𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐮𑑂𑐰𑐵𑐨𑑅 𑐟𑑂𑐰𑑅𑐟𑐹𑐳𑐵 𑐖𑐎 𑐰𑐶𑐥𑑂𑐮𑐰𑐮𑐶𑐳𑐾 𑐰𑐵𑐬𑑂𑐟𑐵

𑐫𑐾𑑃 – 𑐳𑐬𑐎𑐵𑐬𑑄 𑐣𑐾𑐎𑐥𑐵 𑐰𑐶𑐥𑑂𑐮𑐰 𑐥𑐸𑐔𑐮𑑄 𑐴𑐟𑐶𑐫𑐵𑐬 𑐮𑑅𑐮𑑂𑐴𑐵𑑅𑐳𑐵 𑐖𑐎 𑐰𑐵𑐬𑑂𑐟𑐵 𑐖𑐸𑐂 𑐦𑐂𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐧𑐶𑐴𑐷𑐰𑐵𑑅 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑐫𑐵 𑐣𑐶𑐬𑑂𑐞𑐫 𑐳𑐵𑐬𑑂𑐰𑐖𑐣𑐶𑐎 𑐫𑐵𑐫𑐾𑐟 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐳𑐬𑐎𑐵𑐬𑐫𑐵 𑐥𑑂𑐬𑐰𑐎𑑂𑐟𑐵 𑐮𑐶𑐳𑐾𑑄 𑐳𑐘𑑂𑐔𑐵𑐬𑐩𑐣𑑂𑐟𑑂𑐬𑐷 𑐐𑑀𑐎𑐸𑐮 𑐧𑐵𑐳𑑂𑐚𑑀𑐮𑐵𑑄 𑐄𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐴𑐶𑑄𑐳𑐵𑐟𑑂𑐩𑐎 𑐐𑐟𑐶𑐰𑐶𑐢𑐶 𑐫𑐵𑑅𑐐𑐸 𑐢𑐵𑐳𑐾𑑄 𑐳𑐬𑐎𑐵𑐬𑑄 𑐰𑑄𑐐𑐸 𑐦𑐵𑐐𑐸𑐣 𑑒𑑘 𑐐𑐟𑐾 𑐰𑐶𑐥𑑂𑐮𑐰 𑐥𑐸𑐔𑑅𑐫𑐵𑐟 𑐥𑑂𑐬𑐟𑐶𑐧𑐣𑑂𑐢 𑐟𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋

𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐩𑐣𑑂𑐟𑑂𑐬𑐷 𑐧𑐵𑐳𑑂𑐎𑑀𑐚𑐵𑑄 𑐢𑐫𑐵𑐡𑐷, ‘𑐳𑑄𑐰𑐵𑐡𑐫𑐵 𑐣𑐶𑑄𑐟𑐶𑑄 𑐖𑐶𑐥𑐶𑑄 𑐟𑐫𑐵𑐬 𑐡𑐸 𑑋 𑐟𑐬, 𑐳𑑄𑐰𑐵𑐡 𑐐𑐮𑐟 𑐐𑐟𑐶𑐰𑐶𑐢𑐶𑐮𑐶𑐳𑐾 𑐖𑐸𑐂 𑐦𑐂 𑐩𑐏𑐸 𑑋 𑐰𑐵𑐬𑑂𑐟𑐵𑐫𑑂 𑐔𑑂𑐰𑐣𑐾 𑐣𑑂𑐴𑑂𑐫𑑅 𑐴𑐟𑐶𑐫𑐵𑐬 𑐟𑑂𑐰𑑅𑐟𑐾𑐩𑐵𑑅, 𑐴𑐶𑑄𑐳𑐵 𑐟𑑂𑐰𑑅𑐟𑐾𑐩𑐵𑑅 𑑋’𑐰𑐫𑑂𑐎𑐮𑑄 𑐕𑐸𑑄 𑐀𑐳𑐣𑑂𑐟𑐸𑐲𑑂𑐚𑐶 𑐡𑐸𑐳𑐵 𑐱𑐵𑐣𑑂𑐟𑐶𑐥𑐹𑐬𑑂𑐞 𑐬𑐵𑐖𑐣𑐷𑐟𑐶 𑐰 𑐰𑐵𑐬𑑂𑐟𑐵𑐥𑐵𑐏𑐾𑑄 𑐳𑑄𑐧𑑀𑐢𑐣 𑐫𑐵𑐫𑐾𑐦𑐂𑐐𑐸 𑐏𑑃 𑐢𑐵𑐳𑐾𑑄 𑐢𑐫𑐵𑐡𑐷, ‘𑐬𑐵𑐖𑐣𑐷𑐟𑐶𑐎 𑐩𑐿𑐡𑐵𑐣 𑐏𑐵𑐮𑐷 𑐡𑐸, 𑐣𑑂𑐴𑑂𑐫𑐵𑐠𑐵𑐫𑑂 𑐩𑑂𑐴𑐶𑐟𑐹𑐳𑐵𑑄 𑐖𑐶𑐄 𑑋’

𑐩𑐾𑐏𑐾 𑐰𑐶𑐥𑑂𑐮𑐰𑑄 𑐎𑐵𑐨𑑂𑐬𑐾 𑐐𑑀𑐮𑐷𑐎𑐵𑐞𑑂𑐜𑐫𑑂 𑐥𑑂𑐬𑐴𑐬𑐷 𑐖𑐰𑐵𑐦𑐷 𑐎𑐵𑐬𑐧𑐵𑐴𑐷 𑐢𑐎𑐵𑑅 𑐫𑐵𑑅𑐐𑐸 𑐡𑐵𑐰𑐷𑐫𑐵𑐟 𑐣𑐾𑐎𑐥𑐵 𑐰𑐶𑐥𑑂𑐮𑐰𑑄 𑐧𑐎𑐰𑐵𑐳 𑐚𑐶𑐥𑑂𑐥𑐞𑐷 𑐫𑐵𑑅𑐐𑐸 𑐡𑐸 𑑋 𑐧𑐶𑐴𑐷𑐰𑐵𑑅 𑐩𑐢𑑂𑐫 𑐎𑐾𑐣𑑂𑐡𑑂𑐬𑐷𑐫 𑐎𑐩𑐵𑐞𑑂𑐜𑐫𑐵 𑐂𑐘𑑂𑐔𑐵𑐬𑑂𑐖 𑐴𑐾𑐩𑐣𑑂𑐟𑐥𑑂𑐬𑐎𑐵𑐱 𑐌𑐮𑐷 ‘𑐳𑐸𑐡𑐬𑑂𑐱𑐣𑑄’ 𑐕𑐐𑐹 𑐰𑐶𑐖𑑂𑐘𑐥𑑂𑐟𑐶 𑐖𑐵𑐬𑐷 𑐫𑐵𑐳𑐾𑑄 𑐎𑐵𑐨𑑂𑐬𑐾 𑐐𑑀𑐮𑐷𑐎𑐵𑐞𑑂𑐜𑐫𑐵𑐟 𑐎𑐫𑐵𑑅 𑐥𑐵𑐬𑑂𑐚𑐷𑐫𑐵 𑐁𑐢𑐶𑐎𑐵𑐬𑐶𑐎 𑐢𑐵𑐬𑐞 𑐥𑐶𑐟 𑐧𑐶𑐄𑐐𑐸 𑐏𑑅 𑑋

𑐰𑑄𑐐𑐸 𑐔𑐿𑐟 𑑕 𑐐𑐟𑐾 𑐎𑐵𑐨𑑂𑐬𑐾𑐫𑐵 𑐬𑑀𑐱𑐷 𑐐𑐵𑐄𑑃𑐥𑐵𑐮𑐶𑐎𑐵𑐫𑑂 𑐰𑐶𑐥𑑂𑐮𑐰 𑐥𑐸𑐔𑑅𑐫𑐵 𑐎𑐵𑐬𑑂𑐫𑐎𑐬𑑂𑐟𑐵𑑄 𑐥𑑂𑐬𑐴𑐬𑐷𑐫𑐵𑐟 𑐐𑑀𑐮𑐷 𑐎𑐫𑐾𑐎𑐹𑐐𑐸 𑐰 𑐖𑐰𑐵𑐦𑐷 𑐎𑐵𑐬𑐧𑐵𑐴𑐷𑐫𑐵 𑐗𑑂𑐰𑐮𑐫𑑂 𑐰𑐶𑐥𑑂𑐮𑐰𑐫𑐵 𑐣𑐶𑐩𑑂𑐴 𑐎𑐵𑐬𑑂𑐫𑐎𑐬𑑂𑐟𑐵 𑐖𑑂𑐰𑐣𑐵𑐐𑐸 𑐰 𑐩𑐾𑐥𑐶𑑄 𑐦𑐬𑐵𑐬 𑐖𑐹𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋 𑐰𑐶𑐖𑑂𑐘𑐥𑑂𑐟𑐶𑐂 𑐣𑐶𑐴𑐟𑑂𑐠𑐵 𑐀𑐨𑐶𑐫𑐵𑐣𑐎𑐬𑑂𑐩𑐷𑐫𑐵𑐟 𑐥𑑂𑐬𑐴𑐬𑐷𑑄 𑐐𑑀𑐮𑐷 𑐔𑐮𑐾 𑐫𑐵𑐣𑐵𑑅 𑐖𑑂𑐰𑑄𑐐𑐸 𑐢𑐵𑐳𑐾𑑄 𑐰𑐶𑐥𑑂𑐮𑐰 𑐥𑐸𑐔𑑅𑐥𑐵𑐏𑐾𑑄 𑐐𑑀𑐮𑐷 𑐔𑐮𑐾 𑐫𑐵𑐟 𑐢𑐂𑐐𑐸 𑐏𑑃 𑐦𑐫𑑂𑐐𑑄 𑐏𑑃 𑐏𑑅 𑐢𑐫𑐵𑐟𑑅𑐐𑐸 𑐡𑐸 𑑋

𑐀𑐠𑐾 𑐴𑐾 𑐰𑐶𑐖𑑂𑐘𑐥𑑂𑐟𑐶𑐂 𑐳𑐬𑐎𑐵𑐬𑐫𑐵 𑐠𑑂𑐰 𑐩𑐏𑐸𑐐𑐸 𑐧𑐎𑐰𑐵𑐳𑑄 𑐖𑐣𑐫𑐸𑐡𑑂𑐢𑐎𑐵𑐮𑐫𑐵 𑐳𑑄𑐎𑐚𑐎𑐵𑐮𑐫𑐵𑐟 𑐮𑐸𑐩𑑄𑐎𑐹𑐐𑐸 𑐢𑐵𑐳𑐾𑑄 𑐟𑐟𑑂𑐎𑐵𑐮 𑐠𑑅𑐥𑐶𑐣𑐶𑐐𑐸 𑐥𑑂𑐬𑐴𑐬𑐷 𑐰𑐵 𑐳𑐸𑐬𑐎𑑂𑐲𑐵 𑐣𑐶𑐎𑐵𑐫𑐫𑐵𑐟 𑐁𑐎𑑂𑐬𑐩𑐞 𑐫𑐵𑐫𑐾𑐐𑐸 𑐥𑐵𑐬𑑂𑐚𑐷𑐫𑐵 𑐣𑐷𑐟𑐶 𑐴𑐾 𑐩𑐡𑐸𑐐𑐸 𑐰 𑐡𑐮𑐵𑐮 𑐥𑐸𑑃𑐖𑐷𑐰𑐵𑐡𑐫𑐵 𑐰𑐶𑐬𑐸𑐡𑑂𑐢 𑐠𑑅𑐥𑐶𑐣𑐶𑐐𑐸 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐰𑐶𑐖𑑂𑐘𑐥𑑂𑐟𑐶𑐂 𑐰𑐬𑑂𑐟𑐩𑐵𑐣 𑐳𑐬𑐎𑐵𑐬, 𑐐𑐺𑐴 𑐥𑑂𑐬𑐱𑐵𑐳𑐣 𑐰 𑐳𑐸𑐬𑐎𑑂𑐲𑐵 𑐣𑐶𑐎𑐵𑐫 𑐡𑐾𑐫𑑂𑐫𑐵𑐟 𑐐𑐺𑐴𑐫𑐸𑐡𑑂𑐢𑐫𑑂 𑐑𑑂𑐰𑐵𑐣𑐵𑑅 𑐨𑑂𑐬𑐲𑑂𑐚𑐵𑐔𑐵𑐬, 𑐴𑐵𑐎𑐸 𑐧𑐖𑐵𑑅 𑐁𑐡𑐶𑐫𑐵𑐟 𑐳𑐸𑐔𑐸𑐎𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐧𑐶𑐫𑐵𑐟𑑅𑐐𑐸 𑐡𑐸 𑑋

𑐩𑐾𑐏𑐾 𑐰𑐶𑐥𑑂𑐮𑐰 𑐩𑐵𑐌𑐰𑐵𑐡𑐷 𑐰𑐶𑐬𑐸𑐡𑑂𑐢 𑐳𑐾𑐣𑐵 𑐥𑐬𑐶𑐔𑐵𑐮𑐣 𑐖𑐸𑐮 𑐢𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐳𑐩𑐵𑐔𑐵𑐬𑐫𑐵𑐟 𑐣𑐾𑐥𑐵𑐮𑐷 𑐳𑐾𑐣𑐵𑑄 𑐏𑐞𑑂𑐜𑐣 𑐫𑐵𑑅𑐐𑐸 𑐡𑐸 𑑋 𑐧𑐶𑐴𑐷𑐰𑐵𑑅 𑐕𑐐𑐹 𑐰𑐶𑐖𑑂𑐘𑐥𑑂𑐟𑐶 𑐖𑐵𑐬𑐷 𑐫𑐵𑐳𑐾𑑄 𑐳𑐾𑐣𑐵𑑅 𑐠𑑅𑐥𑐶𑐣𑐶𑐐𑐸 𑐥𑐹𑐬𑑂𑐰𑐣𑐶𑐬𑑂𑐢𑐵𑐬𑐶𑐟 𑐟𑐵𑐮𑐶𑐩, 𑐳𑐿𑐣𑑂𑐫 𑐀𑐨𑑂𑐫𑐵𑐳 𑐰 𑐳𑑂𑐰𑐵𑐳𑑂𑐠𑑂𑐫 𑐱𑐶𑐰𑐶𑐬𑐫𑑂 𑐎𑐾𑐣𑑂𑐡𑑂𑐬𑐶𑐟 𑐖𑐹𑐐𑐸 𑐏𑑃 𑐳𑐾𑐣𑐵𑑄 𑐢𑐵𑑅𑐐𑐸 𑐡𑐸 𑑋 𑐳𑐾𑐣𑐵𑐫𑐵 𑐰𑐶𑐖𑑂𑐘𑐥𑑂𑐟𑐶𑐂 𑐣𑐾𑐥𑐵𑑅𑐫𑐵 𑐳𑐾𑐣𑐵 𑐳𑑄𑐰𑐶𑐢𑐵𑐣, 𑐳𑐿𑐣𑐶𑐎 𑐋𑐣 𑐰 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐣𑐷𑐟𑐶 𑐰 𑐣𑐶𑐬𑑂𑐡𑐾𑐱𑐣 𑐎𑐠𑑄 𑐳𑐘𑑂𑐔𑐵𑐮𑐣 𑐖𑐸𑐂𑐐𑐸 𑐳𑑄𑐳𑑂𑐠𑐵 𑐖𑐹𑐐𑐸𑐮𑐶𑑄 𑐣𑐾𑐥𑐵𑑅𑐫𑐵 𑐳𑐾𑐣𑐵 𑐠𑑅𑐐𑐸 𑐖𑐶𑐩𑑂𑐩𑐾𑐰𑐵𑐬𑐷 𑐥𑑂𑐬𑐟𑐶 𑐳𑐖𑐐 𑐡𑐸 𑐢𑐫𑐵𑐟𑑅𑐐𑐸 𑐡𑐸 𑑋