Read news in NepalBhasa text-- www.hamroschool.com BACK 𑐥𑐡𑑂𑐩𑐬𑐟𑑂𑐣𑐫𑐵 𑐣𑐵𑐩𑑄 𑐳𑐶𑐬𑐥𑐵𑑅 𑐣𑐷𑐳𑑂𑐰𑐣𑐷𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑐡𑑂𑐩𑐬𑐟𑑂𑐣𑐫𑐵 𑐣𑐵𑐩𑑄 𑐳𑐶𑐬𑐥𑐵𑑅 𑐣𑐷𑐳𑑂𑐰𑐣𑐷𑐐𑐸

𑐫𑐾𑑃 – 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐣𑐵𑐩𑑄 𑐳𑐬𑐎𑐵𑐬𑑄 𑐳𑐶𑐬𑐥𑐵𑑅 𑐣𑐷𑐳𑑂𑐰𑐣𑐷𑐐𑐸 𑐖𑐹𑐐𑐸 𑐡𑐸 𑑋 𑐳𑑄𑐳𑑂𑐎𑐺𑐟𑐶 𑐩𑐣𑑂𑐟𑑂𑐬𑐵𑐮𑐫𑐥𑐵𑐏𑐾𑑄 𑐨𑐵𑐖𑐸 𑐟𑐸𑐮𑐵𑐢𑐬𑐫𑐵 𑐣𑐵𑐩𑑄 𑐳𑐶𑐬𑐥𑐵𑑅 𑐣𑐷𑐳𑑂𑐰𑐣𑐾𑐐𑐸 𑐧𑐔𑑄 𑐳𑑄𑐳𑑂𑐎𑐺𑐟𑐶 𑐩𑐣𑑂𑐟𑑂𑐬𑐷 𑐫𑑀𑐐𑐾𑐱 𑐨𑐚𑑂𑐚𑐬𑐵𑐃𑑄 𑐧𑐶𑐫𑐵𑐡𑐷𑐐𑐸 𑐏𑑅 𑑋 𑐥𑐡𑑂𑐩𑐬𑐟𑑂𑐣 𑐮𑐸𑐩𑐣𑑂𑐟𑐶 𑐐𑐸𑐠𑐶𑐫𑐵 𑐥𑑂𑐬𑐟𑐶𑐣𑐶𑐢𑐶𑐟 𑐮𑐶𑐳𑐾 𑐏𑑃 𑐮𑑂𑐴𑐵𑐳𑐾𑑄 𑐩𑐣𑑂𑐟𑑂𑐬𑐷 𑐨𑐚𑑂𑐚𑐬𑐵𑐃𑐣𑑄 𑐠𑑂𑐰 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐐𑐸𑐠𑐶𑐫𑐵 𑐣𑐵𑐫𑑅 𑐜𑐵. 𑐎𑐾𑐱𑐰𑐩𑐵𑐣 𑐱𑐵𑐎𑑂𑐫𑐫𑐵 𑐣𑐾𑐟𑐺𑐟𑑂𑐰𑐫𑑂 𑐰𑑄𑐐𑐸 𑐥𑑂𑐬𑐟𑐶𑐣𑐶𑐢𑐶 𑐩𑐞𑑂𑐜𑐮𑑄 𑐩𑐣𑑂𑐟𑑂𑐬𑐷 𑐨𑐚𑑂𑐚𑐬𑐵𑐃𑐫𑐵𑐟 𑐕𑐐𑐹 𑐖𑑂𑐘𑐵𑐥𑐣𑐥𑑁 𑐧𑐶𑐳𑐾𑑄 𑐟𑐸𑐮𑐵𑐢𑐬𑐫𑐵 𑐴𑐸𑐮𑐵𑐎 𑐚𑐶𑐎𑐚 𑐥𑐶𑐎𑐵𑐫𑐾𑐩𑐵𑑅𑐐𑐸, 𑐰𑐫𑑂𑐎𑑅𑐫𑐵 𑐎𑐶𑐥𑐵 𑐟𑐫𑐵𑑅 𑐥𑐵𑑃𑐫𑑂𑐩𑑂𑐰𑑅 𑐥𑐶𑐠𑐣𑐾𑐩𑐵𑑅𑐐𑐸, 𑐟𑐸𑐮𑐵𑐢𑐬𑐫𑐵 𑐧𑐵𑐬𑐾 𑐥𑐵𑐛𑑂𑐫𑐳𑐦𑐸𑐮𑐷 𑐧𑑂𑐰𑑄𑐎𑐾 𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐏𑑅 𑑋 𑐩𑐣𑑂𑐟𑑂𑐬𑐷 𑐨𑐚𑑂𑐚𑐬𑐵𑐃𑐣𑑄 𑐴𑐸𑐮𑐵𑐎 𑐚𑐶𑐎𑐚 𑐥𑐶𑐠𑐣𑐾𑐐𑐸 𑐮𑐵𑐐𑐶𑑄 𑐳𑐘𑑂𑐔𑐵𑐬 𑐩𑐣𑑂𑐟𑑂𑐬𑐵𑐮𑐫𑐫𑐵𑐟 𑐂𑐣𑐵𑐥 𑐫𑐵𑐫𑐾𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋

𑐩𑐣𑑂𑐟𑑂𑐬𑐷𑐫𑐵𑐟 𑐖𑑂𑐘𑐵𑐥𑐣𑐥𑑁 𑐧𑐷𑐐𑐸 𑐮𑐵𑐐𑐶𑑄 𑐐𑐸𑐠𑐶𑐫𑐵 𑐣𑑂𑐰𑐎𑐸 𑐳𑐸𑐩𑑂𑐣𑐶𑐩𑐵 𑐟𑐸𑐮𑐵𑐢𑐬, 𑐕𑑂𑐫𑐵𑑄𑐖𑑂𑐫𑐾 𑐣𑐬𑐾𑐱𑐰𑐷𑐬 𑐱𑐵𑐎𑑂𑐫 𑐮𑐶𑐳𑐾𑑄 𑐳𑑄𑐑𑐷𑐫 𑐳𑐵𑑄𑐳𑐡 𑐎𑐺𑐲𑑂𑐞𑐐𑑀𑐥𑐵𑐮 𑐱𑑂𑐬𑐾𑐲𑑂𑐛, 𑐥𑑂𑐬𑐡𑐾𑐱 𑐳𑐵𑑄𑐳𑐡𑐥𑐶𑑄 𑐜𑐵. 𑐀𑐖𑐫𑐎𑑂𑐬𑐵𑐣𑑂𑐟𑐶 𑐱𑐵𑐎𑑂𑐫, 𑐬𑐵𑐖𑐾𑐱 𑐱𑐵𑐎𑑂𑐫 𑐰 𑐐𑐸𑐠𑐶𑐫𑐵 𑐩𑐾𑐥𑐶𑑄 𑐥𑐡𑐵𑐢𑐶𑐎𑐵𑐬𑐷𑐟 𑐗𑐵𑑅𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐩𑐣𑑂𑐟𑑂𑐬𑐷 𑐨𑐚𑑂𑐚𑐬𑐵𑐃𑐣𑑄 𑐩𑐡𑐸𑐩𑑂𑐴 𑐟𑐸𑐮𑐵𑐢𑐬𑐮𑐶𑐳𑐾𑐫𑐵 𑐠𑑅𑐐𑐸 𑐥𑐸𑐮𑐵𑑄𑐐𑐸 𑐮𑐸𑐩𑐣𑑂𑐟𑐶 𑐣𑑄 𑐀𑐣 𑐎𑐣𑐵𑐡𑐷𑐐𑐸 𑐡𑐸 𑑋

𑑒𑑐𑑔𑑓 𑐳𑐵𑐮𑐫𑐵 𑐔𑐸𑐣𑐵𑐰𑐫𑑂 𑐠𑑅𑐥𑐶𑑄 𑐣𑑄 𑐳𑐴𑐨𑐵𑐐𑐷 𑐖𑐸𑐫𑐵𑐐𑐸 𑐮𑐶𑐳𑐾𑑄 𑐨𑐵𑐖𑐸 𑐟𑐸𑐮𑐵𑐢𑐬𑐮𑐶𑐳𑐾𑑄 𑐟𑐸𑑄 𑐠𑑅 𑐣𑑄 𑐕𑐸𑑄 𑐃 𑐣𑐵𑐥𑑄 𑐖𑐾𑐮 𑐮𑐵𑑅𑐐𑐸 𑐥𑑂𑐬𑐱𑑄𑐐 𑐰𑐫𑑂𑐎𑐮𑑄 𑐀𑐣 𑐮𑐸𑐩𑑄𑐎𑐵𑐡𑐷𑐐𑐸 𑐏𑑅 𑑋
𑐣𑐾𑐥𑐵𑐮𑐫𑑂 𑐩𑐵𑐣𑐰 𑐀𑐢𑐶𑐎𑐵𑐬 𑐁𑐣𑑂𑐡𑑀𑐮𑐣𑐫𑐵 𑐱𑐸𑐬𑐸𑐰𑐵𑐟 𑐫𑐵𑐫𑐾𑐐𑐸 𑐮𑐶𑐳𑐾𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐣𑑂𑐴𑐹𑐡𑑃 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐨𑐵𑐖𑐸 𑐟𑐸𑐮𑐵𑐢𑐬𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐫𑐵𑑅 𑐣𑑄 𑐀𑐣 𑐔𑐬𑑂𑐔𑐵 𑐖𑐹𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS