Read news in NepalBhasa text-- www.hamroschool.com BACK 𑐨𑐵𑐫𑑂 𑐩𑐠𑐸𑐫𑐵𑑅 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣 𑐀𑐳𑐦𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐨𑐵𑐫𑑂 𑐩𑐠𑐸𑐫𑐵𑑅 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣 𑐀𑐳𑐦𑐮

𑐫𑐾𑑃 – 𑐖𑐸𑐩𑑂𑐮𑐵𑐫𑑂 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐮𑑂𑐴𑐵𑐂𑐐𑐸 𑐨𑐵𑐳𑑄 𑐏𑑃 𑐠𑐸𑐂𑐎𑐾 𑐩𑐦𑐫𑐵𑑅 𑐳𑐬𑐎𑐵𑐬𑑄 𑐀𑐣 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣𑐫𑐵 𑐖𑑂𑐫𑐵𑐗𑑂𑐰𑑅 𑐀𑐳𑐦𑐮 𑐖𑐹𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐀𑐣 𑐳𑑂𑐠𑐵𑐣𑐷𑐫 𑐖𑐣𑐟𑐵𑐫𑐵𑐟 𑐄𑐩𑐶𑐳𑑄 𑐴𑐾 𑐠𑐸𑐂𑐐𑐸 𑐨𑐵𑐳𑑄 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣𑐫𑐵 𑐠𑐷𑐠𑐷 𑐳𑐵𑐢𑐣 𑐰 𑐖𑑂𑐫𑐵𑐗𑑂𑐰𑑅 𑐧𑐵𑐬𑐾 𑐠𑐸𑐂𑐎𑐾 𑐩𑐦𑐸𑐐𑐸 𑐎𑐵𑐬𑐞𑑄 𑐫𑐵𑐣𑐵𑑅 𑐀𑐣 𑐧𑐣𑑂𑐢𑑂𑐫𑐵𑐎𑐬𑐞 (𑐨𑑂𑐫𑐵𑐳𑐾𑐎𑑂𑐚𑑀𑐩𑐷) 𑐫𑐵𑐎𑐾𑐐𑐸 𑐮𑐵𑐐𑐶𑑄 𑐩𑐣𑐹𑐟 𑐩𑐰𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐨𑑂𑐫𑐵𑐳𑐾𑐎𑑂𑐚𑑀𑐩𑐷 𑐫𑐵𑐟 𑐢𑐵𑑅𑐳𑐵 𑐱𑐬𑐷𑐬 ‘𑐳𑑂𑐫𑐣𑐷’ 𑐢𑐂𑐐𑐸 𑐀𑐣𑑂𑐢𑐰𑐶𑐱𑑂𑐰𑐵𑐳𑑄 𑐫𑐵𑐣𑐵𑑅 𑐩𑐶𑐖𑑄𑐟 𑐕𑐩𑑂𑐴 𑐴𑐾 𑐩𑐰𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐏𑐵𑐳 𑐫𑐵𑐣𑐵𑑅 𑐥𑐸𑐖𑐵𑐥𑐵𑐛 𑐫𑐵𑐫𑐾𑐩𑐵𑑅𑐥𑐶𑑄 𑐳𑑂𑐠𑐵𑐣𑐷𑐫 𑐮𑐵𑐩𑐵𑐟 𑐱𑐬𑐷𑐬𑐫𑐵 𑐕𑐸𑑄 𑐣𑑄 ‘𑐀𑑄𑐐 𑐳𑑂𑐫𑐣’ 𑐢𑐵𑑅𑐳𑐵 𑐥𑐸𑐖𑐵𑐥𑐵𑐛 𑐠𑐾𑑄𑐖𑑂𑐫𑐵𑑅𑐐𑐸 𑐥𑐰𑐶𑐟𑑂𑐬 𑐖𑑂𑐫𑐵 𑐫𑐵𑐫𑐾𑐟 𑐮𑐵𑐫𑐎 𑐖𑐸𑐂 𑐩𑐏𑐸 𑐢𑐂𑐐𑐸 𑐀𑐣𑑂𑐢𑐰𑐶𑐱𑑂𑐰𑐵𑐳𑑄 𑐫𑐵𑐣𑐵𑑅 𑐨𑑂𑐫𑐵𑐳𑐾𑐎𑑂𑐚𑑀𑐩𑐷 𑐫𑐵𑐫𑐾𑐟 𑐳𑐸𑑄 𑐴𑐾 𑐩𑐰𑑅𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋

𑐟𑐬 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑐰 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐷𑐟𑐫𑑂𑐳𑑄 𑐢𑐵𑑅𑐳𑐵 𑐄𑐩𑐶𑐟 𑐄𑐩𑐶𑐳𑑄 𑐴𑐾 𑐠𑐸𑐂𑐐𑐸 𑐨𑐵𑐳𑑄 𑐠𑐸𑐎𑐶𑐫𑐵 𑐧𑐵𑐬𑐾 𑐎𑐣𑐾 𑐩𑐦𑐸𑐐𑐸 𑐎𑐵𑐬𑐞𑑄 𑐳𑑂𑐠𑐵𑐣𑐷𑐫 𑐩𑐶𑐖𑑄𑐟 𑐨𑑂𑐫𑐵𑐳𑐾𑐎𑑂𑐚𑑀𑐩𑐷 𑐫𑐵𑐫𑐾𑐟 𑐩𑐰𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐨𑑂𑐫𑐵𑐳𑐾𑐎𑑂𑐚𑑀𑐩𑐷 𑐫𑐵𑐣𑐵𑑅 𑐱𑐬𑐷𑐬𑐫𑐵 𑐕𑐸𑑄 𑐴𑐾 𑐀𑑄𑐐 𑐳𑑂𑐫𑐣𑐷 𑐩𑐏𑐸 𑐢𑐂𑐐𑐸 𑐏𑑃 𑐄𑐩𑐶𑐟 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐷𑐟𑐫𑑂𑐳𑑄 𑐠𑐸𑐂𑐎𑐾 𑐩𑐦𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋 𑐨𑑂𑐫𑐵𑐳𑐾𑐎𑑂𑐚𑑀𑐩𑐷 𑐫𑐵𑐟 𑐢𑐵𑑅𑐳𑐵 𑐱𑐬𑐷𑐬𑐫𑐵 ‘𑐀𑑄𑐐 𑐳𑑂𑐫𑐣𑐷𑐐𑐸’ 𑐰 𑐠𑐸𑐎𑐶𑑄 𑐫𑐵𑐣𑐵𑑅 𑐮𑐵𑐩𑐵 𑐖𑑂𑐫𑐵 𑐫𑐵𑐫𑐾 𑐖𑐷 𑐩𑐏𑐸 𑐢𑐂𑐐𑐸 𑐀𑐣𑑂𑐢𑐰𑐶𑐱𑑂𑐰𑐵𑐳 𑐄𑐩𑐶𑐎𑐾 𑐡𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋

𑐀𑐠𑐾 𑐏𑑅𑐳𑐵𑑄 𑐳𑑂𑐠𑐵𑐣𑐷𑐫 𑐕𑐸𑑄 𑐩𑐶𑐳𑐵𑐟 𑐢𑐵𑑅𑐳𑐵 𑐳𑑂𑐠𑐵𑐫𑐷 𑐧𑐣𑑂𑐢𑑂𑐫𑐵𑐎𑐬𑐞𑐫𑐵 𑐮𑐵𑐐𑐶𑑄 𑐰𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐟𑐬 𑐄𑐥𑐶𑑄 𑐣𑑄 𑐐𑐸𑐮𑐶 𑐩𑐵𑐟𑑂𑐬𑐵𑐫𑑂 𑐰𑐫𑐾 𑐩𑐵𑑅𑐐𑐸 𑐏𑑅 𑐄𑐮𑐶 𑐩𑐰𑑅𑐐𑐸 𑐏𑑃 𑐳𑑂𑐰𑐵𑐳𑑂𑐠𑑂𑐫𑐎𑐬𑑂𑐩𑐷𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐩𑐶𑐖𑑄𑐟 𑐢𑐵𑑅𑐳𑐵 𑐁𑑅 𑐟𑐎 𑐕𑐩𑑂𑐴 𑐴𑐾 𑐰𑑅𑐐𑐸 𑐩𑐡𑐸𑐣𑐶 𑑋

𑐨𑐵𑐲𑐵𑐫𑐵 𑐴𑐾 𑐳𑐩𑐳𑑂𑐫𑐵𑑄 𑐫𑐵𑐣𑐵𑑅 𑐥𑐬𑐶𑐰𑐵𑐬 𑐣𑐶𑐫𑑀𑐖𑐣𑐫𑐵 𑐎𑐵𑐬𑑂𑐫𑐎𑑂𑐬𑐩 𑐧𑐵𑑄𑐮𑐵𑐎 𑐳𑐘𑑂𑐔𑐵𑐮𑐣 𑐫𑐵𑐫𑐾 𑐩𑐦𑐫𑐵𑐔𑑂𑐰𑑄𑐐𑐸 𑐏𑑅𑐳𑐵𑑄 𑐄𑐏𑐾𑐥𑐵𑐏𑐾 𑐢𑐵𑑅𑐳𑐵 𑐕𑐸𑑄 𑐣𑑄 𑐣𑐶𑐎𑐵𑐫𑑄 𑐢𑑂𑐫𑐵𑐣 𑐩𑐧𑐶𑐄𑐐𑐸 𑐏𑑃 𑐣𑑄 𑐢𑐵𑑅𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS