Read news in NepalBhasa text-- www.hamroschool.com BACK 𑐥𑑂𑐫𑐵𑐣 𑐣𑐩𑑂𑐧𑐬𑑄 𑐎𑐰𑐵𑐜𑐷𑐫𑐵𑐟 𑐳𑑄𑐎𑐚 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑑂𑐫𑐵𑐣 𑐣𑐩𑑂𑐧𑐬𑑄 𑐎𑐰𑐵𑐜𑐷𑐫𑐵𑐟 𑐳𑑄𑐎𑐚

𑐩𑐷 𑐩𑐦𑐫𑐵𑑅 𑐕𑐾𑑃𑐫𑑂 𑐕𑐾𑑃𑐫𑑂 𑐎𑐰𑐵𑐜𑐷 𑐎𑐵𑑅 𑐰𑐂𑐐𑐸 𑐧𑐣𑑂𑐡

𑐫𑐾𑑃 – 𑐡𑑂𑐰𑑅𑐕𑐶 𑐟𑐎𑐵 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐢𑑂𑐫𑐧𑐵𑐫𑐵 𑐎𑐵𑐬𑑀𑐧𑐵𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐳𑐩𑐾𑐟 𑐥𑑂𑐫𑐵𑐣 𑐣𑐩𑑂𑐧𑐬 𑐀𑐣𑐶𑐰𑐵𑐬𑑂𑐫 𑐖𑐸𑐂𑐩𑐵𑑅 𑐢𑐂𑐐𑐸 𑐰𑑂𑐫𑐰𑐳𑑂𑐠𑐵 𑐳𑐬𑐎𑐵𑐬𑑄 𑐫𑐵𑐫𑐾𑐰𑑄 𑐎𑐰𑐵𑐜𑐷 𑐖𑑂𑐫𑐵 𑐫𑐵𑐂𑐥𑐶𑑄𑐟 𑐳𑐩𑐾𑐟 𑐟𑑅𑐢𑑄𑐐𑐸 𑐳𑐩𑐳𑑂𑐫𑐵 𑐖𑐹𑐐𑐸 𑐡𑐸 𑑋 𑐠𑐸𑐎𑐶𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐕𑐾𑑃𑐫𑑂 𑐕𑐾𑑃𑐫𑑂 𑐰𑐫𑐵𑑅 ‘𑐏𑐵𑐮𑐷 𑐧𑑀𑐚𑐮, 𑐥𑐸𑐬𑐵𑐣𑐵 𑐎𑐵𑐐𑐖’ 𑐣𑑂𑐫𑐵𑑅 𑐰𑐂𑐥𑐶𑑄 𑐴𑐾 𑐧𑐣𑑂𑐡 𑐖𑐹𑐐𑐸 𑐡𑐸 𑑋

𑐀𑐠𑐾 𑐕𑐾𑑃𑐫𑑂 𑐕𑐾𑑃𑐫𑑂 𑐎𑐰𑐵𑐜𑐷 𑐳𑐵𑐩𑐵𑐣 𑐣𑑂𑐫𑐵𑐣𑐵 𑐫𑑄𑐎𑐷𑐥𑐶𑑄𑐳𑑄 𑐰𑐴𑐾 𑐳𑐵𑐩𑐵𑐣 𑐎𑐰𑐵𑐜𑐷 𑐳𑑄𑐎𑐮𑐣 𑐎𑐾𑐣𑑂𑐡𑑂𑐬𑐫𑑂 𑐩𑐷𑐩𑐵𑐮 𑐢𑐵𑑅𑐳𑐵 𑐠𑑅𑐐𑐸 𑐥𑑂𑐫𑐵𑐣 𑐣𑐩𑑂𑐧𑐬 𑐳𑐩𑐾𑐟 𑐎𑑂𑐫𑐣𑐾 𑐩𑐵𑑅𑐐𑐸 𑐖𑐸𑐫𑐵𑑅 𑐄𑐩𑐶𑐟 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐎𑐰𑐵𑐜𑐷 𑐳𑑄𑐎𑐮𑐣 𑐎𑐾𑐣𑑂𑐡𑑂𑐬𑐫𑑂 𑐳𑐵𑐩𑐵𑐣 𑐩𑐶𑐫𑐵𑑅 𑐡𑑂𑐰𑑅𑐕𑐶 𑐟𑐎𑐵 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐢𑑂𑐫𑐧𑐵 𑐎𑐵𑐫𑐾 𑐩𑐵𑐮 𑐢𑐵𑑅𑐳𑐵 𑐥𑑂𑐫𑐵𑐣 𑐣𑐩𑑂𑐧𑐬 𑐎𑑂𑐫𑐣𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐡𑐸 𑑋

𑐎𑐰𑐵𑐜𑐷 𑐳𑑄𑐎𑐮𑐎𑐟𑐫𑑂𑐳𑑄 𑐎𑐰𑐵𑐜𑐷 𑐳𑐵𑐩𑐵𑐣 𑐎𑐵𑐫𑐾𑐐𑐸 𑐧𑐣𑑂𑐡 𑐫𑐵𑐫𑐾𑐰𑑄 𑐠𑑁𑑄𑐎𑐣𑑂𑐴𑐫𑑂 𑐫𑐾𑑃𑐫𑐵 𑐠𑐷𑐠𑐷 𑐬𑐾𑐲𑑂𑐚𑐸𑐬𑐾𑐣𑑂𑐚 𑐰 𑐴𑑀𑐚𑐾𑐮𑐫𑑂 𑐧𑐶𑐫𑐬, 𑐀𑐫𑐮𑐵𑑅𑐫𑐵 𑐳𑐶𑐳𑐷, 𑐨𑑂𑐰𑑄𑐫𑐵 𑐧𑐵𑐎𑐳 𑐁𑐡𑐶 𑐠𑐵𑐟𑐶 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐵𑐥𑐵 𑐕𑐐𑑅 𑐧𑐶𑐫𑐬 𑐧𑑀𑐚𑐮𑐫𑐵 𑐳𑑂𑐰𑐟𑐎𑐵𑑄 𑐩𑐷𑐐𑐸 𑐫𑐵𑐣𑐵𑐔𑑂𑐰𑑄𑐥𑐶𑑄 𑐬𑐾𑐲𑑂𑐚𑐸𑐬𑐾𑐣𑑂𑐚 𑐰 𑐴𑑀𑐚𑐮𑐟 𑐁𑑅 𑐎𑐰𑐵𑐜𑐷 𑐳𑐵𑐩𑐵𑐣 𑐎𑐵𑐂𑐥𑐶𑑄 𑐩𑐰𑐫𑐾𑐰𑑄 𑐳𑐶𑐳𑐷 𑐟𑐫𑐾𑐐𑐸 𑐠𑐵𑐫𑑂 𑐩𑐡𑐫𑐵𑑅 𑐳𑐩𑐳𑑂𑐫𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐠𑐸𑐎𑐶𑑄 𑐫𑐵𑐣𑐵𑑅 𑐰𑑂𑐫𑐰𑐳𑐵𑐫𑐷𑐟𑐫𑑂𑐟 𑐕𑐏𑐾 𑐳𑐶𑐳𑐷 𑐟𑐫𑐾𑐟 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐩𑐾𑐏𑐾 𑐕𑐸𑑄 𑐨𑐔𑐵 𑐖𑐸𑐫𑐵𑐔𑑂𑐰𑑄𑐐𑐸 𑐁𑐩𑑂𑐡𑐵𑐣𑐷 𑐣𑑄 𑐩𑑂𑐴𑑀 𑐖𑐹𑐐𑐸 𑐡𑐸 𑑋 𑐬𑐾𑐲𑑂𑐚𑐸𑐬𑐾𑐣𑑂𑐚 𑐰 𑐴𑑀𑐚𑐮 𑐰𑑂𑐫𑐰𑐳𑐵𑐫𑐷𑐫𑐵 𑐮𑐵𑐐𑐶𑑄 𑐧𑐶𑐫𑐬, 𑐀𑐫𑐮𑐵𑑅 𑐰 𑐨𑑂𑐰𑑄𑐫𑐵 𑐧𑐵𑐎𑐳 𑐣𑑄 𑐕𑐐𑐹 𑐏𑐣𑐾𑐩𑐡𑐸𑐐𑐸 𑐁𑐩𑑂𑐡𑐵𑐣𑐷 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐰𑐵𑐜𑐷𑐟𑐫𑑂𑐳𑑄 𑐁𑑅 𑐧𑐶𑐫𑐬, 𑐀𑐫𑐮𑐵𑑅𑐫𑐵 𑐏𑐵𑐮𑐷 𑐳𑐶𑐳𑐷 𑐰 𑐨𑑂𑐰𑑄𑐫𑐵 𑐧𑐵𑐎𑐳 𑐎𑐵𑑅𑐩𑐰𑐫𑐾𑐰𑑄 𑐠𑐸𑐎𑐶𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐐𑐸𑐎𑐠𑑄 𑐫𑐵𑐫𑐾𑐐𑐸 𑐢𑐂𑐐𑐸 𑐴𑐾 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋

𑐩𑐾𑐏𑐾 𑐠𑑂𑐰𑐴𑐾 𑐎𑐵𑐬𑐞𑑄 𑐫𑐵𑐣𑐵𑑅 𑐎𑐰𑐵𑐜𑐷 𑐳𑑄𑐎𑐮𑐣 𑐫𑐵𑐂𑐐𑐸 𑐳𑑄𑐎𑐮𑐣 𑐎𑐾𑐣𑑂𑐡𑑂𑐬𑐟 𑐣𑑄 𑐧𑐣𑑂𑐡 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐰𑐵𑐜𑐷 𑐳𑑄𑐎𑐮𑐣 𑐎𑐾𑐣𑑂𑐡𑑂𑐬𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵𑐟 𑐎𑐰𑐵𑐜𑐷 𑐎𑐬 𑐥𑐸𑐮𑐾𑐐𑐸 𑐫𑐵𑐣𑐵𑐔𑑂𑐰𑑄𑐳𑐵𑑄 𑐳𑑄𑐎𑐮𑐎𑐟𑐫𑑂𑐳𑑄 𑐥𑑂𑐫𑐵𑐣 𑐣𑐩𑑂𑐧𑐬 𑐎𑐫𑐵𑐩𑐟𑑅𑐐𑐸𑐮𑐶𑑄 𑐳𑐵𑐩𑐵𑐣 𑐣𑑂𑐫𑐵𑐫𑐾 𑐩𑐦𑐫𑐵𑑅 𑐎𑐾𑐣𑑂𑐡𑑂𑐬 𑐧𑐣𑑂𑐡 𑐫𑐵𑐫𑐾 𑐩𑐵𑐮𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐎𑐰𑐵𑐜𑐷 𑐳𑑄𑐎𑐮𑐎𑑄 𑐥𑑂𑐫𑐵𑐣 𑐎𑐵𑐫𑐾 𑐦𑐂 𑐩𑐏𑐸
𑐎𑐰𑐵𑐜𑐷𑐫𑐵 𑐳𑐵𑐩𑐵𑐣 𑐎𑐵𑑅 𑐰𑐂𑐥𑐶𑑄𑐟 𑐣𑑄 𑐥𑑂𑐫𑐵𑐣 𑐣𑐩𑑂𑐧𑐬 𑐀𑐣𑐶𑐰𑐵𑐬𑑂𑐫 𑐫𑐵𑑅𑐳𑐵𑑄 𑐄𑐩𑐶𑐳𑑄 𑐥𑑂𑐫𑐵𑐣 𑐎𑐵𑐫𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐢𑐵𑑅𑐳𑐵 𑐩𑐡𑐸 𑑋 𑐕𑐾𑑃𑐫𑑂 𑐕𑐾𑑃𑐫𑑂 𑐏𑐵𑐮𑐷 𑐧𑑀𑐚𑐮 𑐎𑐵𑑅 𑐰𑐂𑐥𑐶𑑄 𑐀𑐢𑐶𑐎𑐵𑑄𑐱 𑐎𑐰𑐵𑐜𑐷 𑐳𑑄𑐎𑐮𑐎𑐟 𑐨𑐵𑐬𑐟𑐷𑐫 𑐣𑐵𑐐𑐬𑐶𑐎 𑐏𑑅𑐳𑐵 𑐨𑐵𑐬𑐟𑐷𑐫 𑐣𑐵𑐐𑐬𑐶𑐎𑑄 𑐣𑐾𑐥𑐵𑐮𑐫𑑂 𑐥𑑂𑐫𑐵𑐣 𑐣𑐩𑑂𑐧𑐬 𑐎𑐵𑐫𑐾 𑐦𑐂 𑐩𑐏𑐸 𑑋 𑐣𑐾𑐥𑐵𑐮𑐷 𑐴𑐾 𑐣𑐵𑐐𑐬𑐶𑐎 𑐏𑑅𑐳𑐵𑑄 𑐀𑐢𑐶𑐎𑐵𑑄𑐱 𑐎𑐰𑐵𑐜𑐷 𑐳𑑄𑐎𑐮𑐎𑐟𑐫𑑂𑐎𑐾 𑐣𑐾𑐥𑐵𑐮𑐷 𑐣𑐵𑐐𑐬𑐶𑐎𑐟𑐵 𑐩𑐡𑐸 𑑋

𑐄𑐎𑐶𑑄 𑐣𑑄 𑐄𑐩𑐶𑐳𑑄 𑐥𑑂𑐫𑐵𑐣 𑐣𑐩𑑂𑐧𑐬 𑐎𑐵𑐫𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐩𑐡𑐸 𑑋 𑐠𑑂𑐰 𑐎𑐵𑐬𑐞𑑄 𑐫𑐵𑐣𑐵𑑅 𑐠𑑂𑐰 𑐎𑐰𑐵𑐜𑐷 𑐳𑑄𑐎𑐮𑐎𑐟𑐫𑑂𑐳𑑄 𑐔𑐵𑐴𑐾 𑐖𑐸𑐫𑐵𑑅 𑐣𑑄 𑐥𑑂𑐫𑐵𑐣 𑐣𑐩𑑂𑐧𑐬 𑐎𑐵𑐫𑐾 𑐩𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐳𑐩𑐳𑑂𑐫𑐵 𑐩𑐾𑐩𑐾𑐐𑐸 𑐔𑐷𑐢𑑄𑐐𑐸 𑐰𑑂𑐫𑐰𑐳𑐵𑐫 𑐫𑐵𑐂𑐥𑐶𑑄𑐟 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

 

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS