𑐎𑐸𑐩𑐵𑐬𑐷, 𑐐𑐞𑐾𑐱 𑐰 𑐨𑐿𑐬𑐰𑐫𑐵 𑐱𑑂𑐬𑐷𑐥𑐡 𑐨𑐟𑑂𑐟𑐵 𑐀𑐥𑑂𑐰𑐮
𑐫𑐾𑑃 – 𑐫𑐾𑑃𑐫𑐵 𑐮𑐵𑐫𑑂𑐎𑐹 𑐎𑐸𑐩𑐵𑐬𑐷𑐫𑐵𑐟 𑐫𑐾𑑃 𑐩𑐣𑐥𑐵𑑄 𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐱𑑂𑐬𑐷𑐥𑐡𑑂 𑐨𑐟𑑂𑐟𑐵 𑐰𑐺𑐡𑑂𑐢𑐶 𑐫𑐵𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐥𑐸𑐮𑐵𑑄𑐥𑐶𑑄 𑐎𑐸𑐩𑐵𑐬𑐷 𑐰 𑐎𑐸𑐩𑐵𑐬𑐷 𑐐𑐞𑐾𑐱 𑐨𑐿𑐬𑐰𑐫𑐵𑐟 𑐧𑐷𑐐𑐸 𑐨𑐟𑑂𑐟𑐵 𑐣𑑄 𑐀𑐥𑑂𑐰𑐫𑐾𑐎𑐹𑐐𑐸 𑐡𑐸 𑑋 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐁𑑅 𑐰𑐬𑑂𑐟𑐩𑐵𑐣 𑐎𑐸𑐩𑐵𑐬𑐷𑐫𑐵𑐟 𑐮𑐫𑑂 𑑕𑑐 𑐴𑐖𑐵𑐬 𑐟𑐎𑐵 𑐱𑑂𑐬𑐷𑐥𑐡 𑐨𑐟𑑂𑐟𑐵 𑐧𑐷𑐐𑐸 𑐖𑐹𑐐𑐸 𑐡𑐸 𑑋 𑐮𑐶𑐳𑐾𑑄 𑐎𑐸𑐩𑐵𑐬𑐷 𑐩𑐵𑐖𑐸𑐫𑐵 𑐳𑐸𑐳𑐵𑑅𑐎𑐸𑐳𑐵𑑅 𑐫𑐵𑐂𑐥𑐶𑑄 𑐔𑐶𑐟𑐵𑐂𑐡𑐵𑐬𑐫𑐵𑐟 𑐧𑐷𑐐𑐸 𑐨𑐟𑑂𑐟𑐵 𑐳𑐸𑐰𑐶𑐢𑐵 𑐣𑑄 𑐧𑐝𑐾 𑐫𑐵𑐣𑐵𑑅 𑐮𑐫𑑂 𑑕𑑐 𑐴𑐖𑐵𑐬 𑐟𑐎𑐵 𑐫𑐵𑑅𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐠𑑂𑐰 𑐨𑐟𑑂𑐟𑐵 𑑔𑑐÷𑑔𑑐 𑐴𑐖𑐵𑐬 𑐟𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋
𑐄𑐎𑐠𑑄 𑐴𑐾 𑐥𑐸𑐮𑐵𑑄𑐥𑐶𑑄 𑐎𑐸𑐩𑐵𑐬𑐷𑐥𑐶𑑄𑐟 𑐧𑐷𑐐𑐸 𑐱𑑂𑐬𑐷𑐥𑐡 𑐨𑐟𑑂𑐟𑐵 𑐣𑑄 𑐁𑑅 𑐮𑐫𑑂 𑑑𑑕 𑐴𑐖𑐵𑐬 𑐟𑐎𑐵 𑐫𑐵𑑅𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐠𑑂𑐰 𑐨𑐟𑑂𑐟𑐵 𑐮𑐫 𑑑𑑐 𑐴𑐖𑐵𑐬 𑐟𑐎𑐵 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐮𑐶𑐳𑐾𑑄 𑐰𑐬𑑂𑐟𑐩𑐵𑐣 𑐡𑑂𑐫𑑅𑐨𑐵𑐖𑐸𑐥𑐶𑑄 𑐐𑐞𑐾𑐱 𑐰 𑐨𑐿𑐬𑐰𑐫𑐵 𑐱𑑂𑐬𑐷𑐥𑐡 𑐨𑐟𑑂𑐟𑐵 𑐣𑑄 𑐀𑐥𑑂𑐰𑐫𑐾𑐎𑐵𑑅 𑐁𑑅 𑐮𑐫𑑂 𑑓𑑐÷𑑓𑑐 𑐴𑐖𑐵𑐬 𑐫𑐵𑑅𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐠𑑂𑐰 𑐨𑐟𑑂𑐟𑐵 𑑑𑑕÷𑑑𑑕 𑐴𑐖𑐵𑐬 𑐟𑐎𑐵 𑐫𑐵𑐣𑐵𑐟𑑅𑐐𑐸 𑐏𑑅 𑑋 𑐀𑐠𑐾 𑐴𑐾 𑐥𑐸𑐮𑐵𑑄𑐥𑐶𑑄 𑐐𑐞𑐾𑐱 𑐰 𑐨𑐿𑐬𑐰𑐫𑐵𑐟 𑐧𑐷𑐐𑐸 𑐱𑑂𑐬𑐷𑐥𑐡 𑐨𑐟𑑂𑐟𑐵 𑐣𑑄 𑐁𑑅 𑐮𑐫𑑂 𑑑𑑒 𑐴𑐖𑐵𑐬 𑐟𑐎𑐵 𑐫𑐵𑑅𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐠𑑂𑐰 𑐨𑐟𑑂𑐟𑐵 𑐮𑐫𑑂 𑑘 𑐴𑐖𑐵𑐬 𑐟𑐎𑐵 𑐫𑐵𑐣𑐵 𑐟𑑅𑐐𑐸 𑐏𑑅 𑑋
𑐩𑑂𑐴𑐶𑐐𑑅 𑐠𑐣𑐫𑐵 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐫𑐵𑑅𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐫𑐾𑑃 𑐩𑐣𑐥𑐵𑐫𑐵 𑐩𑐾𑐫𑐬 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐳𑐎𑐮𑐾𑑄 𑐥𑐸𑐮𑐵𑑄𑐥𑐶𑑄 𑐎𑐸𑐩𑐵𑐬𑐷 𑐮𑐶𑐳𑐾𑑄 𑐐𑐞𑐾𑐱 𑐰 𑐨𑐿𑐬𑐰𑐥𑐶𑑄𑐟 𑐡𑐕𑐶𑐫𑐵 𑐊𑐎𑐩𑐸𑐲𑑂𑐛 𑐡𑐵𑑄𑐫𑐵 𑐔𑐾𑐎 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐬𑑂𑐟𑐩𑐵𑐣 𑐎𑐸𑐩𑐵𑐬𑐷𑐫𑐵 𑐨𑐟𑑂𑐟𑐵 𑐢𑐵𑑅𑐳𑐵 𑐰𑐳𑐥𑑀𑐮𑐫𑐵 𑐣𑐵𑐩𑐫𑑂 𑐔𑐵𑐫𑐾𑐎𑐵𑐟𑑅𑐐𑐸 𑐧𑐿𑑄𑐎 𑐏𑐵𑐟𑐵𑐫𑑂 𑐴𑐾 𑐟𑐥𑑂𑐫𑑄𑐎 𑐰𑐣𑐷 𑑋
𑐮𑐶𑐳𑐾𑑄 𑐩𑑂𑐴𑐶𑐐𑑅 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐫𑑃𑐫𑐵𑑅 𑐥𑐸𑐣𑑂𑐴𑐶 𑐟𑑅𑐖𑐶𑐎 𑐣𑑂𑐫𑐵𑐫𑐾𑐎𑐾𑐐𑐸 𑐮𑐵𑐐𑐶𑑄 𑐠𑑂𑐰 𑐥𑐬𑑂𑐰𑐫𑑂 𑐳𑑄𑐮𑐐𑑂𑐣 𑐖𑐸𑐂𑐩𑐵𑑅𑐐𑐸 𑐠𑐷𑐠𑐷 𑐖𑐵𑐟𑑂𑐬𑐵𑐫𑐵 𑐏𑐮𑑅𑐟 𑐖𑐵𑐣𑐵𑑅 𑐐𑐛𑐣 𑐫𑐵𑐣𑐵𑐟𑑅𑐐𑐸 𑐂𑐣𑑂𑐡𑑂𑐬𑐖𑐵𑐟𑑂𑐬𑐵 𑐰𑑂𑐫𑐰𑐳𑑂𑐠𑐵𑐥𑐣 𑐳𑐩𑐶𑐟𑐶𑐫𑐵𑐟 𑐣𑑄 𑐊𑐎𑐩𑐸𑐲𑑂𑐛 𑐡𑐵𑑄 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐩𑐾𑐫𑐬 𑐱𑐵𑐎𑑂𑐫𑑄 𑐠𑐸𑐐𑐸𑐳𑐷 𑐫𑑃𑐫𑐵𑑅 𑐖𑐵𑐟𑑂𑐬𑐵𑐫𑐵𑐟 𑐰𑐶𑐡𑐾𑐱𑐫𑑂 𑐟𑐎𑑄 𑐥𑑂𑐬𑐔𑐵𑐬 𑐫𑐵𑐫𑐾𑐐𑐸 𑐮𑐵𑐐𑐶𑑄 𑐠𑐷𑐠𑐷 𑐡𑐾𑐱𑐫𑐵 𑐨𑐐𑐶𑐣𑐷 𑐳𑑂𑐰𑐵𑐥𑐹 𑐡𑐸𑐐𑐸 𑐱𑐴𑐬𑐫𑐵 𑐩𑐾𑐫𑐬𑐥𑐶𑑄𑐟 𑐖𑐵𑐟𑑂𑐬𑐵 𑐳𑑂𑐰𑐫𑐾𑐟 𑐳𑑅𑐟𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐫𑑃𑐫𑐵𑑅 𑐖𑐵𑐟𑑂𑐬𑐵𑑄 𑐰𑐶𑐡𑐾𑐱𑐫𑑂 𑐣𑐾𑐥𑐵𑑅𑐫𑐵 𑐩𑑂𑐴𑐳𑐷𑐎𑐵 𑐧𑐶𑐫𑐵𑐔𑑂𑐰𑑄𑐐𑐸 𑐖𑐹𑐐𑐸𑐮𑐶𑑄 𑐠𑐸𑐎𑐶𑐫𑐵𑐟 𑐦𑐎𑑂𑐰 𑐨𑐰𑑂𑐫 𑐬𑐸𑐥𑑄 𑐴𑐣𑐾𑐟 𑐣𑑄 𑐰𑐫𑑂𑐎𑐮𑑄 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐰𑐫𑑂𑐎𑐮𑑄 𑐐𑐸𑐠𑐶 𑐰𑐶𑐢𑐾𑐫𑐎𑐫𑑂 𑐰𑐫𑐵𑐔𑑂𑐰𑑄𑐐𑐸 𑐰𑐶𑐰𑐵𑐡 𑐳𑐩𑐵𑐢𑐵𑐣 𑐫𑐵𑐣𑐵𑑅 𑐰𑐣𑐾𑐟 𑐳𑐎𑐳𑑂𑐫𑐵𑑄 𑐕𑐐𑐹 𑐴𑐾 𑐩𑐟 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐟 𑐣𑑄 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐫𑐾𑑃𑐫𑐵 𑐳𑑄𑐑𑐷𑐫 𑐳𑐵𑑄𑐳𑐡𑐥𑐶𑑄 𑐎𑐺𑐲𑑂𑐞𑐐𑑀𑐥𑐵𑐮 𑐱𑑂𑐬𑐾𑐲𑑂𑐛, 𑐨𑐶𑐩𑐳𑐾𑐣𑐡𑐵𑐳 𑐥𑑂𑐬𑐢𑐵𑐣 𑐮𑐶𑐳𑐾𑑄 𑐥𑑂𑐬𑐡𑐾𑐱 𑐳𑐵𑑄𑐳𑐡𑐥𑐶𑑄𑐳𑑄 𑐣𑑄 𑐳𑐩𑑂𑐧𑑀𑐢𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐮𑐵𑑄𑐥𑐶𑑄 𑐎𑐸𑐩𑐵𑐬𑐷, 𑐥𑐸𑐮𑐵𑑄𑐥𑐶𑑄 𑐐𑐞𑐾𑐱 𑐰 𑐨𑐿𑐬𑐰𑐥𑐶𑑄 𑐮𑐶𑐳𑐾𑑄 𑐠𑐷𑐠𑐷 𑐡𑑂𑐫𑑅 𑐥𑑂𑐫𑐵𑐏𑑄𑐫𑐵 𑐡𑐸𑐖𑑅𑐥𑐶𑑄 𑐣𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS