𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐷𑐥𑐶𑑄 𑐀𑐥𑑂𑐰𑐮
𑐫𑐾𑑃 (𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳)÷𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵 𑐩𑐐𑐵𑑅 𑐢𑐎𑐵𑑅 𑐁𑐬𑐁𑐬 𑐎𑑂𑐫𑐵𑐩𑑂𑐥𑐳𑐫𑑂 𑐮𑐶 𑐴𑐾 𑐎𑐵𑐫𑐾𑐢𑐸𑑄𑐎𑐹𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐎𑐎𑑂𑐲𑐵 𑐥𑐸𑐺𑐣𑑅 𑐳𑐘𑑂𑐔𑐵𑐮𑐣 𑐫𑐵𑐫𑐾𑐢𑐸𑑄𑐎𑐵𑑅 𑐁𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵 𑐣𑑄 𑐀𑐥𑑂𑐰𑐫𑐵 𑐰𑑅𑐐𑐸 𑐡𑐸 𑑋 𑐀𑐣 𑐀𑐥𑑂𑐰𑐫𑐵 𑐰𑑅𑐐𑐸 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑐣𑐾𑐖𑑂𑐫𑐵𑐫𑑂 𑐮𑑂𑐫𑐵𑐫𑑂𑐩𑑂𑐴 𑐥𑐸𑐳𑑂𑐟𑐵 𑐳𑐎𑑂𑐬𑐶𑐫 𑐖𑐸𑐫𑐵 𑐰𑑅𑐐𑐸 𑐳𑑄𑐎𑐾𑐟 𑐣𑑄 𑐏𑐣𑐾 𑐡𑐫𑐵 𑐰𑑅𑐐𑐸 𑐡𑐸 𑑋
𑐠𑐣𑐶𑑄 𑑑𑑕 𑐩𑐴𑐶𑐣𑐵 𑐣𑑂𑐴𑑂𑐫𑑅 𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵 𑐩𑐐𑐵𑑅 𑐢𑐵𑐳𑐾𑑄 𑐁𑐬𑐁𑐬 𑐎𑑂𑐫𑐵𑐩𑑂𑐥𑐳𑐫𑑂 𑐧𑐷𑐊 𑐟𑐐𑐶𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐮𑐶𑐎𑐵𑑅𑐐𑐸 𑐏𑑅 𑑋 𑐟𑐬 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐐𑐸 𑐡𑐧𑐵𑐧 𑐰 𑐎𑐸𑐟𑑅𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐀𑐣 𑐴𑐵𑐣𑑄 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐎𑐾𑐐𑐸 𑐖𑐎 𑐩𑐏𑐸 𑐰𑐶𑐡𑑂𑐫𑐵𑐬𑑂𑐠𑐷𑐫𑐵 𑐮𑑂𑐫𑐵𑑅 𑐣𑑄 𑐢𑐩𑐵𑐢𑐩 𑐀𑐥𑑂𑐰𑐫𑐵 𑐰𑑅𑐐𑐸 𑐏𑑃 𑐀𑐣 𑐥𑐸𑐣𑑅 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐷𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐬𑐶𑐡𑐾𑐣 𑐩𑐴𑐬𑑂𑐖𑐣𑑄 𑐎𑐣𑐵𑐡𑐶𑐮 𑑋
𑐁𑐬𑐁𑐬 𑐎𑑂𑐫𑐵𑐩𑑂𑐥𑐳𑑄 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐮𑐶𑐎𑐵𑐫𑐾𑐰𑑄 𑐩𑐴𑐬𑑂𑐖𑐣 𑐮𑐐𑐵𑐫𑐟 𑐩𑐣𑐶𑐲 𑐱𑑂𑐬𑐾𑐲𑑂𑐛 𑐰 𑐩𑐾𑐥𑐶𑑄 𑐥𑐵𑐳𑐵𑐥𑐶𑐣𑐶 𑐥𑐸𑐔𑐮𑑄 𑐴𑐵𑐣𑑄 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐟𑐫𑐾𑐎𑐾𑐐𑐸 𑐮𑐵𑐐𑐶𑑄 𑐥𑐴𑐮 𑐫𑐵𑑅𑐐𑐸 𑐏𑑅 𑑋 𑐱𑐸𑐬𑐸𑐂 𑐠𑑂𑐰 𑐥𑐴𑐮 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐕𑐸𑑄 𑐨𑐔𑐵 𑐖𑐎 𑐰𑐶𑐡𑑂𑐫𑐵𑐬𑑂𑐠𑐷 𑐮𑐐𑐾 𑐖𑐹𑐐𑐸 𑐏𑑅𑐳𑐵𑑄 𑐮𑐶𑐥𑐵 𑐄𑐎𑐶𑐫𑐵 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑑅𑐐𑐸 𑐏𑑅 𑑋
𑐠𑑁𑐎𑐣𑑂𑐴𑐫𑑂 𑐀𑐣 𑐧𑐷𑐊 𑐟𑐐𑐶𑑄𑐫𑐵 𑐣𑑂𑐴𑐵𑐥𑐵𑑄𑐐𑐸 𑐰 𑐣𑐶𑐐𑐹𑐐𑐸 𑐡𑑃 𑐳𑐩𑐾𑐟 𑐫𑐵𑐣𑐵𑑅 𑑒𑑕 𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐧𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐣 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐖𑑂𑐫𑐵 𑐥𑑂𑐬𑐵.𑐜𑐵. 𑐔𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐫𑐵𑐣𑐵 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋
𑐰𑐶𑐡𑑂𑐫𑐵𑐬𑑂𑐠𑐷 𑐳𑑄𑐏𑑂𑐫𑐵 𑐀𑐥𑑂𑐰𑐫𑐵 𑐰𑑅𑐐𑐸𑐮𑐶𑑄 𑐁𑑅 𑐎𑑂𑐫𑐵𑐩𑑂𑐥𑐳𑐫𑑂 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐴𑐵𑐣𑑄 𑐮𑐶𑐎𑐵𑐫𑐾 𑐩𑐵𑐮𑐷𑐐𑐸 𑐀𑐰𑐳𑑂𑐠𑐵 𑐩𑐰𑐂𑐐𑐸 𑐏𑑃 𑐳𑐴𑐵𑐫𑐎 𑐎𑑂𑐫𑐵𑐩𑑂𑐥𑐳 𑐥𑑂𑐬𑐩𑐸𑐏 𑐐𑑀𑐰𑐶𑐣𑑂𑐡 𑐁𑐔𑐵𑐬𑑂𑐫𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐧𑑂𑐰𑐣𑐷𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟 𑐴𑐾 𑐩𑐡𑐫𑐵𑑅 𑐀𑐣 𑐳𑑂𑐰𑐡𑑃 𑐥𑑂𑐫𑐡𑑃 𑐎𑐎𑑂𑐲𑐵 𑐴𑐾 𑐳𑐘𑑂𑐔𑐵𑐮𑐣 𑐩𑐖𑐹𑐐𑐸 𑐏𑑅𑐳𑐵 𑐰𑐫𑐵𑑄 𑐮𑐶𑐥𑐵 𑐎𑑂𑐫𑐵𑐩𑑂𑐥𑐳𑑄 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐴𑐾 𑐮𑐶𑐎𑐫𑐵 𑐕𑑂𑐰𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐠𑑁𑑄𑐎𑐣𑑂𑐴𑐫𑑂 𑐢𑐵𑑅𑐳𑐵 𑐀𑐣 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵𑐫𑑂 𑐰𑐂𑐥𑐶𑑄𑐟 𑐨𑐬𑑂𑐣𑐵 𑐎𑐵𑐫𑐾𑐟 𑐕𑐸𑑄 𑐬𑑀𑐎𑐟𑑀𑐎 𑐩𑐡𑐸𑐐𑐸 𑐰 𑐎𑐎𑑂𑐲𑐵 𑐣𑑄 𑐧𑐵𑑄𑐮𑐵𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐰𑐫𑑂𑐎𑐮𑑄 𑐎𑐣𑐵𑐡𑐷𑐐𑐸 𑐡𑐸 𑑋
𑐎𑑂𑐫𑐵𑐩𑑂𑐥𑐳𑐫𑑂 𑐥𑐸𑐣𑑅 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐳𑐘𑑂𑐔𑐵𑐮𑐣 𑐫𑐵𑐎𑐾𑐟 𑐱𑐶𑐎𑑂𑐲𑐞 𑐏𑑂𑐫𑑅𑐮𑐶𑐳𑐾 𑐳𑐩𑑂𑐧𑐣𑑂𑐢𑐶𑐟 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐥𑐶𑑄, 𑐀𑐣𑐫𑐵 𑐳𑑂𑐰𑐰𑐶𑐫𑐸 𑐥𑐡𑐵𑐢𑐶𑐎𑐵𑐬𑐷𑐥𑐶𑑄 𑐮𑐶𑐳𑐾𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵𑐥𑐶𑑄𑐳𑑄 𑐣𑑄 𑐮𑐐𑐵𑐟𑐵𑐬 𑐥𑐴𑐮 𑐫𑐵𑑅𑐐𑐸 𑐏𑑅𑐳𑐵 𑐄𑐎𑐶𑐫𑐵 𑐴𑐾 𑐮𑐶𑐔𑑂𑐰𑑅 𑐎𑐠𑑄 𑐎𑑂𑐫𑐵𑐩𑑂𑐥𑐳 𑐥𑑂𑐬𑐱𑐵𑐳𑐣 𑐧𑐵𑐢𑑂𑐫 𑐖𑐹𑐐𑐸 𑐏𑑅 𑑋
𑐣𑑂𑐴𑐵𑐥𑐵 𑐁𑐬𑐁𑐬 𑐎𑑂𑐫𑐵𑐩𑑂𑐥𑐳𑐫𑐵 𑐣𑐾𑐥𑐵𑐮 𑐨𑐵𑐲𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐳𑐸𑐎𑐸𑐣𑑂𑐡𑐵 𑐳𑐵𑐴𑐶𑐟𑑂𑐫 𑐥𑐵𑑅𑐮𑐵𑑅 𑐳𑑂𑐰𑐣𑐵𑑅 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋
LEAVE YOUR COMMENTS