Read news in NepalBhasa text-- www.hamroschool.com BACK 𑐣𑐾𑐥𑐵𑑅 𑐜𑐶𑐨𑐶𑐖𑐣 𑑑𑐫𑑂 𑐠𑐴𑐵𑑄 𑐰𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐾𑐥𑐵𑑅 𑐜𑐶𑐨𑐶𑐖𑐣 𑑑𑐫𑑂 𑐠𑐴𑐵𑑄 𑐰𑐣

𑐳𑐣𑐳𑐣𑐷𑐥𑐹𑐬𑑂𑐞 𑐎𑐵𑐳𑐵𑐫𑑂 𑐎𑑂𑐫𑐵𑐣𑐵𑐜𑐵𑐫𑐵𑐟 𑑑 𑐰𑐶𑐎𑐾𑐚𑑄 𑐧𑐸𑐎𑐮

𑐫𑐾𑑃– 𑐳𑐣𑐳𑐣𑐥𑐹𑐬𑑂𑐞 𑐎𑐵𑐳𑐵𑐫𑑂 𑐎𑑂𑐫𑐵𑐣𑐵𑐜𑐵𑐰𑐶𑐬𑐸𑐡𑑂𑐢 𑐕𑐐𑐹 𑐰𑐶𑐎𑐾𑐚𑑄 𑐰𑐶𑐖𑐫 𑐔𑐹𑐮𑐵𑐎𑐸𑐳𑐾𑑄 𑐣𑐾𑐥𑐵𑑅 𑐰𑐶𑐱𑑂𑐰 𑐎𑑂𑐬𑐶𑐎𑐾𑐚 𑐮𑐶𑐐𑐫𑐵 𑐜𑐶𑐨𑐶𑐖𑐣 𑑑 𑐫𑑂 𑐠𑐴𑐵𑑄 𑐰𑑄𑐐𑐸 𑐡𑐸 𑑋 𑐠𑑁𑑄 𑐰𑐶𑐖𑐫𑐫𑐵 𑐣𑐶𑑄𑐟𑐶𑑄 𑐎𑐬𑐞 𑐎𑐾𑐳𑐷 𑐀𑐳𑑂𑐰𑐵𑐨𑐵𑐰𑐶𑐎 𑐬𑐸𑐥𑑄 𑐣𑐵𑐫𑐎 𑐳𑐵𑐰𑐶𑐟 𑐖𑐸𑐮 𑑋

𑑔𑑒.𑑑 𑐌𑐨𑐬𑐫𑑂 𑐐𑐸𑑄𑐐𑐹 𑐰𑐶𑐎𑐾𑐚 𑐰𑐣𑐾𑐢𑐸𑑄𑐎𑐹𑐐𑐸 𑐀𑐰𑐳𑑂𑐠𑐵𑐫𑑂 𑐣𑐾𑐥𑐵𑑅 𑐥𑐬𑐵𑐖𑐫 𑐥𑐵𑐏𑐾 𑐣𑑂𑐴𑑂𑐫𑐵𑑅𑐰𑐣𑐾𑐢𑐸𑑄𑐎𑐹𑐐𑐸 𑐏𑑅 𑑋 𑐄𑐧𑐮𑐫𑑂 𑐟𑐎 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑑕𑑑 𑐬𑐣𑐫𑐵 𑐁𑐰𑐱𑑂𑐫𑐎 𑐡𑐸𑐐𑐸 𑐏𑑅 𑑋 𑐠𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐎𑑂𑐬𑐶𑐖𑐫𑑂 𑐡𑐸𑐴𑐵𑑄 𑐰𑑅𑐩𑑂𑐴 𑐎𑐬𑐞 𑐎𑐾𑐳𑐷𑑄 𑑓𑑑 𑐧𑐮𑐫𑑂 𑐥𑑂𑐫𑑄𑐐𑐹 𑐕𑐎𑑂𑐎𑐵 𑐰 𑐳𑑂𑐰𑑄𑐐𑐹 𑐔𑑁𑐎𑐵 𑐠𑑂𑐰𑐵𑐣𑐵𑑅 𑑔𑑒 𑐬𑐣 𑐡𑐫𑐾𑐎𑐾𑐰𑑄 𑐎𑐵𑐳𑐵 𑐣𑐾𑐥𑐵𑑅𑐫𑐵 𑐥𑐎𑑂𑐲𑐫𑑂 𑐰𑑅𑐐𑐸 𑐏𑑅 𑑋 𑐰𑐫𑐵𑐟 𑐀𑐣𑑂𑐟𑐶𑐩 𑐌𑐨𑐬 𑐟𑐎 𑐳𑐵𑐠 𑐧𑐶𑐄𑐩𑑂𑐴 𑐧𑐮𑐬 𑐳𑐣𑑂𑐡𑐷𑐥 𑐮𑐵𑐩𑐶𑐕𑐵𑐣𑐾𑑄 𑑕 𑐬𑐣 𑐡𑐫𑐾𑐎𑐹𑐐𑐸 𑐏𑑅 𑑋

𑐀𑐣𑑂𑐟𑐶𑐩 𑐌𑐨𑐬𑐫𑐵 𑑖 𑐧𑐮𑐫𑑂 𑐣𑐾𑐥𑐵𑑅𑐫𑐵 𑐰𑐶𑐖𑐫𑐫𑐵 𑐣𑐶𑑄𑐟𑐶𑑄 𑑘 𑐬𑐣 𑐁𑐰𑐱𑑂𑐫𑐎 𑐡𑐸𑐐𑐸 𑐏𑑅 𑑋 𑐄𑐧𑐮𑐫𑑂 𑐎𑑂𑐫𑐵𑐣𑐵𑐜𑐵𑐫𑐵 𑐧𑐮𑐬 𑐳𑐾𑐳𑐶𑐮 𑐥𑐬𑐰𑐾𑐖𑑄 𑐮𑐐𑐵𑐟𑐵𑐬 𑐥𑑂𑐫𑑄𑐐𑐹 𑐧𑐮 𑐜𑐚 𑐰𑐵𑑄𑐕𑑂𑐰𑐫𑐾𑐰𑑄 𑐣𑐾𑐥𑐵𑑅𑐫𑐵𑐟 𑐴𑐵𑐎𑐣𑑄 𑐎𑐵𑐳𑐵 𑐟𑑂𑐫𑐵𑐎𑐾𑐟 𑐠𑐵𑐎𑐸𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐏𑑅 𑑋 𑐟𑐬 𑐣𑑂𑐫𑐵𑐐𑐹𑐐𑐸 𑐧𑐮𑐫𑑂 𑐎𑐬𑐞𑑄 𑐕𑐎𑑂𑐎𑐵 𑐠𑑂𑐰𑐵𑐫𑐾𑐰𑑄 𑐴𑐵𑐎𑐣𑑄 𑐎𑐵𑐳𑐵 𑐣𑐾𑐥𑐵𑑅𑐫𑐵 𑐥𑐎𑑂𑐲𑐫𑑂 𑐰𑐮 𑑋 𑐁𑑅 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐀𑐣𑑂𑐟𑐶𑐩 𑐧𑐮𑐫𑑂 𑑒 𑐬𑐣 𑐁𑐰𑐱𑑂𑐫𑐎 𑐖𑐹𑐐𑐸 𑐏𑑅 𑑋 𑐄𑐧𑐮𑐫𑑂 𑐡𑐧𑐵𑐧𑐫𑑂 𑐮𑐵𑐣𑐵𑐔𑑂𑐰𑐩𑑂𑐴 𑐧𑐮𑐬 𑐥𑐬𑐰𑐾𑐖𑑄 𑐰𑐵𑐂𑐜 𑐰𑐵𑑄𑐕𑑂𑐰𑐫𑐾𑐰𑑄 𑐎𑐵𑐳𑐵 𑐧𑐬𑐵𑐧𑐬𑐷𑐫𑐵 𑐀𑐰𑐳𑑂𑐠𑐵 𑐰𑐮 𑑋 𑐀𑐣𑑂𑐟𑐶𑐩 𑐧𑐮𑐫𑑂 𑐕𑐐𑐹 𑐬𑐣 𑐁𑐰𑐱𑑂𑐫𑐎 𑐏𑐣𑐾𑐡𑐟 𑑋 𑐎𑐾𑐳𑐷𑑄 𑐠𑐸𑐎𑐷 𑑑 𑐬𑐣 𑐠𑑂𑐰𑐵𑐣𑐵𑐧𑐶𑐮 𑑋

𑐠𑑂𑐰 𑐎𑐵𑐳𑐵 𑐟𑑂𑐫𑐵𑐫𑐾𑐰𑑄 𑐣𑐾𑐥𑐵𑑅 𑐔𑑂𑐫𑐵𑐐𑐹 𑐮𑑂𑐫𑐵𑑅 𑐎𑐫𑐵𑑅 𑐜𑐶𑐨𑐶𑐖𑐣 𑑑 𑐫𑑂 𑐧𑐝𑐸𑐰𑐵 𑐖𑐹𑐐𑐸 𑐡𑐸𑐳𑐵 𑐳𑐣𑑂 𑑑𑑐𑑑𑑙 𑐫𑑂 𑐖𑐸𑐂𑐐𑐸 𑐊𑐎𑐡𑐶𑐰𑐳𑐷𑐫 𑐰𑐶𑐱𑑂𑐰𑐎𑐥 𑐕𑐣𑑀𑐚 𑐎𑐵𑐳𑐵 𑐣𑑄 𑐩𑑂𑐴𑐶𑐟𑐾𑐏𑐣𑐷𑐐𑐸 𑐖𑐹𑐐𑐸 𑐡𑐸 𑑋 𑐠𑑂𑐰 𑐕𑐣𑑀𑐚 𑐎𑐵𑐳𑐵 𑐰𑐂𑐐𑐸 𑐩𑐴𑐶𑐣𑐵𑐫𑑂 𑐖𑐶𑐩𑑂𑐧𑐵𑐰𑐾𑐫𑑂 𑐖𑐸𑐂 𑑋 𑐀𑐠𑐾𑐴𑐾 𑐣𑐾𑐥𑐵𑑅 𑐁𑑅 𑐣𑐶𑐡𑑃 𑐟𑐎 𑐖𑐸𑐂𑐐𑐸 𑐰𑐶𑐱𑑂𑐰 𑐎𑑂𑐬𑐶𑐎𑐾𑐚 𑐮𑐶𑐐 𑐔𑑂𑐫𑐵𑐩𑑂𑐥𑐶𑐫𑐣𑐳𑐶𑐥 𑐰 𑑔 𑐡𑐶𑐰𑐳𑐷𑐫 𑐩𑐴𑐵𑐡𑐾𑐱𑐷𑐫 𑐎𑐥 𑐩𑑂𑐴𑐶𑐟𑐾𑐟 𑐣𑑄 𑐫𑑀𑐐𑑂𑐫 𑐖𑐹𑐐𑐸 𑐡𑐸 𑑋

𑐧𑐸𑐢𑐰𑐵𑑅𑐫𑐵 𑐎𑐵𑐳𑐵𑐫𑑂 𑐚𑐳 𑐧𑐸𑐂𑐰𑑄 𑐣𑑂𑐴𑐵𑐥𑐵𑑄 𑐧𑑂𑐫𑐵𑐚𑐶𑐒 𑐫𑐵𑑅𑐰𑑅𑐐𑐸 𑐎𑑂𑐫𑐵𑐣𑐵𑐜𑐵𑑄 𑐣𑐶𑐬𑑂𑐢𑐵𑐬𑐶𑐟 𑑕𑑐 𑐌𑐨𑐬𑐫𑑂 𑑑𑑙𑑔 𑐬𑐣 𑐡𑐫𑐾𑐎𑐹𑐐𑐸 𑐏𑑅, 𑐐𑐸𑐎𑐷 𑐌𑐥𑐣𑐬 𑐱𑑂𑐬𑐷𑐩𑐣𑑂𑐠 𑐰𑐶𑐖𑐵𑐬𑐟𑑂𑐣𑐾𑑄 𑐀𑐰𑐶𑐖𑐶𑐟 𑑑𑑐𑑓 𑐬𑐣 𑐡𑐫𑐾𑐎𑐮 𑑋 𑐮𑐶𑐳𑐮𑐫𑑂 𑐧𑑂𑐫𑐵𑐚𑐶𑐒 𑐫𑐵𑑅𑐰𑑅𑐐𑐸 𑐣𑐾𑐥𑐵𑑅𑐫𑐵 𑐥𑑂𑐬𑐡𑐬𑑂𑐱𑐣 𑐢𑐵𑑅𑐳𑐵 𑐟𑐳𑐎𑑄 𑐦𑑂𑐫𑐵𑐳𑐸𑐮 𑑋 𑐌𑐥𑐣𑐬 𑐖𑑂𑐘𑐵𑐣𑐾𑐣𑑂𑐡𑑂𑐬 𑐩𑐮𑑂𑐮, 𑐎𑐥𑑂𑐟𑐵𑐣 𑐥𑐵𑐬𑐳 𑐏𑐜𑐎𑐵 𑐰 𑐱𑐬𑐡 𑐨𑐾𑐲𑐰𑐵𑐎𑐬𑐫𑐵 𑐥𑑂𑐬𑐡𑐬𑑂𑐱𑐣 𑐟𑐳𑐎𑑄 𑐎𑐩𑐖𑑀𑐬 𑐖𑐸𑐮 𑑋 𑐎𑐥𑑂𑐟𑐵𑐣 𑐏𑐜𑐎𑐵 𑐮𑐵 𑐱𑐹𑐣𑑂𑐫𑐫𑑂 𑐁𑐄𑐚 𑐖𑐹𑐐𑐸 𑐏𑑅 𑑋

𑐟𑐬 𑐮𑑂𑐫𑐵𑐫𑑂𑐩𑑂𑐴𑐥𑐶𑑄 𑐎𑐵𑐳𑐵𑐩𑐶𑐥𑐶𑑄𑐳𑑄 𑐣𑐾𑐥𑐵𑑅𑐫𑐵𑐟 𑐰𑐶𑐖𑐫𑐥𑐵𑐏𑐾 𑐣𑑂𑐴𑑂𑐫𑐵𑐎𑐮 𑑋 𑐌𑐥𑐣𑐬 𑐡𑐶𑐮𑐶𑐥 𑐣𑐵𑐠𑑄 𑑔𑑑, 𑐁𑐬𑐶𑐦 𑐱𑐾𑐏𑑄 𑑒𑑖, 𑐬𑑀𑐴𑐶𑐟 𑐥𑑁𑐜𑐾𑐮𑑄 𑑒𑑗 𑐬𑐣 𑐡𑐫𑐾𑐎𑐵𑑅 𑐎𑐵𑐳𑐵 𑐟𑑂𑐫𑐵𑐎𑐾𑐦𑐂𑐐𑐸 𑐁𑐱𑐵 𑐖𑐷𑐰𑐶𑐟 𑐫𑐵𑐣𑐵𑐟𑐮𑐳𑐵 𑐎𑐬𑐞𑑄 𑐀𑐣𑑂𑐟𑐶𑐩 𑐂𑐮𑐫𑑂 𑐟𑐎 𑐳𑑄𑐑𑐬𑑂𑐲 𑐫𑐵𑐣𑐵𑑅 𑐰𑐶𑐖𑐫 𑐔𑐹𑐮𑐵𑐎𑐵𑐧𑐶𑐮 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS