Read news in NepalBhasa text-- www.hamroschool.com BACK 𑐧𑐾𑐮𑐵𑐫𑐟𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐂 𑐣𑑂𑐫𑐵𑐩𑑂𑐴𑐾𑐳𑐶𑐫𑐵 𑐡𑐵𑐰𑐾𑐡𑐵𑐬𑐷 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐧𑐾𑐮𑐵𑐫𑐟𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐂 𑐣𑑂𑐫𑐵𑐩𑑂𑐴𑐾𑐳𑐶𑐫𑐵 𑐡𑐵𑐰𑐾𑐡𑐵𑐬𑐷

𑐧𑐾𑐮𑐵𑐫𑐟𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐚𑐾𑐬𑐶𑐖𑐵 𑐩𑐾𑑄 𑐬𑐵𑐖𑐷𑐣𑐵𑐩𑐵 𑐧𑐷𑐐𑐸 𑐖𑐸𑐂𑐰𑑄 𑐣𑑂𑐴𑐹𑐐𑐸 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐣𑐶𑑄𑐟𑐶𑑄 𑐳𑐟𑑂𑐟𑐵𑐬𑐸𑐝 𑐎𑐣𑑂𑐖𑐬𑐨𑐾𑐚𑐶𑐨 𑐥𑐵𑐬𑑂𑐚𑐷𑐫𑐵 𑐣𑑂𑐫𑐵𑐩𑑂𑐴𑐾𑐳𑐶𑐣𑑄 𑐡𑐵𑐰𑐷 𑐫𑐵𑑅𑐐𑐸 𑐡𑐸 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐩𑐾𑑄 𑐰𑐂𑐐𑐸 𑐩𑐴𑐶𑐣𑐵𑐫𑑂 𑐬𑐵𑐖𑐷𑐣𑐵𑐩𑐵 𑐧𑐷𑐐𑐸 𑐑𑑀𑐲𑐞𑐵 𑐫𑐵𑐫𑐾𑐰𑑄 𑐎𑐣𑑂𑐖𑐬𑐨𑐾𑐚𑐶𑐨 𑐥𑐵𑐬𑑂𑐚𑐷𑐂 𑐥𑑂𑐬𑐟𑐶𑐳𑑂𑐥𑐬𑑂𑐢𑐵 𑐳𑐸𑐬𑐸 𑐖𑐹𑐐𑐸 𑐏𑑅 𑑋 𑐳𑑂𑐰𑐵𑐳𑑂𑐠𑑂𑐫 𑐩𑐣𑑂𑐟𑑂𑐬𑐷 𑐩𑑂𑐫𑐵𑐚 𑐴𑑂𑐫𑐵𑐣𑑂𑐎𑐎 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐣𑐶𑑄𑐟𑐶𑑄 𑐡𑐵𑐰𑐾𑐡𑐵𑐬 𑐫𑐵𑑅𑐩𑑂𑐴 𑐡𑐎𑐮𑐫𑑂 𑐮𑐶𑐥𑐵𑑄𑐩𑑂𑐴 𑐣𑐾𑐟𑐵 𑐖𑐹𑐐𑐸 𑐡𑐸 𑑋

𑐠𑑂𑐰𑐫𑐵𑑄 𑐣𑑂𑐴𑑂𑐫𑐰 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐖𑐾𑐬𑐩𑐷 𑐴𑐣𑑂𑐚, 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐰𑐶𑐎𑐵𑐳 𑐩𑐣𑑂𑐟𑑂𑐬𑐷 𑐬𑑀𑐬𑐷 𑐳𑑂𑐚𑐾𑐰𑐵𑐬𑑂𑐚, 𑐥𑐸𑐮𑐵𑑄𑐩𑑂𑐴 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐧𑑀𑐬𑐶𑐳 𑐖𑐣𑐳𑐣 𑐰 𑐥𑐸𑐮𑐵𑑄𑐩𑑂𑐴 𑐬𑑀𑐖𑐐𑐵𑐬 𑐟𑐠𑐵 𑐥𑐾𑐣𑑂𑐳𑐣𑐩𑐣𑑂𑐟𑑂𑐬𑐷 𑐊𑐳𑑂𑐚𑐬 𑐩𑐎𑑂𑐨𑐾𑑄 𑐳𑐟𑑂𑐟𑐵𑐬𑐸𑐝 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵 𑐖𑐸𑐂𑐐𑐸 𑐣𑐶𑑄𑐟𑐶𑑄 𑐡𑐵𑐰𑐷 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋𑐫𑐸𑐬𑑀𑐥𑐾𑐮𑐷 𑐳𑑄𑐑𑐥𑐵𑐏𑐾𑑄 𑐧𑐾𑐮𑐵𑐫𑐟𑐫𑐵𑐟 𑐕𑐸𑐚𑐾 𑐫𑐵𑐫𑐾𑐐𑐸 𑐧𑑂𑐬𑐾𑐎𑑂𑐖𑐶𑐚𑐫𑐵 𑐣𑐶𑑄𑐟𑐶𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐩𑐾𑑄 𑐴𑑅𑐐𑐸 𑐥𑑂𑐬𑐳𑑂𑐟𑐵𑐰 𑐟𑑅𑐎𑑂𑐰𑑅 𑐴𑐾 𑐳𑑄𑐳𑐡𑐫𑑂 𑐀𑐳𑐦𑐮 𑐖𑐸𑐂𑐰𑑄 𑐩𑐾𑑄 𑐬𑐵𑐖𑐷𑐣𑐵𑐩𑐵 𑐧𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐣𑑂𑐴𑐹𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐡𑐵𑐰𑐾𑐡𑐵𑐬 𑐳𑑂𑐰𑐵𑐳𑑂𑐠𑑂𑐫𑐩𑐣𑑂𑐟𑑂𑐬𑐷 𑐴𑑂𑐫𑐵𑐣𑑂𑐎𑐎𑑄 𑐧𑑂𑐬𑐾𑐎𑑂𑐖𑐶𑐚 𑐮𑐵𑐐𑐹 𑐫𑐵𑐫𑐾 𑐟𑐳𑐎𑑄 𑐁𑐰𑐱𑑂𑐫𑐎 𑐢𑐵𑐳𑐾𑑄 𑐠𑑅𑐩𑑂𑐴𑑄 𑐚𑐾𑐬𑐶𑐖𑐵 𑐩𑐾𑐫𑐵 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐖𑐸𑐂𑐩𑑂𑐴𑐾𑐳𑐶𑐣𑑄 𑐳𑑄𑐳𑐡𑑄 𑐠𑑂𑐰 𑐳𑐩𑑂𑐧𑐣𑑂𑐢𑐷 𑐁𑐰𑐱𑑂𑐫𑐎 𑐳𑐩𑑂𑐗𑑁𑐟𑐵𑐫𑐵 𑐣𑐶𑑄𑐟𑐶𑑄 ‘𑐎𑑂𑐬𑐹𑐬 𑐂𑐩𑐵𑐣𑑂𑐡𑐵𑐬𑐶𑐟𑐵’ 𑐎𑑂𑐫𑐣𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐚𑐾𑐬𑐶𑐖𑐵 𑐩𑐾𑑄 𑐱𑐸𑐎𑑂𑐬𑐰𑐵𑑅 𑐰𑐂𑐐𑐸 𑐖𑐹𑐣 𑑗 𑐟𑐵𑐬𑐶𑐏𑐫𑑂 𑐬𑐵𑐖𑐷𑐣𑐵𑐩𑐵 𑐧𑐷𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑑂𑐎𑐮𑑄 𑐥𑐵𑐬𑑂𑐚𑐷𑐫𑐵 𑐣𑑂𑐴𑐹𑐩𑑂𑐴 𑐣𑐾𑐟𑐵 𑐩𑐮𑑂𑐫𑑅𑐟𑐮𑐾 𑐠𑐩𑑂𑐴𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐥𑐡𑐫𑑂 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐩𑐾𑑄 ‘𑐚𑑀𑐬𑐷 𑐧𑑂𑐫𑐵𑐎𑐧𑐾𑐘𑑂𑐔 𑑑𑑙𑑒𑑒 𑐎𑐩𑐶𑐚𑐷’ 𑐢𑐵𑐂𑐐𑐸 𑐳𑐟𑑂𑐟𑐵𑐬𑐸𑐝 𑐎𑐣𑑂𑐖𑐬𑐨𑐾𑐚𑐶𑐨 𑐥𑐵𑐬𑑂𑐚𑐷𑐫𑐵 𑐳𑐵𑑄𑐳𑐡𑐟𑐫𑑂 𑐥𑐸𑐔𑑅𑐫𑐵 𑐀𑐢𑑂𑐫𑐎𑑂𑐲 𑐳𑐬 𑐐𑑂𑐬𑐵𑐴𑐩 𑐧𑑂𑐫𑑂𑐬𑐵𑐜𑐷𑐮𑐶𑐳𑐾 𑐠𑑅𑐩𑑂𑐴𑑄 𑐬𑐵𑐖𑐷𑐣𑐵𑐩𑐵 𑐧𑐶𑐄𑐐𑐸 𑐕𑐰𑐵𑑅 𑐡𑐸𑐣𑐾 𑐣𑑂𑐴𑐹𑐩𑑂𑐴 𑐣𑐾𑐟𑐵 𑐮𑑂𑐫𑐫𑐾𑐐𑐸 𑐥𑑂𑐬𑐎𑑂𑐬𑐶𑐫𑐵 𑐣𑑂𑐴𑑂𑐫𑐵𑐎𑐾𑐩𑐵𑑅𑐐𑐸 𑐳𑐴𑐩𑐟𑐶 𑐫𑐵𑐣𑐵𑐡𑐷𑐢𑐸𑑄𑐎𑐹𑐐𑐸 𑐡𑐸 𑑋 𑐀𑐠𑐾𑐴𑐾 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐩𑐾𑑄 𑐠𑑅 𑐄𑐟𑑂𑐟𑐬𑐵𑐢𑐶𑐎𑐵𑐬𑐷𑑄 𑐣𑑄 𑐧𑑂𑐬𑐎𑑂𑐖𑐶𑐚 𑐳𑐩𑑂𑐧𑐣𑑂𑐢𑐷 𑐖𑐣𑐩𑐟 𑐳𑑄𑐐𑑂𑐬𑐴𑐫𑐵 𑐮𑐶𑐔𑑂𑐰𑑅𑐫𑐵𑐟 𑐳𑐩𑑂𑐩𑐵𑐣 𑐫𑐵𑐳𑐾𑑄 𑐣𑑂𑐴𑑂𑐫𑐵𑑅𑐰𑐣𑐾𑐩𑐵𑑅𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS