Read news in NepalBhasa text-- www.hamroschool.com BACK 𑐳𑐶𑐎𑑂𑐎𑑂𑐩𑐶𑐫𑑂 𑐨𑐵𑐫𑑂, 𑐮𑐶𑐥𑐶, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑂𑐫𑐣𑐵𑐩𑐶𑐥𑐶𑑄𑐟 𑐴𑐣 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐳𑐶𑐎𑑂𑐎𑑂𑐩𑐶𑐫𑑂 𑐨𑐵𑐫𑑂, 𑐮𑐶𑐥𑐶, 𑐳𑑄𑐳𑑂𑐎𑐺𑐟𑐶𑐫𑐵 𑐳𑑂𑐫𑐣𑐵𑐩𑐶𑐥𑐶𑑄𑐟 𑐴𑐣

𑐠𑐶𑐩𑐶 – 𑐳𑐶𑐎𑑂𑐎𑐶𑐩𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐠𑑅𑐐𑐸 𑐨𑐵𑐫𑑂, 𑐮𑐶𑐥𑐶, 𑐢𑐬𑑂𑐩, 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐣𑐏𑑅𑐔𑐏𑑅, 𑐣𑐳𑐵𑐟𑑂𑐰𑑃𑐳𑐵 𑐖𑑂𑐰𑐮𑑄 𑐁𑐡𑐶𑐫𑐵 𑐧𑐵𑐬𑐾 𑐳𑑂𑐫𑐣𑐾𑐎𑐣𑐾 𑐫𑐵𑑅𑐥𑐶𑑄𑐟 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵, 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶 𑐰 𑐳𑑄𑐳𑑂𑐎𑐺𑐟𑐶 𑐳𑑄𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐫𑐸𑐰𑐵 𑐣𑐾𑐥𑐵𑐮 𑐣𑐵𑑄𑐫𑐵 𑐳𑑄𑐳𑑂𑐠𑐵𑐫𑐵 𑐩𑑄𑐎𑐵𑑅 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑑄𑐐𑐸 𑐣𑐶𑐐𑐹 𑐡𑐱𑐎 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐳𑐶𑐎𑑂𑐎𑐶𑐩𑐫𑑂 𑐰𑐣𑐵𑑅 𑐀𑐣𑐔𑑂𑐰𑑄𑐥𑐶𑑄𑐟 𑐄𑐎𑐠𑑄 𑐣𑐾𑐰𑐵𑑅𑐟𑐫𑑂 𑐠𑐷𑐠𑐷 𑐥𑐎𑑂𑐲𑐫𑐵 𑐧𑐵𑐬𑐾 𑐳𑑂𑐫𑐣𑐾𑐎𑐣𑐾 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐥𑐶𑑄𑐟 𑐰𑐵𑐒𑑂𑐩𑐫 𑐱𑐟𑐵𑐧𑑂𑐡𑐷 𑐥𑐸𑐬𑐸𑐲 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷𑑄 𑐴𑐣𑐵𑐡𑐷𑐐𑐸 𑐏𑑅 𑑋

𑐳𑐣𑑂 𑑑𑑙𑑙𑑗 𑐫𑐵 𑐂𑐮𑑄𑐣𑐶𑐳𑐾𑑄 𑐳𑑂𑐰𑐣𑐶𑐐𑐮𑑄 𑐳𑐶𑐎𑑂𑐎𑐶𑐩𑐫𑑂 𑐰𑐣𑐵𑑅 𑐀𑐣 𑐴𑐾 𑐮𑐵𑑄 𑐮𑐵𑑄 𑐟𑐎 𑐔𑑂𑐰𑐣𑐵𑑅 𑐣𑐾𑐰𑐵𑑅 𑐨𑐵𑐫𑑂, 𑐮𑐶𑐥𑐶, 𑐧𑐵𑐖𑑄, 𑐥𑑂𑐫𑐵𑐏𑑄, 𑐖𑐵𑐟𑑂𑐬𑐵𑐥𑐬𑑂𑐰, 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶, 𑐣𑐏𑑅𑐔𑐏𑑅 𑐟𑐶𑐳𑐵𑐰𑐳𑑅 𑐁𑐡𑐶 𑐧𑐵𑐬𑐾 𑐳𑑂𑐫𑐣𑐾𑐎𑐣𑐾 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐰𑑂𑐫𑐎𑑂𑐟𑐶 𑐰 𑐳𑑄𑐳𑑂𑐠𑐵𑐐𑐟 𑐬𑐸𑐥𑑄 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐠𑐸𑐎𑐠𑑄 𑐳𑐶𑐎𑑂𑐎𑐶𑐩𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐨𑐵𑐫𑑂, 𑐮𑐶𑐥𑐶, 𑐖𑐵𑐟𑑂𑐬𑐵𑐥𑐬𑑂𑐰, 𑐧𑐵𑐖𑑄, 𑐥𑑂𑐫𑐵𑐏𑑄 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐫𑐵𑐣𑐵𑐡𑐷𑐥𑐶𑑄 𑐰𑑂𑐫𑐎𑑂𑐟𑐶𑐐𑐟 𑐰 𑐳𑑄𑐳𑑂𑐠𑐵𑐫𑐵𑐟 𑐫𑐵𑐣𑐵𑑅 𑐣𑐷𑐣𑑂𑐫𑐵𑐩𑑂𑐴 𑐳𑑂𑐰𑐫𑐵𑑄 𑐀𑐥𑑂𑐰𑑅𑐳𑐶𑐟 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐩𑐹𑐥𑐵𑐴𑐵𑑄 𑐖𑑀𑐱𑐷𑑄 𑐳𑐩𑐐𑑂𑐬 𑐳𑐶𑐎𑑂𑐎𑐶𑐩𑐫𑐵 𑐰𑐶𑐎𑐵𑐳𑐫𑑂 𑐣𑐾𑐰𑐵𑑅𑐟𑐫𑑂𑐳𑑄 𑐩𑑂𑐴𑐶𑐟𑐹𑐐𑐸 𑐨𑐹𑐩𑐶𑐎𑐵𑐫𑐵𑐟 𑐎𑐫𑐵𑑅 𑐔𑑂𑐰𑐕𑐵𑐫𑐵𑐡𑐷𑐐𑐸 𑐏𑑅 𑑋

𑐰𑐫𑑂𑐎𑐮𑑄 𑐳𑐶𑐎𑑂𑐎𑐶𑐩𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐨𑐵𑐫𑑂 𑐰 𑐮𑐶𑐥𑐶 𑐣𑐵𑐥𑑄 𑐣𑐾𑐰𑐵𑑅 𑐟𑐖𑐶𑐮𑐖𑐶𑐫𑐵 𑐰𑐶𑐎𑐵𑐳, 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑐟𑐶𑑄 𑐀𑐣𑐫𑐵 𑐬𑐵𑐖𑑂𑐫 𑐳𑐬𑐎𑐵𑐬𑑄 𑐧𑐖𑐾𑐚 𑐴𑐾 𑐰𑐶𑐣𑐶𑐫𑑀𑐖𑐣 𑐫𑐵𑐣𑐵𑑅 𑐣𑐾𑐥𑐵𑐮𑐨𑐵𑐲𑐵 𑐰 𑐣𑐾𑐰𑐵𑑅 𑐥𑐴𑐶𑐔𑐵𑐣𑐫𑐵𑐟 𑐮𑑂𑐫𑑄𑐎𑐾𑐫𑐵 𑐣𑐶𑑄𑐟𑐶𑑄 𑐐𑐸𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐮 𑐰 𑐢𑐵𑐠𑐾𑑄 𑐴𑐾 𑐔𑑂𑐰𑐕𑐵𑐫𑐾𑐧𑐴𑐐𑐹 𑐖𑑂𑐫𑐵 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐶𑐎𑑂𑐎𑐶𑐳 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐣𑐵𑐫𑑅 𑐡𑐶𑐮𑐸 𑐥𑑂𑐬𑐢𑐵𑐣𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐐𑐸 𑐨𑐵𑐫𑑂, 𑐮𑐶𑐥𑐶, 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐳𑐫𑐾𑐎𑐾𑐐𑐸 𑐁𑐥𑐵𑐮𑑄 𑐀𑐰𑐳𑐬 𑐡𑑅𑐳𑐵𑑄 𑐄𑐎𑐶𑐫𑐵𑐟 𑐔𑐶𑐄𑐟𑐵𑑅 𑐩𑐟𑑅𑐐𑐸 𑐰 𑐐𑐩𑑂𑐨𑐶𑐬 𑐩𑐖𑐹𑐐𑐸 𑐏𑑃𑐫𑑂 𑐔𑐶𑐄𑐟𑐵𑑅 𑐥𑑂𑐰𑑄𑐎𑐵𑐡𑐶𑐮 𑑋 𑐀𑐠𑐾 𑐏𑑅𑐳𑐵𑑄 𑐳𑐶𑐎𑑂𑐎𑐶𑐩𑐫𑑂 𑐔𑑂𑐰𑑄𑐥𑐶𑑄𑐎𑐾 𑐣𑐾𑐰𑐵𑑅 𑐨𑐵𑐫𑑂, 𑐮𑐶𑐥𑐶, 𑐎𑐮𑐵𑑅 𑐳𑐵𑐴𑐶𑐟𑑂𑐫, 𑐳𑑄𑐳𑑂𑐎𑐺𑐟𑐶𑐥𑑂𑐬𑐟𑐶 𑐢𑐵𑑅𑐳𑐵 𑐐𑐵𑐎𑑂𑐎𑑄 𑐩𑐟𑐶𑐣𑐵 𑐡𑐸𑐐𑐸 𑐣𑑄 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐩𑐡𑐣𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑑄 𑐠𑐶𑐩𑐶𑐫𑐵 𑐴𑐾 𑐎𑐵𑐫𑐩𑐔𑐵 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐐𑐞𑐾𑐱𑐬𑐵𑐩 𑐮𑐵𑐕𑐶 𑐳𑐶𑐎𑑂𑐎𑐶𑐩𑐫𑑂 𑐰𑐣𑐵𑑅 𑐠𑐣𑐫𑐵 𑐳𑑄𑐳𑑂𑐎𑐺𑐟𑐶, 𑐎𑐮𑐵𑐫𑐵 𑐧𑐵𑐬𑐾 𑐳𑑂𑐫𑐣𑐾𑐎𑐣𑐾 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐐𑐸𑐐𑐸 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐡𑐶𑐮 𑐰 𑐢𑐵𑐠𑐾𑑄𑐫𑐵 𑐴𑐾 𑐐𑑁𑐬𑐰𑐫𑐵 𑐰𑐶𑐲𑐫 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑑄𑐐𑐷𑐟𑐶𑐎 𑐏𑑂𑐫𑑅𑐫𑐵𑐟 𑐟𑐧𑑂𑐫𑐵 𑐫𑐵𑐫𑐾𑐐𑐸𑐮𑐶𑐂 𑐫𑑀𑐐𑐡𑐵𑐣 𑐧𑐶𑐄𑐐𑐸 𑐢𑐵𑐳𑐾𑑄 𑐖𑐣𑐐𑐵𑐫𑐎 𑐬𑐵𑐩𑐎𑐺𑐲𑑂𑐞 𑐡𑐸𑐰𑐵𑐮, 𑐬𑐵𑐩𑐾𑐱, 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐥𑐵𑐮𑑄 𑐩𑑂𑐫𑐾𑑃𑐫𑑂 𑐳𑑄𑐐𑐷𑐟 𑐟𑐫𑐵𑐡𑐷𑐩𑑂𑐴 𑐩𑐣𑐬𑐵𑐖𑐵 𑐣𑐎𑑅𑐩𑐶 𑐰 𑐩𑑂𑐫𑐾𑑃 𑐴𑐵𑐮𑐵𑐩𑐶 𑐥𑐰𑐶𑐟𑑂𑐬 𑐎𑐳𑐵𑑅𑐫𑐵𑐟 𑐳𑐩𑑂𑐩𑐵𑐣 𑐫𑐵𑑅𑐐𑐸 𑐏𑑅 𑑋

𑐀𑐠𑐾 𑐴𑐾 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑑅𑐫𑐵 𑐮𑑀𑐎𑐳𑑄𑐐𑐷𑐟𑐫𑐵 𑐧𑐵𑐬𑐾 𑐠𑐷𑐠𑐷 𑐥𑐟𑑂𑐬𑐥𑐟𑑂𑐬𑐶𑐎𑐵𑐫𑑂 𑐥𑐶𑐴𑐵𑑄 𑐰𑑅𑐐𑐸 𑐳𑐩𑐵𑐔𑐵𑐬𑐫𑐵𑐟 𑐎𑐫𑐵𑑅 𑐧𑑂𑐰𑑃𑐩𑐶𑐥𑐶𑐣𑐶𑐐𑐸 𑐩𑐶𑐏𑐵𑐫𑑂 𑐄𑐟𑑂𑐎𑐺𑐲𑑂𑐚𑐟𑐵𑐫𑐵 𑐁𑐢𑐵𑐬𑐫𑑂 𑐕𑐣𑑁𑐚 𑐫𑐵𑐫𑐾𑐐𑐸 𑐣𑐵𑐥𑑄 𑐀𑐖𑑂𑐫𑐵𑑅𑐐𑐸 𑐮𑑀𑐎𑐳𑑄𑐐𑐷𑐟 𑐳𑐩𑑂𑐧𑐣𑑂𑐢𑐷 𑐧𑐸𑐏𑑃, 𑐔𑑂𑐰𑐳𑐸 𑐰 𑐎𑐶𑐥𑐵𑐫𑐵 𑐣𑑄 𑐧𑑂𑐰𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐄𑐎𑐠𑑄 𑐥𑐟𑑂𑐬𑐶𑐎𑐵𑐫𑑂 𑐥𑐶𑐴𑐵𑑄 𑐰𑑅𑐐𑐸 𑐳𑐩𑐵𑐔𑐵𑐬𑐫𑐵𑐟 𑐖𑑂𑐫𑐵𑐗𑑂𑐰𑐮𑐫𑑂 𑐰𑑅𑐥𑐶𑐣𑐶𑐥𑐵𑐏𑐾𑑄 𑐄𑐟𑑂𑐎𑐺𑐲𑑂𑐚 𑐖𑐹𑐐𑐸 𑐳𑐩𑐵𑐔𑐵𑐬𑐫𑐵𑐟 𑐮𑐶𑐥𑐵 𑐴𑐵𑐎𑐣𑑄 𑐰𑐶𑐱𑐾𑐲 𑐩𑐹𑐮𑑂𑐫𑐵𑑄𑐎𑐣 𑐫𑐵𑐣𑐵𑑅 𑐫𑐵𑐎𑐣𑑄 𑐴𑐾 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐴𑐣𑐾𑐐𑐸 𑐐𑐞𑐾𑐱𑐬𑐵𑐩 𑐮𑐵𑐕𑐶𑑄 𑐎𑐣𑐵𑐡𑐷𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS