𑐧𑑂𑐰𑐫𑐵𑐔𑑂𑐰𑑄𑐐𑐸 𑐖𑐴𑐵𑐖𑐮𑐶𑐳𑐾 𑐳𑐵𑐎𑑂𑐲𑐵𑐟𑑂𑐎𑐵𑐬
𑐗𑐷𑐳𑑄 𑐴𑐰𑐵𑐂𑐖𑐴𑐵𑐖 𑐧𑑂𑐰𑐫𑐵𑐔𑑂𑐰𑑄𑐐𑐸 𑐮𑐵 𑐫𑐎𑑂𑐰 𑐴𑐾 𑐏𑐣𑐵 𑑋 𑐐𑐸𑐮𑐶𑐏𑐾 𑐩𑐣𑐹𑐟 𑐮𑐵 𑐴𑐰𑐵𑐂𑐖𑐴𑐵𑐖𑐫𑑂 𑐔𑑂𑐰𑐣𑐵𑑅 𑐫𑐵𑐟𑑂𑐬𑐵 𑐣𑑄 𑐫𑐵𑐫𑐾𑐢𑐸𑐎𑐹𑐥𑐶𑑄 𑐡𑐸 𑑋 𑐠𑐠𑐾 𑐴𑐰𑐵𑐂𑐖𑐴𑐵𑐖 𑐧𑑂𑐰𑐂𑐐𑐸 𑐂𑐮𑐫𑑂 𑐳𑐟𑐶𑐎𑑄 𑐳𑑂𑐰𑐫𑐾𑐐𑐸 𑐀𑐰𑐳𑐬 𑐢𑐵𑑅𑐳𑐵 𑐄𑐮𑐶 𑐡𑐂𑐩𑐏𑐸, 𑐐𑐸𑐮𑐶 𑐐𑑂𑐬𑐷𑐳𑐫𑐵 𑐕𑐐𑐹 𑐡𑑂𑐰𑐷𑐥𑐫𑑂 𑐰𑐣𑐵𑑅 𑐄𑐎𑐶𑐫𑐵 𑐳𑐵𑐎𑑂𑐲𑐵𑐟𑑂𑐎𑐵𑐬 𑐫𑐵𑐫𑐾 𑐏𑐣𑐷 𑑋 𑐐𑑂𑐬𑐷𑐳𑐫𑑂 𑐳𑑂𑐎𑐶𑐠𑑀𑐳 𑐣𑐵𑑄𑐫𑐵 𑐕𑐐𑐹 𑐡𑑂𑐰𑐷𑐥 𑐡𑐸 𑑋 𑐐𑐸𑐐𑐸 𑐰𑐶𑐱𑑂𑐰𑐫𑑂 𑐴𑐾 𑐩𑐵𑐣𑐰 𑐖𑐷𑐰𑐣𑐫𑑂 𑐀𑐟𑐶𑐎𑑄 𑐡𑐸𑐬𑑂𑐮𑐨 𑐥𑑂𑐬𑐎𑐵𑐬𑐫𑐵 𑐰 𑐧𑐶𑐳𑑂𑐎𑑄𑐎𑐠𑑄𑐫𑐵 𑐀𑐣𑐸𑐨𑐹𑐟𑐶𑐫𑐵 𑐣𑐶𑑄𑐟𑐶𑑄 𑐣𑐵𑑄 𑐖𑐵𑑅 𑑋
𑐗𑐷𑐳𑑄 𑐴𑐰𑐵𑐂𑐖𑐴𑐵𑐖 𑐧𑑂𑐰𑐫𑐵𑐔𑑂𑐰𑑄𑐐𑐸 𑐫𑐎𑑂𑐰 𑐴𑐾 𑐏𑐣𑐵, 𑐰𑐶𑐩𑐵𑐣𑐳𑑂𑐠𑐮𑐫𑑂 𑐴𑐾 𑐰𑑄𑐳𑐵𑑄 𑐣𑑄 𑐄𑐮𑐶 𑐳𑐟𑐶𑐎𑑄 𑐖𑐴𑐵𑐖 𑐧𑑂𑐰𑑅𑐐𑐸 𑐳𑑂𑐰𑐫𑐾 𑐏𑐣𑐷𑐩𑐏𑐸, 𑐐𑐸𑐮𑐶 𑐐𑑂𑐬𑐷𑐳𑐫𑐵 𑐠𑑂𑐰 𑐳𑑂𑐎𑐶𑐠𑑀𑐳 𑐡𑑂𑐰𑐷𑐥𑐫𑑂 𑐰𑐣𑐵𑑅 𑐳𑑂𑐰𑐫𑐾 𑐏𑐣𑐷 𑑋 𑐠𑑂𑐰 𑐡𑑂𑐰𑐷𑐥𑐫𑑂 𑐩𑐣𑐹𑐟 𑐖𑐩𑐶𑐣𑐫𑑂 𑐡𑐣𑐵 𑐔𑑂𑐰𑑃𑐔𑑂𑐰𑑄 𑐴𑐾 𑐧𑑂𑐰𑐫𑐵𑐔𑑂𑐰𑑄𑐐𑐸 𑐖𑐴𑐵𑐖𑐮𑐶𑐳𑐾 𑐟𑐳𑐎𑑄 𑐴𑐾 𑐳𑐟𑐶𑐎𑑄 𑐳𑐵𑐎𑑂𑐲𑐵𑐟𑑂𑐎𑐵𑐬 𑐫𑐵𑐫𑐾 𑐏𑐣𑐷 𑑋 𑐩𑐵𑐣𑐾 𑐫𑐵𑐣𑐵𑐡𑐶𑐳𑑃 𑐎𑐶 𑐠𑑂𑐰 𑐡𑑂𑐰𑐷𑐥𑐫𑑂 𑐡𑐣𑐵𑑅 𑐕𑐶𑑄 𑐧𑑂𑐰𑐫𑐵 𑐔𑑂𑐰𑑄𑐐𑐸 𑐖𑐴𑐵𑐖𑐫𑐵𑐟 𑐮𑑂𑐴𑐵𑐟𑑄 𑐴𑐾 𑐣𑑂𑐴𑑂𑐫𑐵𑐫𑐾 𑐡𑐂 𑑋
𑐄𑐎𑐶𑑄 𑐴𑐾 𑐠𑑂𑐰 𑐳𑑂𑐎𑐶𑐠𑑀𑐳 𑐡𑑂𑐰𑐷𑐥 𑐥𑐬𑑂𑐫𑐚𑐎𑐫𑐵 𑐣𑐶𑑄𑐟𑐶𑑄 𑐧𑐶𑐳𑑂𑐎𑑄𑐫𑐵 𑐕𑐐𑐹 𑐁𑐎𑐬𑑂𑐲𑐞𑐫𑐵 𑐎𑐾𑐣𑑂𑐡𑑂𑐬 𑐖𑐸𑐫𑐵 𑐧𑐶𑐄𑐐𑐸 𑐡𑐸 𑑋 𑐐𑑂𑐬𑐷𑐳𑐫𑐵 𑐳𑑂𑐎𑐶𑐠𑑀𑐳 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐰𑐶𑐩𑐵𑐣𑐳𑑂𑐠𑐮𑐫𑐵 𑐬𑐣𑐰𑐾 𑐣𑑄 𑐳𑑂𑐎𑐶𑐠𑑀𑐳 𑐡𑑂𑐰𑐷𑐥 𑐳𑑂𑐰𑐫𑐵𑑄 𑐕𑐸𑑄 𑐨𑐔𑐵 𑐖𑐎 𑐟𑐵𑐥𑐵𑐎 𑐡𑐸 𑐀𑐮𑐾 𑐳𑐩𑐸𑐡𑑂𑐬 𑐰 𑐰𑐶𑐩𑐵𑐣𑐳𑑂𑐠𑐮𑐫𑐵 𑐬𑐣𑐰𑐾𑐫𑐵 𑐡𑐠𑐸𑐂 𑐕𑐐𑐹 𑐳𑐟𑐎 𑐡𑐸 𑑋 𑐠𑑂𑐰 𑐴𑐾 𑐳𑐟𑐎 𑐳𑐶𑐠𑐫𑑂 𑐡𑐣𑐵𑑅 𑐥𑐬𑑂𑐫𑐚𑐎𑐟𑐫𑑂𑐳𑑄 𑐰𑐶𑐩𑐵𑐣𑐳𑑂𑐠𑐮𑐫𑑂 𑐖𑐴𑐵𑐖 𑐀𑐰𑐟𑐬𑐞 𑐖𑐹𑐐𑐸 𑐀𑐮𑑁𑐎𑐶𑐎 𑐡𑐺𑐱𑑂𑐫𑐫𑐵 𑐀𑐰𑐮𑑀𑐎𑐣 𑐫𑐵𑐫𑐾 𑐦𑐂 𑑋
𑐰𑐶𑐩𑐵𑐣𑐳𑑂𑐠𑐮𑐫𑐵 𑐬𑐣𑐰𑐾𑐫𑑂 𑐀𑐰𑐟𑐬𑐞 𑐫𑐵𑐫𑐾𑐟𑑂𑐫𑑄𑐐𑐸 𑐖𑐴𑐵𑐖𑐫𑐵𑐟 𑐳𑑂𑐰𑐫𑐾𑐧𑐮𑐫𑑂 𑐐𑐣𑑄 𑐰 𑐴𑐾 𑐳𑐟𑐎𑐫𑑂 𑐖𑐎𑑄 𑐀𑐰𑐟𑐬𑐞 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅𑐮𑐵 𑐢𑐂𑐠𑐾𑑄𑐖𑑂𑐫𑐵𑑅𑐐𑐸 𑐀𑐣𑐸𑐨𑐹𑐟𑐶 𑐖𑐸𑐂 𑑋 𑐠𑑂𑐰 𑐡𑑂𑐰𑐷𑐥𑐫𑐵 𑐖𑐩𑐶𑐣𑐫𑑂 𑐡𑐣𑐵𑐔𑑂𑐰𑑄𑐥𑐶𑑄 𑐩𑐣𑐹 𑐰 𑐬𑐣𑐰𑐾𑐫𑑂 𑐀𑐰𑐟𑐬𑐞 𑐫𑐵𑐫𑐾𑐟𑑂𑐫𑑄𑐐𑐸 𑐖𑐴𑐖𑐵𑐫𑐵 𑐡𑐹𑐬𑐷 𑐐𑐸𑐮𑐶 𑐳𑐟𑐶𑐎𑑄 𑐳𑐵𑐎𑑂𑐲𑐵𑐟𑑂𑐎𑐵𑐬 𑐫𑐵𑐫𑐾 𑐦𑐂 𑐄𑐮𑐶 𑐰𑐶𑐱𑑂𑐰𑐫𑐵 𑐐𑐸𑐐𑐸𑑄 𑐣𑑄 𑐠𑐵𑐳𑐫𑑂 𑐳𑐩𑑂𑐨𑐰 𑐖𑐸𑐂𑐩𑐏𑐸 𑑋
𑐰𑐶𑐩𑐵𑐣𑐳𑑂𑐠𑐮𑐫𑐵 𑐬𑐣𑐰𑐾 𑐟𑐳𑐎𑑄 𑐴𑐾 𑐔𑐷𑐴𑐵𑐎𑑅 𑐖𑐹𑐐𑐸𑐮𑐶𑑄 𑐣𑑄 𑐄𑐐𑐸 𑐰𑐶𑐩𑐵𑐣𑐳𑑂𑐠𑐮𑐫𑑂 𑐖𑐴𑐵𑐖 𑐀𑐰𑐟𑐬𑐞 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐰𑐶𑐩𑐵𑐣𑑄 𑐬𑐣𑐰𑐾𑐫𑐵 𑐱𑐸𑐬𑐸𑐰𑐵𑐟𑐷 𑐰𑐶𑐣𑑂𑐡𑐸𑐂 𑐴𑐾 𑐖𑐩𑐶𑐣𑐫𑑂 𑐎𑐸𑐴𑐵𑑄 𑐰𑐫𑐾𑐩𑐵𑑅𑐐𑐸 𑐧𑐵𑐢𑑂𑐫𑐟𑐵𑐫𑐵 𑐎𑐵𑐬𑐞𑑄 𑐠𑐠𑐾 𑐖𑐹𑐐𑐸 𑐏𑑅 𑑋 𑐟𑐬 𑐠𑑂𑐰 𑐴𑐾 𑐣𑑄 𑐥𑐬𑑂𑐫𑐚𑐎𑐟𑐫𑑂 𑐣𑐶𑑄𑐟𑐶𑑄 𑐡𑐸𑐬𑑂𑐮𑐨 𑐁𑐎𑐬𑑂𑐲𑐞𑐫𑐵 𑐎𑐾𑐣𑑂𑐡𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋
LEAVE YOUR COMMENTS