Read news in NepalBhasa text-- www.hamroschool.com BACK 𑐁𑐎𑐶𑐰𑑄𑐣𑐶𑐳𑐾𑑄 𑐨𑐵𑐬𑐟𑐫𑐵𑐟 𑐰𑐶𑐡𑑂𑐫𑐸𑐟 𑐩𑐷𑐐𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐁𑐎𑐶𑐰𑑄𑐣𑐶𑐳𑐾𑑄 𑐨𑐵𑐬𑐟𑐫𑐵𑐟 𑐰𑐶𑐡𑑂𑐫𑐸𑐟 𑐩𑐷𑐐𑐸

𑐫𑐾𑑃  – 𑐣𑐾𑐥𑐵𑐮𑑄 𑐁𑑅 𑐟𑐎 𑐨𑐵𑐬𑐟𑐥𑐵𑐏𑐾𑑄 𑐩𑐟 𑐣𑑂𑐫𑐵𑐣𑐵𑑅 𑐎𑐫𑐵𑐔𑑂𑐰𑑄𑐐𑐸 𑐏𑑅𑐳𑐵 𑐁𑐎𑐶𑐰𑑄𑐣𑐶𑐳𑐾𑑄 𑐩𑐟 𑐩𑐷 𑐣𑑄 𑐦𑐂𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐐𑐸 𑐡𑐸 𑑋 𑐩𑐟 𑐄𑐟𑑂𑐥𑐵𑐡𑐣𑐫𑑂 𑐣𑐾𑐥𑐵𑐮𑑄 𑐫𑐵𑐣𑐵𑐔𑑂𑐰𑑄𑐐𑐸 𑐟𑐷𑐰𑑂𑐬 𑐰𑐶𑐎𑐵𑐳𑐫𑐵 𑐗𑑂𑐰𑐮𑐫𑑂 𑐁𑐎𑐶𑐰𑑄 𑐨𑐵𑐬𑐟𑐫𑐵𑐟 𑑕𑑐𑑐 𑐩𑐾𑐐𑐵𑐰𑐵𑐚 𑐟𑐎 𑐩𑐟 𑐩𑐷 𑐦𑐂𑐐𑐸 𑐀𑐰𑐳𑑂𑐠𑐵 𑐧𑑂𑐰𑐮𑑄𑐐𑐸 𑐏𑑃 𑐄𑐬𑑂𑐖𑐵 𑐩𑐣𑑂𑐟𑑂𑐬𑐵𑐮𑐫𑑄 𑐢𑐵𑑅𑐐𑐸 𑐡𑐸 𑑋

𑐨𑐵𑐬𑐟𑐫𑑂 𑐩𑐟 𑐩𑐷𑐐𑐸 𑐮𑐵𑐐𑐶𑑄 𑐐𑐸𑐐𑐸 𑐥𑐹𑐬𑑂𑐰𑐵𑐢𑐵𑐬 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑅, 𑐠𑑂𑐰 𑐳𑐩𑐾𑐟 𑐣𑐾𑐥𑐵𑐮𑑄 𑐡𑐫𑐾𑐎𑐾 𑐢𑐸𑑄𑐎𑐹𑐐𑐸 𑐖𑐸𑐫𑐵𑑅 𑐁𑐎𑐶𑐰𑑄𑐣𑐶𑐳𑐾𑑄 𑐩𑐟 𑐩𑐷 𑐦𑐂𑐐𑐸 𑐏𑑃 𑐣𑑄 𑐄𑐬𑑂𑐖𑐵𑐩𑐣𑑂𑐟𑑂𑐬𑐷 𑐰𑐬𑑂𑐲𑐩𑐵𑐣 𑐥𑐸𑐣𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐨𑐵𑐬𑐟𑐫𑑂 𑐩𑐟 𑐕𑑂𑐰𑐫𑐾𑐐𑐸 𑐮𑐵𑐐𑐶𑑄 𑐡𑐫𑐾𑐎𑐹𑐐𑐸 𑐠𑐷𑐠𑐷 𑐎𑐠𑑄𑐫𑐵 𑐥𑐹𑐬𑑂𑐰𑐵𑐢𑐵𑐬𑐫𑐵 𑐥𑐬𑐷𑐎𑑂𑐲𑐞 𑐫𑐵𑐳𑐾𑑄 𑐣𑐾𑐥𑐵𑐮𑑄 𑐠𑐸𑐐𑐸𑐳𑐷 𑑒𑑐𑑐 𑐩𑐾𑐐𑐵𑐰𑐵𑐚 𑐩𑐟 𑐣𑐶𑐬𑑂𑐫𑐵𑐟 𑐳𑐩𑐾𑐟 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐁𑐎𑐶𑐰𑑄 𑐠𑐸𑐎𑐶𑐫𑐵 𑐩𑐵𑐟𑑂𑐬𑐵 𑐧𑐝𑐾 𑐖𑐸𑐫𑐵𑑅 𑑕𑑐𑑐 𑐣𑐶𑐳𑐾𑑄 𑑗𑑐𑑐 𑐩𑐾𑐐𑐵𑐰𑐵𑐚 𑐠𑑂𑐫𑐣𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐁𑐎𑐶𑐰𑑄 𑐟𑐎𑐫𑐵 𑐡𑐸𑐣𑐾 𑐀𑐥𑐬 𑐟𑐵𑐩𑐵𑐎𑑀𑐱𑐷𑑄 𑑔𑑘𑑐 𑐩𑐾𑐐𑐵𑐰𑐵𑐚 𑐩𑐟 𑐄𑐟𑑂𑐥𑐵𑐡𑐣 𑐱𑐸𑐬𑐸 𑐖𑐸𑐂𑐰𑑄 𑐣𑐾𑐥𑐵𑑅 𑐠𑑅𑐟 𑐀𑐥𑑂𑐰𑑅 𑐖𑐹𑐐𑐸 𑐧𑐶𑐖𑐸𑐮𑐷 𑐨𑐵𑐬𑐟𑐫𑐵𑐟 𑐩𑐷 𑐦𑐂𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐷𑐐𑐸 𑐏𑑅 𑑋 𑐁𑐎𑐶𑐰𑑄 𑐣𑐾𑐥𑐵𑑅𑐫𑐵 𑐎𑐸𑐮 𑐩𑐟 𑐄𑐟𑑂𑐥𑐵𑐡𑐣 𑑒 𑐴𑐖𑐵𑐬 𑐩𑐾𑐐𑐵𑐰𑐵𑐚 𑐠𑑂𑐫𑐣𑐷𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵 𑐟𑑅𑐐𑐸 𑐡𑐸 𑑋

𑐫𑐡𑐶 𑐣𑐾𑐥𑐵𑐮𑑄 𑐡𑑃𑐫𑑂𑐡𑐳𑑄 𑐠𑑂𑐰𑐴𑐾 𑐥𑐬𑐶𑐩𑐵𑐞𑐫𑑂 𑐨𑐵𑐬𑐟𑐫𑑂 𑐩𑐟 𑐩𑐷 𑐦𑐟 𑐢𑐵𑑅𑐳𑐵 𑐨𑐵𑐬𑐟𑐫𑐵𑐟 𑐩𑐟𑐫𑐵 𑐮𑐵𑐐𑐶𑑄 𑐡𑑃𑐫𑑂 𑑑𑑘 𑐀𑐬𑑂𑐧 𑐟𑐎𑐵 𑐥𑐸𑐮𑐾 𑐩𑐵𑐮𑐷𑐐𑐸 𑐢𑑂𑐫𑐧𑐵 𑐧𑐔𑐾 𑐖𑐸𑐂𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋 𑐣𑐾𑐥𑐵𑐮𑑄 𑐠𑑅𑐟 𑐀𑐥𑑂𑐰𑑅 𑐖𑐹𑐐𑐸 𑐩𑐟 𑐧𑑄𑐐𑐮𑐵𑐡𑐾𑐱𑐫𑑂 𑐣𑑄 𑐩𑐷𑐐𑐸 𑐮𑐵𑐐𑐶𑑄 𑐳𑐩𑑂𑐗𑑁𑐟𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐟𑐬 𑐧𑑄𑐐𑐮𑐵𑐡𑐾𑐱𑐫𑑂 𑐰𑐣𑐷𑐐𑐸 𑐩𑐟 𑐨𑐵𑐬𑐟𑐫𑐵 𑐟𑐵𑐬 𑐖𑐸𑐫𑐵𑑅 𑐰𑐣𑐾 𑐩𑐵𑑅𑐐𑐸 𑐖𑐹𑐐𑐸𑐮𑐶𑑄 𑐄𑐎𑐷 𑐨𑐵𑐬𑐟𑐫𑐵 𑐣𑐶𑐫𑐣𑑂𑐟𑑂𑐬𑐞 𑐡𑐫𑐾 𑐦𑐸𑐐𑐸 𑐏𑑃 𑐢𑐫𑐵 𑐴𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS