𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐨𑐹𑐩𑐶 𑐰𑐶𑐢𑐾𑐫𑐎 𑐐𑐸𑐮𑐶 𑐐𑑂𑐫𑐵𑐣𑐵𑐥𑐸 ?

𑐣𑐾𑐥𑐵𑐮𑐫𑑂 𑐳𑐸𑐎𑐸𑐩𑑂𑐧𑐵𑐳𑐷 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣𑐫𑐵 𑐣𑐶𑑄𑐟𑐶𑑄 𑐢𑐎𑐵𑑅 𑐠𑐷𑐠𑐷 𑐂𑐮𑐫𑑂 𑐳𑐬𑐎𑐵𑐬𑐷 𑐖𑐐𑑂𑐐𑐵 𑐧𑑂𑐫𑐎𑑂𑐟𑐶𑐫𑐵 𑐣𑐵𑐩𑐫𑑂 𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑐳𑐵𑑄 𑐣𑑄 𑐡𑑃𑐫𑑂𑐡𑐳𑑄 𑐴𑐾 𑐠𑑂𑐰 𑐳𑐩𑐳𑑂𑐫𑐵 𑐗𑐣 𑐨𑐣 𑐀𑐥𑑂𑐰𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐱𑐴𑐬𑐫𑑂 𑐰𑐫𑐵 𑐔𑑂𑐰𑐣𑐷𑐐𑐸 𑐀𑐮𑐾 𑐖𑐐𑑂𑐐𑐵 𑐠𑑅𑐐𑐸 𑐣𑐵𑐩𑐫𑑂 𑐎𑐵𑐫𑐾𑐐𑐸 𑐣𑐶𑐟𑐶𑑄 𑐫𑑀𑐖𑐣𑐵𑐧𑐡𑑂𑐢 𑐎𑐠𑑄 𑐴𑐾 𑐩𑐣𑐹𑐟 𑐰𑐂𑐥𑐶𑑄 𑐰 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐟𑐎𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐖𑑂𑐰𑑅𑐐𑐸 𑐂𑐮𑐫𑑂 𑐳𑐬𑐎𑐵𑐬𑑄 𑐨𑐹𑐩𑐶 𑐳𑐩𑑂𑐧𑐣𑑂𑐢𑐶 𑐰𑐶𑐢𑐾𑐫𑐎 𑐴𑐫𑐵𑑅 𑐳𑑂𑐰𑐣𑐶𑐐𑑅𑐫𑐵 𑐳𑐵𑐬𑑂𑐰𑐖𑐣𑐶𑐎 𑐣𑐵𑐥𑑄 𑐐𑐸𑐠𑐶𑐫𑐵 𑐖𑐐𑑂𑐐𑐵𑐫𑐵𑐟 𑐎𑐧𑑂𑐖𑐵 𑐫𑐵𑐫𑐾𑐐𑐸 𑐏𑐾𑐮 𑐳𑐸𑐬𑐸 𑐖𑐸𑐮 𑐢𑐎𑐵𑑅 𑐣𑐾𑐰𑐵𑑅𑐟𑐫𑑂𑐳𑑄 𑐠𑐰𑑄𑐠𑐰𑐫𑑂 𑐳𑐴𑐮𑐴 𑐧𑑂𑐫𑐵𑐎𑐾𑐐𑐸 𑐣𑐵𑐥𑑄 𑐄𑐐𑐸 𑐰𑐶𑐢𑐾𑐫𑐎𑐫𑐵𑐟 𑐎𑐫𑐵𑑅 𑐔𑐶𑐄𑐟𑐵𑑅 𑐟𑐫𑐵𑐴𑑅𑐐𑐸 𑐡𑐸 𑑋

𑐨𑐹𑐩𑐶𑐳𑐩𑑂𑐧𑐣𑑂𑐢𑐶 𑐁𑐛𑑁𑑄 𑐳𑑄𑐱𑑀𑐢𑐣 𑐰𑐶𑐢𑐾𑐫𑐎, 𑑒𑑐𑑗𑑕 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐸𑐳𑐵 𑐁𑑅 𑐕𑐸𑑄 𑐡𑐶𑑄 𑐮𑐶𑐥𑐵 𑐴𑐾 𑐎𑐵𑐣𑐸𑐣 𑐖𑐸𑐫𑐵 𑐰𑐂𑐐𑐸 𑐖𑐹𑐐𑐸 𑐡𑐸𑑋 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑐫𑐵 𑐧𑐿𑐛𑐎𑑄 𑐨𑐹𑐩𑐶 𑐳𑐩𑑂𑐧𑐣𑑂𑐢𑐶 𑐰𑐶𑐢𑐾𑐫𑐎 𑑒𑑐𑑒𑑑𑐫𑐵 𑐳𑑄𑐱𑑀𑐢𑐣 𑐰𑐶𑐢𑐾𑐫𑐎 𑐳𑐬𑑂𑐰 𑐳𑐩𑑂𑐩𑐟𑐶𑑄 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐸𑐳𑐵 𑐁𑑅 𑐰 𑐰𑐶𑐢𑐾𑐫𑐎 𑐎𑐠𑑄 𑐗𑐶𑐡𑑃 𑐟𑐎 𑐳𑐬𑐎𑐵𑐬𑐷 𑐖𑐐𑑂𑐐𑐵 𑐣𑐵𑐥𑑄 𑐀𑐨𑐶𑐮𑐾𑐏𑐫𑐵 𑐖𑑄𑐐𑐮𑐫𑑂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐄𑐮𑑂𑐮𑐾𑐏 𑐖𑐸𑐂𑐰𑑄 𑐂𑐩𑐶𑐟 𑐖𑐐𑑂𑐐𑐵 𑐧𑐷𑐐𑐸 𑐎𑐠𑑄𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑐎𑐷𑐐𑐸 𑐮𑑃𑐥𑐸 𑐔𑐵𑐮𑐷𑐐𑐸 𑐥𑑂𑐬𑐵𑐰𑐢𑐵𑐣 𑐳𑐴𑐶𑐟𑐫𑐵 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐖𑐸𑐂𑐰𑑄 𑐁𑑅 𑐎𑐵𑐣𑐸𑐣 𑐖𑐸𑐫𑐵 𑐰𑐂𑐐𑐸 𑐀𑐰𑐳𑑂𑐠𑐵𑐫𑑂 𑐕𑐸 𑐖𑐸𑐂 𑐢𑐎𑐵𑑅 𑐣𑑄 𑐔𑐶𑐄𑐟𑐵𑑅 𑐟𑐫𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐖𑐐𑑂𑐐𑐵 𑐂𑐣𑐾𑐐𑐸 𑐢𑐂𑐐𑐸 𑐕𑐎𑑅𑐫𑐵 𑐣𑐶𑑄𑐟𑐶𑑄 𑐢𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐡𑐸 𑑋

𑐰𑐶𑐢𑐾𑐫𑐎𑐫𑑂 𑐳𑐸𑐎𑐩𑑂𑐰𑐵𑐳𑐷 𑐰 𑐀𑐧𑑂𑐫𑐰𑐳𑑂𑐠𑐶𑐟 𑐰𑐳𑑀𑐰𑐵𑐳𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐢𑐎𑐵𑑅 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐠𑑅 𑐥𑐬𑐶𑐰𑐵𑐬𑐫𑐵 𑐣𑐵𑐩𑐫𑑂 𑐖𑐐𑑂𑐐𑐵 𑐡𑐸𑐳𑐵𑑄 𑐣𑑄 𑐠𑑅𑐐𑐸 𑐣𑐵𑐩𑐫𑑂 𑐖𑐐𑑂𑐐𑐵 𑐩𑐡𑐸𑐥𑐶𑑄𑐟 𑐬𑐵𑐖𑑂𑐫𑑄 𑐖𑐐𑑂𑐐𑐵 𑐂𑐣𑐾𑐐𑐸 𑐮𑑃𑐥𑐸 𑐔𑐵𑐫𑐾𑐎𑐹𑐐𑐸 𑐏𑐣𑐾𑐡𑐸 𑑋

𑐰𑐶𑐢𑐾𑐫𑐎𑐫𑑂 𑐖𑐐𑑂𑐐𑐵 𑐂𑐣𑐾𑐐𑐸 𑐣𑐶𑐟𑐶𑑄 𑐎𑐾𑐣𑑂𑐡𑑂𑐬 𑐳𑐬𑐎𑐵𑐬𑑄 𑐳𑑂𑐠𑐵𑐣𑐷𑐫 𑐟𑐴 𑐰 𑐥𑑂𑐬𑐡𑐾𑐱 𑐳𑐬𑐎𑐵𑐬𑐮𑐶𑐳𑐾 𑐳𑐩𑐣𑑂𑐰𑐫 𑐫𑐵𑐂 𑐢𑐎𑐵𑑅 𑐣𑑂𑐴𑑂𑐫𑐠𑐣𑐵𑐟𑑅𑐐𑐸 𑐡𑐸𑐳𑐵 𑐳𑐸𑐎𑐸𑐩𑑂𑐧𑐵𑐳𑐷 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐸𑐂 𑐢𑐎𑐵𑑅 𑐳𑐬𑐎𑐵𑐬 𑐥𑐎𑑂𑐲𑐢𑐬 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐨𑐹𑐩𑐶𑐳𑐸𑐢𑐵𑐬 𑐟𑐠𑐵 𑐰𑑂𑐫𑐰𑐳𑑂𑐠𑐵 𑐟𑐠𑐵 𑐳𑐴𑐎𑐵𑐬𑐷𑐩𑐣𑑂𑐟𑑂𑐬𑐷 𑐥𑐡𑑂𑐩𑐵 𑐀𑐬𑑂𑐫𑐵𑐮𑑄 𑐳𑑄𑐳𑐡𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐗𑐶𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐖𑐐𑑂𑐐𑐵 𑐩𑐡𑐸𑐥𑐶𑑄 𑐩𑐣𑐹𑐟𑐫𑑂𑐟 𑐳𑐬𑐎𑐵𑐬𑐷 𑐖𑐐𑑂𑐐𑐵𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐖𑐹𑐳𑐵𑑄 𑐂𑐩𑐶𑐟 𑐄𑐐𑐸 𑐖𑐐𑑂𑐐𑐵 𑐧𑐷𑐐𑐸 𑐧𑑂𑐫𑐰𑐳𑑂𑐠𑐵 𑐫𑐵𑐣𑐵𑐐𑐸 𑐢𑐎𑐵𑑅 𑐳𑑂𑐥𑐲𑑂𑐚 𑐫𑐵𑐣𑐵𑐡𑐷𑐐𑐸𑐫𑐵𑐟 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐣𑐵𑐥𑑄 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐳𑑄 𑐐𑐩𑑂𑐨𑐷𑐬 𑐬𑐸𑐥𑑄 𑐎𑐵𑑅𑐐𑐸 𑐡𑐸 𑑋

𑐠𑐸𑐐𑐸 𑐰𑐶𑐢𑐾𑐫𑐎𑐫𑐵𑐟 𑐳𑑂𑐰𑐮 𑐢𑐵𑑅𑐳𑐵 𑐐𑐣 𑐔𑑂𑐰𑑄𑐥𑐶𑑄𑐟 𑐐𑐣𑐫𑐵𑐐𑐸 𑐖𑐐𑑂𑐐𑐵 𑐧𑐷𑐐𑐸 𑐢𑐎𑐵𑑅 𑐄𑐮𑑂𑐮𑐾𑐏 𑐫𑐵𑐣𑐵𑐟𑑅𑐐𑐸 𑐩𑐡𑐸𑑋 𑐄𑐎𑐶𑐫𑐵 𑐀𑐬𑑂𑐠 𑐥𑐶𑐣𑐾𑑄 𑐳𑑂𑐰𑐣𑐶𑐐𑐮𑐫𑑂 𑐰𑐫𑐵𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐐𑐸 𑐣𑐶𑐟𑐶𑑄 𑐳𑑂𑐰𑐣𑐶𑐐𑑅𑐫𑐵 𑐴𑐾 𑐖𑐐𑑂𑐐𑐵 𑐧𑐷 𑐦𑐂𑐐𑐸 𑐳𑐩𑑂𑐨𑐵𑐰𑐣𑐵 𑐡𑐟 𑑋 𑐳𑑂𑐰𑐣𑐶𑐐𑑅𑐫𑐵 𑐠𑐷𑐠𑐷 𑐏𑐸𑐳𑐶 𑐳𑐶𑐠𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐳𑐸𑐎𑐸𑐩𑑂𑐧𑐵𑐳𑐷𑐟𑐫𑑂𑐟 𑐣𑑄 𑐳𑑂𑐰𑐣𑐶𑐐𑑅𑐫𑐵 𑐴𑐾 𑐖𑐐𑑂𑐐𑐵 𑐧𑐷𑐐𑐸 𑐀𑐰𑐳𑑂𑐠𑐵 𑐖𑐸𑐮 𑑋 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐳𑑂𑐰𑐮 𑐢𑐵𑑅𑐳𑐵 𑐟𑑅𑐎𑑂𑐰𑑅𑐩𑐕𑐶 𑐴𑐾 𑐳𑐸𑐎𑐸𑐩𑑂𑐧𑐵𑐳𑐷𑐫𑐵 𑐣𑐵𑐩𑐫𑑂 𑐖𑐐𑑂𑐐𑐵 𑐰 𑐕𑐾𑑃 𑐧𑐷𑐐𑐸 𑐖𑑂𑐫𑐵 𑐬𑐵𑐖𑑂𑐫𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐁𑑅 𑐣𑑄 𑐄𑐐𑐸 𑐴𑐾 𑐎𑐠𑑄 𑐣𑑂𑐴𑐹𑐐𑐸 𑐎𑐵𑐣𑐸𑐣 𑐎𑐠𑑄 𑐕𑐎𑑂𑐰𑑅𑐫𑐵 𑐣𑐶𑐟𑐶𑑄 𑐢𑐎𑐵𑑅 𑐨𑐹𑐩𑐶 𑐧𑐷𑐐𑐸 𑐖𑐸𑐮 𑑋

𑐐𑐸𑐎𑐠𑑄 𑐧𑐷𑐐𑐸 𑐣𑐵𑐥𑑄 𑐥𑑂𑐬𑐎𑑂𑐬𑐶𑐫𑐵 𑐕𑐸 𑐏𑑅 𑐢𑐂𑐐𑐸 𑐳𑐰𑐵𑐮𑐫𑑂 𑐮𑐵 𑐎𑐣𑑂𑐴𑐫𑑂 𑐰𑐣𑐵 𑐣𑐷𑐟𑐶 𑐣𑐶𑐫𑐩𑐵𑐰𑐮𑐷 𑐰𑐫𑐾 𑐢𑐸𑑄𑐎𑐵𑑅 𑐖𑐎 𑐳𑑂𑐥𑐲𑑂𑐚 𑐖𑐸𑐂 𑑋 𑐟𑐬 𑐁𑑅 𑐴𑐾 𑐢𑐵𑐫𑐾𑐦𑐸𑐐𑐸 𑐀𑐰𑐳𑑂𑐠𑐵 𑐕𑐸 𑐏𑑅 𑐢𑐵𑑅𑐳𑐵 𑐳𑑂𑐰𑐣𑐶𑐐𑐮𑐫𑑂 𑐡𑐸𑐐𑐸 𑐳𑐬𑐎𑐵𑐬𑐷 𑐖𑐐𑑂𑐐𑐵 𑐰𑐵 𑐳𑐩𑐸𑐡𑐵𑐫 𑐣𑑄 𑐥𑑂𑐬𑐫𑑀𑐐 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐧𑐵𑐫𑑂 𑐐𑐸𑐠𑐶𑐫𑐵 𑐖𑐐𑑂𑐐𑐵𑐫𑐵𑐟 𑐬𑐵𑐖𑑂𑐫𑑄 𑐂𑐣𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐡𑐸𑑋 𑐀𑐰𑐳𑑂𑐠𑐶𑐟𑐶𑐫𑐵 𑐣𑐵𑐩𑐫𑑂 𑐀𑐮𑐾 𑐨𑐹𑐩𑐶𑐴𑐶𑐣𑐫𑐵 𑐣𑐵𑐩𑐫𑑂 𑐀𑐠𑐾 𑐖𑐐𑑂𑐐𑐵 𑐂𑐣𑐾𑐐𑐸 𑐖𑑂𑐫𑐵 𑐎𑐵𑐣𑐸𑐣𑐷 𑐬𑐸𑐥𑑄 𑐴𑐾 𑐫𑐵𑐫𑐾𑐟𑑂𑐫𑑄𑐐𑐸𑐮𑐶𑑄 𑐠𑐸𑐎𑐶𑑄 𑐫𑐵𑐣𑐵𑑅 𑐡𑐎𑐮𑐫𑑂 𑐀𑐥𑑂𑐰𑑅 𑐳𑑂𑐰𑐣𑐶𑐐𑑅 𑐰 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐟 𑐮𑐶𑐔𑑂𑐰𑑅 𑐮𑐵𑐂𑐐𑐸 𑐀𑐰𑐳𑑂𑐠𑐵 𑐡𑐸 𑑋

𑐳𑑂𑐰𑐣𑐶𑐐𑐮𑐫𑑂 𑐀𑐠𑐾𑑄 𑐮𑐵 𑐣𑐾𑐰𑐵𑑅𑐟 𑐗𑐣 𑐗𑐣 𑐀𑐮𑑂𑐥𑐩𑐟𑐫𑑂 𑐮𑐵𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐁𑑅 𑐳𑐸𑐎𑐸𑐩𑑂𑐧𑐵𑐳𑐷 𑐰𑐵 𑐀𑐧𑑂𑐫𑐰𑐳𑑂𑐠𑐶𑐟𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐣𑑄 𑐩𑐣𑐹𑐟𑐫𑑂𑐟 𑐖𑐐𑑂𑐐𑐵 𑐂𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾𑐰𑑄 𑐗𑐣 𑐗𑐣 𑐣𑐾𑐰𑐵𑑅𑐟 𑐀𑐮𑑂𑐥𑐩𑐟𑐫𑑂 𑐮𑐵𑐣𑐵 𑐰𑐣𑐷 𑑋 𑐥𑐶𑐣𑐾𑑄 𑐰𑐫𑐵𑑅 𑐖𑐐𑑂𑐐𑐵 𑐣𑑂𑐫𑐵𑐣𑐵𑑅 𑐔𑑂𑐰𑐣𑐷𑐥𑐶𑑄 𑐖𑐎 𑐩𑐏𑐸 𑐁𑑅 𑐮𑐵 𑐳𑐶𑐟𑐶𑐎𑑄 𑐖𑐐𑑂𑐐𑐵 𑐎𑐫𑐵𑑅 𑐔𑑂𑐰𑐣𑐷𑐥𑐶𑑄 𑐣𑑄 𑐡𑐟𑑋 𑐠𑐸𑐐𑐸 𑐮𑑂𑐫𑐵𑐏𑑄 𑐳𑑂𑐰𑐮 𑐢𑐵𑑅𑐳𑐵 𑐳𑑂𑐰𑐣𑐶𑐐𑐮𑐫𑑂 𑐩𑐣𑐹𑐟 𑐗𑐣 𑐗𑐣 𑐀𑐥𑑂𑐰𑐫𑐵 𑐰𑐣𑐷𑐐𑐸 𑐀𑐰𑐳𑑂𑐠𑐵 𑐖𑐸𑐮 𑑋

𑐣𑐾𑐰𑐵𑑅𑐟𑐫𑑂𑐳𑑄 𑐳𑐵𑐩𑐸𑐴𑐶𑐎 𑐬𑐸𑐥𑑄 𑐕𑑂𑐫𑐮𑐵 𑐰𑐫𑐵𑐔𑑂𑐰𑑄𑐐𑐸 𑐳𑐩𑐸𑐡𑐵𑐫𑐫𑐵 𑐖𑐐𑑂𑐐𑐵𑐣𑐶𑐳𑐾𑑄 𑐳𑐬𑐎𑐵𑐬𑐷 𑐖𑐐𑑂𑐐𑐵 𑐰 𑐐𑐸𑐠𑐶𑐫𑐵 𑐖𑐐𑑂𑐐𑐵𑐫 𑐟𑐎𑑄 𑐬𑐵𑐖𑑂𑐫𑑄 𑐔𑐵𑐴𑐵𑐣𑐵 𑐫𑐵𑐟 𑐢𑐵𑑅𑐳𑐵 𑐩𑐾𑐥𑐶𑐣𑑂𑐟 𑐟𑐫𑐾 𑐴𑐫𑐾𑐦𑐂𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑑄𑐐𑐸 𑐡𑐸𑑋 𑐳𑑂𑐰𑐣𑐶𑐐𑐮𑐫𑑂 𑐳𑐮𑑄𑐳𑑅 𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐣𑐾𑐥𑐵𑐮𑐫𑑂 𑐳𑑄𑐰𑐶𑐢𑐵𑐣, 𑐋𑐣 𑐎𑐵𑐣𑐸𑐣 𑐟𑐎𑑄 𑐩𑐡𑐸𑐐𑐸 𑐂𑐮𑑄𑐣𑐶𑐳𑐾𑑄 𑐕𑐾𑑃 𑐡𑐣𑐵𑑅 𑐔𑑂𑐰𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐎𑐫𑑁𑑄 𑐣𑐾𑐰𑐵𑑅𑐟𑐫𑑂𑐐𑐸 𑐁𑑅 𑐟𑐎 𑐣𑑄 𑐕𑐾𑑃𑐫𑐵 𑐥𑐹𑐬𑑂𑐖𑐵 𑐩𑐡𑐸𑐣𑐶 𑑋 𑐳𑑂𑐰𑐰𑐵𑐳𑐷𑐟𑐫𑑂𑐐𑐸 𑐥𑐸𑐬𑑂𑐖𑐵 𑐩𑐡𑐸𑐣𑐶 𑑋 𑐥𑐸𑐬𑑂𑐖𑐵 𑐩𑐡𑐸𑐥𑐶𑑄 𑐣𑐵𑐥𑑄 𑐥𑐸𑐬𑑂𑐖𑐵 𑐡𑐸𑐥𑐶𑐣𑐶𑐐𑐸 𑐕𑐾𑑃 𑐟𑐎𑑄 𑐐𑐿𑐬 𑐣𑑂𑐫𑐵𑐫𑐶𑐎 𑐳𑐜𑐎 𑐰𑐶𑐳𑑂𑐟𑐵𑐬𑐫𑐵 𑐣𑐵𑐩𑐫𑑂 𑐠𑐸𑐣𑐾𑐐𑐸 𑐰 𑐧𑑂𑐫𑐎𑑂𑐟𑐶𑐫𑐵 𑐖𑐐𑑂𑐐𑐵 𑐟𑐎𑑄 𑐳𑐵𑐬𑑂𑐰𑐖𑐣𑐶𑐎 𑐖𑐐𑑂𑐐𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐳𑐵𑐬𑑂𑐰𑐖𑐣𑐶𑐎 𑐖𑐐𑑂𑐐𑐵 𑐀𑐬𑑂𑐠𑐵𑐟 𑐳𑐬𑐎𑐵𑐬𑐷 𑐖𑐐𑑂𑐐𑐵 𑐟𑐎𑑄 𑐧𑑂𑐫𑐎𑑂𑐟𑐶𑐫𑐵 𑐣𑐵𑐩𑐫𑑂 𑐧𑐷𑐐𑐸 𑐎𑐠𑑄𑐫𑐵 𑐣𑐶𑐫𑐩 𑐴𑐫𑐾𑐟𑑂𑐫𑑄𑐐𑐸 𑐢𑐂𑐐𑐸 𑐟𑐳𑐎𑑄 𑐐𑐩𑑂𑐨𑐷𑐬 𑐰𑐶𑐲𑐫 𑐏𑑅 𑑋

𑐳𑑄𑐰𑐶𑐢𑐵𑐣𑐫𑑂 𑐁𑐰𑐵𑐳 𑐰 𑐰𑐳𑑀𑐰𑐵𑐳𑐫𑐵 𑐴𑐎 𑐢𑐂𑐐𑐸 𑐩𑐵𑐰𑐣 𑐀𑐢𑐶𑐎𑐵𑐬 𑐏𑑅 𑐢𑐎𑐵𑑅 𑐔𑑂𑐰𑐫𑐵𑐟𑑅𑐐𑐸 𑐡𑐸 𑐠𑑂𑐰 𑐧𑐵𑑄𑐮𑐵𑑅𑐐𑐸 𑐥𑐎𑑂𑐲 𑐏𑑅 𑑋 𑐳𑐸𑑄 𑐣𑑄 𑐩𑐣𑐹𑐫𑐵𑐟 𑐔𑑂𑐰𑐣𑐾𑐐𑐸 𑐠𑐵𑐫𑑂 𑐩𑐵𑑅 𑑋 𑐂𑐩𑐶𑐟 𑐬𑐵𑐖𑑂𑐫𑑄 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅 𑑋 𑐟𑐬 𑐔𑑂𑐰𑐣𑐾𑐐𑐸 𑐠𑐵𑐫𑑂 𑐩𑐡𑐸𑐐𑐸 𑐣𑐵𑐩𑐫𑑂 𑐠𑐵𑐫𑑂 𑐠𑐵𑐳𑑄 𑐩𑐣𑐹𑐟 𑐴𑐫𑐵 𑐟𑐫𑐾𑐐𑐸 𑐀𑐮𑐾 𑐳𑑂𑐰𑐣𑐶𑐐𑐮𑐫𑑂 𑐴𑐾 𑐂𑐩𑐶𑐟 𑐰𑐳𑑀𑐰𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵 𑐢𑐵𑐂𑐐𑐸 𑐩𑐸𑐮𑐸𑐎𑐫𑐵 𑐰𑑂𑐫𑐰𑐳𑑂𑐠𑐵 𑐰 𑐳𑑄𑐑𑐷𑐫𑐟𑐵𑐫𑐵 𑐨𑐵𑐰𑐣𑐵𑐫𑐵 𑐴𑐾 𑐀𑑅𑐏𑑅 𑐏𑑅 𑑋 𑐣𑐾𑐥𑐵𑑅 𑐳𑑄𑐑𑐷𑐫𑐟𑐵𑐫𑑂 𑐰𑐣𑐾 𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐣𑑄 𑐳𑐸𑐎𑐸𑐩𑑂𑐰𑐵𑐳𑐷 𑐰 𑐀𑐰𑐳𑑂𑐠𑐶𑐟𑐶𑐫𑐵𑐟 𑐧𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐳𑑂𑐰𑐣𑐶𑐐𑑅𑐫𑐵 𑐴𑐾 𑐖𑐐𑑂𑐐𑐵 𑐂𑐣𑐾𑐐𑐸 𑐖𑑂𑐫𑐵 𑐫𑐵𑐟 𑐢𑐵𑑅𑐳𑐵 𑐧𑐵𑐳𑑂𑐟𑐰𑐫𑑂 𑐠𑑂𑐰 𑐳𑑄𑐑𑐷𑐫𑐟𑐵𑐫𑐵 𑐩𑐬𑑂𑐩 𑐨𑐵𑐰𑐣𑐵 𑐰 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐟 𑐥𑐶𑐟𑐣𑐾𑐐𑐸 𑐫𑑀𑐖𑐣𑐵 𑐳𑐴𑐶𑐟𑐫𑐵 𑐕𑐐𑐹 𑐎𑐠𑑄𑐫𑐵 𑐁𑐎𑑂𑐬𑐩𑐞 𑐴𑐾 𑐏𑑅 𑑋

𑐳𑑄𑐑𑐷𑐫𑐟𑐵𑐫𑑂 𑐰𑐣𑐾 𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐳𑐸𑑄 𑐣𑑄 𑐔𑑂𑐰𑐣𑐾𑐐𑐸 𑐠𑐵𑐫𑑂 𑐩𑐡𑐸𑐥𑐶𑑄 𑐀𑐬𑑂𑐠𑐵𑐟 𑐨𑐹𑐩𑐶 𑐩𑐡𑐸𑐥𑐶𑑄 𑐏𑑅𑐳𑐵 𑐂𑐥𑐶𑑄 𑐐𑐣𑑄 𑐰𑑅𑐐𑐸 𑐏𑑅 𑐀𑐣 𑐴𑐾 𑐫𑑄𑐎𑐵𑑅 𑐟𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅 𑑋 𑐟𑐬 𑐀𑐠𑐾 𑐩𑐫𑐵𑐳𑐾 𑐐𑐣 𑐐𑐣 𑐔𑑂𑐰𑐣𑐵𑐔𑑂𑐰𑐣 𑐀𑐣 𑐀𑐣 𑐴𑐾 𑐟𑐫𑐾𑐐𑐸 𑐎𑐠𑑄𑐫𑐵 𑐣𑐶𑐫𑐟 𑐳𑐴𑐶𑐟 𑐐𑐸𑐐𑐸 𑐰𑐶𑐢𑐾𑐫𑐎 𑐴𑐮 𑐠𑐸𑐎𑐶𑑄 𑐳𑑂𑐰𑐣𑐶𑐐𑑅 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅𑐟𑐫𑑂𑐟 𑐩𑐾𑐐𑐸 𑐎𑐠𑑄𑐫𑐵 𑐥𑑂𑐬𑐴𑐵𑐬 𑐖𑐸𑐂𑐐𑐸 𑐀𑐰𑐳𑑂𑐠𑐵 𑐡𑐸𑑋 𑐄𑐎𑐶𑑄 𑐳𑐟𑑂𑐟𑐵𑐥𑐎𑑂𑐲 𑐰 𑐰𑐶𑐥𑐎𑑂𑐲𑐣𑐶𑐳𑐾𑑄 𑐠𑐷𑐠𑐷 𑐬𑐵𑐖𑐣𑐷𑐟𑐶𑐎 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐣𑐶𑐳𑐾𑑄 𑐳𑐵𑑄𑐳𑐡𑐟𑐫𑑂𑐟 𑐟𑐎𑑄 𑐕𑐥𑑂𑐰𑐵𑑅 𑐴𑐾 𑐩𑑂𑐴𑐸𑐟𑐸𑑄 𑐢𑐵𑐫𑐾𑐩𑐵𑑅𑐐𑐸 𑐡𑐸 𑐎𑐶 𑐐𑐸𑐠𑐶𑐫𑐵 𑐖𑐐𑑂𑐐𑐵, 𑐳𑐵𑐬𑑂𑐰𑐖𑐣𑐶𑐎 𑐬𑐸𑐥𑑄 𑐥𑑂𑐬𑐫𑑀𑐐 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐖𑐐𑑂𑐐𑐵, 𑐣𑐾𑐰𑐵𑑅 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶 𑐣𑐵𑐥𑑄 𑐳𑐨𑑂𑐫𑐟𑐵 𑐣𑐵𑐥 𑐳𑑂𑐰𑐣𑐵𑐔𑑂𑐰𑑄𑐐𑐸, 𑐐𑐸𑐠𑐶 𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐖𑐐𑑂𑐐𑐵𑐫𑐵𑐟 𑐐𑐸𑐐𑐸 𑐣𑑄 𑐴𑐵𑐮𑐟𑐫𑑂𑐟 𑐖𑐐𑑂𑐐𑐵 𑐰𑐶𑐴𑐶𑐣 𑐩𑐣𑐹𑐫𑐵 𑐣𑐵𑐩𑐫𑑂 𑐂𑐣𑐾𑐐𑐸 𑐖𑑂𑐫𑐵 𑐫𑐵𑐫𑐾 𑐡𑐂𑐩𑐏𑐸 𑑋

𑐁𑐡𑐶𑐰𑐵𑐳𑐷𑐟𑐫𑑂𑐐𑐸 𑐨𑐹𑐩𑐶 𑐀𑐢𑐶𑐎𑐵𑐬 𑐣𑐵𑐥 𑐳𑑂𑐰𑐣𑐵𑐔𑑂𑐰𑑄𑐐𑐸 𑐂𑐩𑐶𑐐𑐸 𑐳𑐨𑑂𑐫𑐟𑐵 𑐰 𑐂𑐩𑐶𑐐𑐸 𑐥𑐴𑐶𑐔𑐵𑐣 𑐣𑐵𑐥 𑐳𑑂𑐰𑐵𑐣𑐵𑐔𑑂𑐰𑑄𑐐𑐸 𑐨𑐹𑐩𑐶𑐫𑐵 𑐴𑐾 𑐖𑐐𑑂𑐐𑐵 𑐂𑐣𑐾𑐐𑐸 𑐫𑑀𑐖𑐣𑐵 𑐎𑐠𑑄 𑐐𑐸𑐐𑐸 𑐎𑐠𑑄 𑐐𑐸𑐥𑐔𑐸𑐥 𑐫𑐵𑐣𑐵 𑐰𑐶𑐢𑐾𑐫𑐎 𑐴𑐫𑐵 𑐖𑐣𑐟𑐵𑐫𑐵𑐟 𑐳𑐹𑐔𑐣𑐵 𑐟𑐎𑑄 𑐩𑐧𑐶𑐳𑐾 𑐥𑐵𑐬𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐢𑐂𑐐𑐸 𑐟𑐳𑐎𑑄 𑐐𑐩𑑂𑐨𑐷𑐬 𑐰𑐶𑐲𑐫 𑐏𑑅 𑑋 𑐎𑐣𑑂𑐴𑐫𑑂 𑐰𑐣𑐵𑑅 𑐠𑐸𑐎𑐶𑑄 𑐮𑐵𑐂𑐐𑐸 𑐮𑐶𑐔𑑂𑐰𑑅𑐫𑐵𑐟 𑐎𑐫𑐵 𑐳𑐵𑑄𑐳𑐡𑑂𑐟𑐫𑑂𑐟 𑐟𑐎𑑄 𑐖𑐣𑐟𑐵𑑄 𑐣𑑂𑐴𑑂𑐫𑐳𑑅 𑐣𑑂𑐫𑐣𑐾𑐟 𑐟𑐫𑐵𑐬 𑐖𑐸𑐫𑐵𑐔𑑂𑐰𑐣𑐾𑐩𑐵𑑅 𑑋 𑐖𑐣𑐟𑐵𑑄 𑐳𑐵𑑄𑐳𑐡𑐟𑐫𑑂𑐟 𑐕𑐸𑐎𑐶𑐫𑐵 𑐁𑐢𑐵𑐬𑐫𑑂 𑐨𑐹𑐩𑐶 𑐳𑐩𑑂𑐧𑐣𑑂𑐢𑐷 𑐰𑐶𑐢𑐾𑐫𑐎 𑐥𑐵𑐬𑐶𑐟 𑐫𑐵𑐣𑐵𑐐𑐸 𑐏𑑅 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐣𑑂𑐫𑐣𑐾𑐟 𑐟𑐫𑐵𑐬 𑐖𑐸𑐫𑐵 𑐔𑑂𑐰𑐣𑐾𑐩𑐵𑑅 𑑋 𑐳𑑂𑐰𑐣𑐶𑐐𑑅𑐫𑐵 𑐁𑐡𑐶𑐰𑐵𑐳𑐷 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵𑐟 𑐩𑐾𑐐𑐸 𑐎𑐠𑑄𑐫𑐵 𑐥𑑂𑐬𑐴𑐵𑐬𑐫𑐵 𑐬𑐸𑐥𑐫𑑂 𑐀𑐠𑐾 𑐰𑐶𑐢𑐫𑐾𑐎 𑐥𑐵𑐬𑐶𑐟 𑐫𑐵𑑅𑐐𑐸𑐮𑐶𑑄 𑐁𑑅 𑐕𑐥𑑂𑐰𑐵𑑅 𑐩𑑂𑐴𑐸𑐟𑐸𑑄 𑐴𑐾 𑐢𑐵𑐫𑐾𑐩𑐵𑑅 𑐎𑐶 𑐐𑐣𑑄 𑐰𑑅𑐥𑐶𑑄 𑐳𑐸𑐎𑐸𑐩𑑂𑐰𑐵𑐳𑐷𑐟 𑐏𑑅 𑐀𑐣 𑐴𑐾 𑐫𑑄𑐎𑐵𑑅 𑐂𑐩𑐶𑐟 𑐀𑐣𑐫𑐵 𑐴𑐾 𑐖𑐐𑑂𑐐𑐵 𑐧𑐶𑐄 𑐀𑐮𑐾 𑐐𑐣𑑄 𑐰𑐫𑐵 𑐀𑐰𑑂𑐫𑐰𑐳𑑂𑐠𑐶𑐟 𑐰𑐳𑑀𑐰𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑑄 𑐏𑑅 𑐂𑐩𑐶𑐟 𑐂𑐩𑐶𑐐𑐸 𑐴𑐾 𑐠𑐵𑐳𑐫𑑂 𑐫𑑄𑐎𑐵𑑅 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐟 𑑋 𑐦𑐸𑐎𑐳𑐶𑐟 𑐳𑑂𑐰𑐣𑐶𑐐𑐮𑐫𑑂 𑐟𑐫𑐾 𑐴𑐫𑐾𑐐𑐸 𑐫𑑀𑐖𑐣𑐵 𑐧𑐣𑑂𑐡 𑐫𑐵 𑐢𑐎𑐵𑑅 𑐢𑐵𑐫𑐾𑐩𑐵𑑅𑐐𑐸 𑐃 𑐰𑑅𑐐𑐸 𑐡𑐸 𑑋