Read news in NepalBhasa text-- www.hamroschool.com BACK 𑐧𑑁𑐡𑑂𑐢 𑐔𑐿𑐟𑑂𑐫 𑐮𑑂𑐴𑑂𑐰𑐣𑐾𑐖𑑂𑐫𑐵 𑐎𑑂𑐰𑐔𑐵𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑑁𑐡𑑂𑐢 𑐔𑐿𑐟𑑂𑐫 𑐮𑑂𑐴𑑂𑐰𑐣𑐾𑐖𑑂𑐫𑐵 𑐎𑑂𑐰𑐔𑐵𑐮

𑐏𑑂𑐰𑐥 – 𑐠𑐣𑐫𑐵 𑐧𑑁𑐡𑑂𑐢 𑐳𑐩𑐎𑐺𑐟 𑐰𑐶𑐴𑐵𑐬 𑐥𑐬𑐶𑐳𑐬𑐫𑑂 𑐔𑑂𑐰𑑄𑐐𑐸 𑐧𑑁𑐡𑑂𑐢 𑐔𑐿𑐟𑑂𑐫 𑐮𑑂𑐴𑑂𑐰𑐣𑐾𑐖𑑂𑐫𑐵 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐏𑑂𑐰𑐥 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐳𑐸𑐣𑐶𑐮 𑐥𑑂𑐬𑐖𑐵𑐥𑐟𑐶𑑄 𑐄𑐐𑐸 𑐔𑐿𑐟𑑂𑐫𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋𑐔𑐿𑐟𑑂𑐫 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅 𑐥𑑄𑐔𑐱𑐷𑐮 𑐐𑑂𑐬𑐴𑐞 𑐫𑐵𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐮𑐳𑐎𑐸𑐳 𑐫𑐵𑐳𑐾𑑄 𑐥𑐡𑑂𑐩𑐳𑐸𑐣𑑂𑐡𑐬 𑐱𑐵𑐎𑑂𑐫𑑄 𑐏𑑂𑐰𑐥𑐫𑐵 𑐔𑐿𑐟𑑂𑐫 𑐰 𑐠𑐷𑐠𑐷 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞 𑐰 𑐳𑑄𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐣𑐶𑐖𑐷 𑐏𑑂𑐫𑐮𑑄 𑐖𑐸𑐫𑐵𑐔𑑂𑐰𑑄𑐐𑐸 𑐎𑐸𑐟𑑅𑐫𑐵𑐟 𑐳𑑂𑐠𑐵𑐣𑐷𑐫 𑐟𑐴𑐥𑐵𑐏𑐾𑑄 𑐣𑑄 𑐟𑐶𑐧𑑅 𑐡𑐟 𑐢𑐵𑑅𑐳𑐵 𑐏𑑂𑐰𑐥 𑐡𑐾𑐫𑑂𑐫𑐵 𑐴𑐾 𑐱𑑀𑐨𑐵 𑐀𑐥𑑂𑐰𑐫𑐵 𑐰𑐣𑐷𑐐𑐸 𑐰𑐶𑐱𑑂𑐰𑐵𑐳 𑐀𑐥𑑂𑐰𑑄𑐎𑐵𑐡𑐶 𑑋

𑐔𑐿𑐟𑑂𑐫 𑐮𑑂𑐴𑑂𑐰𑐣𑐾𑐖𑑂𑐫𑐵𑐫𑐵 𑐣𑐶𑑄𑐟𑐶𑑄 𑐐𑐛𑐣 𑐫𑐵𑐣𑐵𑐟𑑅𑐐𑐸 𑐳𑐩𑐶𑐟𑐶𑐫𑐵 𑐳𑑄𑐫𑑀𑐖𑐎 𑐟𑐷𑐬𑑂𑐠𑐬𑐵𑐖 𑐰𑐖𑑂𑐬𑐵𑐔𑐵𑐬𑑂𑐫𑑄 𑐔𑐿𑐟𑑂𑐫 𑐳𑑄𑐬𑐎𑑂𑐲𑐞𑐫𑐵 𑐥𑑂𑐬𑐟𑐶𑐰𑐾𑐡𑐣 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐳𑐾𑑄 𑐩𑐔𑐵𑑄𑐣𑐶𑐳𑐾𑑄 𑐴𑐾 𑐔𑐿𑐟𑑂𑐫𑐫𑐵 𑐖𑑂𑐘𑐵𑐣 𑐧𑐷 𑐦𑐟 𑐢𑐵𑑅𑐳𑐵 𑐄𑐎𑐶𑐫𑐵 𑐮𑐶𑐔𑑂𑐰𑑅 𑐣𑑄 𑐧𑐵𑑄𑐮𑐵𑑅𑐐𑐸 𑐴𑐾 𑐰𑐂𑐐𑐸 𑐰 𑐔𑐿𑐟𑑂𑐫𑐫𑐵 𑐳𑑄𑐬𑐎𑑂𑐲𑐞 𑐮𑐶𑐥𑐵𑐠𑑂𑐫𑑄𑐎𑑄 𑐖𑐸𑐫𑐵𑐔𑑂𑐰𑐣𑐷 𑐢𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐰𑐫𑑂𑐎𑐮𑑄 𑐏𑑂𑐰𑐥 𑐡𑐾𑐫𑑂 𑐡𑐸𑐣𑐾 𑐳𑑄𑐬𑐎𑑂𑐲𑐞 𑐫𑐵𑐫𑐾𑐩𑐵𑑅𑐐𑐸 𑐧𑑁𑐡𑑂𑐢 𑐳𑐩𑑂𑐥𑐡𑐵𑐟 𑐁𑐥𑐵𑐮𑑄 𑐡𑐸𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐩𑐿𑐟𑑂𑐬𑐾𑐫 𑐫𑐸𑐰𑐵 𑐳𑑄𑐑𑐥𑐵𑐏𑐾𑑄 𑐥𑐹m𑐔𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐧𑑁𑐡𑑂𑐢 𑐳𑑄𑐑 𑐏𑑂𑐰𑐥𑐫𑐵 𑐣𑐵𑐫𑑅 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫𑑄 𑐥𑐸𑐬𑐵𑐟𑐟𑑂𑐰𑐰𑐶𑐡𑑂𑐟𑐫𑑂𑐳𑑄 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 ‘𑐐𑐣 𑐔𑐿𑐟𑑂𑐫, 𑐀𑐣 𑐰𑐶𑐴𑐵𑐬’ 𑐢𑐂𑐐𑐸 𑐀𑐰𑐢𑐵𑐬𑐞𑐵 𑐰𑐶𑐱𑐾𑐲𑐟𑑅 𑐏𑑂𑐰𑐥 𑐡𑐾𑐫𑑂𑐫𑐵 𑐣𑐶𑑄𑐟𑐶𑑄 𑐳𑐵𑐥𑐾𑐎𑑂𑐲 𑐖𑐹𑐐𑐸 𑐰𑐶𑐔𑐵𑑅 𑐟𑐫𑐵𑐡𑐶𑐮 𑑋 𑐥𑑂𑐬𑐵𑐢𑑂𑐫𑐵𑐥𑐎 𑐳𑐶𑐡𑑂𑐢𑐶𑐬𑐟𑑂𑐣 𑐱𑐵𑐎𑑂𑐫𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐏𑑂𑐰𑐥𑐫𑐵 𑐳𑑂𑐠𑐵𑐣𑐷𑐫 𑐥𑐴𑐶𑐔𑐵𑐣 𑐎𑑂𑐫𑐣𑐾𑐎𑐠𑑄 𑐟𑐫𑐵𑐬 𑐖𑐹𑐐𑐸 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑑂 𑐳𑑂𑐰𑐵𑑄𑐫𑐵𑑅𑐥𑐸𑐣𑑂𑐴𑐶, 𑐏𑑂𑐰𑐥𑐫𑐵 𑐳𑐩𑑂𑐫𑐎, 𑐐𑐸𑑄𑐮𑐵 𑐧𑐵𑐖𑑄, 𑐥𑑄𑐔𑐡𑐵𑐣, 𑐮𑐸𑑃𑐢𑑂𑐰𑐵𑐏𑐵 𑐮𑐐𑐵𑐫𑐟 𑐏𑑂𑐰𑐥𑐫𑐵 𑐬𑐴𑐣𑐳𑐴𑐣, 𑐳𑑄𑐳𑑂𑐎𑐺𑐟𑐶 𑐧𑐴𑐵𑑅𑐧𑐴𑐷𑐫𑐵 𑐰𑐶𑐲𑐫𑐫𑐵𑐟 𑐣𑑄 𑐠𑐵𑐫𑑂 𑐧𑐷𑐐𑐸 𑐰𑐶𑐱𑑂𑐰𑐵𑐳 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑐸𑐠𑐸𑐧𑐴𑐷 𑐰𑐶𑐎𑐵𑐳 𑐳𑐩𑐶𑐟𑐶𑐫𑐵 𑐄𑐥𑐵𑐢𑑂𑐫𑐎𑑂𑐲 𑐬𑐟𑑂𑐣𑐧𑐵𑐧𑐸 𑐰𑐖𑑂𑐬𑐵𑐔𑐵𑐬𑑂𑐫𑑄 𑐔𑐿𑐟𑑂𑐫 𑐖𑐶𑐬𑑂𑐞𑑀𑐡𑑂𑐰𑐵𑐬𑐫𑐵 𑐁𑐫 𑐰𑑂𑐫𑐫 𑐣𑑂𑐴𑑂𑐫𑐧𑑂𑐰𑐫𑐵𑐡𑐶𑐳𑐾𑑄 𑐣𑐐𑐬𑐥𑐵𑐮𑐶𑐎𑐵𑑄 𑐥𑐶𑐠𑑄𑐐𑐸 𑐧𑑂𑐬𑑀𑐳𑐬𑐫𑑂 𑐧𑑁𑐡𑑂𑐢 𑐳𑐩𑑂𑐥𑐡𑐵𑐫𑐵 𑐧𑐵𑐬𑐾 𑐐𑐣𑑄 𑐣𑑄 𑐄𑐮𑑂𑐮𑐾𑐏 𑐩𑐖𑐹𑐐𑐸 𑐏𑑃𑐫𑑂 𑐣𑐐𑐬𑐥𑐵𑐮𑐶𑐎𑐵𑐫𑐵 𑐢𑑂𑐫𑐵𑐣𑐵𑐎𑐬𑑂𑐲𑐞 𑐫𑐵𑐎𑐵𑐡𑐶𑐮 𑑋 𑐣𑐐𑐬𑐥𑑂𑐬𑐩𑐸𑐏 𑐥𑑂𑐬𑐖𑐵𑐥𑐟𑐶𑑄 𑐥𑐹𑐬𑑂𑐰 𑐰𑐎𑑂𑐟𑐵𑐟𑐫𑑂𑐳𑑄 𑐟𑐫𑐵𑐡𑐷𑐐𑐸 𑐖𑐶𑐖𑑂𑐘𑐵𑐳𑐵𑐫𑐵𑐟 𑐎𑐫𑐵𑑅 𑐠𑐩𑑂𑐴𑑄 𑐢𑑂𑐫𑐵𑐣 𑐧𑐷𑐐𑐸 𑐖𑐸𑐂 𑐢𑐵𑐳𑐾𑑄 𑐣𑐶𑐫𑐩𑐎𑐠𑑄 𑐰𑐂𑐐𑐸 𑐥𑑂𑐬𑐳𑑂𑐟𑐵𑐰, 𑐫𑑀𑐖𑐣𑐵 𑐰 𑐖𑑂𑐫𑐵𑐗𑑂𑐰𑑅𑐫𑐵𑐟 𑐳𑑂𑐰𑐷𑐎𑐺𑐟𑐶 𑐧𑐷𑐐𑐸 𑐖𑐎 𑐩𑐏𑐳𑐾 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐣𑑄 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋

𑐰𑐶𑐴𑐵𑐬𑐫𑐵 𑐳𑐥𑑂𑐟𑐔𑐣𑑂𑐡𑑂𑐬 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐨𑐶𑐎𑑂𑐲𑐸 𑐢𑐩𑑂𑐩𑐵𑐱𑑀𑐨𑐣 𑐩𑐴𑐵𑐳𑑂𑐠𑐰𑐶𑐬, 𑐏𑑂𑐰𑐥 𑐣𑐥𑐵 𑑑 𑐰𑐜𑐵𑐀𑐢𑑂𑐫𑐎𑑂𑐲 𑐱𑑂𑐫𑐵𑐩𑐎𑐺𑐲𑑂𑐞 𑐏𑐟𑑂𑐬𑐷𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋𑐠𑐷𑐠𑐷 𑐧𑑁𑐡𑑂𑐢 𑐔𑐿𑐟𑑂𑐫 𑐰 𑐳𑐩𑑂𑐥𑐡𑐵𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅𑐎𑐠𑑄 𑐰𑐶𑐴𑐵𑐬𑐫𑐵 𑐔𑐿𑐟𑑂𑐫 𑐮𑑂𑐴𑑂𑐰𑐣𑐾𑐖𑑂𑐫𑐵 𑐖𑐹𑐐𑐸 𑐏𑑅 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS