𑐔𑑂𑐰𑐧𑐴𑐵𑑅 𑐎𑐬𑐸𑐞𑐵𑐩𑐫𑐫𑐵 𑐖𑐵𑐟𑑂𑐬𑐵 𑐎𑑂𑐰𑐔𑐵𑐮

𑐫𑐾𑑃- 𑐳𑑂𑐰𑐣𑐶𑐐𑑅 𑐕𑐐𑐸𑐮𑐶𑑄 𑐖𑐵𑐟𑑂𑐬𑐵𑐩𑐫 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐫𑐾𑑃 𑐡𑐾𑐱𑑄 𑐡𑐎𑑂𑐲𑐶𑐞 𑐨𑐾𑐐𑐫𑑂 𑐮𑐵𑑅𑐐𑐸 𑐔𑑂𑐰𑐧𑐴𑐵𑑅 𑐎𑐬𑐸𑐞𑐵𑐩𑐫𑐫𑐵 𑐖𑐵𑐟𑑂𑐬𑐵 𑐖𑐸𑐮 𑑋 𑐫𑐾𑑃 𑐡𑐾𑐱𑑄 𑐡𑐎𑑂𑐲𑐶𑐞 𑐨𑐾𑐐𑐳𑑂𑐠𑐶𑐟 𑐔𑑂𑐰𑐧𑐴𑐵𑑅 𑐜𑐵𑑃𑐜𑐵𑐫𑑂 𑐔𑑂𑐰𑑄𑐩𑑂𑐴 𑐎𑐬𑐸𑐞𑐵𑐩𑐫𑐫𑐵 𑐏𑑅 𑐖𑐵𑐟𑑂𑐬𑐵 𑐫𑐵𑑅𑐐𑐸 𑐏𑑅 𑑋

𑐖𑐵𑐟𑑂𑐬𑐵 𑐳𑑂𑐰𑐫𑐵𑑄 𑐕𑐰𑐵𑑅 𑐣𑑂𑐴𑑂𑐫𑑅 𑐣𑑂𑐴𑑂𑐰𑑄 𑐫𑐵𑑅𑐩𑑂𑐴 𑐎𑐬𑐸𑐞𑐵𑐩𑐫𑐫𑐵𑐟 𑐰𑑄𑐐𑐸 𑐱𑐣𑐶𑐰𑐵𑑅 𑐔 𑐟𑐡𑐱𑐿𑑄𑐫𑐵 𑐣𑑂𑐴𑐶𑐎𑐸𑐣𑑂𑐴𑐸 𑐧𑐵𑐐𑐩𑐟𑐶 𑐏𑐸𑐳𑐶𑐂 𑐫𑑄𑐎𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐧𑐵𑐖𑑄𑐮𑐶𑐳𑐾𑑄 𑐖𑐵𑐟𑑂𑐬𑐵 𑐫𑐵𑑅𑐐𑐸 𑐏𑑅 𑑋 𑐔𑑂𑐰𑐧𑐴𑐵𑑅 𑐜𑐵𑑃𑐜𑐵𑑄 𑐗𑐞𑑂𑐜𑐿 𑐳𑑂𑐰𑑄𑐐𑐹 𑐎𑐶𑐮𑑀𑐩𑐶𑐚𑐬 𑐟𑐵𑐥𑐵𑑅𑐐𑐸 𑐣𑑂𑐫𑐏𑐸 𑐏𑐸𑐳𑐶𑐫𑐵 𑐡𑑀𑐨𑐵𑐣𑐫𑑂 𑐟𑐎 𑐎𑐬𑐸𑐞𑐵𑐩𑐫𑐫𑐵 𑐩𑐹𑐬𑑂𑐟𑐶𑐫𑐵𑐟 𑐏𑐟𑐫𑑂 𑐟𑐫𑐵𑑅 𑐫𑑄𑐎𑐹𑐐𑐸 𑐏𑑅 𑑋 𑐁𑐡𑐶𑐣𑐵𑐠 𑐮𑑀𑐎𑐾𑐱𑑂𑐰𑐬𑐫𑐵 𑐣𑐵𑐩𑑄 𑐣𑑄 𑐩𑑂𑐴𑐳𑐶𑐫𑐵 𑐰𑐫𑐵𑐔𑑂𑐰𑑄𑐩𑑂𑐴 𑐎𑐬𑐸𑐞𑐵𑐩𑐫𑐫𑐵𑐟 𑐩𑐶𑐳𑐵 𑐰 𑐩𑐶𑐖𑑄 𑐣𑐶𑐐𑐸𑐮𑐶𑑄 𑐬𑐸𑐥𑐫𑑂 𑐎𑐵𑐫𑐾𑐐𑐸 𑐫𑐵𑐣𑐵𑐟𑑅𑐐𑐸𑐮𑐶𑑄 ‘𑐀𑐬𑑂𑐢𑐣𑐵𑐬𑐾𑐱𑑂𑐰𑐬’ 𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋

𑐥𑑂𑐬𑐵𑐔𑐷𑐣 𑐂𑐮𑐫𑑂 𑐎𑐬𑐸𑐞𑐵𑐩𑐫𑐫𑐵 𑐩𑐹𑐬𑑂𑐟𑐶 𑐣𑑂𑐫𑐏𑐸 𑐏𑐸𑐳𑐶𑐫𑐵 𑐴𑐾 𑐡𑑀𑐨𑐵𑐣𑐫𑑂 𑐮𑐸𑐂𑐎𑐵𑑅 𑐔𑑂𑐰𑐧𑐴𑐵𑑅𑐫𑐵 𑐳𑑂𑐠𑐵𑐣𑐷𑐫𑐰𑐵𑐳𑐷𑑄 𑐜𑐵𑑃𑐜𑐵 𑐔𑑂𑐰𑐫𑑂 𑐴𑐾 𑐡𑐾𑐐𑑅 𑐠𑐫𑐾𑐎𑐵𑑅 𑐔𑐿𑐟𑐡𑐱𑐿𑑄𑐫𑐵 𑐴𑐾 𑐣𑑂𑐴𑐶𑐎𑐸𑐣𑑂𑐴𑐸 𑐥𑑂𑐬𑐟𑐶𑐳𑑂𑐠𑐵𑐥𑐣 𑐫𑐵𑑅𑐐𑐸 𑐢𑐂𑐐𑐸 𑐖𑐣𑐰𑐶𑐱𑑂𑐰𑐵𑐳 𑐡𑐸 𑑋

𑐖𑐵𑐟𑑂𑐬𑐵𑐫𑑂 𑐳𑑂𑐰𑐣𑐶𑐐𑑅𑐮𑐶𑐳𑐾𑑄 𑐖𑑅𑐏𑑅𑐫𑐵 𑐠𑐵𑐳𑑄 𑐁𑐥𑐵𑐮𑑄 𑐩𑐣𑐹𑐟𑐫𑑂 𑐳𑐴𑐨𑐵𑐐𑐶𑐟𑐵 𑐡𑐸𑐐𑐸 𑐏𑑅 𑑋 𑐔𑑂𑐰𑐧𑐴𑐵𑑅 𑐎𑐬𑐸𑐞𑐵𑐩𑐫𑐫𑐵𑐟 𑐴𑐶𑐣𑑂𑐡𑐹 𑐰 𑐧𑑁𑐡𑑂𑐢 𑐣𑐶𑐐𑐸𑐮𑐶𑑄 𑐳𑐩𑑂𑐥𑑂𑐬𑐡𑐵𑐫𑐫𑐵 𑐢𑐬𑑂𑐩𑐵𑐰𑐮𑐩𑑂𑐧𑐶𑐟𑐫𑑂𑐳𑑄 𑐄𑐟𑐶𑐎𑑄 𑐁𑐳𑑂𑐠𑐵 𑐟𑐫𑐵𑑅 𑐩𑐵𑐣𑐾 𑐫𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐧𑑁𑐡𑑂𑐢 𑐢𑐬𑑂𑐩𑐵𑐰𑐮𑐩𑑂𑐧𑐶𑐟𑐫𑑂𑐳𑑄 𑐳𑑂𑐰𑐣𑐶𑐐𑑅𑐫𑐵 𑐥𑑂𑐫𑐩𑑂𑐴 𑐩𑐢𑑂𑐫𑐾 𑐕𑐩𑑂𑐴 𑐮𑑀𑐎𑐾𑐱𑑂𑐰𑐬𑐎𑐠𑑄 𑐣𑑄 𑐎𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋