Read news in NepalBhasa text-- www.hamroschool.com BACK 𑐏𑐶𑐔𑐵𑐮𑐶𑐳𑐾 𑐣𑐵𑑄 𑐖𑑂𑐰𑑅𑐮𑐵𑐫𑐾𑐰𑑄 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐏𑐶𑐔𑐵𑐮𑐶𑐳𑐾 𑐣𑐵𑑄 𑐖𑑂𑐰𑑅𑐮𑐵𑐫𑐾𑐰𑑄

𑐖𑐣𑐵𑐰𑐬 𑐰 𑐗𑑄𑐐𑑅𑐥𑐕𑐶 𑐮𑐴𑐷𑐐𑐸 𑐩𑐣𑐹𑐟𑐫𑑂 𑐕𑐐𑐹 𑐳𑑀𑐏 𑐏𑑅 𑑋 𑐠𑑅𑐐𑐸 𑐳𑑀𑐏 𑐥𑐹𑐬𑐵 𑐫𑐵𑐫𑐾𑐟 𑐩𑐣𑐹𑐟𑐫𑑂𑐳𑑄 𑐖𑐣𑐵𑐰𑐬 𑐰 𑐗𑑄𑐐𑑅𑐥𑐕𑐶 𑐮𑐴𑐷 𑑋 𑐠𑐠𑐾 𑐮𑐴𑐶𑐣𑐵𑐟𑐂𑐥𑐶𑑄 𑐩𑐢𑑂𑐫𑐾 𑐫𑐎𑑂𑐰𑐳𑐶𑐣𑑄 𑐠𑑅𑐐𑐸 𑐕𑐾𑑃𑐫𑑂 𑐏𑐶𑐔𑐵 𑐴𑐾 𑐮𑐴𑐷𑐐𑐸 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐕𑐾𑑃𑐫𑐵 𑐳𑐸𑐬𑐎𑑂𑐲𑐵 𑐣𑑄 𑐖𑐸𑐂 𑐢𑐂𑐐𑐸 𑐰𑐶𑐔𑐵𑐬𑑄 𑐫𑐎𑑂𑐰𑐳𑐶𑐣𑑄 𑐏𑐶𑐔𑐵 𑐴𑐾 𑐮𑐴𑐷𑐐𑐸 𑐫𑐵𑐂𑐐𑐸 𑐏𑑅 𑑋 𑐠𑐠𑐾 𑐮𑐴𑐶𑐣𑐵 𑐟𑑅𑐥𑐶𑑄 𑐖𑐣𑐵𑐰𑐬, 𑐗𑑄𑐐𑑅𑐥𑐕𑐶𑐫𑐵𑐟 𑐂𑐩𑐶𑐳𑑄 𑐣𑐵𑑄 𑐣𑑄 𑐧𑐶𑐫𑐵𑐟𑑅𑐐𑐸 𑐡𑐂 𑑋

𑐟𑐵 𑐎𑐶 𑐂𑐩𑐶𑐟 𑐫𑐵𑐄𑑃𑐎 𑐰 𑐀𑑅𑐥𑐸𑐎 𑐠𑑅 𑐠𑐵𑐫𑑂 𑐳𑑅𑐟𑐾 𑐦𑐫𑐾𑐩𑐵 𑐢𑐎𑐵𑑅 𑐠𑐠𑐾 𑐣𑐵𑑄 𑐕𑐸𑐂𑐐𑐸 𑐏𑑅 𑑋 𑐟𑐬 𑐠𑑂𑐰 𑐴𑐾 𑐣𑐵𑑄 𑐣𑑄 𑐩𑐣𑐹𑐟𑐫𑑂 𑐣𑐶𑑄𑐟𑐶𑑄 𑐐𑐧𑐮𑐾𑑄 𑐐𑐧𑐮𑐾𑑄 𑐟𑐳𑐎𑑄 𑐑𑐵𑐑𑑅 𑐖𑐸𑐂𑐐𑐸 𑐖𑐎 𑐩𑐏𑐸 𑐳𑐩𑐳𑑂𑐫𑐵 𑐴𑐾 𑐣𑑄 𑐖𑐸𑐫𑐵 𑐧𑐷 𑐫𑑅 𑑋 𑐠𑐖𑑂𑐫𑐵𑑅𑐐𑐸 𑐴𑐾 𑐕𑐐𑐹 𑐑𑐚𑐣𑐵 𑐔𑐷𑐣𑐫𑑂 𑐖𑐹𑐐𑐸 𑐡𑐸 𑑋 𑐔𑐷𑐣𑐫𑐵 𑐀𑐣𑐴𑐸𑐂 𑐥𑑂𑐬𑐵𑐣𑑂𑐟𑐫𑑂 𑐕𑐩𑑂𑐴 𑐩𑐣𑐸𑐏𑑄 𑐮𑐴𑐶𑐣𑐵𑐟𑑅𑐥𑐶𑑄 𑐏𑐶𑐔𑐵𑐫𑐵 𑐎𑐵𑐬𑐞𑑄 𑐥𑑂𑐬𑐴𑐬𑐷 𑐔𑑁𑐎𑐷𑐂 𑐎𑐸𑑄𑐎𑐵 𑐔𑑂𑐰𑐣𑐾𑐩𑐵𑑅𑐐𑐸 𑐡𑐸 𑑋

𑐥𑑂𑐬𑐵𑐣𑑂𑐟𑐫𑐵 𑐳𑐷 𑐥𑑂𑐫𑐵𑐒 𑐣𑐵𑑄𑐫𑐵 𑑓𑑑 𑐡𑑃 𑐡𑐸𑐩𑑂𑐴 𑐕𑐩𑑂𑐴 𑐮𑑂𑐫𑐵𑐫𑑂𑐩𑑂𑐴𑑄 𑐠𑑅𑐐𑐸 𑐕𑐾𑑃𑐫𑑂 𑐣𑐶𑐩𑑂𑐴 𑐏𑐶𑐔𑐵 𑐮𑐴𑐶𑐣𑐵𑐟𑑅𑐐𑐸 𑐏𑑅 𑑋 𑐰𑑄 𑐮𑐴𑐶𑐣𑐵𑐟𑑅𑐥𑐶𑑄 𑐣𑐶𑐩𑑂𑐴𑐩𑐢𑑂𑐫𑐾 𑐕𑐩𑑂𑐴 𑐏𑐶𑐔𑐵𑐫𑐵 𑐣𑐵𑑄 𑐕𑐒 𑐎𑑂𑐰𑐵𑐣 𑐰 𑐩𑐾𑐩𑑂𑐴 𑐏𑐶𑐔𑐵𑐫𑐵 𑐣𑐵𑑄 𑐱𑐶 𑐎𑑂𑐰𑐵𑐣 𑐟𑐫𑐵𑐟𑑅𑐐𑐸 𑐖𑐸𑐫𑐵𑐔𑑂𑐰𑐣 𑑋 𑐥𑑂𑐫𑐵𑐒𑑄 𑐮𑐴𑐶𑐣𑐵𑐟𑑅𑐥𑐶𑑄 𑐠𑑂𑐰 𑐴𑐾 𑐣𑐶𑐩𑑂𑐴 𑐏𑐶𑐔𑐵𑐫𑐵 𑐣𑐵𑑄𑐫𑐵 𑐎𑐵𑐬𑐞𑑄 𑐰 𑐥𑑂𑐬𑐴𑐬𑐷 𑐔𑑁𑐎𑐷𑐂 𑐎𑐸𑑄𑐎𑐵 𑐔𑑂𑐰𑐣𑐾𑐩𑐵𑑅𑐐𑐸 𑐏𑑅 𑑋 𑐄𑐎𑐶𑐫𑐵 𑐎𑐵𑐬𑐞 𑐕𑐸 𑐢𑐵𑑅𑐳𑐵 𑐣𑐶𑐩𑑂𑐴𑑄 𑐏𑐶𑐔𑐵𑐫𑐵 𑐣𑐵𑑄 𑐳𑐬𑐎𑐵𑐬𑐷 𑐀𑐢𑐶𑐎𑐵𑐬𑐷𑐮𑐶𑐳𑐾 𑐖𑑂𑐰𑑅𑐮𑐵𑑅𑐐𑐸𑐮𑐶𑑄 𑐏𑑅 𑑋

𑐔𑐶𑐣𑐶𑐫𑐵 𑐳𑐬𑐎𑐵𑐬𑐷 𑐀𑐢𑐶𑐎𑐵𑐬𑐷𑐟𑐫𑑂 𑐠𑑅𑐥𑐶𑐣𑐶𑐐𑐸 𑐧𑐾𑐂𑐖𑑂𑐖𑐟 𑐫𑐵𑐫𑐾𑐟 𑐳𑑂𑐰𑑅𑐐𑐸 𑐢𑐵𑐳𑐾𑑄 𑐥𑑂𑐬𑐵𑐣𑑂𑐟𑐫𑐵 𑐫𑐶𑐒 𑐔𑑀𑐄 𑐥𑑂𑐬𑐴𑐬𑐷 𑐖𑑂𑐫𑐵𑐎𑐸𑐠𑐶𑑄 𑐠𑐸𑐎𑐠𑑄𑐫𑐵 𑐥𑐮𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐣𑑂𑐴𑐵𑐥𑐵 𑐮𑐵 𑐠𑑂𑐰 𑐏𑑅 𑐥𑑂𑐬𑐴𑐬𑐷 𑐩𑐳𑐶𑐄 𑐟𑐬 𑐖𑐧 𑐥𑑂𑐫𑐵𑐒𑑄 𑐠𑐩𑑂𑐴𑑄 𑐮𑐴𑐶𑐣𑐵𑐟𑑅𑐥𑐶𑑄 𑐏𑐶𑐔𑐵𑐫𑐵 𑐣𑐵𑑄 𑐳𑐵𑐩𑐵𑐖𑐶𑐎 𑐳𑑄𑐖𑐵𑐮 ‘𑐰𑐷 𑐔𑑂𑐫𑐵𑐚’𑐫𑑂 𑐥𑑀𑐳𑑂𑐚 𑐫𑐵𑐟 𑐰𑐫𑐵𑑄 𑐮𑐐𑐟𑑂𑐟𑐿 𑐴𑐾 𑐰𑐫𑐵𑐟 𑐥𑑂𑐬𑐴𑐬𑐷𑑄 𑐖𑑂𑐰𑑄𑐐𑐸 𑐏𑑅 𑑋

𑐥𑑂𑐬𑐴𑐬𑐷𑑄 𑐥𑑂𑐫𑐵𑐒𑐫𑐵𑐟 𑐖𑑂𑐰𑐣𑐵𑐏𑐟𑑄 𑐔𑐷𑐣𑐫𑑂 𑐕𑐾𑑃 𑐮𑐴𑐷𑐥𑐶𑑄 𑐳𑐸𑑄 𑐣𑑄 𑐖𑐣𑐵𑐰𑐬𑐫𑐵 𑐣𑐵𑑄 𑐳𑐬𑐎𑐵𑐬𑐷 𑐀𑐢𑐶𑐎𑐵𑐬𑐷𑐫𑐵 𑐣𑐵𑐩𑑄 𑐟𑐫𑐾𑐐𑐸 𑐐𑐿𑐬𑐎𑐵𑐣𑐹𑐣𑐷 𑐖𑐹𑐐𑐸 𑐳𑑂𑐥𑐲𑑂𑐚 𑐫𑐵𑑅𑐐𑐸 𑐡𑐸 𑑋 𑐥𑑂𑐫𑐵𑐒𑐫𑐵𑐟 𑐖𑑂𑐰𑐣𑐾 𑐢𑐸𑑄𑐎𑐵𑑅 𑐁𑑅 𑐰𑐫𑐵𑐟 𑑑𑑐 𑐣𑑂𑐴𑐸𑐫𑐵 𑐣𑐶𑑄𑐟𑐶𑑄 𑐴𑐶𑐬𑐵𑐳𑐟𑐫𑑂 𑐟𑐂𑐐𑐸 𑐖𑐹𑐐𑐸 𑐡𑐸 𑑋 𑐔𑐷𑐣𑐫𑐵 𑐳𑐸𑐬𑐎𑑂𑐲𑐵 𑐎𑐵𑐣𑐹𑐣 𑐀𑐣𑑂𑐟𑐬𑑂𑐐𑐟 𑐥𑑂𑐫𑐵𑐒𑐫𑐵𑐟 𑐠𑑂𑐰 𑐳𑐖𑐵𑐫 𑐧𑐶𑐄𑐐𑐸 𑐏𑑅 𑑋 𑐥𑑂𑐬𑐴𑐬𑐷𑐫𑐵 𑐎𑐠𑑄 𑐕𑐒 𑐎𑑂𑐰𑐵𑐣 𑐥𑑂𑐬𑐵𑐣𑑂𑐟𑐫𑐵 𑐣𑐐𑐬 𑐎𑑂𑐲𑐾𑐟𑑂𑐬𑐫𑑂 𑐖𑐸𑐂𑐐𑐸 𑐀𑐥𑐬𑐵𑐢 𑐣𑐶𑐫𑐣𑑂𑐟𑑂𑐬𑐞 𑐫𑐵𑐂𑐩𑑂𑐴 𑐀𑐢𑐶𑐎𑐵𑐬𑐷 𑐏𑑅𑐳𑐵 𑐱𑐶 𑐎𑑂𑐰𑐵𑐣 𑐀𑐣𑑁𑐥𑐔𑐵𑐬𑐶𑐎 𑐳𑐵𑐩𑐸𑐡𑐵𑐫𑐶𑐎 𑐎𑐵𑐬𑑂𑐫𑐎𑐬𑑂𑐟𑐵 𑐏𑑅 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS