𑑒𑑕𑑐𑑐 𑐡𑑃 𑐥𑐸𑐮𑐵𑑄𑐐𑐸 𑐏𑑂𑐫𑐾𑑄
𑐏𑑂𑐫𑐾𑑄 𑐐𑑂𑐰𑑅𑐣𑑂𑐴𑐸𑐟𑐎 𑐳𑐸𑐬𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑐣𑐷 𑑋 𑐩𑐣𑐳𑐾 𑐟𑐫𑐵𑐟𑐮 𑐢𑐵𑑅𑐳𑐵 𑐣𑐶𑐮𑐵 𑐳𑑂𑐰𑐮𑐵𑑄𑐣𑐶𑐳𑐾𑑄 𑐣𑑂𑐫𑐵𑐮𑐵 𑐏𑐸𑐮𑐵𑐟𑐎 𑑋 𑐗𑐷𑐳𑑄 𑐠𑐠𑐾 𑐰𑐶𑐔𑐵𑑅 𑐫𑐵𑐂 𑐖𑐸𑐂 𑑋 𑐟𑐬 𑐩𑐏𑐸 𑐏𑑂𑐫𑐾𑑄 𑑒𑑕𑑐𑑐 𑐡𑑃 𑐟𑐎 𑐳𑐸𑐬𑐎𑑂𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐥𑐟𑑂𑐟𑐵 𑐮𑐐𑐾 𑐖𑐹𑐐𑐸 𑐡𑐸 𑑋 𑐔𑐷𑐣𑐫𑐵 𑐖𑐶𑐫𑐵𑐒𑐳𑐸 𑐥𑑂𑐬𑐵𑐣𑑂𑐟𑐫𑑂 𑐥𑐸𑐬𑐵𑐟𑐟𑑂𑐰𑐰𑐶𑐡𑑂𑐟𑐫𑑂𑐳𑑄 𑐫𑐵𑑅𑐐𑐸 𑐕𑐐𑐹 𑐄𑐟𑑂𑐏𑐣𑐣𑑂𑐫𑐵 𑐂𑐮𑐫𑑂 𑑒𑑕𑑐𑑐 𑐡𑑃 𑐥𑐸𑐮𑐵𑑄𑐐𑐸 𑐳𑐷𑐐𑐵𑑅 (𑐔𑐶𑐴𑐵𑐣𑑄) 𑐳𑐡𑑂𑐡𑐾 𑐏𑑂𑐫𑐾𑑃 𑐮𑐸𑐂𑐎𑐹𑐐𑐸 𑐡𑐸 𑑋 𑐄𑐟𑑂𑐏𑐣𑐣𑐫𑐵 𑐂𑐮𑐫𑑂 𑐖𑐵𑐬 𑐠𑐾𑑄𑐖𑑂𑐫𑐵𑑅𑐐𑐸 𑐠𑐮𑐫𑑂 𑐟𑐫𑐵𑐟𑑅𑐐𑐸 𑐏𑑂𑐫𑐾𑑄𑐩𑐢𑑂𑐫𑐾 𑐕𑐐𑑅 𑐴𑐾 𑐖𑐎 𑐟𑐖𑑂𑐫𑐵𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐮𑐸𑐂𑐎𑐹𑐐𑐸 𑐏𑑅 𑑋
𑐥𑑂𑐬𑐵𑐣𑑂𑐟𑐫𑐵 ‘𑐣𑐵𑐣𑐖𑐶𑐒 𑐩𑑂𑐫𑐸𑐖𑐶𑐫𑐩 𑐂𑐣𑑂𑐲𑑂𑐚𑐶𑐔𑑂𑐫𑐹𑐟 𑐀𑐦 𑐁𑐬𑑂𑐎𑐶𑐫𑑀𑐮𑑀𑐖𑐷’𑐫𑐵 𑐕𑐠𑑂𑐰𑑅 𑐀𑐣𑐸𑐳𑐣𑑂𑐢𑐵𑐟𑐵𑐟𑐫𑑂𑐳𑑄 𑐮𑐶𑐫𑐵𑐒 𑐳𑐴𑐬𑐫𑐵 𑐳𑐵𑐒𑐳𑐶𑐒𑐳𑑂𑐠𑐶𑐟 𑐕𑐐𑐹 𑐨𑐬𑐵𑐫𑑂𑐢𑑄𑐐𑐸 𑐔𑐶𑐴𑐵𑐣𑐫𑑂 𑐄𑐟𑑂𑐏𑐣 𑐫𑐵𑑅𑐐𑐸 𑐂𑐮𑐫𑑂 𑐖𑐵𑐬 𑐠𑐾𑑄 𑐏𑐣𑐾 𑐡𑐸𑐐𑐸 𑐔𑐵𑐫𑐵 𑐠𑐮𑐫𑑂 𑐏𑑂𑐫𑐾𑑄 𑐟𑐫𑐵𑐟𑑅𑐐𑐸 𑐮𑐸𑐂𑐎𑐹𑐐𑐸 𑐏𑑅 𑑋 𑐩𑐣𑐸𑐏𑑄 𑐮𑑂𑐴𑐵𑐟𑑄 𑐠𑐶𑐂𑐰𑑄 𑐏𑑂𑐫𑐾𑑄 𑐟𑐖𑑂𑐫𑐵𑑅𑐐𑐸 𑐐𑑂𑐫𑐵𑑅𑐔𑐶𑐎𑐸𑐫𑐵 𑐎𑐵𑐬𑐞𑑄 𑐏𑑂𑐫𑐾𑑄 𑐮𑑂𑐫𑐵𑑅 𑐏𑐵𑐫𑐾𑐟 𑐊𑐎𑑂𑐳–𑐬𑐾 𑐩𑐾𑐱𑐶𑐣𑐫𑐵 𑐥𑑂𑐬𑐫𑑀𑐐 𑐫𑐵𑐣𑐵𑐐𑐸 𑐄𑐟𑑂𑐏𑐣𑐣𑐫𑑂 𑐳𑑄𑐮𑐐𑑂𑐣𑐩𑐢𑑂𑐫𑐾 𑐕𑐩𑑂𑐴 𑐥𑐸𑐬𑐵𑐟𑐟𑑂𑐰𑐰𑐶𑐡𑑂 𑐗𑐵𑐌 𑐴𑐾𑐒𑐩𑐶𑑄𑐐𑑄 𑐢𑐵𑑅𑐐𑐸 𑐡𑐸 𑑋
‘𑐏𑑂𑐫𑐾𑑄𑐫𑐵 𑐟𑐸𑐫𑐸𑐐𑐸 𑐰 𑐩𑑂𑐴𑐵𑐳𑐸𑐐𑐸 𑐧𑑂𑐰 𑐢𑐵𑑅𑐳𑐵 𑐢𑑂𑐰𑐐𑐶𑐣𑐵 𑐔𑑂𑐰𑐣𑐾 𑐀𑐰𑐳𑑂𑐠𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐏𑑅, 𑐟𑐬 𑐄𑐎𑐷 𑐔𑐶 𑐟𑐫𑐵𑐟𑑅𑐐𑐸 𑐡𑐸 𑐰𑐵 𑐩𑐡𑐸 𑐢𑐂𑐐𑐸 𑐧𑐵𑐬𑐾 𑐢𑐵𑑅𑐳𑐵 𑐕𑐸𑑄 𑐳𑐷𑐎𑐾 𑐩𑐦𑐸𑐣𑐶 𑐄𑐎𑐶𑑄 𑐏𑑂𑐫𑐾𑑄𑐫𑐵 𑐜𑐷𑐊𑐣𑐊 𑐥𑐬𑐷𑐎𑑂𑐲𑐞 𑐫𑐵𑐣𑐵𑑅 𑐠𑐥 𑐖𑐵𑐣𑐎𑐵𑐬𑐷 𑐎𑐵𑐫𑐾𑐐𑐸 𑐎𑐸𑐟𑑅 𑐫𑐵𑐫𑐾𑐐𑐸 𑐖𑐸𑐂’ 𑐴𑑀𑐒𑐩𑐶𑑄𑐐𑑄 𑐢𑐵𑑅𑐐𑐸 𑐡𑐸 𑑋 𑐏𑑂𑐫𑐾𑑄𑐫𑐵 𑐟𑐳𑐎𑑄 𑐳𑑁𑐏𑐶𑐣 𑐩𑐣𑐸𑐏𑑄 𑐄𑐐𑐸 𑐏𑑂𑐫𑐾𑑄 𑐟𑐫𑐾 𑐟𑑅𑐐𑐸 𑐏𑐫𑐾𑐩𑐵𑑅 𑐢𑐂𑐐𑐸 𑐀𑐣𑐸𑐩𑐵𑐣 𑐫𑐵𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐄𑐩𑑂𑐴 𑐩𑐣𑐹 𑐩𑐡𑐫𑐾 𑐢𑐸𑑄𑐎𑐵𑑅 𑐰𑐫𑐵𑐐𑐸 𑐴𑐾 𑐮𑐸𑐩𑐣𑑂𑐟𑐶𑐂 𑐠𑐮𑐫𑑂 𑐏𑑂𑐫𑐾𑑄 𑐟𑐫𑐵𑑅 𑐰𑐫𑐵𑐐𑐸 𑐳𑐷𑐩𑑂𑐴𑐣𑐵𑐥𑑄 𑐟𑐫𑐵𑑅 𑐮𑑂𑐴𑐵𑐎𑐵 𑐧𑐶𑐄𑐐𑐸 𑐏𑐫𑐾𑐩𑐵𑑅 𑐢𑐎𑐵𑑅 𑐀𑐣𑐸𑐳𑐣𑑂𑐢𑐵𑐟𑐵𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋
𑐔𑐷𑐣𑐫𑐵 𑐥𑐸𑐮𑐵𑑄𑐐𑐸 𑐠𑐖𑑂𑐫𑐵𑑅𑐐𑐸 𑐳𑐷𑐐𑐵𑐮𑑄 𑐠𑐸𑐎𑐠𑑄 𑐏𑑂𑐫𑐾𑑄 𑐮𑐸𑐂𑐎𑐹𑐐𑐸 𑐑𑐚𑐣𑐵 𑐢𑐵𑑅𑐳𑐵 𑐠𑑂𑐰 𑐣𑑂𑐴𑐵𑐥𑐵𑑄𑐏𑐸𑐳𑐷 𑐩𑐏𑐸 𑑋 𑐁𑐟𑐎 𑐐𑐸𑐮𑐶 𑐣𑑄 𑐏𑑂𑐫𑐾𑑄 𑐮𑐸𑐂𑐎𑐮 𑐄𑐎𑐷 𑐀𑐥𑑂𑐰𑑅𑐠𑐾𑑄 𑐡𑐎𑑂𑐰𑑄 𑐏𑑂𑐫𑐾𑑄 𑐟𑐖𑑂𑐫𑐵𑑅𑐐𑐸 𑐀𑐰𑐳𑑂𑐠𑐵𑐫𑑂 𑐮𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐀𑐣𑐸𑐳𑐣𑑂𑐢𑐵𑐣𑐫𑑂 𑐳𑑄𑐮𑐐𑑂𑐣 𑐰𑐿𑐖𑑂𑐘𑐵𑐣𑐶𑐎𑐟𑐫𑑂𑐎𑐠𑑄 𑐠𑐸𑐮𑐶𑐩𑐕𑐶𑑄 𑐟𑐵𑑅𑐴𑐵𑐎𑑅𑐐𑐸 𑐀𑐰𑐢𑐶 𑐟𑐎 𑐏𑑂𑐫𑐾𑑄𑐫𑐵 𑐥𑐶𑐣𑐾𑐫𑐵 𑐨𑐵𑐐 𑐣𑑄 𑐳𑐸𑐬𑐎𑑂𑐲𑐶𑐟 𑐬𑐸𑐥𑑄 𑐡𑐫𑐵𑐔𑑂𑐰𑐣𑐷𑐐𑐸 𑐢𑐂𑐐𑐸 𑐟𑐳𑐎𑑄 𑐀𑐖𑐹 𑐔𑐵𑐫𑐵𑐥𑐸𑐐𑐸 𑐰𑐶𑐲𑐫 𑐏𑑅 𑑋 𑐳𑐣𑑂 𑑒𑑐𑑑𑑕 𑐫𑑂 𑐣𑑄 𑑒𑑐𑑐𑑐 𑐡𑑃 𑐥𑐸𑐮𑐵𑑄𑐐𑐸 𑐏𑑂𑐫𑐾𑑄 𑐮𑐸𑐂𑐎𑐹𑐐𑐸 𑐏𑑅 𑑋
LEAVE YOUR COMMENTS