𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐳𑐵𑑄𑐳𑑂𑐎𑐺𑐟𑐶𑐎 𑐣𑐐𑐬𑐫𑑂 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐖𑑀𑐱𑐷𑐫𑐵 𑐀𑐨𑐶𑐣𑐣𑑂𑐡𑐣

𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐏𑑂𑐰𑐥- 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐮𑐶𑐳𑐾𑑄 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑐫𑐵𑐟 𑐩𑑂𑐴𑐷𑐐 𑐱𑐸𑐎𑑂𑐬𑐰𑐵𑑅 𑐏𑑂𑐰𑐥𑐫𑑂 𑐟𑑅𑐖𑐶𑐎 𑐴𑐣𑐾𑐖𑑂𑐫𑐵 𑐖𑐸𑐮 𑑋 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐣𑐵𑐐𑐬𑐶𑐎 𑐀𑐨𑐶𑐣𑐣𑑂𑐡𑐣 𑐳𑐩𑐵𑐬𑑀𑐴 𑐳𑐩𑐶𑐟𑐶 𑐏𑑂𑐰𑐥𑑄 𑐫𑐵𑑅𑐐𑐸 𑐏𑑅 𑑋 𑐀𑐨𑐶𑐣𑐣𑑂𑐡𑐣 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐠𑐸𑐐𑐸 𑐳𑐩𑑂𑐩𑐵𑐣 𑐠𑑅𑐐𑐸 𑐳𑐩𑑂𑐩𑐵𑐣 𑐩𑐏𑐸𑐳𑐾𑑄 𑐨𑐵𑐲𑐵, 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐮𑐵𑐐𑐵𑐫𑐵𑐟 𑐫𑐵𑑅𑐐𑐸 𑐳𑐩𑑂𑐩𑐵𑐣 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞𑐫𑑂 𑐳𑐎𑐮 𑐣𑐾𑐟𑐵𑐟𑐫𑑂𑐐𑐸 𑐩𑐣𑐫𑑂 𑐣𑐶𑐨𑐵𑑅 𑐟𑑂𑐰𑐫𑐾𑐩𑐵 𑐢𑐂𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵𑐡𑐶𑐳𑐾𑑄 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐖𑑀𑐱𑐷𑑄 𑐢𑐫𑐵𑐡𑐶𑐮, ‘𑐨𑐵𑐲𑐵, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐮𑐵𑐐𑐶𑑄 𑐬𑐵𑐖𑐣𑐷𑐟𑐶𑐂 𑐣𑑄 𑐖𑐵𑐐𑐬𑐞 𑐰𑐫𑐾𑐩𑐵, 𑐳𑐩𑐺𑐡𑑂𑐢 𑐣𑐾𑐥𑐵𑑅 𑐟𑐟𑑅𑐢𑑄𑐐𑐸 𑐨𑐰𑐣 𑐡𑐫𑐵𑑄 𑐖𑐎 𑐖𑐸𑐂 𑐩𑐏𑐸, 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞 𑐩𑐖𑐸𑐂𑐎𑑄 𑐳𑐩𑐺𑐡𑑂𑐢 𑐣𑐾𑐥𑐵𑐮 𑐳𑐩𑑂𑐨𑐰 𑐩𑐡𑐸 𑑋’

𑐥𑐹𑐬𑑂𑐬𑑂𑐏𑐵𑑄 𑐡𑐫𑐾𑐎𑐵𑐟𑑅𑐐𑐸 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐂 𑐔𑑂𑐰𑐣𑐵𑑅 𑐠𑐸𑐂𑐎𑐵𑑅 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐁𑐐𑑂𑐬𑐴 𑐫𑐵𑐣𑐵𑐡𑐶𑐳𑐾𑑄 𑐰𑐫𑑂𑐎𑐮𑑄 𑐏𑑂𑐰𑐥𑐫𑐵𑐟 𑐀𑐢𑑂𑐫𑐫𑐣 𑐰 𑐀𑐣𑐸𑐳𑐣𑑂𑐢𑐵𑐣𑐫𑐵 𑐎𑐾𑐣𑑂𑐡𑑂𑐬 𑐡𑐫𑐾𑐎𑐾 𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐰𑐬𑐶𑐲𑑂𑐛 𑐥𑐟𑑂𑐬𑐎𑐵𑐬 𑐨𑐿𑐬𑐰 𑐬𑐶𑐳𑐵𑐮𑑄 𑐳𑑄𑐳𑑂𑐎𑐺𑐟𑐶 𑐳𑐩𑑂𑐥𑐡𑐵𑐫𑐵 𑐰𑐶𑐡𑑂𑐰𑐟𑐵𑐫𑐵 𑐢𑐬𑑀𑐴𑐬
𑐖𑑀𑐱𑐷 𑐣𑐾𑐥𑐵𑐮𑐨𑐵𑐲𑐵, 𑐳𑐵𑐴𑐶𑐟𑑂𑐫 𑐰 𑐳𑑄𑐳𑑂𑐎𑐺𑐟𑐶𑐂 𑐣𑐾𑐥𑐵𑑅 𑐡𑐾𑐫𑑂𑐫𑐵 𑐴𑐾 𑐥𑑂𑐬𑐟𑐷𑐎 𑐏𑑅 𑐢𑐫𑐵𑐡𑐶𑐮 𑑋

𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐣𑐵𑐐𑐬𑐶𑐎 𑐀𑐨𑐶𑐣𑐣𑑂𑐡𑐣 𑐳𑐩𑐵𑐬𑑀𑐴 𑐳𑐩𑐶𑐟𑐶 𑐏𑑂𑐰𑐥𑐫𑐵 𑐀𑐢𑑂𑐫𑐎𑑂𑐲 𑐣𑐬𑐾𑐣𑑂𑐡𑑂𑐬𑐨𑐎𑑂𑐟 𑐴𑐵𑐜𑐵𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐟𑐶𑐮𑐎𑐥𑑂𑐬𑐎𑐵𑐱 𑐎𑐵𑐫𑐳𑑂𑐠, 𑐟𑑂𑐬𑐶𑐬𑐟𑑂𑐣 𑐱𑐵𑐎𑑂𑐫, 𑐩𑐴𑐾𑐣𑑂𑐡𑑂𑐬𑐐𑑀𑐥𑐵𑐮 𑐎𑐬𑑂𑐩𑐵𑐔𑐵𑐬𑑂𑐫 𑐮𑐐𑐵𑐫𑐟𑑄 𑐱𑐟𑐵𑐧𑑂𑐡𑐷𑐥𑐸𑐬𑐸𑐲 𑐖𑑀𑐱𑐷𑐫𑐵 𑐫𑑀𑐐𑐡𑐵𑐣 𑐧𑐵𑐬𑐾 𑐎𑐣𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐟𑐾𑐖𑐾𑐱𑑂𑐰𑐬𑐧𑐵𑐧𑐸 𑐐𑑂𑐰𑑄𑐐𑑅, 𑐬𑐩𑐵𑐥𑐟𑐶𑐬𑐵𑐖 𑐱𑐬𑑂𑐩𑐵, 𑐱𑑂𑐬𑐷𑐐𑑀𑐥𑐵𑐮 𑐥𑑂𑐬𑐖𑐵𑐥𑐟𑐶, 𑐥𑐹𑐬𑑂𑐞𑐧𑐴𑐵𑐡𑐸𑐬𑐸 𑐰𑐿𑐡𑑂𑐫 𑐰 𑐎𑐿𑐮𑐵𑐱𑐨𑐎𑑂𑐟 𑐥𑑂𑐬𑐢𑐵𑐣𑐵𑑄𑐐𑐥𑐶𑐳𑑄 𑐀𑐨𑐶𑐣𑐣𑑂𑐡𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐀𑐨𑐶𑐣𑐣𑑂𑐡𑐣 𑐫𑐵𑐫𑐾 𑐣𑑂𑐴𑑂𑐫𑑅 𑐏𑑂𑐰𑐥𑐫𑐵 𑐡𑐟𑐵𑐟𑑂𑐬𑐫𑑄 𑐟𑑅𑐖𑐶𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 ¥𑐫𑐵𑐮𑐷 𑐫𑐵𑐣𑐵𑑅 𑐏𑑂𑐰𑐥 𑐣𑐐𑐬 𑐔𑐵𑑅𑐴𑐶𑐄𑐐𑐸 𑐏𑑅 𑑋 𑐰𑐫𑐵𑑄 𑐣𑑂𑐴𑑂𑐫𑑅 𑐩𑐢𑑂𑐫𑐥𑐸𑐬 𑐠𑐶𑐩𑐶𑐫𑐵 𑐧𑐵𑐴𑐵𑐏𑐵 𑐧𑐖𑐵𑐬𑑄 𑐕𑐐𑐹 𑐟𑑅𑐖𑐶𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 ¥𑐫𑐵𑐮𑐷 𑐫𑐵𑐣𑐵𑑅 𑐩𑐾𑐫𑐬 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑐫𑐵 𑐣𑐾𑐟𑐟𑑂𑐰𑐫𑑂 𑐣𑐐𑐬 𑐔𑐵𑑅𑐴𑐶𑐮𑐵𑑅 𑐱𑑄𑐏𑐢𑐬 𑐔𑑀𑐎 𑐟𑐎 𑐰𑐫𑐵𑑅𑐮𑐶 𑐀𑐣𑑄𑐣𑐶𑐳𑐾𑑄 𑐐𑐵𑐜𑐷𑐂 𑐳𑑂𑐎𑐬𑑂𑐚𑐶𑐒 𑐫𑐵𑐣𑐵𑑅 𑐏𑑂𑐰𑐥𑐫𑑂 𑐴𑑅𑐐𑐸 𑐏𑑅 𑑋