𑐀𑐩𑐾𑐬𑐶𑐎𑐵𑐫𑐵 𑐎𑐵𑐬𑐞𑑄 𑐰𑐵𑐬𑑂𑐟𑐵 𑐳𑑂𑐫𑑄𑐐𑐸 𑐡𑑂𑐰𑐥𑑄
𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐎𑐶𑐩 𑐖𑑀𑐒𑑂𑐐 𑐀𑐣𑑄 𑐀𑐩𑐾𑐬𑐶𑐎𑐵 𑐮𑐶𑐳𑐾 𑐖𑐸𑐫𑐵𑐔𑑂𑐰𑑄𑐐𑐸 𑐰𑐵𑐬𑑂𑐟𑐵𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐟 𑐎𑐸𑐚𑐣𑐷𑐟𑐶𑐎 𑐥𑐴𑐮 𑐫𑐵𑐫𑐾𑐐𑐸 𑐎𑐶 𑐩𑐫𑐵𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐫𑐵𑐎𑐣𑑄 𑐴𑐾 𑐣𑐶𑐬𑑂𑐞𑐫 𑐫𑐵𑐣𑐵𑐡𑐷𑐟𑑂𑐫𑑄𑐐𑐸 𑐏𑑃 𑐕𑐩𑑂𑐴 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐰𑐬𑐶𑐲𑑂𑐛 𑐀𑐢𑐶𑐎𑐵𑐬𑐷𑑄 𑐢𑐵𑑅𑐐𑐸 𑐡𑐸 𑑋 𑐀𑐠𑐾𑐴𑐾 𑐣𑐾𑐟𑐵 𑐎𑐶𑐩𑑄 𑐎𑑂𑐲𑐾𑐥𑑂𑐫𑐵𑐳𑑂𑐟𑑂𑐬 𑐰 𑐁𑐞𑐰𑐶𑐎 𑐥𑐬𑐷𑐎𑑂𑐲𑐞 𑐡𑐶𑐎𑐾𑐐𑐸 𑐧𑐵𑐬𑐾 𑐣𑑄 𑐫𑐵𑐎𑐣𑑄 𑐣𑐶𑐬𑑂𑐞𑐫 𑐫𑐵𑐂𑐐𑐸 𑐏𑑃 𑐰𑐫𑑂𑐎𑐮𑑄 𑐢𑐫𑐵𑐡𑐷𑐐𑐸 𑐡𑐸 𑑋
𑐄𑐩𑑂𑐴 𑐀𑐢𑐶𑐎𑐵𑐬𑐷𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐰 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐡𑐠𑐸𑐂 𑐨𑐶𑐫𑐟𑐣𑐵𑐩𑐫𑐵 𑐴𑐣𑑀𑐂 𑐖𑐹𑐐𑐸 𑐣𑐶𑐎𑑂𑐰𑑅𑐐𑐸 𑐱𑐶𑐏𑐬 𑐰𑐵𑐬𑑂𑐟𑐵𑐫𑑂 𑐀𑐩𑐾𑐬𑐶𑐎𑐵 𑐧𑐵𑑄𑐮𑐵𑑅𑐐𑐸 𑐴𑑂𑐰𑑅𑐟𑐵𑑅𑐫𑐵𑐟 𑐟𑑂𑐰𑑅𑐦𑐶𑐎𑐹𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐔𑑀 𑐳𑑀𑐣 𑐴𑐸𑐃 𑐥𑑂𑐫𑑀𑐒𑑂𑐐𑐫𑐵𑐒𑑂𑐐𑐫𑑂 𑐰𑐶𑐡𑐾𑐱𑐷 𑐎𑐸𑐚𑐣𑐷𑐟𑐶𑐖𑑂𑐘 𑐰 𑐳𑑄𑐰𑐵𑐡𑐡𑐵𑐟𑐵𑐟𑐫𑑂𑐟 𑐳𑑄𑐰𑑀𑐢𑐣 𑐫𑐵𑐫𑐾𑐐𑐸 𑐗𑑂𑐰𑐮𑐫𑑂 𑐠𑑂𑐰 𑐏𑑃 𑐢𑐵𑐳𑐾𑑄 𑐰𑐵𑐬𑑂𑐟𑐵𑐫𑑂 𑐕𑐸𑑄 𑐣𑑄 𑐳𑐴𑐩𑐟𑐶 𑐩𑐖𑐹𑐐𑐸 𑐏𑑃𑐫𑑂 𑐄𑐟𑑂𑐟𑐬 𑐎𑑀𑐬𑐶𑐫𑐵 𑐡𑐸𑑅𑐏𑐷 𑐡𑐸𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋
𑐀𑐠𑐾𑐴𑐾 𑐰𑐫𑑂𑐎𑐮𑑄 𑐀𑐩𑐾𑐬𑐶𑐎𑐵𑑄 𑐬𑐸𑐔𑐶 𑐎𑑂𑐫𑐣𑐵𑐩𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐰𑐵𑐬𑑂𑐟𑐵 𑐴𑐵𑐎𑐣𑑄 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐣𑑄 𑐩𑐡𑐸𑐐𑐸 𑐏𑑃 𑐳𑑂𑐥𑐲𑑂𑐚 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐱𑐶𑐏𑐬 𑐰𑐵𑐬𑑂𑐟𑐵 𑐥𑑂𑐬𑐎𑑂𑐬𑐶𑐫𑐵𑐫𑑂 𑐳𑐴𑐨𑐵𑐐𑐷 𑐄𑐥𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐔𑑀𑑄 𑐰𑐵𑐬𑑂𑐟𑐵𑐫𑑂 𑐀𑐩𑐾𑐬𑐶𑐎𑐵𑐫𑐵 𑐥𑐴 𑐏𑐣𑐵𑑅 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐀𑐖𑐹 𑐔𑐵𑑅𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋
𑐰𑐫𑑂𑐎𑐮𑑄 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥 𑐰𑐵𑐬𑑂𑐟𑐵𑐫𑑂 𑐨𑐔𑐵 𑐮𑐔𑐶𑐮𑑀 𑐏𑐣𑐾𑐡𑐸𑐐𑐸 𑐏𑑅𑐳𑐵𑑄 𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐩𑐵𑐂𑐎 𑐥𑑀𑐩𑑂𑐥𑐾𑐌 𑐰 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐶𑐫 𑐳𑐸𑐬𑐎𑑂𑐲𑐵 𑐳𑐮𑑂𑐮𑐵𑐴𑐎𑐵𑐬 𑐖𑑀𑐣 𑐧𑑀𑐮𑑂𑐚𑐣𑐫𑐵 𑐴𑐛𑐥𑐹𑐬𑑂𑐞 𑐩𑐵𑐐𑑄 𑐫𑐵𑐣𑐵𑑅 𑐰𑐵𑐬𑑂𑐟𑐵 𑐡𑐠𑐸𑐂 𑐴𑐾 𑐟𑑂𑐰𑐵𑑅𑐡𑑅𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾𑐴𑐾 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐰𑐬𑐶𑐲𑑂𑐛 𑐳𑐮𑑂𑐮𑐵𑐴𑐎𑐵𑐬𑐟𑐫𑑂 𑐥𑐵𑐏𑐾𑑄 𑐰𑐫𑐵𑐔𑑂𑐰𑑄𑐐𑐸 𑐢𑐵𑐥𑐹𑐫𑐵 𑐎𑐵𑐬𑐞𑑄 𑐣𑑄 𑐰𑐵𑐬𑑂𑐟𑐵𑐫𑐵 𑐰𑐵𑐟𑐵𑐰𑐬𑐞 𑐗𑐣 𑐳𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐣𑑄 𑐰𑐫𑑂𑐎𑐮𑑄 𑐧𑐶𑐫𑐵𑐡𑐶𑐮 𑑋
𑐩𑐾𑐏𑐾 𑐥𑑀𑐩𑑂𑐥𑐾𑐌 𑐰 𑐧𑑀𑐮𑑂𑐚𑐣𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵 𑐠𑑂𑐰 𑐡𑑂𑐰𑐥𑑄𑐫𑐵 𑐢𑐵𑑅𑐳𑐵 𑐏𑐞𑑂𑐜𑐣 𑐫𑐵𑐣𑐵𑐡𑐷𑐢𑐸𑑄𑐎𑐹𑐐𑐸 𑐡𑐸 𑑋 ‘𑐄𑐩𑐶𑐳𑑄 𑐢𑐵𑑅𑐐𑐸 𑐏𑑃𑐫𑑂 𑐳𑐟𑑂𑐫𑐟𑐵 𑐩𑐡𑐸’ 𑐥𑑀𑐩𑑂𑐥𑐾𑐌𑑄 𑐢𑐫𑐵𑐡𑐷𑐐𑐸 𑐡𑐸 𑑋 𑐀𑐠𑐾𑐴𑐾 𑐧𑑀𑐮𑑂𑐚𑐣𑑄 𑐬𑐵𑐲𑑂𑐚𑑂𑐬𑐥𑐟𑐶 𑐚𑑂𑐬𑐩𑑂𑐥 𑐴𑐾 𑐀𑐣𑑂𑐟𑐶𑐩 𑐣𑐶𑐬𑑂𑐞𑐫𑐎𑐬𑑂𑐟𑐵 𑐖𑐹𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋𑐰𑐶𑐡𑐾𑐱𑐩𑐣𑑂𑐟𑑂𑐬𑐷 𑐥𑑀𑐩𑑂𑐥𑐾𑐌𑑄 𑐎𑑂𑐲𑐾𑐥𑑂𑐫𑐵𑐳𑑂𑐟𑑂𑐬 𑐰 𑐁𑐞𑐰𑐶𑐎 𑐥𑐬𑐷𑐎𑑂𑐲𑐞 𑐳𑑂𑐠𑐐𑐟 𑐫𑐵𑐫𑐾𑐐𑐸 𑐎𑐶𑐩𑐫𑐵 𑐥𑑂𑐬𑐟𑐶𑐧𑐡𑑂𑐢𑐟𑐵𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐚𑑂𑐬𑐩𑑂𑐥𑑄 𑐰𑐶𑐱𑑂𑐰𑐵𑐳 𑐫𑐵𑐣𑐵𑐡𑐷𑐐𑐸 𑐳𑑂𑐥𑐲𑑂𑐚 𑐫𑐵𑐣𑐵𑐡𑐷𑐐𑐸 𑐡𑐸 𑑋
LEAVE YOUR COMMENTS