓 𑐜𑐶𑐳𑐾𑐩𑑂𑐧𑐬 𑐎𑐸𑐣𑑂𑐴𑐸 𑐡𑐸𑐧𑐃𑐫𑐵 𑐀𑐮 𑐱𑐦𑐵 𑐥𑐵𑐬𑑂𑐎𑐫𑑂 𑐄𑐥𑐳𑑂𑐠𑐶𑐟 𑐖𑐸𑐫𑐵𑑅 𑐐𑐸𑑃𑐨𑑂𑐰𑐫𑑂 𑐣𑑂𑐫𑐵𑐫𑐾𑐎𑐹𑐳𑐾𑑄 𑐫𑑅𑐩𑐬𑐶 𑐥𑐸𑐣𑑂𑐴𑐶 𑐣𑑂𑐫𑐵𑐫𑐾𑐎𑐹𑐐𑐸 𑐏𑑅 𑑋 𑐣𑐾𑐰𑐵𑑅 𑐥𑐸𑐔𑑅 𑐫𑐸𑐊𑐃 𑐡𑐸𑐧𑐃 𑐎𑑂𑐲𑐾𑐟𑑂𑐬𑐷𑐫 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐠𑑂𑐰 𑐖𑑂𑐫𑐵𑐗𑑂𑐰𑑅𑐡𑐸𑐧𑐃 𑐎𑑂𑐲𑐾𑐟𑑂𑐬𑐷𑐫 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐡𑐶𑐥𑐾𑐱 𑐱𑑂𑐬𑐾𑐲𑑂𑐛𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅 𑐳𑐦𑐮 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐥𑐸𑐔𑑅 𑐫𑐸𑐊𑐃𑐫𑐵 𑐠𑐷𑐠𑐷 𑐥𑐡𑐵𑐢𑐶𑐎𑐵𑐬𑐷𑐳𑐴𑐶𑐟𑐫𑐵 𑐳𑑄𑐫𑐣𑑂𑐟𑑂𑐬 𑐐𑐛𑐣 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵 𑐳𑐸𑐬𑐸𑐂 𑐳𑐎𑐮𑐾𑑄 𑐥𑐵𑐴𑐵𑑃𑐥𑐶𑑄𑐟 𑐧𑑂𑐫𑐵𑐔 𑐰 𑐫𑑀𑐩𑐬𑐶 𑐥𑑂𑐬𑐳𑐵𑐡 𑐧𑐶𑐫𑐵𑑅 𑐮𑐳𑐎𑐸𑐳 𑐫𑐵𑑅𑐐𑐸 𑐏𑑅 𑑋 𑐥𑐵𑐴𑐵𑑃 𑐎𑐠𑑄 𑐣𑐾𑐦𑐶𑐣 𑐫𑐸𑐊𑐃𑐫𑐵 𑐀𑐢𑑂𑐫𑐎𑑂𑐲 𑐩𑐴𑐾𑐱 𑐩𑑀𑐎𑑂𑐟𑐵𑐣, 𑐣𑐾𑐥𑐵𑐮𑐷 𑐳𑐩𑐵𑐖 𑐫𑐸𑐊𑐃𑐫𑐵 𑐎𑑀𑐲𑐵𑐢𑑂𑐫𑐎𑑂𑐲 𑐡𑐶𑐥𑐎 𑐬𑐵𑐄𑐟, 𑐊𑐣𑐁𑐬𑐊𑐣𑐊 𑐩𑐢𑑂𑐫𑐥𑐹𑐬𑑂𑐰 𑐄𑐥𑐳𑐄𑑄𑐫𑑀𑐖𑐎 𑐩𑐣𑑀𑐖 𑐐𑑀𑐬𑑂𑐏𑐵𑐮𑐷, 𑐥𑑂𑐬𑐰𑐵𑐳𑐷 𑐨𑐸𑐖𑐾𑐮 𑐳𑐩𑐵𑐖 𑐳𑐾𑐰𑐵 𑐳𑐩𑐶𑐟𑐶𑐫𑐵 𑐏𑐜𑐎 𑐨𑐸𑐖𑐾𑐮, 𑐣𑐾𑐦𑐶𑐣 𑐳𑐡𑐳𑑂𑐫 𑐰 𑐟𑐩𑐸 𑐳𑐩𑐵𑐖𑐫𑐵 𑐥𑑂𑐬𑐟𑐶𑐣𑐶𑐢𑐶 𑐳𑐵𑐒𑑂𑐮𑐷 𑐜𑑀𑐮𑑂𑐩𑐵 𑐐𑐸𑐬𑐸𑐒, 𑐣𑐵𑐐𑐬𑐶𑐎 𑐳𑐾𑐰𑐵 𑐳𑐩𑐵𑐖𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐨𑐵𑐎𑐬 𑐥𑑁𑐜𑐾𑐮, 𑐫𑐸𑐊𑐃 𑐊𑐎𑑂𑐳𑐔𑐾𑐘𑑂𑐖 𑐣𑐾𑐥𑐵𑐮 𑐎𑑀𑐀𑐬𑑂𑐜𑐶𑐣𑐾𑐚𑐬 𑐳𑐣𑑂𑐟𑑀𑐲 𑐥𑑂𑐬𑐳𑐵𑐃𑐫𑐵 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑑅𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐥𑐸𑐔𑑅 𑐫𑐸𑐊𑐃𑐫𑐵 𑐀𑐢𑑂𑐫𑐎𑑂𑐲 𑐮𑐎𑑂𑐲𑑂𑐩𑐞 𑐱𑑂𑐬𑐾𑐲𑑂𑐛𑑄 𑐩𑐣𑑀𑐬𑐘𑑂𑐖𑐣𑐵𑐟𑑂𑐩𑐎 𑐖𑑂𑐫𑐵𑐗𑑂𑐰𑑅𑐫𑐵 𑐖𑐶𑐩𑑂𑐩𑐵 𑐎𑐫𑐵𑐡𑐷𑐐𑐸 𑐏𑑅𑐳𑐵 𑐄𑐥𑐵𑐢𑑂𑐫𑐎𑑂𑐲 𑐬𑐵𑐖𑐾𑐱 𑐥𑑂𑐬𑐢𑐵𑐣, 𑐏𑐾𑐮𑐎𑐹𑐡 𑐳𑑄𑐫𑑀𑐖𑐎 𑐴𑐶𑐬𑐵𑐮𑐵𑐮 𑐱𑑂𑐬𑐾𑐲𑑂𑐛𑑄 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑑂𑐠𑐵𑐥𑐣𑐫𑐵 𑐖𑐶𑐩𑑂𑐩𑐾𑐰𑐵𑐬𑐷 𑐎𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐣𑐳𑐵𑐖𑑂𑐰𑐮𑑄𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐩𑐴𑐵𑐳𑐔𑐶𑐰 𑐎𑐸𑐩𑐵𑐬 𑐧𑐮𑐵𑐩𑐷𑐥𑐵𑐏𑐾𑑄 𑐖𑐹𑐐𑐸 𑐏𑑅 𑑋

𑐫𑑅𑐩𑐬𑐶 𑐡𑐫𑐾𑐎𑐾𑐐𑐸 𑐖𑑂𑐫𑐵 𑐡𑐸𑐧𑐃 𑐎𑑂𑐲𑐾𑐟𑑂𑐬𑐷𑐫 𑐳𑐩𑐶𑐟𑐶𑐫𑐵 𑐀𑐢𑑂𑐫𑐎𑑂𑐲 𑐡𑐶𑐥𑐾𑐱 𑐱𑑂𑐬𑐾𑐲𑑂𑐛𑐫𑐵 𑐕𑐾𑑃𑐫𑑂 𑐣𑐶𑐬𑐸 𑐱𑑂𑐬𑐾𑐲𑑂𑐛, 𑐬𑐷𑐡𑐶 𑐳𑑂𑐠𑐵𑐥𑐶𑐟 𑐱𑑂𑐬𑐾𑐲𑑂𑐛 𑐣𑐰𑐶𑐣𑐵 𑐱𑐵𑐎𑑂𑐫, 𑐳𑐺𑐲𑑂𑐚𑐶 𑐱𑐵𑐎𑑂𑐫, 𑐳𑐥𑐣𑐵 𑐩𑐵𑐮𑐵𑐎𑐵𑐬𑐮𑐶𑐳𑐾𑑄 𑐮𑐎𑑂𑐲𑑂𑐩𑐞 𑐱𑑂𑐬𑐾𑐲𑑂𑐛, 𑐴𑐶𑐬𑐵𑐮𑐵𑐮 𑐱𑑂𑐬𑐾𑐲𑑂𑐛, 𑐥𑑂𑐬𑐩𑑀𑐡 𑐱𑑂𑐬𑐾𑐲𑑂𑐛, 𑐬𑐵𑐖𑐾𑐱 𑐥𑑂𑐬𑐢𑐵𑐣, 𑐡𑐶𑐥𑐾𑐱 𑐱𑑂𑐬𑐾𑐲𑑂𑐛𑐥𑐶𑑄𑐳𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐶𑐡𑐾𑐱𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐠𑑅𑐐𑐸 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐥𑑂𑐬𑑀𑐟𑑂𑐳𑐵𑐴𑐶𑐟 𑐫𑐵𑐫𑐾𑐐𑐸, 𑐠𑐷𑐠𑐷 𑐥𑑂𑐬𑐟𑐶𑐨𑐵𑐰𑐵𑐣 𑐣𑐾𑐥𑐵𑐮𑐷𑐟𑐫𑑂 𑐥𑑂𑐬𑐟𑐶𑐨𑐵𑐫𑐵𑐟 𑐎𑐡𑐬 𑐫𑐵𑐳𑐾𑑄 𑐴𑑅𑐥𑐵𑑅 𑐧𑐷𑐐𑐸 𑐰 𑐣𑐾𑐰𑐵𑑅 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑑄𑐬𑐎𑑂𑐲𑐞 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐟 𑐣𑐾𑐰𑐵𑑅 𑐥𑐸𑐔𑑅 𑐫𑐸𑐊𑐃 𑐠𑐖𑑂𑐫𑐵𑑅𑐐𑐸 𑐎𑐠𑑄𑐫𑐵 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐰 𑐠𑐸𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑑅 𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐣𑐾𑐰𑐵𑑅 𑐥𑐸𑐔𑑅 𑐫𑐸𑐊𑐂 𑐣𑑂𑐴𑑂𑐫𑐵𑐧𑐮𑐾𑑄 𑐮𑐐𑐾 𑐖𑐸𑐫𑐵𑐔𑑂𑐰𑐣𑐷𑐐𑐸 𑐏𑑃 𑐩𑐴𑐵𑐳𑐔𑐶𑐰 𑐎𑐸𑐩𑐵𑐬 𑐧𑐮𑐵𑐩𑐷𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS